Botee bo Hlaola Borapedi bja Therešo

“Ke tla ba dira gore ba be le botee bjalo ka mohlape ka lešakeng.”—MIKA 2:12, NW.

1. Tlholo e nea bjang bohlatse bja gore Modimo ke yo bohlale?

MOPSALME o itše: “Morêna, medirô ya xaxo xa se ka boati! O e dirile xohle ka bohlale; lefase le tletše dibopiwa tša xaxo.” (Ps. 104:24) Bohlale bja Modimo bo bonagala dimeleng, dikhunkhwaneng, diphoofolong le dipaketherieng lefaseng le leo le raraganego ka tsela e kgahlišago. Le gona, go na le dilo tše dikete-kete tše di diregago mmeleng wa gago, go tloga sethong se senyenyane-nyenyane sa mmele gomme ka moka di a šomišana gore o be motho yo a feletšego le yo a phetšego gabotse.

2. Bjalo ka ge go bontšhitšwe go letlakala 13, ke ka baka la’ng botee bjo bo bego bo le gona magareng ga Bakriste bo be bo ka bonagala eka ke mohlolo?

² Jehofa o bopile batho gore ba ithekge ka ba bangwe. Lefase le tletše ka batho bao ba bogegago ka ditsela tše di fapa-fapanego, ba e-na le dimelo le bokgoni tše di sa swanego. Go tlaleletša moo, Modimo o bopile batho ba mathomo ba e-na le dika tše di swanago le tša gagwe tšeo di bego di tla dira gore ba kgone go dirišana le ba bangwe le go ithekga ka ba bangwe. (Gen. 1:27; 2:18) Lega go le bjalo, lefase la batho ka bolona le arogantšwe le Modimo gomme le ka mohla ga se la ka la ba le botee. (1 Joh. 5:19) Ka gona, go ela hloko gore phuthego ya Bokriste ya lekgolong la pele la nywaga e be e tletše ka batho ba sa swanego bjalo ka makgoba a Efeso, basadi ba tumilego ba Bagerika, banna ba Bajuda bao ba rutegilego le batho bao mathomong ba bego ba rapela medimo ya diswantšho, go bontšha gore khutšo ya bona e be e le ya mohlolo.—Dit. 13:1; 17:4; 1 Bathes. 1:9; 1 Tim. 6:1.

3. Beibele e hlalosa bjang botee bja Bakriste gomme re tla ahla-ahla’ng sehlogong se?

³ Borapedi bja therešo bo dira gore batho ba kgone go dirišana ka kwano eka ke ditho tša mmele o tee. (Bala 1 Bakorinthe 12:12, 13.) Tše dingwe tša dilo tšeo re tlago go di ahla-ahla sehlogong se ke gore: Borapedi bja therešo bo dira bjang gore batho ba be le botee? Ke ka baka la’ng e le Jehofa feela yo a ka dirago gore batho ba dimilione bao ba tšwago ditšhabeng ka moka ba be le botee? Ke dilo dife tšeo di šitišanago le botee bja rena tšeo Jehofa a re thušago gore re di pheme? Mabapi le botee, Bokriste bja therešo bo fapana bjang le Bojakane?

Borapedi bja Therešo bo Dira Bjang Gore Batho ba be le Botee?

4. Borapedi bja therešo bo dira bjang gore batho ba be le botee?

⁴ Batho bao ba lego borapeding bja therešo ba lemoga gore ka ge Jehofa a bopile dilo ka moka, ke yena Mmuši yo a swanetšego wa legohle. (Kut. 4:11) Ka gona, gaešita le ge Bakriste ba therešo ba phela mafelong a sa swanego le ka tlase ga maemo a sa swanego, ba latela melao e swanago ya Modimo gomme ba phela ka melao ya motheo e swanago ya Beibele. Barapedi ka moka ba therešo ka mo go swanetšego ba bitša Jehofa gore ke ‘Tate.’ (Jes. 64:8; Mat. 6:9) Ka gona, ka moka ga bona ke bana ba motho ba moya gomme ba thabela botee bjo bo kgahlišago bjoo mopsalme a boletšego ka bjona ge a re: “A botse le thatêxô! xe bana ba motho bà dula ba kwana!”—Ps. 133:1.

