Botee bja Bokriste bo Tagafatša Modimo

‘Le leke ka matla go boloka botee bja moya.’—BAEF. 4:3.

1. Bakriste ba lekgolong la pele la nywaga ba kua Efeso ba tagafaditše Modimo bjang?

BOTEE bja phuthego ya Bokriste ya Efeso ya bogologolo bo tagafaditše Modimo wa therešo, Jehofa. Motseng woo wo o atlegilego kudu ka tša kgwebo, go molaleng gore bana babo rena ba bangwe ba Bakriste ba be ba humile gomme e be e le beng ba bahlanka mola ba bangwe e be e le bahlanka e bile mohlomongwe ba diila kudu. (Baef. 6:5, 9) Ba bangwe e be e le Bajuda bao ba ithutilego therešo dikgweding tše tharo nakong ya ge moapostola Paulo a be a bolela disinagogeng tša bona. Ba bangwe ba be ba ile ba rapela Aratemise le go dira maleatlana. (Dit. 19:8, 19, 26) Go molaleng gore Bokriste bja therešo bo ile bja kopanya batho bao ba tšwago ditlogong tše dintši. Paulo o ile a lemoga gore Jehofa o tagafatšwa ke botee bja phuthego. Moapostola yo o ngwadile gore: “Go yena go išwe letago ka phuthego.”—Baef. 3:21.

2. Ke’ng seo se ilego sa hlohla botee bja Bakriste ba kua Efeso?

² Lega go le bjalo, botee bjo bo šegofaditšwego bja phuthego ya Efeso bo ile bja hlohlwa. Paulo o ile a eletša bagolo ba moo gore: “Gare ga lena ka noši go tla tsoga banna gomme ba bolela dilo tše di kgopamego gore ba goge barutiwa gore ba ba šale morago.” (Dit. 20:30) Le gona, bana babo ba bangwe ba be ba sa dutše ba e-na le moya wa go ikarola woo Paulo a lemošitšego gore o ‘šoma go barwa ba go se kwe.’—Baef. 2:2; 4:22.

 Lengwalo Leo le Gatelelago Botee

3, 4. Lengwalo la Paulo le le yago go Baefeso le gatelela botee bjang?

³ Paulo o ile a lemoga gore ge e ba Bakriste ba nyaka go dula ba šoma ka kwano, yo mongwe le yo mongwe wa bona o swanetše go katanela go kgothaletša botee. Modimo o ile a budulela Paulo go ngwalela Baefeso lengwalo leo taba-kgolo ya lona e bego e le mabapi le botee. Ka mohlala, Paulo o ngwadile gore morero wa Modimo ke “go kgobokanya gotee gape dilo tšohle go Kriste.” (Baef. 1:10) O ile a ba a bapiša Bakriste le mafsika ao go agwago moago ka ona. “Moago ka moka o kopantšwe gotee ka kwano, o a gola ya ba tempele e kgethwa ya Jehofa.” (Baef. 2:20, 21) Go feta moo, Paulo o ile a gatelela botee bja Bajuda le bja Bakriste ba Bantle, a ba a gopotša bana babo gore ka moka ba bopilwe ke motho o tee. O itše Jehofa ke “Tate, yo lapa le lengwe le le lengwe legodimong le lefaseng le bitšwago ka yena.”—Baef. 3:5, 6, 14, 15.

⁴ Ge re dutše re hlahloba kgaolo 4 ya Baefeso, re tla bona gore ke ka baka la eng go nyakega maiteko gore go be le botee, kamoo Jehofa a re thušago ka gona go ba le botee le gore ke boemo bofe bja kgopolo bjo bo tla re thušago gore re dule re le boteeng. Ke ka baka la’ng o sa bale kgaolo yeo ka moka gore o holwe kudu ke thuto ye?

Seo se Dirago Gore Botee bo Nyake Boiteko bjo bo Tseneletšego

5. Ke ka baka la’ng barongwa ba Modimo ba kgona go hlankela ka botee eupša ke ka baka la’ng e ka ba tlhohlo gore rena re be boteeng?

