Go Dula ke Swaregile Mokgatlong wa Jehofa

Ka ge go anega Vernon Zubko

KE GODIŠEDITŠWE polaseng ya kgaufsi le Stenen, motsaneng wa profense ya Saskatchewan, kua Canada. Batswadi ba-ka e lego Fred le Adella, ba be ba šoma ka thata go hlokomela nna le kgaetšedi ya-ka yo mogolo Aurellia gotee le baratho ba-ka e lego Alvin, Allegra le Dary moyeng le nameng. Go ba go fihla le lehono, re sa dutše re leboga gore batswadi ba rena ba re rutile therešo.

Tate, yo e bego e le Mokriste yo a tloditšwego, e be e le moebangedi yo a sa boifego. O šomile ka thata go re hlokomela, eupša o ile a kgonthišetša gore batho ba a tseba gore ke yena Hlatse. Ka mehla o be a bolela ka therešo. Nka se tsoge ke lebetše mafolofolo le go ba sebete ga gagwe. O be a dulela go mpotša gore: “Dula o swaregile mokgatlong wa Jehofa gomme o tla phema mathata.”

Gantši re be re dira modiro wa setarateng kua Stenen le mafelong a kgaufsi. Ka mehla ke be ke thatafalelwa ke go dira bjalo. Toropo e nngwe le e nngwe e be e e-na le bo-mphenyašilo ba yona gomme ba be ba e-tla go rena ba bafsa le go re kwera. Ge ke be ke e-na le nywaga e seswai, ke be ke eme khutlong e nngwe ke swere dimakasine tša Morokami le Phafoga! ge sehlopha sa bafsa se e-tla go nna. Ba ile ba phamola kefa ya-ka e mpsha hlogong gomme ba e bea koteng yeo ke bego ke eme kgaufsi le yona. Ke leboga gore ngwanabo rena yo a godilego o be a ntebeletše gomme a bona seo se bego se direga. O ile a mpatamela gomme a mpotšiša gore: “Vern, na go na le bothata?” Kapejana bašemane ba ile ba tsena bjang botala. Le ge phihlelo yeo e be e nyamiša go se nene, e nthutile gore ge motho a dira modiro wa setarateng, o swanetše go sepela-sepela gomme a se ke a ema bjalo ka kota. Tlwaetšo e bjalo ya ge ke be ke sa gola le yona e mphile sebete sa go ya modirong wa ntlo le ntlo.

Nna le Alvin re kolobeditšwe ka May 1951. Ke be ke e-na le nywaga e 13. Ke sa dutše ke gopola gore Ngwanabo rena Jack Nathan, yo a neilego polelo ya kolobetšo, o re kgothaleditše gore re se ke ra dumelela kgwedi e feta re sa ka ra bolela ka Jehofa. * Lapa lešo le be le dutše le lebelela tirelo ya bobulamadibogo e le modiro o kaone-kaone wo motho a ka o dirago. Ka gona ka 1958, ka morago ga go fetša sekolo, ke ile ka hudugela Winnipeg, Manitoba, go yo bula madibogo. Le ge tate a be a thabela gore ke šome le yena kgwebong ya lapa ke le motho yo a hlwekišago, yena le mma ba be ba nkgothaletša kudu go tsenela tirelo ya nako e tletšego gomme ba ile ba nthekga ge ke be ke huduga.

Legae le Lefsa le Modirišani yo Mofsa

Ka 1959, ofisi ya lekala e ile ya kgopela gore motho le ge e le ofe yo a ka kgonago go hudugela Quebec a dire bjalo ka ge go be go nyakega baebangedi ba bantši kudu. Ke ile ka ya Montreal go yo bula madibogo. Ye e be e le phetogo e le  ruri! Se e be e le selo se sefsa bophelong bja-ka ge ke be ke ithuta go bolela Sefora le go tlwaelana le setšo se se fapanego. Molebeledi wa rena wa tikologo o ile a mpotša gore, “O se ke wa re, ‘Se ke seo ke bego ke se dira kua gae.’” Ye e be e le keletšo e botse kudu.—1 Bakor. 9:22, 23.

Ke be ke se na mothuši wa mmulamadibogo ge ke be ke hudugela kua Quebec. Lega go le bjalo, kgaetšedi yo monyenyane yo a bitšwago Shirley Turcotte, yo ke bego ke kopane le yena pejana kua Winnipeg, o ile a thoma go ba modirišani wa-ka wa sa ruri ge re be re nyalana ka February 1961. Le yena o be a e-tšwa lapeng leo le ratago Jehofa. Gaešita le ge ka nako yeo ke be ke sa lemoge, o be a tla ba mothopo wa matla le kgothatšo go theoša le nywaga.