5. Ke seka sefe seo se dirago gore barapedi ba therešo ba be le botee?

⁵ Gaešita le ge Bakriste ba therešo ba se ba phethagala, ba rapela gotee ka kwano ka ge ba ithutile go ratana. Jehofa o ba ruta go ratana go feta kamoo ba bangwe ba ka dirago ka gona.  (Bala 1 Johane 4:7, 8.) Lentšu la gagwe le re: “Aparang maikwelo a borutho a bonolo a lešoko, botho, monagano o ikokobeditšego, boleta le bopelotelele. Tšwelang pele le kgotlelelana gomme le lebalelana ka bolokologi ge e ba motho a e-na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo. Eupša, ka ntle le dilo tše ka moka, aparang lerato, gobane ke setlemo se se phethagetšego sa botee.” (Bakol. 3:12-14) Setlemo se se se phethagetšego sa botee—lerato—ke seka sa motheo seo se hlaolago Bakriste ba therešo. Na le wena ga se wa ka wa bona gore botee bjo ke seka seo se hlaolago borapedi bja therešo?—Joh. 13:35.

6. Kholofelo ya Mmušo e re thuša bjang go thabela khutšo?

⁶ Barapedi ba therešo ba na le botee ka baka la ge ba lebeletše gore Mmušo wa Modimo ke yona kholofelo e nnoši bakeng sa moloko wa batho. Ba a tseba gore kgaufsinyane Mmušo wa Modimo o tla tšea legato la mebušo ya batho gomme wa šegofatša batho bao ba kwago ka khutšo ya kgonthe le ya ka mo go sa felego. (Jes. 11:4-9; Dan. 2:44) Ka gona, Bakriste ba latela seo Jesu a se boletšego ka balatedi ba gagwe ge a re: “Bona ga se karolo ya lefase go etša ge nna ke se karolo ya lefase.” (Joh. 17:16) Bakriste ba therešo ga ba tšee karolo dintweng tša lefase; ka baka leo, ba thabela botee gaešita le ge bao ba ba dikologilego ba le ntweng.

Mothopo o Nnoši wa Tlhahlo ya Moya

7, 8. Tlhahlo ya Beibele e kgatha tema bjang boteeng bja rena?

⁷ Bakriste ba lekgolong la pele la nywaga ba ile ba thabela khutšo ka ge ba be ba hwetša kgothatšo go tšwa mothopong o tee. Ba be ba lemoga gore Jesu o be a ruta le go hlahla phuthego ka sehlopha se bušago, seo se bopšago ke baapostola le banna ba bagolo kua Jerusalema. Banna ba bao ba ineetšego ba be ba thea dithuto tša bona Lentšung la Modimo gomme ba be ba e-na le balebeledi ba basepedi bao ba išago tlhahlo ya bona diphuthegong tšeo di lego dinageng tše dintši. Mabapi le balebeledi bao ba basepedi, Beibele e re: “Ge ba dutše ba sepela go phatša metse yeo ba be ba iša ditaelo go bao ba lego moo gore ba di latele, e lego tšeo baapostola le bagolo bao ba lego Jerusalema ba bego ba dirile phetho ka tšona.”—Dit. 15:6, 19-22; 16:4.

⁸ Ka tsela e swanago lehono, Sehlopha se Bušago seo se bopšago ke Bakriste bao ba tloditšwego ka moya se kgatha tema boteeng bja diphuthego tša lefase ka bophara. Sehlopha se Bušago se gatiša dikgatišo tšeo di nago le kgothatšo ya moya ka maleme a mantši. Dijo tše tša moya di theilwe Lentšung la Modimo. Ka gona, seo se rutwago ga se tšwe go batho eupša se tšwa go Jehofa.—Jes. 54:13.

