Tšea Karolo ka Botlalo Punong e Kgolo ya Moya

‘E-ba le go gontši mo o go dirago modirong wa Morena.’—1 BAKOR. 15:58.

1. Jesu o ile a laletša barutiwa ba gagwe go dira’ng?

BOFELONG bja 30 C.E. ge Jesu a be a le leetong gomme a phatša tikologo ya Samaria, o ile a khutša sedibeng kgaufsi le motse wa Sikara. Ge a le moo, o ile a botša barutiwa ba gagwe gore: “Emišang mahlo le bone mašemo gore a šweufaletše go bunwa.” (Joh. 4:35) Jesu o be a sa bolele ka puno ya kgonthe, eupša o be a bolela ka go kgoboketšwa ka tsela ya moya ga batho ba dipelo tše di lokilego bao e bego e tla ba balatedi ba gagwe. Ge e le gabotse, o be a ba kgothaletša gore ba gate mogato o itšego. Go be go e-na le modiro o montši wo o bego o swanetše go phethwa gomme nako ya go o phetha e be e le e nyenyane!

2, 3. (a) Ke’ng seo se bontšhago gore re phela mehleng ya puno? (b) Ke’ng seo se tlago go ahla-ahlwa sehlogong se?

² Seo Jesu a se boletšego mabapi le puno ke sa bohlokwa kudu mehleng ya rena. Re phela mehleng yeo lefase la batho le ‘šweufaletšego go bunwa.’ Ngwaga le ngwaga, batho ba dimilione ba laletšwa gore ba tle ba hwetše therešo yeo e neago bophelo gomme go kolobetšwa barutiwa ba bafsa ba dikete tše dintši. Re na le tokelo ya go tšea karolo punong e kgolo go feta tšohle, re hlahlwa ke Mong wa puno, Jehofa Modimo. Na o na le ‘go gontši mo o ka go dirago’ modirong wo wa puno?—1 Bakor. 15:58.

³ Nywageng e meraro le seripa ya bodiredi bja gagwe bja lefaseng, Jesu o ile a hlama barutiwa ba gagwe bakeng sa go ba babuni. Sehlogo se se tla ahla-ahla dithuto tše tharo tša bohlokwa go tše dintši tšeo Jesu a di rutilego barutiwa ba gagwe. Thuto e nngwe le e nngwe e gatelela seka seo go lego bohlokwa kudu gore re be le sona ge re dutše re katanela go dira sohle seo re ka se kgonago modirong wa mehleng yeno wa go kgoboketša barutiwa. A re hlahlobeng dika tše ka se tee ka se tee.

Boikokobetšo bo Bohlokwa

4. Jesu o bontšhitše bjang bohlokwa bja boikokobetšo?

⁴ Anke o nagane ka se: Barutiwa ba sa tšwa go ngangišana ka taba ya gore ke mang yo mogolo go bona. Mohlomongwe ba sa dutše ba bonagala ba sa botane e bile ba sa selekegile. Ke moka Jesu o bitša ngwana yo monyenyane gomme a mo emiša gare ga bona. A lebišitše tlhokomelo ngwaneng yoo yo monyenyane, o re: “Mang le mang yo a tlago go ikokobetša [goba, “mang le mang yo a itirago yo monyenyane,” Byington] go swana le ngwana yo yo monyenyane, ke yena yo mogolo kudu mmušong wa magodimo.” (Bala Mateo 18:1-4.) Go e na le go nagana bjalo ka lefase, leo le tšeago motho a le bohlokwa go ithekgile ka matla a gagwe, lehumo goba maemo, barutiwa ba be ba swanetše go kwešiša gore go ba ga bona ba bagolo go be go ithekgile ka go ‘itira ba banyenyane’ mahlong a ba bangwe. Jehofa o be a tla ba šegofatša le go ba diriša ge feela ba be ba bontšha boikokobetšo bja kgonthe.

5, 6. Ke ka baka la’ng o swanetše go ikokobetša gore o tšee karolo ka botlalo modirong wa puno? Bontšha.

