Dipotšišo tše Tšwago go Babadi

Go Genesi 6:3, re bala gore: “Moya wa ka o ka se kgotlelele batho sa ruri ka ge e le nama. Ka gona matšatši a bona e tla ba nywaga e lekgolo-masomepedi (120).” Na Jehofa o be a bolela gore bophelo bja batho bo tla felela ka nywaga e 120, le gona na go tšere Noa nywaga e mekaalo go tsebatša ka Meetsefula ao a tlago?

Karabo dipotšišong tše ka bobedi ke aowa.

Pele ga Meetsefula, batho ba be ba phela nywaga e makgolo. Noa o be a na le nywaga e 600 ge Meetsefula a etla gomme o ile a phela go ba go fihla a na le e 950. (Gen. 7:6; 9:29) Le ba bangwe bao ba ilego ba belegwa ka morago ga Meetsefula ba ile ba phela nywaga ya ka godimo ga e 120. Arapagashadi o hwile a na le nywaga e 438 gomme Shela a na le e 433. (Gen. 11:10-15) Lega go le bjalo, mehleng ya Moše, nywaga ya bophelo bja batho e ile ya fokotšega go fihla go 70 goba 80. (Ps. 90:10) Ka baka leo, Genesi 6:3 e be e sa bolele gore batho ba tla phela nywaga e 120.

Ka gona, na mantšu a temana ye e be e le taelo e tšwago go Modimo e lebišitšwe go Noa gore a lemoše batho ka phedišo yeo e bego e tla tla nywageng e 120? Aowa. Modimo o boletše le Noa ka makga a mantši. Ditemaneng tše lesome ka morago ga ye, re bala gore: “Modimo a re go Noa: ‘Ke tlo fediša nama ka moka ka gobane lefase le tletše bošoro.’” Noa o feditše modiro o mogolo wa go aga areka nywageng e latetšego gomme ka nako yeo: “Jehofa a re go Noa: ‘Wena le lapa la gago ka moka tsenang ka arekeng.’” (Gen. 6:13; 7:1) Le gona, go na le makga a mangwe  ao Jehofa a tsebišitšego Noa ditaba ka ditiragalo tše dingwe.—Gen. 8:15; 9:1, 8, 17.

Lega go le bjalo, Genesi 6:3 yona ga e bolele ka Noa goba go bontšha gore Modimo o ile a bolela le yena. E ka kwešišwa e le feela pontšho ya seo Modimo a se rerilego goba a ikemišeditšego go se dira. (Bapiša le Genesi 8:21.) Ke gabohlokwa go lemoga gore pegong ya ditiragalo tša nako e telele pele ga mehla ya Adama re hwetša dipolelwana tše bjalo ka: “Modimo a re.” (Gen. 1:6, 9, 14, 20, 24) Go molaleng gore Jehofa o be a sa bolele le motho mo lefaseng ka ge go be go se gwa tšwa go bopša batho.

Ka gona, go a kwagala go phetha ka gore Genesi 6:3 e bolela ka maikemišetšo a Modimo a go fediša tshepedišo e kgopo ya dilo mo lefaseng. Jehofa o be a ikemišeditše go ahlola lefase nywageng e 120 e tlago go latela gaešita le ge Noa a be a se a tšwa a tseba. Eupša ke ka baka la’ng a ile a bea nako? Ke ka baka la’ng a ile a leta?

Moapostola Petro o re nea mabaka ka gore: “Modimo [o] be a letile ka go se fele pelo mehleng ya Noa, ge areka e be e agwa, e lego yeo ka go yona batho ba sego kae, ke gore meoya e seswai, e ilego ya phološwa meetseng.” (1 Pet. 3:20) Ee, ge Modimo a be a dira phetho mabapi le nywaga e 120, go be go sa na le dilo tšeo di bego di swanetše go dirwa. Nywaga e ka bago e 20 e latetšego, Noa le mosadi wa gagwe ba ile ba thoma go ba le bana. (Gen. 5:32; 7:6) Barwa ba bona ba bararo ba ile ba gola le go nyala gomme ba godiša lapa ya ba “meoya e seswai.” Ke moka ba ile ba swanelwa ke go aga areka yeo ba bego ba ka se e fetše ka pela ka ge e le e kgolo e bile lapa la Noa e le le lenyenyane. Ee, go se fele pelo ga Modimo ka nywaga e 120 go dumeletše dilo tšeo go direga gomme gwa bula tsela ya gore batho ba botegago ba seswai ba ‘phološwe meetseng.’

Beibele ga e bolele ka go lebanya ngwaga woo Jehofa a boditšego Noa gore Meetsefula a tla tla. Go tloga mola barwa ba gagwe ba belegwago, ba golago le go nyala go ka ba go tšere nywaga e 40 goba e 50 pele Meetsefula a ka tla. Ke moka Jehofa a re go Noa: “Ke tlo fediša nama ka moka.” O okeditše ka go laela Noa gore a age areka e kgolo gomme a tsene gotee le lapa la gagwe ka gare ga yona. (Gen. 6:13-18) Nywagasomeng e sa šaletšego, Noa o ile a dira se se fetago go bea mohlala wa toko ka bophelo bja gagwe. O hlanketše e le “mmoledi wa toko” yo a bego a na le molaetša wa temošo wo a bego a swanetše go o tsebatša—boikemišetšo bja Modimo bja go fediša batho ka moka bao ka nako yeo ba bego ba sa phele go ya ka ditekanyetšo tša Gagwe. Noa ga se a ka a tseba nako e telele e sa le pele ngwaga woo seo se bego se tla direga ka wona eupša o be a tseba gore ka kgonthe se tla direga. Le wena o a tseba gore se diregile.—2 Pet. 2:5.