9. Modiro wa rena woo re o neilwego ke Modimo o re thuša bjang gore re be le botee?

⁹ Balebeledi ba Bakriste le bona ba godiša botee ka go etelela pele modiro wa boboledi. Moya woo wa tirišano woo o dirago gore go be le botee go bao ba šomago gotee tirelong ya Modimo ke o matla go feta moya woo o kopanyago batho ba lefase bao ba tlwaelanego. Phuthego ya Bokriste  ga se ya hlomelwa go itloša bodutu eupša e hlometšwe go tumiša Jehofa le go phetha modiro—modiro wa go bolela ditaba tše dibotse, wa go dira barutiwa le go aga phuthego. (Baroma 1:11, 12; 1 Bathes. 5:11; Baheb. 10:24, 25) Ka gona, moapostola Paulo o be a ka kgona go bolela ka Bakriste a re: “Le ema le tiile ka moya o tee, ka moya o tee le katana le bapelane bakeng sa tumelo ya ditaba tše dibotse.”—Bafil. 1:27.

10. Bjalo ka batho ba Modimo, re boteeng ka ditsela dife?

¹⁰ Ka mo go swanago, bjalo ka batho ba Jehofa, re na le botee ka ge re amogela bolaodi bja Jehofa, re rata bana babo rena, re holofela Mmušo wa Modimo le go hlompha bao Modimo a ba dirišago go etelela pele gare ga rena. Jehofa o re thuša go phema maemo a mangwe ao ka baka la go se phethagale a ka senyago botee bja rena.—Baroma 12:2.

Go Fenya Boikgogomošo le Lehufa

11. Ke ka baka la’ng boikgogomošo bo aroganya batho gomme Jehofa o re thuša bjang gore re bo fenye?

¹¹ Boikgogomošo bo aroganya batho. Motho yo a ikgogomošago o rata go ipona a phagametše batho ba bangwe gomme gantši o thaba ka tsela e nago le boithati ge a ikgantšha. Eupša se gantši ga se dire gore go be le botee; bao ba kwago ge motho a ikgantšha ba ka ba le lehufa. Morutiwa Jakobo o re botša ka go lebanya gore: “Go ikgantšha mo go bjalo ka moka go kgopo.” (Jak. 4:16) Go tšeela batho ba bangwe fase ga se go bontšha lerato. Se se kgahlišago ke gore Jehofa ke mohlala o mobotse wa boikokobetšo ka gobane o kgona go dirišana le batho bao ba sa phethagalago bjalo ka rena. Dafida o ngwadile gore: “Boikokobetšo bja gago [Modimo] bo a nkgodiša.” (2 Sam. 22:36, NW) Lentšu la Modimo le re thuša go fenya boikgogomošo ka go re ruta go nea mabaka ka tsela e botse. Paulo o ile a budulelwa go botšiša gore: “Ke mang yo a go dirago gore o fapane le yo mongwe? Ruri, ke eng seo o nago le sona seo o sa se fiwago? Bjale ge e ba ruri o se filwe, ke ka baka la’ng o ikgantšha bjalo ka ge eka ga se wa se fiwa?”—1 Bakor. 4:7.

12, 13. (a) Ke ka baka la’ng go le bonolo go ba le lehufa? (b) Go lebelela ba bangwe ka tsela yeo Jehofa a ba lebelelago ka yona go ka ba le mafelelo afe?

¹² Lehufa ke lepheko le lengwe leo le dirago gore go se ke gwa ba le botee. Ka baka la go se phethagale ga leabela, ka moka ga rena re na le “tshekamelo ya go ba le mona,” e bile ka dinako tše dingwe gaešita le batho bao ba nago le nako e telele e le Bakriste ba ka ikwa ba e-na le lehufa ka baka la maemo a ba bangwe, dilo tšeo ba nago le tšona, ditokelo goba bokgoni. (Jak. 4:5) Ka mohlala, ngwanabo rena yo a nago le lapa a ka ba le lehufa ge yo mongwe yo e lego modiredi wa nako e tletšego a e-na le ditokelo tše itšego, a sa lemoge gore le modiredi yoo a ka ba le hlasenyana ya lehufa ge a bona ngwanabo rena yo a nago le lapa a e-na le bana ba gagwe. Re ka dira bjang gore lehufa le bjalo le se ke la senya botee bja rena?

