O a Laletšwa!

BAPALA

O a Laletšwa!

O a Laletšwa!

O LALETŠWA kae? Go etela e nngwe ya diofisi tša lekala tša Dihlatse tša Jehofa, yeo gantši e bitšwago Bethele. Go na le meago e 118 ya mohuta wo dinageng tše di fapa-fapanego. Gantši baeng ba bontšha tebogo e tšwago pelong ya seo ba se bonago Bethele.

Ka morago ga go bona batho ba bantši bao ba šomago ka thata ba hlankela Jehofa ofising ya lekala ya kua Mexico, lesogana le lengwe leo le bego le ithuta Beibele le be le kgahlegile kudu moo le ilego la botšiša gore: “Ke swanetše go dira’ng gore le nna ke tle ke dule mo?” Le ile la botšwa gore: “Sa pele, o swanetše go kolobetšwa. Ke moka, e ka ba mo gobotse gore o hlankele o le mmulamadibogo—mogoeledi wa Mmušo wa nako e tletšego.” Lesogana le le ile la dira seo le boditšwego sona, gomme nywageng e mebedi ka morago le ile la laletšwa go yo hlankela Bethele ya Mexico, moo le šetšego le hlanketše gona ka nywaga e 20.

Bethele Ke’ng?

Ka Seheberu, “Bethele” e ra gore “Ngwakô wa Modimo.” (Gen. 28:19) Didirišwa tšeo di lego gona diofising tše di fapa-fapanego tša makala di dirišetšwa go gatiša le go phatlalatša Dibeibele le dikgatišo tše di theilwego Beibeleng e le gore diphuthego tša Dihlatse tša Jehofa tše di fetago 100 000 di thušwe moyeng. Bašomi ba Bethele ba e ka bago ba 20 000—banna le basadi ba tšwago ditlogong le ditšong tšeo di fapa-fapanego—ga ba bontšhe moya wa boithati ge ka nako e tletšego ba hlankela Jehofa le bana babo bona le dikgaetšedi ba moya. Bao ba feditšego nywaga e mentši ba le modirong wo wa Bokriste ba šoma gotee le bafsa bao ba lego mafolofolo. Mantšiboa le mafelo-bekeng, ditho tša lapa la Bethele di thabela go kopanela diboka le bodiredi bja Bokriste diphuthegong tša kgaufsi tša Dihlatse tša Jehofa. E bile di diriša nako ya tšona ya ka thoko di ithuta Beibele, di itapološa le go phetha mabaka a motho ka noši.

Ditho tša lapa la Bethele di hwetša tšheletiana e nyenyane ya go hlokomela dinyakwa tša tšona kgwedi le kgwedi. Di ja dijo tše bose tšeo di nago le phepo e bile di phela tikologong e hlwekilego le e kgahlišago. Magae a Bethele ga se a manobonobo. Lega go le bjalo, a a kgahliša. Baeti ga ba kgahlišwe feela ke meago yeo e hlokomelwago gabotse le dirapana le tsela yeo go nago le thulaganyo, eupša ba kgahlišwa le ke moya wa botho le tirišano woo o lego gona Bethele. Yo mongwe le yo mongwe o šoma ka mafolofolo, eupša go swarega ga bona ka mošomo ga go ba palediše gore ba be le moya wa bogwera. Lapeng la Bethele, motho ga a tšeelwe godimo ka baka la maemo a gagwe goba go ikwa a phagametše ba bangwe ka baka la kabelo yeo a e dirago. Kabelo e nngwe le e nngwe e bohlokwa, e ka ba ya go hlwekiša, go hlokomela dirapana, go apea goba go šoma mo go gatišwago goba ka ofising. Ditho tša lapa la Bethele, bjalo ka ge di tsebja, di šoma gotee bjalo ka sehlopha go thekga bodiredi bja Dihlatse tša Jehofa.—Bakol. 3:23.