⁵ Go ba go fihla lehono, batho ba bantši lefaseng ba neela maphelo a bona go tsomeng matla, lehumo le maemo. Ka baka leo, ba ba le nako e nyenyane goba ga ba be le nako ka mo go feletšego ya dilo tša moya. (Mat. 13:22) Ka mo go fapanego, batho ba Jehofa ba thabela go ‘itira ba banyenyane’ pele ga ba bangwe gore ba šegofatšwe le go amogelwa ke Mong wa puno.—Mat. 6:24; 2 Bakor. 11:7; Bafil. 3:8.

⁶ Ela hloko mohlala wa Francisco, yo a hlankelago  e le mogolo kua Amerika Borwa. Ge e be e sa le lesogana, o ile a tlogela yunibesithi gore a tsenele bobulamadibogo. O gopola gore: “Ge ka morago ke be ke beeletša mosadi yo ke bego ke tla mo nyala, nkabe ke ile ka hwetša mošomo wo o bego o tla dira gore nna le mosadi wa-ka re be le tšhelete e ntši. Go e na le moo, re ile ra dira phetho ya go nolofatša maphelo a rena le go tšwela pele gotee tirelong ya nako e tletšego. Ka morago, re ile ra ba le bana gomme ditlhohlo tša oketšega. Eupša Jehofa o re thušitše go kgomarela phetho ya rena.” Francisco o phetha ka gore: “Go tlaleletša dikabelong tše dingwe tše dintši tše di kgethegilego, ke thabetše tokelo ya go hlankela ke le mogolo ka nywaga e fetago e 30. Le ka mohla ga se ra ka ra itsholela go phela maphelo a bonolo.”

7. Wena o lekile bjang go diriša keletšo e hwetšwago go Baroma 12:16?

⁷ Ge o gana “dilo tše phagamego” tša lefase le gomme o dumelela go “[ya] le dilo tše ikokobeditšego,” le wena o ka letela go hwetša ditšhegofatšo tše dintši le ditokelo modirong wa puno.—Baroma 12:16; Mat. 4:19, 20; Luka 18:28-30.

Go ba Mafolofolo go Tliša Meputso

8, 9. (a) Hlalosa ka boripana papišo ya Jesu ya ditalente. (b) Ke bomang bao ka mo go kgethegilego ba ka kgothatšwago ke papišo ye?

⁸ Seka se sengwe seo re swanetšego go ba le sona gore re tšee karolo ka botlalo modirong wa puno ke go ba mafolofolo. Jesu o bontšhitše taba ye papišong ya ditalente. * Papišo ye e bolela ka monna yo a ilego a nea bahlanka ba bararo dilo tša gagwe pele a ka tšea leeto la go ya kgole. Mohlanka wa pele o hweditše ditalente tše hlano gomme wa bobedi a hwetša tše pedi; wa boraro a hwetša talente e tee. Ka morago ga ge mong wa bona a sepetše, bahlanka ba babedi ba mathomo ba ile ba šoma ka thata gomme gatee-tee ba “gweba” ka ditalente tša bona. Eupša mohlanka wa boraro e be e le “sebodu.” O ile a epela talente ya gagwe mmung. Ge mong wa bona a boa, o ile a putsa bahlanka ba babedi ba pele ka go ba bea gore ba “hlokomele dilo tše dintši.” O ile a amoga mohlanka wa boraro talente yeo a bego a mo neile yona gomme a mo raka ngwakong wa gagwe.—Mat. 25:14-30.

⁹ Ga go pelaelo gore le wena o nyaka go ekiša bahlanka ba mafolofolo bao Jesu a boletšego ka bona papišong le go tšea karolo ka botlalo kamoo o ka kgonago ka gona modirong wa go dira barutiwa. Eupša go thwe’ng ge e ba maemo a ka tla a go palediša go dira seo gona bjale o kgonago go se dira? Mohlomongwe maemo a thata a boiphedišo a go gapeletša go šoma diiri tše ditelele gore o hlokomele lapa la gago. Goba mohlomongwe ga o sa na mafolofolo a bofsa e bile ga o sa phela gabotse mmeleng. Ge e ba  go le bjalo, papišo ya ditalente e go swaretše molaetša o kgothatšago.

10. Mong yo go bolelwago ka yena papišong ya ditalente o ile a bontšha teka-tekano bjang, gona se se go kgothatša ka tsela efe?

