Kamoo Topollo e re Phološago ka Gona
Kamoo Topollo e re Phološago ka Gona
“Yo a dumelago go Morwa o na le bophelo bjo bo sa felego; yo a sa kwego Morwa a ka se ke a bona bophelo, eupša kgalefo ya Modimo e dula e le go yena.”—JOH. 3:36.
1, 2. Le lengwe la mabaka ao a dirilego gore go thome go gatišwa Zion’s Watch Tower e be e le lefe?
TOKOLLO ya bone ya makasine wo e boletše morago kua ka October 1879 gore “ga go na morutwana yo a balago Beibele ka kelohloko yo a ka palelwago ke go bona gore lehu la Kriste le bohlokwa.” Sehlogo seo se phethile ka mantšu a bohlokwa a rego: “Anke re phafogeleng selo le ge e le sefe seo se nyatšago, goba se phaelago ka thoko lehu la Kriste, ka ge e le sehlabelo le poelanyo ya dibe.”—Bala 1 Johane 2:1, 2.
2 Le lengwe la mabaka ao a dirilego gore Zion’s Watch Tower e thome go gatišwa ka July 1879 e be e le go emela thuto ya Beibele ya mabapi le topollo. Dikagare tša yona di be di nea ‘dijo ka nako e swanetšego,’ ka gobane mafelelong a bo-1800, palo e oketšegago ya bao ba ipolelago gore ke bona Bakriste e ile ya thoma go belaela gore lehu la Jesu le ka ba topollo ya dibe tša rena. (Mat. 24:45) Ka nako yeo, ba bantši ba ile ba thoma go dumela thuto ya tlhagelelo, e lego kgopolo yeo e thulanago le taba ya gore motho o bile gona mathomong a phethagetše. Bao ba dumelago tlhagelelo ba ruta gore motho ka boyena o a kaonefala gomme ga a hloke topollo. Ke ka baka leo keletšo ya moapostola Paulo yeo e bego e e-ya go Timotheo e lego e swanetšego gakaakaa ge e re: “Hlokomela seo o se gafetšwego, o furalele dipolelo tša lefeela tšeo di senyago se sekgethwa le dikganetšano tšeo ka maaka di bitšwago gore ke ‘tsebo.’ Ka baka la go kgantšha tsebo e bjalo ba bangwe ba fapogile tumelong.”—1 Tim. 6:20, 21.
3. Re tla ahla-ahla dipotšišo dife gona bjale?
3 Go molaleng gore ga o nyake go ‘fapoga tumelong.’ Gore o kgone go dira bjalo, e ka ba mo gobotse go naganišiša ka dipotšišo tše: Ke ka baka la’ng ke hloka topollo? Ke’ng seo se ilego sa nyakega gore e feleletše e bile gona? Nka holwa bjang ke tokišetšo ye e bohlokwa yeo e ka mphološago kgalefong ya Modimo?
Re ka Šireletšwa Bogaleng bja Modimo
4, 5. Ke’ng seo se bontšhago gore Modimo o galefetše tshepedišo ya gona bjale e kgopo ya dilo?
4 Beibele le histori di bontšha gore ga e sa le go tloga mola Adama a welago sebeng, Modimo o ile a ‘galefela’ batho. (Joh. 3:36) Se se bonagala tabeng ya gore ga go na motho yo a ka phemago lehu. Pušo ya Sathane yeo e nago le moya wa phadišano e tloga e paletšwe ke go šireletša batho masetla-pelong ao a tšwelago pele e bile ga go na pušo ya batho yeo e kgonnego go kgotsofatša dinyakwa tša motheo tša batho ba yona ka moka. (1 Joh. 5:19) Ka gona batho ba tšwela pele ba lebeletšana le dintwa, bosenyi le bodiidi.