A re Boledišaneng le Ditho tša Lapa la Bethele

Anke re beng le kwešišo e tseneletšego ka bao ba bopago lapa le la lefaseng ka bophara. Ba tutueditšwe ke’ng gore ba nyake go hlankela Bethele? Ela hloko mohlala wa Mario. Ge a be a e-ba yo mongwe wa Dihlatse tša Jehofa, Mario o be a šoma mošomo wo o lefago tšhelete e ntši khamphaning ya dikoloi ya Jeremane yeo e tumilego kudu gomme o bile le sebaka sa gore a ka huma le dinala. Nakwana ka morago ga go kolobetšwa, o ile a ithapela go fetša beke e tee a le Bethele nageng ya gabo. O ile a abelwa gore a thuše metšheneng ya go gatiša. Mario o ile a bona phapano e kgolo magareng ga batho bao a bego šoma le bona Bethele le bao a šomago le bona mošomong wa gagwe wa boiphedišo. Ka gona, o ile a kgopela go tsenela tirelo ya Bethele ka nako e tletšego. Gaešita le ge ba bantši ba leloko le bašomi-gotee le yena ba ile ba thatafalelwa ke go kwešiša phetho ya gagwe, Mario ga bjale o hlankela ka lethabo kua Bethele ya Jeremane.

Ba bantši ba tsenela tirelo ya Bethele ba se na tsebo e itšego goba bokgoni bjo itšego ka mo go kgethegilego. Go bile bjalo le ka Abel, yoo ga bjale a nago le nywaga e 15 a hlankela Bethele ya Mexico. O re: “Bethele e bile sekolo sa kgonthe go nna. Ke ithutile go diriša metšhene e raraganego ya go gatiša. Ke a tseba gore ka tsebo ye, nka hwetša tšhelete e ntši mošomong o mongwe ka ntle ga Bethele, eupša go dira bjalo go ka se mphe seo ke nago le sona mo—bophelo bjo bo kgahlišago le bjo bo kgotsofatšago bjoo bo se nago dipelaelo le diphadišano tšeo bašomi ba bantši ba nago le tšona. Ke ikwa ke hweditše thuto e phagamego kudu, yeo e nthušitšego moyeng ya ba ya ntlhalefiša. Gaešita le ge ke be nka ya yunibesithing e kaone-kaone, ke be nka se hwetše mehola e megolo gakaakaa ya moya.”

O ka Matlafatšwa ke go Etela Bethele

Motho a ka kgomega kudu moyeng ka go fo etela Bethele. Go bile bjalo ka Omar, wa kua Mexico. Mmagwe o mo rutile ditherešo tša Beibele. Eupša ge a e-na le nywaga e 17, Omar o ile a kgaotša go ba gona dibokeng tša Bokriste le go tšea karolo bodireding bja phatlalatša. Mafelelong o ile a dira dilo tše di gobogilego le go rata dilo tše di bonagalago. Ka morago, ge Omar a be a šoma khamphaning ya tša poledišano, e bile yo mongwe wa bao khamphani e ba romilego Bethele ya Mexico go yo ba bontšha kamoo didirišwa tše dingwe di šomago ka gona. Omar o re: “Ka morago ga go ba bontšha, motho yo a re amogetšego o ile a re sepediša meagong ya moo. Seo ke se bonego le tsela e botho yeo re ilego ra swarwa ka yona di ile tša dira gore ke naganišiše ka mohuta wa bophelo bjoo ke bego ke bo phela, bjoo bo bego bo dira gore ke arogane le Jehofa. Gatee-tee ke ile ka thoma go ba gona gape dibokeng le go ithuta Beibele. Dikgwedi tše tshelelago ka morago ga go etela Bethele, ke ile ka kolobetšwa. Ke leboga Jehofa ka tutuetšo yeo e botse yeo ke e hweditšego ge ke be ke etetše Bethele.”