¹⁰ Ela hloko gore mong yo go bolelwago ka yena papišong ye o ile a lemoga gore bahlanka ba gagwe ba na le bokgoni ka ditsela tše di sa swanego. O bontšhitše se ge a be a aba ditalente, “yo mongwe le yo mongwe a mo nea go ya ka bokgoni bja gagwe.” (Mat. 25:15) Ka ge go be go letetšwe, mohlanka wa pele o ile a tšweletša kudu go feta mohlanka wa bobedi. Lega go le bjalo, mong o ile a lemoga go ba mafolofolo ga bahlanka ba ka bobedi ka go bolela ka bona e le ‘bahlanka ba babotse le bao ba botegago’ gomme a ba putsa ka mo go swanetšego. (Mat. 25:21, 23) Ka mo go swanago, Mong wa puno, Jehofa Modimo, o a tseba gore maemo a gago a kgoma tsela yeo o tšeago karolo ka yona tirelong ya gagwe. A ka se palelwe ke go lemoga maiteko ao o a dirago ka moya ka moka a go mo hlankela gomme o tla go putsa ka mo go swanetšego.—Mar. 14:3-9; bala Luka 21:1-4.

11. Bontšha kamoo go ba mafolofolo maemong a thata go ka feleletšago ka ditšhegofatšo tše dintši.

¹¹ Mohlala wa Selmira, kgaetšedi wa Mokriste yo a dulago kua Brazil, o bontšha gore go ba mafolofolo tirelong ya Modimo ga se gwa ithekga ka gore dilo di re sepelele gabotse bophelong. Nywageng e 20 e fetilego, monna wa Selmira o ile a bolawa ka sethunya nakong ya ge dikebekwa di be di hula dilo tša bona gomme a mo tlogela le barwedi ba bararo bao a bego a swanetše go ba godiša. Ka dinako tše dingwe mošomo wa gagwe wa go ba mohlwekiši wa ntlo o be o dira gore a šome diiri tše ditelele le go sepela maeto a lapišago ka dikoloi tše di rwelego merwalo ditoropong. Go sa šetšwe mathata a, o ile a beakanya maemo a gagwe gore a hlankele e le mmulamadibogo wa ka mehla. Ka morago, barwedi ba gagwe ba babedi ba ile ba mo tlatša tirelong ya bobulamadibogo. O laodiša ka gore: “Go theoša le nywaga, ke ithutile Beibele le batho ba fetago 20 gomme ba bile ditho tša lapa leo nka rego ke lešo. Le lehono ke sa dutše ke thabela lerato la bona le bogwera bja bona. Ke lehumo leo le ka se rekwego ka tšhelete.” Ruri Mong wa puno o putsitše go šoma ka mafolofolo ga Selmira!

12. Re ka bontšha mafolofolo bjang modirong wa boboledi?

¹² Ge e ba maemo a gago a gona bjale a lekanyetša nako yeo o nyakago go e fetša bodireding, o sa dutše o ka leka go oketša go tšea ga gago karolo modirong wa puno ka go dira gore bodiredi bja gago bo tšweletše kudu. Ge o diriša ka kelohloko ditšhišinyo tše di tšweletšwago beke le beke Sebokeng sa Tirelo, o tla loutša bokgoni bja gago bja go dira boboledi gomme wa hwetša dibaka tše difsa tša go nea bohlatse. (2 Tim. 2:15) Le gona, ge e ba go kgonega, o ka dira lenaneo le lefsa goba wa gafa mediro yeo e sego bohlokwa gore o kgone go thekga dithulaganyo tša tirelo ya tšhemo tša phuthego.—Bakol. 4:5.

13. Ke’ng seo se lego bohlokwa tabeng ya go hlagolela le go kgomarela moya wa go ba mafolofolo?

¹³ Dula o gopola gore go ba mafolofolo go tšweletšwa ke pelo e nago le tebogo. (Ps. 40:8) Mohlanka wa boraro yo go boletšwego ka yena papišong ya Jesu o be a boifa mong wa gagwe, a mo lebelela e le yo a nyakago dilo ka šiši le yo a se nago teka-tekano. Ka baka leo, mohlanka yo o ile a epela talente ya gagwe go e na le go e dirišetša go oketša dilo tša mong wa gagwe. Re swanetše go hlagolela le go kgomarela tswalano e botse le Mong wa puno, Jehofa, gore re pheme boemo bjo bjalo bja kgopolo bja go hlokomologa dilo. Beela nako ka thoko bakeng sa go ithuta le go naganišiša ka dika tša gagwe tše di kgahlišago—lerato la gagwe, go se fele pelo le kgaugelo. Ka tsela yeo, pelo ya gago e tla tutueletšega go dira sohle seo o ka se kgonago tirelong ya gagwe.—Luka 6:45; Bafil. 1:9-11.

