Go Iphahlelela Jehofa o go Lebelela Bjang?

MONNA o ile a re: “Mosadi yo O mmeilexo xore a bê le nna, ké yêna a mphilexo sehlare seo, ka ja.” Mosadi yena a re: “Nôxa e mphorile, ka ja.” Mantšu a ao batswadi ba rena ba pele, Adama le Efa, ba a boditšego Modimo a ile a bontšha gore motho o rata go iphahlelela.—Gen. 3:12, 13.

Tsela yeo Jehofa a ilego a ahlola Adama le Efa ka baka la go se kwe ga bona ka boomo e ile ya bontšha gore ga a amogele go iphahlelela ga bona. (Gen. 3:16-19) Ka gona, na re ka phetha ka gore le ka mohla Jehofa ga a dumele ge re iphahlelela? Goba na ka dinako tše dingwe o a dumela ge re iphahlelela? Ge e ba go le bjalo, re ka tseba bjang phapano magareng ga go iphahlelela mo go swanetšego le mo go sa swanelago? Pele re hwetša karabo, anke re hlahlobeng seo se bolelwago ke go iphahlelela.

Go iphahlelela ke go hlalosa lebaka leo selo se itšego se diregilego, se sa kago sa direga goba se ka se kego sa direga. Go iphahlelela e ka ba tlhaloso e kwagalago ya go palelwa ke go dira selo se itšego gomme go ka nyaka gore motho a kgopele tshwarelo go tšwa pelong gomme seo sa dira gore go be le mabaka a kwagalago a go mo lebalela. Lega go le bjalo, go etša ge go bonwe tabeng ya Adama le Efa, go iphahlelela go ka fetoga sehlare sa ntšhirela. Ka ge gantši go iphahlelela go direga maemong a bjalo, gantši go a belaelwa.

Ge re iphahlelela—kudu-kudu medirong e sepedišanago le tirelo ya rena go Modimo—re swanetše go phema go ‘iphora ka kgopolo ya maaka.’ (Jak. 1:22) Ka gona, anke re hlahlobeng mehlala ya Beibele le melao ya motheo yeo e tlago go re thuša go ‘tšwela pele re kgonthišetša se se amogelegago go Morena.’—Baef. 5:10.

Seo Modimo a Nyakago re se Dira

Ka Lentšung la Modimo re hwetša ditaelo tše di lebanyago tšeo rena bjalo ka batho ba Jehofa re swanetšego go di kwa. Ka mohlala, taelo ya Kriste ya gore re ‘ye re dire batho ba ditšhaba ka moka barutiwa’ ke taelo yeo e sa dutšego e šoma go balatedi ka moka ba therešo ba Kriste. (Mat. 28:19, 20) Ge e le gabotse, go phetha taelo yeo go bohlokwa kudu moo moapostola Paulo a itšego: “Go madimabe nna ge e ba ke se ka bolela ditaba tše dibotse!”—1 Bakor. 9:16.

Lega go le bjalo, ba bangwe bao ba ithutilego Beibele le rena ka nako e telele ba sa dutše ba e-na le dihlong tša go bolela ditaba tše dibotse tša Mmušo wa Modimo. (Mat. 24:14) Ba bangwe bao ba bego ba dira modiro wa boboledi ba kgaoditše go dira bjalo. Ke mabaka afe ao bao ba se sa hlwago ba dira modiro wa boboledi ba a neago? Jehofa o ile a arabela bjang ge ba bangwe ba be ba dika-dika go kwa ditaelo tša gagwe nakong e fetilego?

Go Iphahlelela Moo Modimo a sa go Amogelego

“E tloga e le boima.” Go dira modiro wa boboledi go ka bonagala go tloga go le boima, kudu-kudu go bao ba nago le dihlong ka tlhago. Lega go le bjalo, ela hloko seo re ka ithutago sona mohlaleng wa Jona. O ile a newa kabelo yeo a bego a e bona e tloga e le boima—Jehofa o ile a mo laela gore a tsebatše phedišo e tlago ya Ninife. Go bonolo go kwešiša lebaka leo le dirilego gore Jona a thatafalelwe ke go phetha kabelo yeo. Ninife e be e le  motse-mošate wa Asiria gomme Baasiria ba be ba tumile ka go ba sehlogo. Jona a ka ba a ipotšišitše gore: ‘Na ke tla kgona bathong ba mohuta wo?’ ‘Ba tla ntira’ng?’ Kapejana o ile a tšhaba. Lega go le bjalo, Jehofa ga se a amogela go iphahlelela ga Jona. Go e na le moo, Jehofa o ile a buša a mo laela gore a dire boboledi go Baninife. Mo nakong ye, Jona ka sebete o ile a phetha kabelo ya gagwe gomme Jehofa o ile a mo šegofatša.—Jona 1:1-3; 3:3, 4, 10.