⁵ Paulo o kgothaleditše bana babo ba Baefeso gore ba ‘leke ka matla go boloka botee bja moya.’ (Baef. 4:3) Ela hloko taba ya barongwa ba Modimo gore o kwešiše go nyakega ga boiteko tabeng ye. Ga go na diphedi tše di swanago tlwaa mo lefaseng, ka gona re ka phetha ka gore Jehofa o šegofaditše barongwa ba gagwe ba dimilione ka boemo bja moswana-noši. (Dan. 7:10) Lega go le bjalo, ba kgona go hlankela Jehofa ka botee ka gobane ka moka ga bona ba a mo theetša le go dira thato ya gagwe. (Bala Psalme 103:20, 21.) Ka ge barongwa ba ba botegago ba e-na le dika tše di sa swanego, Bakriste le bona ba na le mafokodi ao a sa swanego. Se se ka dira gore go ba le botee e be tlhohlo.

6. Ke boemo bofe bja kgopolo bjo bo tla re thušago go thabela go dirišana le bana babo rena bao ba nago le mafokodi ao a sa swanego le a rena?

⁶ Ge batho bao ba sa phethagalago ba leka go dirišana, go bonolo gore ba be le dikgohlano. Ka mohlala, go thwe’ng ge e ba ngwanabo rena yo a nago le moya o boleta yoo ka mehla a fihlago ka morago ga nako a hlankela Jehofa gotee le ngwanabo rena yo a dulago a swere nako eupša e le sefela-pelwana? Yo mongwe le yo mongwe wa bona a ka nagana gore yo mongwe o fokola kudu boitshwarong eupša a lebala gore le yena o fokola kudu dikarolong tše dingwe. Bana babo rena ba ba babedi ba ka hlankela bjang ka kwano? Ela hloko kamoo boemo bja kgopolo bjo bo kgothaletšwago ke Paulo mantšung a gagwe a  latelago bo ka ba thušago ka gona. Ka gona nagana kamoo re ka dirago gore go be le botee ka go hlagolela boemo bjoo bja kgopolo. Paulo o ngwadile gore: “Ke le lopa gore le sepele ka mo go swanelago . . . ka boikokobetšo bjo bo feletšego bja monagano le boleta, ka bopelotelele, ka go kgotlelelana ka lerato, le leka ka matla go boloka botee bja moya setlemong se se tlemaganyago sa khutšo.”—Baef. 4:1-3.

7. Ke ka baka la’ng go le bohlokwa gore re katanele go ba batee le Bakriste bao ba sa phethagalago?

⁷ Go bohlokwa go ithuta go hlankela Modimo ka botee le batho bao ba sa phethagalago ka gobane go na le mmele o tee wa barapedi ba therešo. “Go na le mmele o tee le moya o tee, go etša ge le bileditšwe kholofelong e tee yeo le bileditšwego go yona; go na le Morena o tee, tumelo e tee, kolobetšo e tee; Modimo o tee le Tatago batho bohle.” (Baef. 4:4-6) Moya wa Jehofa le ditšhegofatšo tša gagwe di tswalanywa le borwarre bjo bo nago le botee bjoo Modimo a bo dirišago. Ge ba bangwe ba ka re nyamiša ka phuthegong, re ka leba kae? Ga go na moo re ka kwago mantšu a bophelo bjo bo sa felego.—Joh. 6:68.