5 Ka gona, go molaleng gore Jehofa ga a šegofatše tshepedišo ya gona bjale e kgopo ya dilo. Paulo o itše “kgalefo ya Modimo e utollwa go tšwa legodimong kgahlanong le go se boife Modimo ka moka.” (Baroma 1:18-20) Ka baka leo, bao ka go se itshole ba phelago maphelo a go bontšha go se boife Modimo ba tla lebana le ditla-morago tša boitshwaro bja bona. Lehono, kgalefo ya Modimo e tsebatšwa ka melaetša ya kahlolo yeo e welago lefaseng la Sathane bjalo ka dikotlo gomme tsebišo e bjalo e tšwelela dikgatišong tša rena tše dintši tšeo di theilwego Beibeleng.—Kut. 16:1.
6, 7. Ke modiro ofe wo Bakriste bao ba tloditšwego ba o etelelago pele, gona batho bao e lego karolo ya lefase la Sathane ba sa bulegetšwe ke sebaka sefe?
6 Na se se bolela gore batho ba šetše ba šiilwe ke nako ya go kgaogana le pušo ya Sathane le go amogelwa ke Modimo? Aowa, ka gobane sebaka sa go boelana le Jehofa se sa le gona. Bakriste ba tloditšwego, bao e lego “batseta bao ba emetšego Kriste legato” ba etelela pele bodiredi bja phatlalatša moo batho ba laletšwago ka gore: “Boelanang le Modimo.”—2 Bakor. 5:20, 21.
7 Moapostola Paulo o itše Jesu ‘o re hlakodiša kgalefong e tlago.’ (1 Bathes. 1:10) Ponagatšo yeo ya kgalefo ya Jehofa e tla bonagala ge mafelelong go fedišwa badiradibe bao ba sa itsholego. (2 Bathes. 1:6-9) Go tla phologa mang? Beibele e re: “Yo a dumelago go Morwa o na le bophelo bjo bo sa felego; yo a sa kwego Morwa a ka se ke a bona bophelo, eupša kgalefo ya Modimo e dula e le go yena.” (Joh. 3:36) Ee, bohle bao ba phelago gomme ba bontšha tumelo go Jesu le topollong ge tshepedišo ye e dutše e batamela bofelo, ba tla phologa ditla-morago tša kgalefo ya Modimo ya letšatšing la mafelelo.
Kamoo Topollo e Šomago ka Gona
8. (a) Ke tebelelo efe e kgolo yeo Adama le Efa ba bego ba e-na le yona? (b) Jehofa o itlhatsetše e le Modimo wa toka e phethagetšego ka tsela efe?
8 Adama le Efa ba bopilwe ba phethagetše. Ge nkabe ba ile ba dula ba e-kwa Modimo, lefase le be le tla ba le tletše ka ditlogolo tša bona tše di thabilego tšeo di phelago gotee le bona Paradeiseng. Lega go le bjalo, batswadi ba rena ba pele ba ile ba se kwe taelo ya Modimo ka boomo. Ka baka leo, ba ile ba ahlolelwa lehu la sa ruri gomme ba rakwa Paradeiseng ya mathomo. Ge Adama le Efa ba be ba belega bana, sebe se be se šetše se tsene bathong gomme monna yo le mosadi ba pele ba ile ba tšofala gomme mafelelong ba hwa. Se se bontšha gore Jehofa o phethagatša seo a se bolelago. Go oketša moo, ke Modimo wa toka e phethagetšego. Jehofa o be a lemošitše Adama gore o tla hwa ge a ka ja seenywa se se ileditšwego—gomme o ile a hwa.
9, 10. (a) Ke ka baka la’ng ditlogolo tša Adama di e-hwa? (b) Re ka phema bjang lehu la sa ruri?
9 Bjalo ka ditlogolo tša Adama, re abetše mmele wo o sa phethagalago wo o nago le sebe seo se feleletšago ka lehu. Ge Adama a be a dira sebe, le rena re ile ra ba badiradibe le ge re be re se ra hlwa re belegwa bjalo ka ditlogolo tša gagwe. Ka gona kahlolo ya lehu e ile ya akaretša le rena. Ge Jehofa a be a ka dira gore batho ba se sa hlwa ba e-hwa ntle le gore go dirwe sehlabelo, o be a tla ba a boletše maaka. Ge e le gabotse, Paulo o be a bolela ka rena ka moka ge a re: “Gobane re tseba gore Molao ke wa moya; eupša nna ke wa nama, ke rekišitšwe tlase ga sebe. Ke motho yo a hlomolago pelo gakaakang! Ke mang yo a tlago go ntlhakodiša mmeleng wo o hwago lehu le?”—Baroma 7:14, 24.