¹³ Gopola gore Beibele e bapiša ditho tša batlotšwa tša phuthego ya Bokriste le ditho tša mmele bakeng sa go re thuša go phema lehufa. (Bala 1 Bakorinthe 12:14-18.) Gaešita le ge o ka kgona go bona leihlo la gago eupša o sa kgone go bona pelo ya gago, na bobedi bja tšona ga di bohlokwa? Ka mo go swanago, Jehofa o lebelela bohle bao e lego ditho tša phuthego ba le bohlokwa gaešita le ge ka nako e itšego ba bangwe ba ka bonagala ba phagametše ba bangwe. Ka gona anke re lebeleleng bana babo rena ka tsela yeo Jehofa a ba lebelelago ka yona. Go e na le go hufegela ba bangwe, re ka bontšha go tshwenyega ka bona le go ba kgahlegela. Ka go dira bjalo, re dira gore phapano magareng ga Bokriste bja therešo le dikereke tša Bojakane e bonagale gabotse.

 Bojakane—Bo Tumile Kudu ka go ba le Dikarogano

14, 15. Go tlile bjang gore Bokriste bja bohlanogi bo se ke bja ba le botee?

¹⁴ Botee bja Bakriste ba therešo bo fapana kudu le dikgohlano tše di lego gona dikerekeng tša Bojakane. Lekgolong la bone la nywaga, Bokriste bja bohlanogi bo be bo apareditše kudu mo e lego gore bo ile bja laolwa ke mmušiši wa boheitene wa Roma, a dira gore Bojakane bo gole. Ke moka, ganyenyane-ganyenyane mebušo e mentši e ile ya arogana le Roma gomme ya hloma dikereke tša Naga ya yona.

¹⁵ Mebušo yeo e mentši e ile ya lwantšhana ka nywaga-kgolo e mentši. Lekgolong la bo-17 le la bo-18 la nywaga, batho ba kua Brithania, Fora le United States ba ile ba kgothaletša gore batho ba ineele Dinageng tša gabo bona gore mafelelong, botšhaba bo be bjalo ka bodumedi. Lekgolong la bo-19 le la bo-20 la nywaga, batho ba bantši ba ile ba thoma go nagana kudu ka botšhaba. Mafelelong, dikereke tša Bojakane di ile tša arogana ka dihlopha, tšeo bontši bja tšona di bego di thekga botšhaba. Bao ba tsenago kereke ba ile ba ba ba ya ntweng kgahlanong le badumedi-gotee le bona ba setšhaba se sengwe. Lehono Bojakane bo aroganywa ke ditumelo tša bjona le botšhaba.

16. Bao ba lego Bojakaneng ba aroganywa ke ditaba tša mohuta ofe?

¹⁶ Lekgolong la bo-20 la nywaga, dihlopha tše makgolo tša Bojakane di ile tša thoma lesolo la mohlakanelwa la go kgothaletša botee. Eupša ka morago ga nywaga-some e mentši ya lesolo leo, ke dikereke tše sego kae feela tšeo di ilego tša ba le botee gomme bao ba tsenago kereke ba sa dutše ba fapana ka dikgopolo ditabeng tše bjalo ka tlhagelelo, go ntšha mpa, bosodoma le go dira basadi baruti. Dikarolong tše dingwe tša Bojakane, baetapele ba bodumedi ba leka go kopanya batho ba dihlopha tše di fapa-fapanego ka go dira gore ba hlokomologe dithuto tšeo di ilego tša ba aroganya mathomong. Lega go le bjalo, go hlokomologa dithuto tše bjalo go dira gore batho ba šale ba fokola tumelong e bile ga go dire gore go be le botee ka malapeng a Bojakane ao a aroganego ka bodumedi.

