Bota Leina la Jehofa

“Ke tla šadiša baikokobetši le ba boleta gomme ba tla bota leina la Jehofa.”​—TSEF. 3:12.

1, 2. Ke ledimo lefe la seswantšhetšo leo le tlago go wela batho kgauswinyane?

NA O kile wa swanelwa ke go bota leporogo ka go tšhabela ka tlase ga lona ge go be go batamela pula ya matlakadibe goba ledimo la sefako? Leporogo le ka go šireletša puleng ya matlakadibe goba ledimo la sefako, eupša le ka se go šireletše gakaalo ge go etla sesasedi goba ledimo le matla.

² Go batamela mohuta o mongwe wa ledimo​—leo le beago maphelo a batho kotsing. Ke “letšatši la ledimo” la seswantšhetšo. “Letšatši [le] le legolo la Jehofa” le tla kgoma batho ka moka. Lega go le bjalo, go na le botšhabelo bjo re ka bo botago. (Bala Tsefanya 1:14-18.) Re ka bo hwetša bjang nakong ya ‘letšatši la kgalefo ya Jehofa’ leo le lego kgauswi le go thoma?

Dinako tša Ledimo Mehleng ya Beibele

3. Ke ‘ledimo lefe la magadima’ leo le wetšego mmušo wa Isiraele wa meloko e lesome?

³ Letšatši la Jehofa le tla thoma ka go fedišwa ga mehuta ka moka ya bodumedi bja maaka mo lefaseng. Histori ya batho ba Modimo ba mehleng ya bogologolo e ka re bontšha kamoo re ka hwetšago botšhabelo. Jesaya, yo a phetšego lekgolong la boseswai la nywaga B.C.E., o bapišitše kahlolo ya ge Jehofa a be a ahlola mmušo wa Isiraele wa meloko e lesome le “ledimo la magadima” leo batho ba bego ba ka se kgone go le thibela. (Bala Jesaya 28:​1, 2.) Boporofeta bjoo bo phethagetše ka 740 B.C.E. ge Asiria e be e hlasela meloko yeo, go akaretša le Efuraimi yeo e bego e le moloko o mogolo wa e mengwe e lesome.

4. “Letšatši le legolo la Jehofa” le ile la wela Jerusalema bjang ka 607 B.C.E.?

⁴ Ka 607 B.C.E., ka morago ga go ahlolwa ga Isiraele yeo e sa botegego, “letšatši le legolo la Jehofa” le ile la tlela Jerusalema le mmušo wa Juda. Seo se bakilwe ke gore batho ba Juda le bona ba be ba fetogile bahlanogi. Bababilona bao ba bego ba bušwa ke Nebukadinetsara ba ile ba tšhošetša Juda le motsemošate wa yona e lego Jerusalema. Bajuda ba ile ba tsoma thušo go “botšhabelo bja maaka,” ka go dira kgwerano ya dipolitiki le Egipita. Lega go le bjalo, ka go swana le ledimo leo le bakago tshenyo, Bababilona ba ile ba fediša “botšhabelo” bjoo.​—Jes. 28:14, 17.

5. Go tla direga’ng ka batho ba Modimo nakong ya phedišo ya bodumedi ka moka bja maaka?

⁵ Letšatši le legolo la Jehofa leo le ilego la tlela Jerusalema e be e fo ba pontšho ya kahlolo ye e bego e tla tlela Bojakane bja bohlanogi mehleng ya rena. Go feta moo, “Babilona o  Mogolo” ka moka, e lego mmušo wa lefase wa bodumedi bja maaka, e tla fedišwa. Ka morago ga moo, go tla fedišwa le dikarolo tše di šetšego tša tshepedišo ya dilo e kgopo ya Sathane. Lega go le bjalo, batho ba Modimo e le sehlopha ba tla phologa ka gobane ba bota Jehofa ka go tšhabela go yena.​—Kut. 7:14; 18:2, 8; 19:19-21.

Botšhabelo bja Moya le bja Kgonthe

6. Batho ba Jehofa ba ka hwetša botšhabelo bjang?

⁶ Batho ba Modimo ba ka hwetša botšhabelo bjang gaešita le gona bjale mehleng ye ya bofelo? Re hwetša botšhabelo bja moya ge ka mehla re rapela ‘re sa lebale leina la Modimo’ le ge re mo hlankela ka phišego. (Bala Maleaki 3:16-18.) Lega go le bjalo, re a lemoga gore go fo nagana ka leina la gagwe ga se gwa lekana. Re bala gore: “Yo mongwe le yo mongwe yo a bitšago leina la Jehofa o tla phološwa.” (Baroma 10:13) Go na le tswalano magareng ga go bitša leina la Jehofa le go phološwa ke yena. Le gona batho ba bantši ba dipelo tše di botegago ba kgona go bona phapano magareng ga Bakriste ba therešo bao ka tlhompho “ba sa lebalego leina la gagwe” e bile ba hlankelago e le Dihlatse tša gagwe le batho bao ba sa mo hlankelego.

