Lwantšha Kgateletšo ya go ya le Mogofe

MAFELO a a fapana ka dikgopolo mabapi le gore ke eng seo se swanetšego goba seo se sa amogelegego le gore ke eng seo se retegago goba se nyatšegago. E bile dikgopolo tšeo di a fetoga ge nako e dutše e e-ya. Ka baka leo, ge re bala dipego tša Mangwalo tšeo di diregilego kgale kudu, re swanetše go ela hloko gore ke kgopolo le ditekanyetšo dife tšeo di bego di amogelwa ke batho ba bantši mehleng ya Beibele go e na le go ipeela ditekanyetšo tša rena go seo re se balago.

Ka mohlala, nagana ka dikgopolo tše pedi tšeo gantši go bolelwago ka tšona ka Mangwalong a Bakriste a Segerika—go godišwa le go nyatšwa. Gore re kgone go kwešiša gakaone ditemana tšeo di bolelago ka go godišwa le go nyatšwa, re swanetše go bona kamoo batho bao ba bego ba phela mehleng yeo ba bego ba lebelela dilo ka gona.

Ditekanyetšo tša Lekgolong la Pele la Nywaga

Seithuti se sengwe se re: “Bagerika, Baroma le Bajuda ba be ba lebelela go godišwa le go nyatšwa di le bohlokwa kudu ditekanyetšong tša ditšo tša bona. Batho ba ile ba ba ba hwa e le ge ba nyaka go godišwa, go itirela leina, go tuma, go ratwa le go hlompšha.” Ditekanyetšo tše bjalo di dirile gore ba tshwenyege kudu ka seo batho ba bangwe ba se naganago.

Maemo, botumo le go godišwa di be di le bohlokwa kudu bathong bao ba ratago go tšeelwa godimo, e ka ba bakgomana goba makgoba. Ga se feela gore motho o be a nyaka go ipona a le bohlokwa eupša o be a nyaka gore batho ba bangwe le bona ba mmone a le bohlokwa. Go godiša motho go be go bolela go dumela phatlalatša gore o itshwara ka tsela yeo go letetšwego gore a itshware ka yona. E bile go mo godiša go be go bolela go kgahlwa ke lehumo la motho yoo, mošomo wa gagwe goba maemo gomme ka go rialo a thoma go tšeelwa godimo go ya kamoo go tlwaelegilego ka gona. Motho o be a ikhweletša kgodišo ka go dira dilo tše dibotse kudu goba ka go phala ba bangwe. Go fapana le moo, go nyatšwa, goba go tšeelwa fase, go be go sepedišana le go kokobetšwa goba go kwerwa phatlalatša. E be e se feela taba ya gore motho o ikwa bjang goba gore letswalo la gagwe le reng eupša e be e le sešupo sa go ahlolwa ke setšhaba.

Ge Jesu a be a bolela ka go bewa ga motho “sebakeng sa ka pele-pele” goba “sebakeng sa tlase-tlase” monyanyeng, seo e be e le kgodišo goba lenyatšo go ya ka setšo sa mehleng yeo. (Luka 14:8-10) Ditiragalong tše pedi, barutiwa ba Jesu ba ile ba lwantšhana ka taba ya gore “ke ofe yo a bonalago e le yo mogolo go bona ka moka.” (Luka 9:46; 22:24) Ba be ba bontšha seo batho ba mehleng ya bona ba bego ba tshwenyegile kudu ka sona. Ka baka leo, baetapele ba bodumedi ba Bajuda bao ba ikgogomošago le bao ba phadišanago ba be ba lebelela boboledi bja Jesu e le bjo bo lekago go godišwa ga bona le bolaodi bja bona. Lega go le bjalo, ka mehla ba be ba palelwa ge ba be ba leka go bonagala ba phagame kudu go mo feta dingangišanong tša phatlalatša pele ga mašaba.—Luka 13:11-17.

Kgopolo e nngwe yeo e bego e le gona go Bajuda, Bagerika le Baroma ba lekgolong la pele la nywaga e be e le ya lenyatšo la go “tsongwa phatlalatša le go ahlolelwa phošo e itšego.” Go bofša ga motho le go golegwa go be go lebelelwa e le go tlontlollwa. Go swarwa ka tsela e bjalo go be go dira gore motho a rogakwe ke bagwera ba gagwe, ba lapa le setšhaba ka moka—go sa šetšwe gore o be a pharwa ka molato wa bosenyi goba go se bjalo. Go senywa leina ka tsela yeo go be go ka dira gore a se sa hlwa a itlhompha gwa ba gwa dira gore ba bangwe ba se sa hlwa ba mo lebelela gabotse. Selo seo se nyamišago kudu go feta go bofša e be e  le go hlomphollwa ka go hlobodišwa goba go otlwa. Go swarwa ka tsela yeo go be go dira gore motho a kwerwe le go gobošwa gomme seo sa dira gore a nyatšege.