‘E-ba yo Mokgethwa’

14. Bao ba nyakago go ba babuni ba swanetše go fihlelela senyakwa sefe sa bohlokwa?

¹⁴ Ge a tsopola Mangwalo a Seheberu, moapostola Petro o bolela kganyogo yeo Modimo a nago le yona ka bahlanka ba gagwe ba lefaseng, ge a re: “Ka go dumelelana le Mokgethwa yo a le  biditšego, le lena le be ba bakgethwa boitshwarong bja lena ka moka, gobane go ngwadilwe gwa thwe: ‘E-bang ba bakgethwa, gobane ke yo mokgethwa.’” (1 Pet. 1:15, 16; Lef. 19:2; Doit. 18:13) Mantšu a a bontšha gore babuni ba swanetše go hlweka boitshwarong le moyeng. Re ka fihlelela senyakwa seo sa bohlokwa ka go gata megato ya gore re hlwekišwe ka tsela ya seswantšhetšo. Seo se ka dirwa bjang? Se ka dirwa ka thušo ya lentšu la Modimo la therešo.

15. Therešo ya lentšu la Modimo e na le matla a go direla’ng?

¹⁵ Lentšu la Modimo la therešo le swantšhwa le meetse ao a hlwekišago. Ka mohlala, moapostola Paulo o ngwadile gore phuthego ya Bakriste ba ba tloditšwego e hlwekile pele ga Modimo, bjalo ka monyadiwa yo a sekilego wa Kriste, yo a e hlwekišitšego a “e hlatswa ka meetse ka lentšu, . . . gore e be e kgethwa gomme e hloke bosodi.” (Baef. 5:25-27) Pejana, Jesu le yena o ile a bolela ka matla a hlwekišago a lentšu la Modimo leo a le tsebaditšego. Ge a bolela le barutiwa ba gagwe, Jesu o itše: “Lena le šetše le thenetšwe ka baka la lentšu leo ke le boditšego lona.” (Joh. 15:3) Ka gona, therešo ya lentšu la Modimo e na le matla a go hlwekiša boitshwarong le moyeng. Ke feela ge re dumelela therešo ya Modimo go re hlwekiša ka tsela ye moo borapedi bja rena bo tla amogelegago go yena.

16. Ke bjang re ka ipolokago re hlwekile moyeng le boitshwarong?

¹⁶ Ka gona, e le gore re be bašomi punong ya Modimo, re thoma ka go lahla mekgwa e šilafatšago maphelo a rena boitshwarong le moyeng. Ee, re swanetše go bea mohlala o mobotse tabeng ya go thekga ditekanyetšo tša Jehofa tše di phagamego tša boitshwaro le tša moya gore re tšwele pele re swanelegela tokelo ya go ba babuni. (Bala 1 Petro 1:14-16.) Bjalo ka ge re dula re hlokomela bohlweki bja rena bja mmele, re swanetše go tšwela pele re amogela tshekego ya lentšu la Modimo la therešo. Se se akaretša go bala Beibele le go ba gona dibokeng tša Bokriste. E bile se bolela go dira maiteko a tseneletšego a go diriša dikgopotšo tša Modimo maphelong a rena. Go dira bjalo go tla re thuša go fenya ditshekamelo tša rena tša sebe le go lwantšha ditutuetšo tše di šilafatšago tša lefase le. (Ps. 119:9; Jak. 1:21-25) Ee, ruri go a homotša go tseba gore ka thušo ya lentšu la Modimo la therešo, re ka ‘hlatswa ra hlweka’ gaešita le dibeng tše dikgolo!—1 Bakor. 6:9-11.