Ge e ba o nagana gore o imelwa ke kabelo ya go bolela ditaba tše dibotse, gopola gore “dilo tšohle di a kgonega go Modimo.” (Mar. 10:27) O ka kgodišega gore Jehofa o tla go matlafatša ge o tšwela pele o mo kgopela thušo gomme o tla go šegofatša ge o dutše o rapa sebete sa go phethagatša bodiredi bja gago.—Luka 11:9-13.

“Ga ke nyake.” O ka dira’ng ge o sa kganyoge go phetha bodiredi bja gago bja Bokriste? Dula o gopola gore Jehofa a ka dira ka go wena gomme seo sa kgoma dikganyogo tša gago. Paulo o itše: “Modimo ke yena yo ka baka la go kgahlega ga gagwe a dirago ka go lena, e le gore le rate le be le dire.” (Bafil. 2:13) Ka baka leo, o ka kgopela Jehofa gore a dire gore o nyake go dira thato ya gagwe. Kgoši Dafida o dirile bjalo. O rapetše Jehofa ka gore: “Nketetšê ka therešô ya xaxo.” (Ps. 25:4, 5, mongwalo o sekamego ke wa rena.) O ka dira se se swanago ka go rapela Jehofa go tšwa pelong gore a go tutuetše gore o nyake go mo kgahliša.

Ke therešo gore ka dinako tše dingwe ge re lapile goba re nyamile, re ka ikgoga maoto ge re e-ya dibokeng Holong ya Mmušo goba re tšea karolo bodireding. Ge e ba go le bjalo, na re swanetše go fo phetha ka gore ga re rate Jehofa e le ka kgonthe? Le gatee. Bahlanka ba Modimo ba ba botegago ba nakong e fetilego le bona ba ile ba swanelwa ke go katana gore ba dire thato ya Modimo. Ka mohlala, Paulo o itše o ‘tutše mmele wa gagwe,’ ka tsela ya seswantšhetšo, gore a kgone go kwa ditaelo tša Modimo. (1 Bakor. 9:26, 27) Ka gona le ge re swanetše go ikgapeletša go phetha bodiredi, re ka kgodišega gore Jehofa o tla re šegofatša. Ka baka la’ng? Ka gobane re na le lebaka le le kwagalago la go ikgapeletša go dira thato ya Modimo—re rata Jehofa. Ka go dira bjalo, re araba mantšu a Sathane a gore bahlanka ba Modimo ba tla Mo hlanogela ge ba ka lekwa.—Jobo 2:4.

“Ke swaregile kudu.” Ge e ba o sa tšee karolo bodireding ka baka la ge o ikwa o swaregile kudu, go tloga go le bohlokwa gore o lekodišiše dilo tšeo o di etišago pele. Jesu o itše: “Ka gona, tšwelang pele le tsoma mmušo pele.” (Mat. 6:33) Go ka nyakega gore o nolofatše bophelo bja gago goba o fokotše nako yeo o e fetšago o ithabiša gomme o e diriše bodireding gore o kgone go latela molao wo wa motheo. Ee, boithabišo le dilo tše dingwe tša motho ka noši di na le sebaka sa tšona, eupša ga se lebaka le le kwagalago la go palelwa ke go phetha bodiredi. Mohlanka wa Modimo o etiša dikgahlego tša Mmušo pele bophelong bja gagwe.