‘Dimpho Tšeo e Lego Banna’ di Kgothaletša Botee

8. Ke’ng seo Kriste a se dirišago gore a re thuše go fenya dikarogano?

⁸ Paulo o ile a diriša mokgwa o tlwaelegilego wa bahlabani ba mehleng ya bogologolo go bontšha kamoo Jesu a neilego ‘dimpho tšeo e lego banna’ bakeng sa go re thuša go dira gore phuthego e be boteeng. Mohlabani wa mofenyi a ka tla gae a thopile motho o šele gore e tle e be mohlanka yo a bego a tla thuša mosadi wa gagwe ka mediro ya ka gae. (Ps. 68:1, 12, 18) Ka mo go swanago, go fenya ga Jesu lefase go mo neile bahlanka ba bantši bao ba ikgafago. (Bala Baefeso 4:7, 8.) O ile a diriša bjang mathopša ao a seswantšhetšo? “O neile ba bangwe e le baapostola, ba bangwe e le baporofeta, ba bangwe e le baebangedi, ba bangwe e le badiši le barutiši, ka morero wa go lokiša bakgethwa, bakeng sa modiro wa bodiredi, bakeng sa go agwa ga mmele wa Kriste, go fihla ge ka moka re fihlelela botee tumelong.”—Baef. 4:11-13.

9. (a) ‘Dimpho tšeo e lego banna’ di thuša bjang gore re dule re e-na le botee? (b) Ke ka baka la’ng setho se sengwe le se sengwe sa phuthego se swanetše go kgatha tema boteeng bja yona?

⁹ Bjalo ka badiši ba lerato, ‘dimpho tše tšeo e lego banna’ di re thuša go dula re le boteeng. Ka mohlala, ge mogolo wa phuthego a lemoga gore bana babo rena ba babedi ba “tsošetšana phenkgišano,” a ka tsenya letsogo kutšwanyana boteeng bja phuthego ka go nea keletšo ya ka thoko ‘gore a ba bušetše tseleng ka moya wa boleta.’ (Bagal. 5:26–6:1) Ka ge e le barutiši, ‘dimpho tše tšeo e lego banna’ di re thuša go matlafatša tumelo ya rena motheong wa dithuto tša Beibele. Ka baka leo, ba kgothaletša botee  le go re thuša go tšwela pele re gola ka tsebo ya Bokriste. Paulo o ngwadile gore se se direlwa “gore re se sa hlwa re e ba bana, re akga-akgwa bjalo ka ge eka re akga-akgwa ke maphoto le go išwa kua le kua ke phefo e nngwe le e nngwe ya thuto ka bohwirihwiri bja batho, ka boradia bja go loga maano a bofora.” (Baef. 4:13, 14) Mokriste yo mongwe le yo mongwe o swanetše go kgatha tema boteeng bja rena bja borwarre, go fo swana le ge setho se sengwe le se sengwe sa mebele ya rena ya nama se thuša tše dingwe ka go di nea seo di se nyakago.—Bala Baefeso 4:15, 16.

Hlagolela Boemo bjo Bobotse bja Kgopolo

10. Boitshwaro bjo bo gobogilego bo ka hlohla botee bja rena bjang?

¹⁰ Na o hlokometše gore kgaolo ya bone ya lengwalo la Paulo le le yago go Baefeso e bontšha gore lerato ke selo se segolo seo se tla re thušago gore re be le botee bjalo ka Bakriste bao ba gotšego ka tsebo? Ke moka e bontšha seo lerato le se akaretšago. Ka mohlala, go latela tsela ya lerato go kgahlanong le bootswa le boitshwaro bjo bo hlephilego. Paulo o kgothaleditše bana babo gore ba se ke ba “sepela go etša ge le ditšhaba di sepela.” Batho bao ba be ba “lahlegetšwe ke maikwelo ohle a boitshwaro” gomme ba “ikgafetše boitshwaro bjo bo hlephilego.” (Baef. 4:17-19) Lefase le le gobogilego leo re phelago go lona le hlohla botee bja rena. Batho ba dira metlae ka bootswa, ba opela ka bjona, ba bo bogela e le boithabišo gomme ba bo dira ka sephiring goba phatlalatša. Lega go le bjalo, go bapala ka lerato, mo go ka akaretšago go itira eka o kgahlegela motho yo a itšego ka tša botona le botshadi eupša o sa ikemišetša go nyalana le yena, go ka dira gore o be kgole le Jehofa le phuthego. Ka baka la’ng? Ka gobane go ka go lebiša bootsweng gabonolo. Le gona, go bapala ka lerato mo go dirago gore motho yo a lego lenyalong a dire bohlotlolo go ka kgaoganya batswadi le bana ka tsela e sehlogo le go aroganya balekane bao ba se nago molato le balekane ba bona ba lenyalo. Ruri bjo ga se botee! Ga go makatše ge moapostola Paulo a ngwadile gore: “Lena ga se la ithuta Kriste a le bjalo.”—Baef. 4:20, 21.