10 Ke Jehofa Modimo feela yo a ka tšweletšago molao wa kamoo a ka re lebalelago dibe ka bolokologi gomme a re lokolla kotlong ya lehu la sa ruri. O dirile se ka go romela Morwa wa gagwe yo a rategago go tšwa legodimong gore a belegwe e le motho yo a phethagetšego, yoo a bego a ka re gafela bophelo bja gagwe e le sehlabelo. Ka go se swane le Adama, Jesu o ile a dula a phethagetše. Ge e le gabotse, “ga se a ka a dira sebe.” (1 Pet. 2:22) Ka gona, Jesu o be a swanelega go ka tšweletša moloko wa batho wo o phethagetšego. Lega go le bjalo, o ile a dumelela manaba a Modimo gore a mmolaye gore a thuše ditlogolo tša Adama le go dira gore bao ba bontšhago tumelo go yena ba hwetše bophelo bjo bo sa felego. Mangwalo a hlalosa ka gore: “Go na le Modimo o tee le mmoelanyi o tee magareng ga Modimo le batho, motho, Kriste Jesu, yo a ikgafilego ya ba topollo e lekanago bakeng sa bohle.”—1 Tim. 2:5, 6.
11. (a) Mehola ya topollo e ka swantšhwa ka tsela efe? (b) Mehola ya topollo ke e megolo gakaaka’ng?
11 Tsela yeo sehlabelo se šomago ka yona e ka swantšhwa le boemo bja batho bao ba lahlegetšwego ke ditšhelete tša bona pankeng yeo e tletšego bofora yeo e wetšego sekolotong se segolo. Beng ba panka ba a golegwa gomme ba ahlolelwa nywaga e mentši kgolegong. Eupša go thwe’ng ka batho bao ba bego ba bolokile ditšhelete tša bona pankeng yeo? Ka ge ga bjale ba diila, ga ba kgone go fetoša boemo bjo ba lego go bjona ka ntle le ge monna yo botho yo a humilego a ka tšea panka ye gomme a bušetša batho ka moka ditšhelete tša bona, a ba imolla dikolotong tša bona. Ka tsela e swanago, Jehofa Modimo le Morwa wa gagwe yo a rategago ba rekolotše ditlogolo tša Adama gomme ba phumola molato wa sebe motheong wa madi a Jesu a tšholotšwego. Se ke sona se dirilego gore Johane Mokolobetši a bolele ka Jesu gore: “Bonang, Kwana ya Modimo e tlošago sebe sa lefase!” (Joh. 1:29) Lefase leo sebe sa lona se tlošwago le akaretša bao ba phelago le bao ba hwilego.
Seo se Ilego sa Nyakega Gore go be le Topollo
12, 13. Re ka ithuta’ng boikemišetšong bja Aborahama bja go gafa Isaka?
12 Ga go kgonege gore re kwešiše ka botlalo seo Tatago rena wa legodimong le Morwa wa gagwe yo a rategago ba ilego ba lahlegelwa ke sona gore go be le topollo. Eupša Beibele e re anegela diphihlelo tšeo di ka re thušago go kwešiša se. Ka mohlala, akanya kamoo Aborahama a swanetšego go ba a ile a ikwa ka gona ge a be a sepela leeto la matšatši a mararo go ya Moria ka baka la go kwa taelo ya Modimo e rego: “Tšea morwa wa xaxo e lexo o tee, yo O mo rataxo, yêna Isaka, O yê naxeng ya Moriya; xôna-moo O mo dirê sehlabêlô thabeng ya xôna, ye ke tl’o xo Xo laetša yôna.”—Gen. 22:2-4.