“Ga ke swanelege.” O ka nagana gore ga o swanelege go ba modiredi wa ditaba tše dibotse. Bahlanka ba bangwe ba Jehofa ba mehleng ya Beibele ba be ba se na bokgoni gakaalo go phetha mediro  yeo Jehofa a bego a ba abetše yona. Ka mohlala, nagana ka Moše. Ge Jehofa a be a mo roma gore a phethe modiro o itšego, Moše o itše: “Hlê Morêna! Xa ke motho e a tsebaxo xo bolêla xo tloxa la bô-maabana le la bô-malôba; le byalo xe O sa thôma xo bolêla le nna mohlanka wa xaxo, ke wa molomo o sa kwalexo, ke wa leleme le lethata.” Le ge Jehofa a ile a mo kgonthišetša, Moše o ile a araba ka gore: “Aowii Morêna! A k’O romê e mongwê yo O rataxo xo mo roma.” (Ek. 4:10-13) Jehofa o ile a arabela bjang?

Jehofa ga se a ka a lokolla Moše gore a se ke a phetha kabelo ya gagwe. Lega go le bjalo, Jehofa o kgethile Arone gore a thuše Moše go phetha modiro woo. (Ek. 4:14-17) Go oketša moo, nywageng yeo e latetšego, Jehofa o ile a thekga Moše gomme a mo nea tšohle tšeo a bego a di nyaka gore a kgone go phetha dikabelo tšeo Modimo a mo neilego tšona. Lehono, o ka kgodišega gore Jehofa o tla tutuetša badumedi-gotee le wena go go thuša gore o phethe bodiredi bja gago. Go oketša moo, Lentšu la Modimo le re kgonthišetša gore Jehofa o tla dira gore re swanelegele modiro wo a laetšego gore re o dire.—2 Bakor. 3:5; bona lepokisi le le rego  “Nywaga e Thabišago Kudu Bophelong Bja-ka.”

“Go na le yo a nkgopišitšego.” Ba bangwe ba kgaotša go tšea karolo bodireding goba go ba gona dibokeng tša phuthego ka baka la ge ba kgopišitšwe gomme ba nea mabaka ka gore ruri Jehofa o tla kwa mabaka a bona a go tapa moyeng. Le ge go kgopišwa ke motho yo mongwe go ka kwagala, na ruri ke lebaka le le kwagalago la go kgaotša go tšea karolo medirong ya Bokriste? Paulo le modumedi-gotee le  yena e lego Baranaba ba ka ba ba ile ba kgopišana ka morago ga go se dumelelane gomme seo sa baka “ngangišano e bogale.” (Dit. 15:39) Eupša na yo mongwe wa bona o ile a kgaotša go tšea karolo bodireding ka baka la se? Ga go bjalo!

Ka mo go swanago, ge o kgopišitšwe ke modumedi-gotee le wena, gopola gore lenaba la gago ga se ngwaneno wa Mokriste yo a sa phethagalago eupša ke Sathane, yo a nyakago go go metša. Lega go le bjalo, Diabolo a ka se atlege ge e ba o ‘emeletšana le yena o tiile tumelong.’ (1 Pet. 5:8, 9; Bagal. 5:15) Ge e ba o e-na le tumelo e bjalo, o ka ‘se ke wa nyamišwa.’—Baroma 9:33.

Ge e ba re se na Bokgoni Gakaalo

Mehlaleng ye e mmalwa ya go iphahlelela, go ba molaleng gore ga go na mabaka a kwagalago go ya ka Mangwalo ao a re paledišago go phetha ditaelo tše di tšwago go Jehofa ka go lebanya, go akaretša le thomo ya go bolela ditaba tše dibotse. Lega go le bjalo, re ka ba re e-na le mabaka a kwagalago a go palelwa ke go phetha bodiredi bja rena go fihla bokgoleng bjo itšego. Go phetha maikarabelo a mangwe a Mangwalo go ka fokotša nako yeo re bego re ka rata go e fetša modirong wa boboledi. Le gona, ruri re ka ba re lapile kudu goba re babja kudu go dira seo re bego re ka rata go se dira tirelong ya Jehofa. Lega go le bjalo, Lentšu la Modimo le re kgonthišetša gore Jehofa o tseba seo re se kganyogago gomme o tseba le mafokodi a rena.—Ps. 103:14; 2 Bakor. 8:12.

Ka baka leo, re swanetše go ela hloko gore ga re ikahlole goba go ahlola ba bangwe ga sehlogo ditabeng tše. Moapostola Paulo o ngwadile gore: “Wena o mang o ahlolago mohlanka wa lapa wa yo mongwe? Ge a ema goba a e-wa ke tabeng ya mong wa gagwe.” (Baroma 14:4) Go e na le go ipapetša le ba bangwe, re swanetše go gopola gore “yo mongwe le yo mongwe wa rena o tla ikarabela go Modimo.” (Baroma 14:12; Bagal. 6:4, 5) Ge yo mongwe le yo mongwe wa rena a batamela Jehofa ka thapelo gomme a iphahlelela go yena, o swanetše go dira bjalo ka ‘letswalo le le botegago.’—Baheb. 13:18.