Go Etela Gaspé

Ka morago ga nywaga mebedi re nyalane, re ile ra kgethwa go ba babulamadibogo ba ba kgethegilego kua Rimouski, Quebec. Seruthwaneng se se latelago, ofisi ya lekala e ile ya re kgopela gore re ye go dira modiro wa boboledi kua Gaspé Peninsula, go akaretša le lebopong la ka bohlabela bja Canada. Re be re abetšwe gore re bjale dipeu tše dintši tša therešo kamoo re bego re ka kgona ka gona. (Mmo. 11:6) Re ile ra rwala dimakasine tše fetago 1 000 ka koloing le dipuku tše e ka bago tše 400, go akaretša le dijo le diaparo gomme ra thoma leeto la botelele bja kgwedi. Re ile ra šoma metsana ka moka ya Gaspé ka tatelano. Seteišene sa radio sa lefelong leo se ile sa lemoša batho gore Dihlatse di tseleng gomme sa ba botša gore ba se ke ba amogela dikgatišo tša rena. Lega go le bjalo, badudi ba bantši ba ile ba se kwešiše tsebišo yeo gomme ba nagana gore e be e bapatša dikgatišo tša rena, ka gona ba ile ba di amogela.

Nywageng yeo, tokologo ya go dira boboledi e be e le selo se sefsa dikarolong tše dingwe tša Quebec gomme go be go tlwaelegile gore maphodisa a re emiše. Se se diregile motseng o mongwe moo re bego re sepediša dikgatišo mo e nyakilego go ba mojakong o mongwe le o mongwe. Lephodisa le ile la re kgopela gore re ye le lona seteišeneng sa maphodisa gomme re ile ra ya. Ke ile ka hwetša gore ramolao wa motse woo o be a ntšhitše taelo ya gore re kgaotše go dira boboledi. Ka ge moetapele wa maphodisa a be a se gona letšatši ka moka, ke ile ka nea ramolao lengwalo leo le bego le ngwadilwe gabotse le le tšwago ofising ya lekala ya Toronto leo le bego le hlalosa gore re na le tshwanelo ya go dira boboledi. Ka morago ga go bala lengwalo leo, ramolao o ile a bolela kapejana a re: “Bona, ga ke nyake mathata. Moruti wa mo motseng ke yena a mpoditšego gore ke le thibele.” Ka ge re be re nyaka gore batho ba tšhemong yeo ba tsebe gore mošomo wa rena ga se wo o sego molaong, kapejana re ile ra boela moo lephodisa le bego le re emišitše gona gomme ra tšwela pele ka bodiredi bja rena.

Mesong e latetšego ge re be re boela go yo bona moetapele wa maphodisa, o be a nyamišitšwe ke go kwa gore re be re thibetšwe. Nkabe o kwele ge a be a leletša ramolao! Mohlankedi wa maphodisa o re boditše gore ge re ka ba le mathata, re lebe go yena thwii gomme o tla swaragana le bothata bjoo. Le ge re be re sa tsebane e bile re sa tsebe Sefora gabotse, batho ba be ba bontšha botho e bile ba e-na le moya wa go amogela baeng. Eupša re ile ra ipotšiša gore: ‘Na ba tla tsoga ba tsebile therešo?’ Re ile ra hwetša karabo ka morago ga nywaga e mmalwa ge re be re boela go yo aga Diholo tša Mmušo go dikologa Gaspé. Re ile ra hwetša gore bontši bja bao re bego re neile bohlatse go bona e šetše e le bana babo rena. Ka kgonthe, Jehofa ke yena a medišago.—1 Bakor. 3:6, 7.