7, 8. Bakriste ba lekgolong la pele la nywaga ba phološitšwe bjang ka tsela ya kgonthe gomme ba mehleng ya lehono ba tla phološwa bjang go swana le bona?

⁷ Lega go le bjalo, ga re phološwe moyeng feela. Batho ba Modimo ba holofetšwa botšhabelo bja kgonthe. Re bona mohlala wa se go seo se diregilego ka 66 C.E. ka morago ga gore madira a Roma ao a bego a eteletšwe pele ke Cestius Gallus a hlasele Jerusalema. Jesu o be a boletše e sa le pele gore matšatši a masetlapelo ao a be a tla “fokotšwa.” (Mat. 24:15, 16, 21, 22) Seo se diregile ge madira a Roma a be a tlogela go rakelela motse go sa letelwa, e lego seo se ilego sa dira gore ‘batho’ ka moka, ke gore Bakriste ba therešo, ba ‘phologe.’ Ba ile ba kgona go tšhaba go tšwa motseng le metsaneng ya kgauswi. Ba bangwe ba ile ba tshela noka ya Jorodane gomme ba tšhabela dithabeng ka bohlabela bja noka yeo.

⁸ Re ka bona gore go na le selo seo Bakriste bao le batho ba Modimo lehono ba swanago ka sona. Nakong e fetilego, Bakriste ba lekgolong la pele la nywaga ba be ba tsoma botšhabelo gomme bahlanka ba Modimo lehono le bona ba tsoma botšhabelo. Lega go le bjalo, gona bjale ba ka se tšhabele lefelong le itšego, ka ge Bakriste ba therešo ba hwetšwa lefaseng ka bophara. Eupša “bakgethwa” le bagwera ba bona bao ba botegago ba tla phologa e le ka kgonthe phedišo ya Bojakane bja bohlanogi ka go tšhabela go Jehofa le mokgatlong wa gagwe wo o lego bjalo ka thaba.

9. Ke bomang bao ba lekilego go dira gore leina la Jehofa le lebalwe? Nea mohlala.

⁹ Ka lehlakoreng le lengwe, Bojakane bo swanetše go fedišwa ka ge bo kgathile tema go direng gore batho bao ba tsenago kereke ba se ke ba tseba therešo le ka go bontšha phatlalatša gore bo hloile leina la Modimo. Mehleng ya Magareng, leina la Modimo le be le tsebja kudu kua Yuropa ka moka. Leina leo, le le emelwago ke ditlhaka tše nne tša Seheberu tšeo di bitšwago Tetragrammaton le leo ka tlwaelo le fetolelwago e le YHWH (goba JHVH), le be le tšwelela ditšheleteng tša tšhipi, mabotong a ka pele a dintlo, dipukung tše dintši le Dibeibeleng gaešita le dikerekeng tše dingwe tša Makatholika le Maprotestanta. Lega go le bjalo, maikemišetšo a ba bangwe mehleng yeno ke go ntšha leina la Modimo diphetolelong tša Beibele le dikarolong tše dingwe moo le dirišwago gona. Se sengwe seo se bontšhago se ke Lengwalo Leo le Yago Sebokeng sa Bapišopo sa Mabapi le ‘Leina la Modimo,’ la June 29, 2008, leo le ngwadilwego ke Phuthego ya Borapedi bja Modimo le Tayo ya Ditirelo. Lengwalong leo, Kereke ya Roma Katholika e ngwadile gore mekgwa ka moka ya go fetolela Tetragrammaton e swanetše go tšeelwa legato ke lentšu “Morena.” Vatican e laetše gore leina la Modimo ga se la swanela go dirišwa dikošeng le dithapelong nakong ya ditirelo  tša bodumedi tša Katholika. Le gona baetapele ba madumedi a mangwe bao ba lego ka gare le ka ntle ga Bojakane le bona ba dirile gore barapedi ba dimilionemilione ba se ke ba tseba Modimo wa therešo.