11. Beibele e kgothaletša Bakriste go dira diphetogo dife?

¹¹ Paulo o gateletše gore re swanetše go lahla ditsela tše di senyago monagano gomme go e na le go dira bjalo re hlagolele boemo bja kgopolo bjo bo dirago gore re kgone go phela ka kwano le ba bangwe. O itše: “Le lahle motho wa kgale yo a dumelelanago le tsela ya lena ya pele ya boitshwaro le yo a senywago go ya ka dikganyogo tša gagwe tše forago [tša motho wa kgale]; . . . le mpshafatšwe matleng a tutuetšago monagano wa lena, le apare motho yo mofsa yo a bopilwego go ya ka thato ya Modimo tokong ya therešo le potegong.” (Baef. 4:22-24) Re ka ‘mpshafatšwa bjang matleng ao a tutuetšago monagano wa rena’? Ge e ba re naganišiša ka seo re ithutago sona Lentšung la Modimo le ka mohlala o mobotse wa Bakriste bao ba gotšego ka tsebo, re ka apara motho yo mofsa “yo a bopilwego go ya ka thato ya Modimo” ge re dira maiteko.

Hlagolela Mekgwa e Mebotse ya go Bolela

12. Go bolela therešo go kgothaletša botee bjang gona ke ka baka la’ng go le thata gore ba bangwe ba bolele therešo?

¹² Go bohlokwa gore batho ba bolele therešo ka lapeng goba ka phuthegong. Go bolela ka go se pepetletše, ka bolokologi le ka botho go ka dira gore batho ba batamelane. (Joh. 15:15) Eupša go thwe’ng ge e ba motho a botša ngwanabo maaka? Ge ngwanabo a lemoga gore o boditšwe maaka, a ka se sa mmota gakaalo. O ka  kwešiša seo se dirilego gore Paulo a ngwale gore: “Bolelang therešo yo mongwe le yo mongwe wa lena le moagišani wa gagwe, gobane re ditho seng sa rena.” (Baef. 4:25) Motho yo a tlwaetšego go bolela maaka, mohlomongwe a thomile go a bolela e sa le ngwana, a ka thatafalelwa ke go thoma go bolela therešo. Eupša Jehofa a ka thaba ge a mmona a dira maiteko e bile o tla mo thuša.

13. Go phema polelo e gobošago go akaretša’ng?

¹³ Jehofa o re ruta gore re kgothaletše moya wa tlhompho le botee ka phuthegong le ka lapeng ka go re beela mellwane e tiilego tseleng yeo re bolelago ka yona. “A polelo e bodilego e se ke ya tšwa molomong wa lena . . . A kgalako yohle e bošula le bogale le pefelo le mašata le polelo e gobošago di tlošwe go lena gotee le bobe bjohle.” (Baef. 4:29, 31) Tsela e nngwe yeo re ka phemago go bolela mantšu ao a kgopišago ke gore re hlagolele boemo bja kgopolo bja go hlompha ba bangwe kutšwanyana. Ka mohlala, monna yo a dulago a hlaba mosadi wa gagwe ka mantšu o swanetše go katanela go fetoša tsela yeo a mo lebelelago ka yona, kudu-kudu ge a dutše a ithuta kamoo Jehofa a lebelelago basadi ka gona. Modimo o bile o tlotša basadi ba bangwe ka moya o mokgethwa, a ba nea tebelelo ya go buša e le dikgoši-gotee le Kriste. (Bagal. 3:28; 1 Pet. 3:7) Ka mo go swanago, mosadi yo a nago le mokgwa wa go hlabela monna wa gagwe mašata o swanetše go fetoga ge a ithuta kamoo Jesu a ilego a itshwara ka gona ge a be a kwerwa.—1 Pet. 2:21-23.