Go bolawa koteng ya tlhokofatšo go be go bontšha gore motho o dirile bobe bjo bo nyatšegago kudu. Seithuti Martin Hengel se re polao e bjalo e be e le “kotlo ya makgoba. Ka gona e be e bontšha go gobošwa mo go feteletšego, lenyatšo le tlhokofatšo.” Setšhaba se be se dula se gatelela lapa labo motho yo a bego a nyaditšwe ka tsela ye, se gatelela le bagwera ba gagwe gore ba mo latole. Ka ge Kriste a hwile ka tsela ye, bohle bao ba bego ba nyaka go ba Bakriste lekgolong la pele la nywaga C.E. ba be ba swanetše go lebeletšana le go kwerwa phatlalatša ka tsela ye. Go bonagala batho ba bantši ba be ba nagana gore ke bošilo gore motho a ipitše molatedi wa motho yo a kokotetšwego koteng. Moapostola Paulo o ngwadile gore: “Re bolela Kriste yo a kokotetšwego koteng, seo go Bajuda ke kgopišo eupša go ditšhaba ke bošilo.” (1 Bakor. 1:23) Bakriste ba pele ba ile ba lebeletšana bjang le tlhohlo ye?

Ditekanyetšo tše di Fapa-fapanego

Bakriste ba lekgolong la pele la nywaga ba be ba e-kwa molao gomme ba katanela go phema go gobošwa ka baka la boitshwaro bjo bo fošagetšego. Moapostola Petro o ngwadile gore: “A go se be le motho go lena yo a tlaišegago e le mmolai goba lehodu goba modirabobe goba e le mpheane ditabeng tša batho ba bangwe.” (1 Pet. 4:15) Lega go le bjalo, Jesu o boletše e sa le pele gore balatedi ba gagwe ba be ba tla tlaišwa ka baka la leina la gagwe. (Joh. 15:20) Petro o ngwadile gore: “Ge e ba [motho] a tlaišega ka ge e le Mokriste, a se ke a hlabja ke dihlong, eupša a tšwele pele go reta Modimo.” (1 Pet. 4:16) Go se hlabje ke dihlong ka baka la ge motho a tlaišetšwa go ba molatedi wa Kriste go be go bolela go hlokomologa dikgopolo tše di tlwaelegilego tša mehleng yeo.

Bakriste ba be ba ka se dumelele ditekanyetšo  tša batho ba bangwe di laola tsela yeo ba itshwarago ka yona. Batho ba lekgolong la pele la nywaga ba be ba lebelela Mesia yo a bego a kokotetšwe koteng e le lešilo. Seo se ka ba se ile sa gateletša Bakriste gore ba ikwe ba nyaka go dumelelana le kgopolo yeo e bego e amogelega. Lega go le bjalo, go dumela ga bona gore Jesu e be e le Mesia go be go nyaka gore ba mo latele, gaešita le ge ba be ba kwerwa. Jesu o itše: “Mang le mang yo a hlabjago ke dihlong ka nna le ka mantšu a-ka molokong wo wa dihlotlolo le wa sebe, Morwa wa motho le yena o tla hlabja ke dihlong ka yena ge a fihla ka letago la Tatagwe a e-na le barongwa ba bakgethwa.”—Mar. 8:38.

Lehono, re ka lebeletšana le dikgateletšo tšeo morero wa tšona e lego go dira gore re kgaotše go ba Bakriste. Re ka gatelelwa ke bao re tsenago le bona sekolo, baagišani goba bašomi-gotee le rena bao ba lekago go dira gore re itshware gampe, re se botege goba re dire mediro e belaetšago. Batho ba bjalo ba ka leka go re swariša dihlong ka baka la gore re phela ka go dumelelana le melao ya motheo e nepagetšego. Re swanetše go itshwara bjang?