Bao ba Kgethagatšago Leina la Modimo ba a Šireletšwa

10. Leina la Modimo le hlompšha bjang lehono?

¹⁰ Ka go fapana le seo madumedi a mangwe a se dirago, Dihlatse tša Jehofa di godiša leina la Modimo le go le tagafatša. Ba le kgethagatša ka go le diriša ka tsela e hlomphegago. Jehofa o kgahlwa ke bao ba mmotago gomme o ba selo le ge e le sefe seo se nyakegago gore a šegofatše le go šireletša batho ba gagwe. “O tseba bao ba tšhabelago go yena.”—Nah. 1:7; Dit. 15:14.

11, 12. Ke bomang bao ba godišitšego leina la Jehofa kua Juda ya bogologolo gomme ke bomang bao ba le godišitšego mehleng yeno?

¹¹ Gaešita le ge batho ba bantši mehleng ya Juda ya bogologolo ba ile ba fetoga bahlanogi, go ile gwa ba le ba bangwe bao ba ilego ba “bota leina la Jehofa.” (Bala Tsefanya 3:12, 13.) Ee, ge Modimo a be a otla Juda ye e se nago tumelo ka go dumelela Bababilona gore ba e fenye le go iša batho ba yona bothopša, batho ba bangwe, ba bjalo ka Jeremia, Baruke le Ebede-meleke ba ile ba phološwa. Ba phetše “gare ga” setšhaba sa bahlanogi. Ba bangwe ba ile ba dula ba botega ge ba le bothopša. Ka 539 B.C.E., Bameda le Baperesia bao ba bego ba eteletšwe pele ke Korese ba ile ba fenya Babilona. Go se go ye kae Korese o ile a laela gore mašaledi a Bajuda a dumelelwe go boela gae.

¹² Tsefanya o boletše e sa le pele gore Jehofa o be a tla thabela go phološa bao ba bego ba tla bušetšwa borapeding bjo bo sekilego. (Bala Tsefanya 3:14-17.) Go bile bjalo le mehleng ya rena. Ka morago ga go hlongwa ga Mmušo wa Modimo legodimong, Jehofa o ile a phološa mašaledi a botegago a batlotšwa bokgobeng bja moya bja Babilona o Mogolo. Le gona bjale ba sa dutše ba mo kgahla.

13. Batho ba ditšhaba ka moka ba hwetša tokologo efe?

¹³ Bao ba nago le kholofelo ya go phela ka mo go sa felego lefaseng le bona ba tšwile go Babilona o Mogolo gomme ba tokologong ya moya ya dithuto tša maaka tša bodumedi. (Kut. 18:4) Ka gona, Tsefanya 2:3 e phethagala kudu mehleng ya rena ge e re: “Tsomang Jehofa, lena bohle ba boleta ba lefase.” Ba boleta ba ditšhaba ka moka, go sa šetšwe gore ba na le kholofelo ya go phela legodimong goba lefaseng, ga bjale ba tšhabela leineng la Jehofa.

Leina la Modimo ga se Pheko

14, 15. (a) Ke dilo dife tšeo ba bangwe ba di dirišitšego e le pheko? (b) Ke’ng seo se sa swanelago go dirišwa e le taola?

¹⁴ Baisiraele ba bangwe ba be ba lebelela tempele e le pheko yeo e bego e tla ba šireletša manabeng a bona. (Jer. 7:1-4) Pejana, Baisiraele ba be ba lebelela areka ya kgwerano e le taola yeo e bego e tla ba šireletša ntweng. (1 Sam. 4:3, 10, 11) Constantine yo Mogolo o ile a penta seka sa ditlhaka tša Segerika, khi le rho e lego ditlhaka tše pedi tša mathomo tša leina “Kriste” ka Segerika, dikotseng tša bahlabani ba gagwe ka ge a be a holofela gore di tla ba šireletša ntweng. E bile go naganwa gore Kgoši Gustav Adolph II wa kua Sweden, yo a lwelego Ntweng ya Nywaga e Masometharo, o be a apara kholoro yeo e bontšhitšwego go letlakala 7. Ela hloko gore leina Iehova le bonagala gabotse kholorong ye.

¹⁵ Ba bangwe ba batho ba Modimo bao ba bego ba tshwenywa ke batemona ba ile ba tšhabela go Jehofa ka go bitša leina la gagwe. Lega go le bjalo, selo seo se nago le leina la Modimo ga se sa swanela go lebelelwa e le pheko goba go dirišwa e le taola bophelong bja letšatši le letšatši, go le bjalo ka ge eka se na le matla a go šireletša ka tsela ya maleatlana. Yeo ga se tsela ya go tšhabela leineng la Jehofa.