Borapedi bja Therešo ga bo na Botšhaba

17. Go ile gwa bolelwa bjang e sa le pele gore borapedi bja therešo bo tla dira gore batho e be batee “bofelong bya mabaka”?

¹⁷ Gaešita le ge batho ba arogane o šoro gona bjale go feta le ge e le neng pele, botee bo sa dutše bo dira gore Bakriste ba therešo e be bao ba fapanego. Moporofeta wa Modimo e lego Mika o boletše e sa le pele gore: “Ke tla ba dira gore ba be le botee bjalo ka mohlape ka lešakeng.” (Mika 2:12, NW) Mika o boletše e sa le pele gore borapedi bja therešo bo tla phagama go feta mehuta ka moka ya borapedi, e ka ba bja medimo ya maaka goba bja Naga yeo e lebelelwago e le modimo. O ngwadile gore: “Bofelong bya mabaka thaba ya Ntlo ya Modimo e tlo ba e thekxilwe xodimo xa dithaba, è beilwe xodimo xa meboto; ’me dithšaba di tlo thšoloxêla mo xo yôna. Byale xe sethšaba se sengwê le se sengwê sè e-ya ka tsela ya modimo wa sôna, rena re tlo fêla rè e-ya ka tsela ya Morena Modimo wa rena.”—Mika 4:1, 5.

18. Borapedi bja therešo bo re thušitše go dira diphetogo dife?

 ¹⁸ Mika o ile a ba a hlalosa kamoo borapedi bja therešo bo tlago go dira gore bao e kilego ya ba manaba ba be boteeng. “Merafô-rafô [ya batho] e tlo ya xôna è re: A re yeng re rotoxêlê thabeng ya Morêna, Ngwakong wa Modimo wa Jakobo, a re rutê ’tsela tš’axwe. . . . Ke mo ba tl’o xo tšea dithšoša ba rula mexoma ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.” (Mika 4:2, 3) Bao ba tlogelago borapedi bja medimo yeo e dirilwego ke batho goba bja ditšhaba gomme ba amogela borapedi bja Jehofa ba thabela botee bja lefase ka bophara. Modimo o ba ruta ditsela tša lerato.

19. Borapedi bja therešo bjo bo dirago gore batho ba dimilione ba be boteeng bo hlatsela’ng?

¹⁹ Botee bja lefase ka bophara bja Bakriste ba therešo lehono ke bja moswana-noši e bile ke bohlatse bjo bo lemogegago bja gore Jehofa o tšwela pele a hlahla batho ba gagwe ka moya wa gagwe. Batho bao ba tšwago ditšhabeng ka moka ba ba boteeng go feta le ge e le neng pele historing ya motho. Se ke phethagatšo e kgahlišago ya seo se bolelwago go Kutollo 7:9, 14 gomme se bontšha gore kgaufsinyane barongwa ba Modimo ba tla lokolla “diphefo” tšeo di tlago go fediša tshepedišo ya gona bjale e kgopo ya dilo. (Bala Kutollo 7:1-4, 9, 10, 14.) Na go ba boteeng bja lefase ka bophara ga se tokelo? Yo mongwe le yo mongwe wa rena a ka tsenya letsogo bjang boteeng bjo bjalo? Se se tla ahla-ahlwa sehlogong se se latelago.

O be o tla Araba Bjang?

• Borapedi bja therešo bo dira bjang gore batho ba be boteeng?

• Re ka thibela lehufa bjang gore le se ke la senya botee bja rena?

• Ke ka baka la’ng barapedi ba therešo ba sa aroganywe ke botšhaba?

[Dipotšišo tša Thuto]

[Seswantšho go letlakala 13]

Bakriste ba lekgolong la pele la nywaga ba be ba e-tšwa ditlogong tše dintši?

[Diswantšho go letlakala 15]

O tlaleletša boteeng bjang ge o thuša medirong ya go agwa ga Diholo tša Mmušo?