17. Re swanetše go kwa keletšo efe ya Beibele gore re dule re hlwekile?

¹⁷ Na o dumelela lentšu la Modimo la therešo go hlwekiša bophelo bja gago? Ka mohlala, o arabela bjang ge o lemošwa ka dikotsi tša boithabišo bjo bo gobogilego bja lefase le? (Ps. 101:3) Na o phema segwera se se sa nyakegego le bao o tsenago le bona sekolo goba bao o šomago le bona bao e sego badumedi-gotee le wena? (1 Bakor. 15:33) Na o dira boiteko bjo bo tiilego bja go fenya mafokodi ao a ka go šilafatšago pele ga Jehofa? (Bakol. 3:5) Na o ikarola dingangišanong tša tša dipolitiki tša lefase le gotee le moya wa borata-naga wo o kgomago dipapadi tše dintši tša phadišano?—Jak. 4:4.

18. Go hlweka boitshwarong le moyeng go ka re thuša bjang gore re be babuni bao ba tšweletšago?

¹⁸ Go kwa ka potego ditabeng tše bjalo go tla ba le mafelelo a mabotse. Ge Jesu a be a bapiša barutiwa ba gagwe ba tloditšwego le makala a morara, o itše: “Lekala le lengwe le le lengwe le le lego go nna leo le sa enywego dienywa [Tate] o a le tloša, gomme le lengwe le le lengwe leo le enywago dienywa o a le thenela gore le enywe dienywa tše dintši.” (Joh. 15:2) Ge o dutše o  dumelela meetse a therešo ya Beibele gore a go hlwekiše, o tla tšweletša dienywa tše dintši kudu.

Ditšhegofatšo tša Gona Bjale le tša Nakong e Tlago

19. Barutiwa ba Jesu ba ile ba šegofatšwa bjang maitekong a bona bjalo ka babuni?

¹⁹ Barutiwa ba ba botegago bao ba ilego ba diriša tlwaetšo ya Jesu ka morago ba ile ba matlafatšwa ke moya o mokgethwa ka Pentekoste ya 33 C.E. gore e be dihlatse “go fihla karolong ya kgole ya lefase.” (Dit. 1:8) Ba ile ba hlankela e le ditho tša sehlopha se bušago, e le baromiwa, e le bagolo ba basepedi gomme ba kgathile tema e bohlokwa go boleleng ditaba tše dibotse “tlholong yohle yeo e lego tlase ga legodimo.” (Bakol. 1:23) Ruri ba ile ba hwetša ditšhegofatšo le gona ba ile ba thabiša ba bangwe!

20. (a) Ke ditšhegofatšo dife tšeo o di hweditšego ka go tšea karolo ka botlalo punong ya moya? (b) O ikemišeditše go dira’ng?

²⁰ Ee, ka go bontšha boikokobetšo, ka go ba mafolofolo le ka go thekga ditekanyetšo tše di phagamego tša Lentšu la Modimo, re tla tšwela pele re thabela go tšea karolo ka botlalo le ka tsela e nago le morero punong e kgolo ya moya yeo e tšwelago pele gona bjale. Gaešita le ge ba bantši ba lebeletšana le bohloko le kgakanego tšeo di sepedišanago le go rata dilo tše di bonagalago tša lefase le gotee le go tsoma maipshino a lona, rena re ba le lethabo la kgonthe le kgotsofalo. (Ps. 126:6) Sa bohlokwa kudu, “boitapišo bja [rena] ga se bja lefeela Moreneng.” (1 Bakor. 15:58) Mong wa puno, Jehofa Modimo, o tla re putsa ka mo go sa felego ka ‘modiro wa rena le lerato leo re le bontšhitšego leineng la gagwe.’—Baheb. 6:10-12.

[Mongwalo wa tlase]

Na o a Gopola?

Ge o dutše o katanela go tšea karolo ka botlalo modirong wa puno . . .

• ke ka baka la’ng go le bohlokwa go bontšha boikokobetšo?

• ke bjang o ka hlagolelago le go kgomarela moya wa go ba mafolofolo?

• ke ka baka la’ng go le bohlokwa go dula o hlwekile boitshwarong le moyeng?

[Dipotšišo tša Thuto]

[Seswantšho go letlakala 17]

Boikokobetšo bo ka re thuša go phela maphelo a bonolo ao a sepedišanago le dikgahlego tša Mmušo