Masahiko wa kua Japane, le yena o godišeditšwe lapeng la Dihlatse. Lega go le bjalo, o ile a thoma go bona tsela ya bophelo ya Bokriste e tletše ka melao yeo e mo thibelago go dira seo a se nyakago. O ile a thoma go tšea karolo kudu medirong ya sekolo gomme a kgaotša go ba gona dibokeng le go tšea karolo modirong wa boboledi. Masahiko o gopola gore: “Ka letšatši le lengwe ba lapa lešo le bagwera ba bona ba mmalwa ba Bakriste ba ile ba kgetha go etela Bethele. Ba gešo ba ile ba nkgapeletša go ya, ka gona ke ile ka ya. Go sepedišwa meagong ya Bethele go ile gwa ntapološa go feta le ge e le neng pele. Lethabo leo ke le hweditšego ka go gwerana le Bakriste ba bangwe ge re dutše re bona meago ya lekala e bile selo seo ke sa kago ka se hwetša go bagwera ba-ka bao e sego Dihlatse. Kganyogo ya go phela bophelo bja Bokriste e ile ya gola go nna, gomme ke ile ka phetha ka go kgopela go swarelwa thuto ya Beibele.” Ga bjale Masahiko o hlankela e le modiredi wa nako e tletšego phuthegong ya gabo.

Kgaetšedi yo mongwe wa Hlatse yo a tšwago Fora o ile a hudugela Moscow ka mošomo. Ge a le moo o ile a se sa bona batho ba Jehofa gomme a thoma go fokola moyeng. O ile a dira sebe gomme mafelelong a nyalana le monna yo e sego Mokriste. Ke moka, kgaetšedi wa Mokriste yo a tšwago Fora o ile a mo etela, gomme ba ile ba sepela gotee ba ya St. Petersburg, kua Russia, go yo etela lapa la Bethele la moo. O ngwadile gore: “Re ile ra amogelwa ka borutho kua Bethele, gomme se se ile sa nkgoma kudu. Go be go aparetše khutšo. Ke ile ka kwa go foka moya wa Jehofa. Go re’ng ke be ke dira phošo e kgolo gakaakaa ya go hlanogela mokgatlo wa Jehofa? Ka morago ga go etela Bethele, ke ile ka rapela Jehofa gore a nthuše gomme ka thoma go ruta bana ba-ka Beibele ke e-na le maikemišetšo a mafsa.” Go tlaleletša thušong e nngwe ya moya yeo e hweditšwego ke Hlatse ye yeo e bego e fokola, o kgomilwe kudu ke go etela Bethele gomme ka morago a dira tšwelopele e botse.

Go etela Bethele go ka kgoma bjang bao ba sa tsebego Dihlatse tša Jehofa? Ka 1988, Alberto yo a bego a tsemile medu dipolitiking, o ile a etela Bethele ya Brazil. Go hlweka ga lefelo leo, go ba ga lona le thulaganyo le mediro ya gona yeo e dirwago phatlalatša di ile tša mo kgahla kudu. Nakwana ka morago ga go etela Bethele, Alberto o ile a laletšwa sekolong sa boruti moo molamo wa gagwe e bego e le moruti. Alberto o ile a bona phapano. O itše: “Dilo ka moka moo sekolong sa boruti di be di direlwa ka sephiring.” Nakwana ka morago ga go etela Bethele, o ile a amogela thuto ya Beibele, a tlogela dipolitiki gomme ga bjale o hlankela e le mogolo ka phuthegong.

Tlaa o Etele Bethele!

Ba bantši ba dirile maiteko a magolo gore ba etele ofisi ya lekala ya nageng ya gabo bona. Ka mohlala, Paulo le Eugenia ba kua Brazil ba ile ba boloka tšhelete ka nywaga e mene gore ba tle ba kgone go tšea leeto la matšatši a mabedi la dikhilomithara tše 3 000 ka pese go yo bona meago ya Bethele nageng yeo. Ba itše: “Ga se ra ka ra itshola. Ga bjale re kwešiša mokgatlo wa Jehofa kutšwanyana. Ka dinako tše dingwe ge re hlalosetša dithuto tša rena tša Beibele mešomo yeo e dirwago Bethele, ba re botšiša gore, ‘Na le kile la ya moo?’ Ga bjale re kgona go araba ka gore ee.”

Na go na le ofisi ya lekala le legae la Bethele nageng ya geno goba nageng ya kgaufsi? Re go laletša gore o etele meago yeo. Re go kgonthišetša gore o tla amogelwa ka borutho gomme wa holega kudu moyeng ge o etetše Bethele.