13 Mafelelong Aborahama o ile a fihla moo a bego a laetšwe go ya gona. O swanetše go ba a ile a thatafalelwa ke go tlema Isaka matsogo le maoto le go mo robatša aletareng yeo Aborahama ka noši a bego a e agile. Ruri Aborahama o kwele bohloko ge a be a emiša thipa go itokišeletša go bolaya morwa wa gagwe! Akanya kamoo Isaka a bego a ikwa ka gona ge a be a robetše aletareng, a letetše go bolawa gabohloko ka thipa e bogale. Morongwa wa Jehofa o ile a thiba Aborahama ka yona nako yeo. Seo Aborahama le Isaka ba se dirilego ka nako yeo se re thuša go kwešiša gore Jehofa o ile a lahlegelwa kudu ge a be a dumelela baemedi ba Sathane go bolaya Morwa wa Gagwe. Tsela yeo Isaka a ilego a itshwara ka yona e swantšhetša gabotse go ikemišetša ga Jesu go tlaišega le go hwa ka baka la rena.—Baheb. 11:17-19.
14. Ke’ng seo se diragetšego bophelong bja Jakobo seo se re thušago go kwešiša tahlegelo yeo e bakilwego ke topollo?
14 Tahlegelo ya topollo e ka swantšhwa gape ke seo se diregilego bophelong bja Jakobo. Jakobo o be a rata Josefa kudu go feta barwa ba gagwe ka moka. Ka maswabi, bomorwarrago Josefa ba ile ba mo hufegela le go mo hloya. Lega go le bjalo, Josefa ga se a ka a gana ge tatagwe a be a mo roma go ya go hlola bomorwarragwe. Ka nako yeo ba be ba le madišong ba diša mohlape wa Jakobo bokgoleng bja dikhilomithara tše lekgolo ka leboa la motse wa gabo bona wa Heburone. Akanya kamoo Jakobo a ilego a ikwa ka gona ge barwa ba gagwe ba boa le kobo ya Josefa e kgamathetše madi! O ile a lla ka gore: “Ké yôna kobô ya ngwan’ake; ó llwe ke sebata; ruri Josefa ó llwe.” Se se ile sa kgoma Jakobo kudu moo a ilego a llela Josefa ka matšatši a mantši. (Gen. 37:33, 34) Jehofa ga a swaragane le maemo go swana le batho bao ba sa phethagalago. Lega go le bjalo, go naganišiša ka seo se diragetšego bophelong bja Jakobo go ka re thuša gore ka tsela e itšego re kwešiše kamoo Modimo a ilego a ikwa ka gona ge Morwa wa gagwe yo a rategago a swarwa gampe gomme a bolawa ga sehlogo ge e be e le motho wa nama.
Go Holwa ke Topollo
15, 16. (a) Jehofa o bontšhitše bjang gore o amogela topollo? (b) Topollo e go hotše bjang?
15 Jehofa Modimo o ile a tsoša Morwa wa gagwe yo a botegago ka mmele wa moya woo o nago le letago. (1 Pet. 3:18) Jesu yo a tsošitšwego o ile a tšwelela go barutiwa ba gagwe ka matšatši a 40, a ba matlafatša tumelong le go ba hlamela modiro o mogolo wa boebangedi woo o bego o letše ka pele. Ke moka o ile a rotogela legodimong. Ge a le moo, o ile a gafela Modimo mohola wa madi a gagwe a tšholotšwego gore a dirišetšwe go hola balatedi ba gagwe ba kgonthe bao ba bontšhago tumelo moholeng wa sehlabelo sa gagwe sa topollo. Jehofa Modimo o ile a bontšha gore o amogela topollo ya Kriste ka go abela Jesu gore a tšhollele moya o mokgethwa go barutiwa ba gagwe bao ba bego ba bokane Jerusalema ka letšatši la Pentekoste ya 33 C.E.—Dit. 2:33.