Ekiša Bao ba Ilego ba se be le Taba le go Hlabišwa Dihlong

Jesu o ile a lebeletšana le polao e sehlogo kudu e le gore a ka dula a botegela Jehofa. “O ile a kgotlelela kota ya tlhokofatšo, a se be le taba le go hlabišwa dihlong.” (Baheb. 12:2) Manaba a Jesu a ile a mo phasola, a mo tshwela ka mare, a mo hlobodiša, a mo otla, a mo kokotela koteng le go mo goboša ka mantšu. (Mar. 14:65; 15:29-32) Lega go le bjalo, Jesu ga se a ba le taba le go hlabišwa dihlong ka ditsela tšeo. Bjang? Ga se a ka a šutha le ge a be a swarwa ka tsela yeo. Jesu o be a tseba gore Jehofa o sa dutše a mo lebelela ka tsela e nago le seriti gomme ruri o be a sa inyakele letago bathong. Gaešita le ge Jesu a hwile bjalo ka lekgoba, Jehofa o mo neile seriti ka go mo tsoša le go mo nea maemo a hlomphegago kudu kgaufsi le Yena. Go Bafilipi 2:8-11, re bala gore: “[Kriste Jesu o ile] a ikokobetša gomme a ba yo a kwago go fihla lehung, ee, lehung koteng ya tlhokofatšo. Ka lona lebaka le gape Modimo o mo phagamišeditše boemong bja godimo gomme ka botho a mo nea leina le lego ka godimo ga leina le ge e le lefe le lengwe, e le gore letolo le lengwe le le lengwe la bao ba lego legodimong le bao ba lego lefaseng le bao ba lego ka tlase ga mmu le khuname leineng la Jesu, gomme leleme le lengwe le le lengwe le swanetše go dumela phatlalatša gore Jesu Kriste ke Morena gore go išwe letago go Modimo Tate.”

Ga se gore Jesu o be a sa kwe bohloko ge a be a hlomphollwa go fihlela a bolawa. Ka ge Morwa wa Modimo a be a swaiwa diphošo ka gore ke yena morogaki, o be a tshwenyegile kudu ka gore Tatagwe a ka nyatšwa. Jesu o ile a kgopela Jehofa go dira gore a se ke a nyatšiša leina la gagwe ka tsela yeo. O rapetše ka gore: “Tloša senwelo se go nna.” Eupša Jesu o ile a ikokobeletša thato ya Modimo. (Mar. 14:36) Lega go le bjalo, Jesu o ile a fenya kgateletšego yeo a bego a le ka tlase ga yona gomme a se be le taba le go hlabišwa dihlong. Go ba gona, bao ba bego ba amogela ditekanyetšo tše di tlwaelegilego mehleng ya bona ke bona ba bego ba ka hlabja ke dihlong. Go molaleng gore Jesu ga se a ka a amogela ditekanyetšo tšeo.

Barutiwa ba Jesu le bona ba ile ba golegwa le go otlwa. Go swarwa ka tsela e bjalo go ile gwa dira gore batho ba bantši ba se ke ba ba hlompha. Ba be ba tšeelwa fase le go nyatšwa. Lega go le bjalo, ga se ba ka ba nyama. Barutiwa ba kgonthe ba ile ba lwantšha kgateletšego ya go ya le mogofe gomme ba se be le taba le go hlabišwa dihlong. (Mat. 10:17; Dit. 5:40; 2 Bakor. 11:23-25) Ba be ba tseba gore ba swanetše go ‘tšea dikota tša bona tša tlhokofatšo gomme ba latele Jesu ka go se kgaotše.’—Luka 9:23, 26.

Go thwe’ng ka rena lehono? Go Modimo, dilo tšeo lefase le di lebelelago e le bošilo, e le tše di fokolago le tše di nyatšegago di lebelelwa e le bohlale, e le tše matla le tše di hlomphegago. (1 Bakor. 1:25-28) Na e be e ka se be ga bošilo le go hloka tlhaologanyo ge nkabe le rena re be re ka rata go ya le mogofe?

Motho le ge e le ofe yo a ratago go godišwa o swanetše go ela hloko seo ba bangwe ba se naganago ka yena. Ka lehlakoreng le lengwe, bjalo ka Jesu le balatedi ba gagwe ba lekgolong la pele la nywaga, le rena re nyaka gore Jehofa e be Mogwera wa rena. Ka baka leo, re tla tšeela godimo seo yena a se tšeelago godimo gomme ra nyatša seo a se nyatšago.

[Seswantšho go letlakala 4]

Jesu o be a sa tutuetšwe ke kgopolo ya lefase mabapi le go hlabišwa dihlong