Na o a Gopola?

Na o thabetše go bala ditokollo tša morago bjale tša Morokami? Bona ge e ba o ka kgona go araba dipotšišo tše di latelago:

• Go dumela gore dilo ka moka di rerilwe e sa le pele go thomile bodumeding bja ditlogolo tša mang?

Bocalvin bo gatelela thuto ya gore dilo ka moka di rerilwe e sa le pele. Dithuto tša Mompshafatši Jean Cauvin (John Calvin) di atile dikerekeng tše bjalo ka Reformed, Presbyterian, Congregational le Puritan.—9/1, matlakala 18-21.

• Kaine o tšere mosadi wa gagwe kae?

Mosadi wa Kaine e swanetše go ba e be e le setlogolo sa Efa, yo a ilego a belega “barwa le barwedi.” (Gen. 5:4)—9/1, letlakala 25.

• Modimo o romile morongwa ofe gore a etelele pele Baisiraele ge a be a ba ntšha Egipita? (Ek. 23:20, 21)

Go a kwagala go dumela gore morongwa yoo yo a bego ‘a na le leina la Jehofa mo go yena’ e be e le Morwa wa Modimo wa leitšibulo, yoo ka morago a ilego a bitšwa Jesu.—9/15, letlakala 21.

• Ke ka baka la’ng puku ya 1 Bakorinthe e bolela ka nama yeo e hlabetšwego medimo ya diswantšho?

Diphoofolo di be di dirwa dihlabelo ditempeleng tša Bagerika le Baroma, eupša nama yeo e sa jewago nakong ya tirelo e be e ka rekišwa borekišetšong bja nama. Bakriste ba be ba sa tšee karolo borapeding bja boheitene; lega go le bjalo, ga se gore ba be ba swanetše go lebelela nama yeo e rekišwago moo e le e šilafetšego. Moapostola Paulo o ngwadile gore: “Le tšwele pele le eja se sengwe le se sengwe seo se rekišwago borekišetšong bja nama, le sa botšišiše ka baka la matswalo a lena; gobane ‘lefase ke la Jehofa le tšeo di tletšego go lona.’” (1 Bakor. 10:25, 26)—10/1, letlakala 12.

• Ke go iphahlelela ga mohuta mang mo go sa amogelwego ke Modimo ge go tliwa ditabeng tša borapedi bja therešo?

‘E tloga e le boima. Ga ke nyake. Ke swaregile kudu. Ga ke swanelege. Go na le yo a nkgopišitšego.’ Ye ke tsela e sa kwagalego ya go iphahlelela yeo motho a ka e dirago ge a palelwa ke go kwa ditaelo tša Modimo.—10/15, matlakala 12-15.

• O ka dira bjang gore diboka tša Bokriste di go age le go aga ba bangwe?

Lokišeletša e sa le nako. Eba gona dibokeng ka mehla. Fihla ka nako. Etla o itlhamile gabotse. Phema ditšhitišo. Tšea karolo. Dira gore dikarabo tša gago e be tše dikopana. Phetha dikabelo. Reta batšeakarolo. Thabela bogwera le bana beno pele le ka morago ga diboka.—10/15, letlakala 22.

• Ke pego efe ya Beibele, yeo e akaretšago ngwanenyana, yeo e bolelago ka lephera leo ga bjale le bitšwago bolwetši bja Hansen?

Dikgoši tša Bobedi kgaolo 5 e bolela ka ngwanenyana wa Moisiraele, yo a bego a hlankela ntlong ya molaodi wa madira a kgoši ya Siria yo a bego a bitšwa Naamane. Ka ge molaodi yo a be a na le lephera, ngwanenyana o ile a mo kgothaletša gore a ye go moporofeta Elisha gore a mo alafe.—11/1, letlakala 22.

• Re ka ithuta’ng go ineeleng ga Arone kgateletšong ya dithaka?

Nakong ya ge Moshe a be a se gona, Baisiraele ba ile ba kgopela Arone gore a ba direle modingwana. O ile a ineela gomme a ba direla. Se se bontšha gore ga se bafsa feela bao ba lebeletšanago le kgateletšo ya dithaka. E ka kgoma gaešita le batho ba bagolo bao ba nyakago go dira se se nepagetšego. Re swanetše go ganetša kgateletšo e mpe ya dithaka.—11/15, letlakala 8.

• Therešo ke efe, nonwane ke efe?

Sathane ke motho wa kgonthe: therešo. (2 Bakor. 11:14) Ge batho ka moka ba ehwa, ba fetela lefelong la moya: nonwane. (Mmo. 9:5) Barongwa ba ba botegago ba tshwenyega ka rena: therešo. (Ps. 34:7) Jesu o lekana le Modimo: nonwane. (1 Bakor. 11:3)—12/1, matlakala 8-9.