16 Gatee-tee balatedi bao ba tloditšwego ba Kriste ba ile ba thoma go kgothaletša ba bangwe go phema bogale bja Modimo ka go kolobetšwa leineng la Jesu Kriste gore ba lebalelwe dibe tša bona. (Bala Ditiro 2:38-40.) Go tloga letšatšing leo go ya pele, batho ba dimilione bao ba tšwago ditšhabeng ka moka ba ile ba ba le tswalano le Modimo ka go bontšha tumelo sehlabelong sa Jesu sa topollo. (Joh. 6:44) Bjale re swanetše go ahla-ahla dipotšišo tše dingwe tše pedi: Na go na le motho yo a neilwego kholofelo ya bophelo bjo bo sa felego ka baka la mediro ya gagwe e mebotse? Ge re šetše re e-na le kholofelo ye e kgahlišago, na e ka re lahlegela?
17. Re swanetše go lebelela bjang tšhegofatšo e kgahlišago ya go ba bagwera ba Modimo?
17 Ruri topollo ga e re swanele. Eupša ka go bontšha tumelo go yona, batho ba dimilione lehono ke bagwera ba Modimo gomme ba na le kholofelo ya go phela ka mo go sa felego lefaseng la paradeise. Lega go le bjalo, go ba bagwera ba Jehofa ga se kgonthišetšo ya gore re tla dula re e-na le tswalano le yena. Gore re pheme letšatši le le tlago la kgalefo ya Modimo, re swanetše go dula re bontšha gore re tloga re leboga “topollo yeo e lefilwego ke Kriste Jesu.”—Baroma 3:24; bala Bafilipi 2:12.
Dula o Bontšha Tumelo Topollong
18. Go bontšha tumelo topollong go akaretša’ng?
18 Lengwalo leo sehlogo se se theilwego go lona la Johane 3:36, le bontšha gore go ba le tumelo go Morena Jesu Kriste go akaretša go mo kwa. Go leboga topollo go swanetše go re tutueletša go phela ka go dumelelana le dithuto tša Jesu, go akaretša le seo a se rutilego mabapi le boitshwaro. (Mar. 7:21-23) “Kgalefo ya Modimo e tlela” bohle bao ka go se itshole ba dirago bootswa, ba bolelago metlae e lešago dihlong le “ditšhila tša mohuta o mongwe le o mongwe,” tšeo di akaretšago go dulela go bogela diswantšho tšeo di kgothaletšago bootswa.—Baef. 5:3-6.
19. Ke ditsela dife tše dibotse tša go bontšha gore re dumela topollong?
19 Go leboga topollo go swanetše go dira gore re dule re swaregile “medirong ya boineelo go Modimo.” (2 Pet. 3:11) Anke re beeleng nako e ntši ka thoko bakeng sa go rapela ka mehla le ka go tšwa pelong, go ba le thuto ya motho ka noši ya Beibele, go ba gona dibokeng, borapedi bja lapa le go bolela ka Mmušo ka phišego. Le gona, anke re se keng ra “lebala go dira botse le go abelana dilo le ba bangwe, gobane Modimo o kgahlišwa ke dihlabelo tše bjalo.”—Baheb. 13:15, 16.
20. Bohle bao ba bontšhago tumelo topollong ba ka letela go hwetša ditšhegofatšo dife?
20 Ge Jehofa a thoma go galefela tshepedišo ye e kgopo ya dilo, ruri re tla thabela gore re ile ra bontšha tumelo topollong le go dula re e leboga! Le gona, lefaseng le lefsa la Modimo le le holofeditšwego, re tla dula re leboga tokišetšo ye e botse yeo e ilego ya re phemiša kgalefo ya Modimo.—Bala Johane 3:16; Kutollo 7:9, 10, 13, 14.
O be o tla Araba Bjang?
• Ke ka baka la’ng re nyaka topollo?
• Go bile le tahlegelo efe ka baka la topollo?
• Topollo e re hola bjang?
• Re bontšha tumelo bjang sehlabelong sa Jesu sa topollo?
[Dipotšišo tša Thuto]
[Seswantšho go letlakala 13]
Re bulegetšwe ke sebaka sa go boelana le Jehofa
[Diswantšho go letlakala 15]
Go naganišiša ka dilo tšeo di diragaletšego Aborahama, Isaka le Jakobo go ka re thuša go kwešiša tahlegelo e kgolo yeo e bakilwego ke topollo