Re Hwetša Bohwa

Morwedi wa rena Lisa o belegwe ka 1970. Bohwa bjo bjo bo tšwago go Jehofa bo re tlišeditše lethabo le legolo bophelong. Shirley le Lisa ba be ba šoma le nna medirong ya go aga Diholo tša Mmušo. Ge Lisa a be a fetša sekolo, o itše: “Tate le mma, ka ge e le nna ke le ntšhitšego tirelong ya nako e tletšego ka nakwana, ke tla leka go tswalela sekgoba seo ka go ba mmulamadibogo.” Ka morago ga nywaga e fetago e 20, Lisa o sa dutše a hlankela e le mmulamadibogo, eupša gona bjale o hlankela le monna wa gagwe,  Sylvain. Ba bile le tokelo ya go šoma gotee medirong ya go aga ya ditšhaba-tšhaba. Bjalo ka lapa re ikemišeditše go boloka maphelo a rena a le bonolo le go itira bao ba hwetšagalago bakeng sa tirelo ya Jehofa. Ga se ka lebala mantšu a Lisa ge a be a thoma go bula madibogo. Ge e le gabotse, o ntutueditše go boela tirelong ya nako e tletšego ka 2001 gomme ke be ke dutše ke bula madibogo go tloga ka nako yeo. Go bula madibogo go tšwela pele go nthuta go bota Jehofa dilong ka moka tšeo ke di dirago le go phela bophelo bjo bonolo eupša e le bjo bo kgotsofatšago le bjo bo thabišago.

Modiro wa go Aga o Nyaka Lerato le Potego

Jehofa o nthutile gore ge nka itira yo a hwetšagalago gomme ka amogela kabelo le ge e le efe yeo a mphago yona, ke tla buna ditšhegofatšo tše dintši. Ke tokelo e kgolo go hlankela Komiting ya tša Meago ya Tikologo le go šoma medirong ya go aga le bana babo rena le dikgaetšedi go dikologa Quebec le mafelo a mangwe.

Le ge baithapi ba bangwe ba sa nape ba e-na le bokgoni gakaalo bja go nea dipolelo sethaleng, ba phadima bjalo ka dinaledi medirong ya go aga Diholo tša Mmušo. Bana babo rena ba bao ba rategago ba šoma ka pelo ka moka gomme ditalente tša bona di a bonagala. Mafelelong go ba le moago o mobotse wo o dirišetšwago borapedi bja Jehofa.

Ke botšišitšwe gantši gore: “Dika tša bohlokwa kudu tša go ba moithapi modirong wa go aga Holo ya Mmušo ke dife?” Phihlelo e nthutile gore motho o swanetše go thoma ka go rata Jehofa le Morwa wa gagwe gotee le barwarre ka moka. (1 Bakor. 16:14) Sa bobedi, go nyakega potego. Ge dilo di sa sepele ka tsela yeo re di nyakago ka yona—ka ge di fela di sa sepele gabotse—motho yo a botegago o tla tšwela pele a thekga thulaganyo ya pušo ya Modimo. Go botega go tla mo tutueletša go ithapela mediro ya nako e tlago.

Go Leboga Jehofa

Le ge tate a hwile ka 1985, ke dula ke gopola keletšo yeo a mphilego yona ya go dula ke swaregile mokgatlong wa Jehofa. Go swana le ba bangwe bao ba hweditšego kabelo ya legodimong ya mokgatlo wa Jehofa, ga go pelaelo gore o swaregile kudu mo a lego gona. (Kut. 14:13) Ga bjale mma o na le nywaga e 97. Ka baka la go hwa lehlakore, ga a sa kgona go bolela gabotse; lega go le bjalo, o sa dutše a tseba Beibele. O tsopola Beibele ge a ngwala mangwalo gomme o re kgothaletša go tšwela pele re hlankela Jehofa ka potego. Ruri rena bana bohle re leboga batswadi ba bjalo ba lerato!

E bile ke leboga Jehofa ka go mpha Shirley, mosadi wa-ka yo gape e lego molekane yo a botegago. O dula a gopola keletšo yeo mmagwe a mo neilego yona ya gore: “Vern o tla dula a swaregile therešong gomme o swanetše go ithuta go se be le lehufa ge a thuša ba bangwe.” Ge re be re nyalana nywageng e 49 e fetilego, re ile ra dira phetho ya gore re tla gola gotee re hlankela Jehofa gomme ge e ba bobedi bja rena re ka phologa bofelo bja tshepedišo ye, re tla boela ra ba bafsa gotee gomme ra tšwela pele re mo hlankela ka mo go sa felego. Ee, re bile le ‘go gontši mo re go dirilego modirong wa Morena.’ (1 Bakor. 15:58) Jehofa o re hlokometše e le ruri gomme o kgonthišeditše gore ga re hloke selo se sebotse.

[Mongwalo wa tlase]

[Seswantšho go letlakala 31]

“Bjalo ka lapa re ikemišeditše go boloka maphelo a rena a le bonolo le go itira bao ba hwetšagalago bakeng sa tirelo ya Jehofa”