Seo se Dirago Gore go Hlankela Jehofa go re Thabiše

Ka moka ga rena re ka hlankela Jehofa re thabile ka gobane seo a se nyakago—go sa šetšwe maemo a rena bophelong—se dula se leka-lekane e bile re ka se fihlelela. Ke ka baka la’ng re rialo?

Lentšu la Modimo le re: “Yo a swanetšwexo ke tše botse O se mo hlokišê tšôna, xe ’atla sa xaxo sè kxôna xo di dira.” (Die. 3:27) O lemogile’ng seemeng se mabapi le seo Modimo a se nyakago? Jehofa ga a laele gore o katanele go bapetša matla a gago le a bana beno eupša o go laela gore o Mo hlankele ka ‘se seatla sa gago se kgonago go se dira.’ Ee, yo mongwe le yo mongwe wa rena—go sa šetšwe gore o fokola gakaakang goba ke yo matla gakaakang—a ka kgona go hlankela Jehofa ka pelo ka moka.—Luka 10:27; Bakol. 3:23.

[Lepokisi/​Seswantšho go letlakala 14]

 “Nywaga e Thabišago Kudu Bophelong Bja-ka”

Gaešita le ge re fokola nameng goba maikwelong, ga se ra swanela go kitimela go phetha ka gore seo se tla re thibela go tšea karolo ka botlalo bodireding. Ka mohlala, ela hloko seo se diragaletšego Ernest, ngwanabo rena wa Mokriste wa kua Canada.

Ernest o be a kgama-kgametša e bile a e-na le dihlong kudu. Ka morago ga go gobala o šoro mokokotlo, o ile a swanelwa ke go tlogela mošomo wa gagwe wa go ba moagi. Le ge a be a golofetše, maemo a gagwe ga se a ka a mo dumelela go fetša nako e oketšegilego bodireding. O ile a kgongwa ke kgothatšo yeo e neilwego dibokeng tša phuthego mabapi le go tšea bobulamadibogo bja go thuša. Lega go le bjalo, o be a sa nagane gore o swanelegela bodiredi bjoo.

O ile a kgopela go tsenela bobulamadibogo bja go thuša ka kgwedi e tee gore a bone ge e ba a ka bo kgona. O ile a makatšwa ke ge a be a kgona go phetha kabelo ya gagwe ka katlego. Ke moka o ile a nagana gore: ‘Ke a tseba gore nka se sa kgona go bo tšea.’ Gore a bone ge e ba a rereša, o ile a bo tsenela la bobedi—le mo nakong ye, o ile a kgona go phetha modiro wa gagwe.

Ernest o feditše ngwaga a hlankela e le mmulamadibogo wa go thuša, eupša o itše: “Se ke kgodišegilego ka sona ke gore nka se tsoge ke bile mmulamadibogo wa ka mehla.” Le mo nakong ye, gore a bone ge e ba a rereša, o ile a kgopela go tsenela bobulamadibogo bja ka mehla. O be a maketše kudu ge a be a fetša ngwaga wa mathomo e le mmulamadibogo wa ka mehla. O dirile phetho ya go tšwela pele gomme o ile a šegofatšwa ka lethabo la go hlankela e le mmulamadibogo wa ka mehla ka nywaga e mebedi, go fihlela a e-hwa ka baka la go mpefala ga dikgobalo tša gagwe. Lega go le bjalo, pele ga ge a ka hwa, o boditše bao ba bego ba mo etetše a sekišitše megokgo gore: “Nywaga yeo ke e feditšego ke hlankela ke le mmulamadibogo e bile nywaga e thabišago kudu bophelong bja-ka.”

[Seswantšho go letlakala 13]

Re ka fenya mapheko le ge e le afe ao a ka re paledišago go phetha bodiredi

[Seswantšho go letlakala 15]

Jehofa o a thaba ge re mo hlankela ka moya ka moka, re dira sohle seo maemo a rena a re dumelelago go se dira