14. Ke ka baka la’ng go bontšha kgalefo go le kotsi?

¹⁴ Go se kgone go laola kgalefo go tswalana kgaufsi kudu le polelo e gobošago. Se le sona se ka aroganya batho. Kgalefo e swana le mollo. Go bonolo gore e tšwe taolong le go baka mathata. (Die. 29:22) Motho yo a nago le mabaka a kwagalago a go se thabe o swanetše go ba šedi ka go laola kgalefo ya gagwe gore a pheme go senya ditswalano tše bohlokwa. Bakriste ba swanetše go katanela go lebalelana, ba se ke ba boloka sekgopi le go tsoša taba yeo gape. (Ps. 37:8; 103:8, 9; Die. 17:9) Paulo o eleditše Baefeso ka gore: “Galefang, eupša le se ke la dira sebe; letšatši le se ke la sobela le galefile, le gona le se ke la nea Diabolo sebaka.” (Baef. 4:26, 27) Ge motho a palelwa ke go laola kgalefo ya gagwe, a ka nea Diabolo sebaka sa go bontšha gore ga go na botee e bile go na le dikgohlano ka phuthegong.

15. Go tšea selo seo e sego sa rena go ka ba le mafelelo afe?

¹⁵ Go hlompha dilo tša ba bangwe go tlaleletša boteeng bja phuthego. Re bala gore: “Yo a utswago a se ke a hlwa a utswa.” (Baef. 4:28) Batho ba Jehofa ba a botana. Ge e ba Mokriste a ka senya go botwa mo go bjalo ka go tšea selo se e sego sa gagwe, a ka senya tswalano e bjalo e thabišago.

Go Rata Modimo go Dira Gore re be Boteeng

16. Re ka diriša bjang mantšu a kgothatšago gore re matlafatše botee bja rena?

¹⁶ Botee bja phuthego ya Bokriste bo dirwa ke gore go rata Modimo go tutuetša bohle go swarana ka lerato. Go leboga botho bja Jehofa go re tutueletša go dira maiteko a tseneletšego a go diriša keletšo e rego: “[Bolelang] polelo e botse ya go aga moo go nyakegago, gore e fetišetše se se rategago go bao ba kwago. . . . E-bang ba botho yo mongwe go yo mongwe, le šokelane ka bonolo, le lebalelane ka bolokologi go etša ge Modimo le yena a le lebaletše ka bolokologi ka Kriste.” (Baef. 4:29, 32) Ka botho Jehofa o lebalela batho ba ba sa phethagalago bjalo ka rena. Na le rena ga se ra swanela go lebalela ba bangwe ge re bona go se phethagale ga bona?

17. Ke ka baka la’ng re swanetše go katana ka matla gore re kgothaletše botee?

¹⁷ Botee bja batho ba Modimo bo tagafatša Jehofa. Moya wa gagwe o re tutuetša ka ditsela tše di fapa-fapanego gore re kgothaletše botee. Ruri re ka se nyake go gana ge moya o re hlahla. Paulo o ngwadile gore: “Le se ke la nyamiša moya o mokgethwa wa Modimo.” (Baef. 4:30) Botee ke letsaka leo re swanetšego go le šireletša. Bo dira gore bohle bao ba lego go bjona ba thabe e bile bo tagafatša Jehofa. “Ka gona, e-bang baekiši ba Modimo, le le bana ba ratwago, le tšwele pele le sepela leratong.”—Baef. 5:1, 2.

O be o tla Araba Bjang?

• Ke boemo bofe bja kgopolo bjo bo kgothaletšago botee go Bakriste?

• Boitshwaro bja rena bo kgothaletša botee bjang ka phuthegong?

• Mantšu a rena a ka re thuša bjang gore re kgone go dirišana le ba bangwe?

[Dipotšišo tša Thuto]

[Seswantšho go letlakala 17]

Bao ba tšwago ditlogong tše di sa swanego ba boteeng

[Seswantšho go letlakala 18]

Na o kwešiša dikotsi tša go bapala ka lerato?