Go Hwetša Botšhabelo Lehono

16. Re ka hwetša bjang botšhabelo bja moya lehono?

¹⁶ Lehono re hwetša botšhabelo tšhireletšong ya moya yeo e hwetšwago ke batho ka  moka ba Modimo. (Ps. 91:1) “Mohlanka yo a botegago le wa temogo” le bagolo ka phuthegong ba re lemoša ka mekgwa ka moka ya lefase yeo e ka dirago gore tšhireletšego ye e be kotsing. (Mat. 24:45-47; Jes. 32:1, 2) Anke o nagane feela gore ke gantši gakae re lemošwa ka go rata dilo tše di bonagalago gomme o be o naganišiše kamoo ditemošo tše bjalo di re šireleditšego ka gona dikotsing tša moya. Le gona go thwe’ng ka kotsi ya go thoma go ba le moya wa go se šetše, wo o ka dirago gore re thome go tapa tirelong ya Jehofa? Lentšu la Modimo le re: “Ditlaela [di tla] bolawa ke go se šetše ga tšona. Ge e le yo a ntheetšago, o tla dula a bolokegile a sa tšhoge go welwa ke masetlapelo.” (Die. 1:32, 33) Go katanela go dula re hlwekile boitshwarong go re thuša go dula re šireletšegile moyeng.

17, 18. Ke’ng seo se thušago batho ba dimilione gore ba tšhabele leineng la Jehofa lehono?

¹⁷ Le gona, nagana ka kgothatšo ye e tšwago go mohlanka yo a botegago ya gore re phethe taelo ya Jesu ya go bolela ditaba tše dibotse tša Mmušo lefaseng ka moka leo go agilwego go lona. (Mat. 24:14; 28:19, 20) Tsefanya o boletše ka phetogo yeo e bego e tla thuša batho gore ba tšhabele leineng la Modimo. Re bala gore: “Ke tla nea merafo leleme le le sekilego, e le gore ka moka e bitše leina la Jehofa gomme e mo direle ka botee.”—Tsef. 3:9.

¹⁸ Leleme le le le sekilego ke’ng? Leleme le le sekilego ke therešo ya mabapi le Jehofa Modimo le merero ya gagwe bjalo ka ge e hwetšwa ka Lentšung la gagwe le le buduletšwego. Ka kgopolo e itšego, o bolela leleme leo ge o dutše o dira gore batho ba be le kwešišo e nepagetšego ka Mmušo wa Modimo le kamoo o tlago go kgethagatša leina la gagwe, ge o gatelela gore bogoši bja Modimo bo lokile le ge o thabela go bolela ka ditšhegofatšo tša ka mo go sa felego tšeo di tlago go hwetšwa ke batho bao ba botegago. Ka ge leleme le la seswantšhetšo le bolelwa ke batho ba bantši, palo e oketšegago ya batho e ‘bitša leina la Jehofa’ gomme ‘e mo direla ka botee.’ Ee, batho ba dimilione lefaseng ka moka ba tšhabela go Jehofa.—Ps. 1:1, 3.

19, 20. Go bota “botšhabelo bja maaka” go bile bjang le mafelelo a nyamišago mehleng ya Beibele?

¹⁹ Batho lefaseng ba na le mathata ao a ka se rarollegego. Ka ge ba bantši ba tloga ba nyaka go rarolla mathata a bona, ba nyaka thušo go batho bao ba sa phethagalago. Goba ba holofela gore ba tla hwetša tharollo mekgatlong ya dipolitiki, go fo swana le ge ka dinako tše dingwe batho ba Isiraele ya bogologolo ba be ba nyaka thušo ditšhabeng tša kgauswi, ba dira dikgwerano le tšona. Lega go le bjalo, le wena o a tseba gore go dira bjalo ga se gwa ka gwa ba thuša. Le gona ga go na mokgatlo wa dipolitiki lehono, goba mokgatlo wa Ditšhaba tše Kopanego, wo o tla kgonago go rarolla mathata a batho ka botlalo. Ka gona ke ka baka la’ng motho a ka bota mekgatlo ya dipolitiki le dikgwerano tša mekgatlo yeo e le botšhabelo? Ka tsela ya boporofeta, Beibele e bitša mekgatlo yeo gore ke “botšhabelo bja maaka.” Le wena o ka e lebelela ka tsela yeo ka gobane batho ka moka bao ba botago mekgatlo yeo ba tla nyama wa go šiiša.—Bala Jesaya 28:15, 17.

 ²⁰ Kgauswinyane, lefase le tla welwa ke sefako sa seswantšhetšo sa letšatši la Jehofa. Mekgatlo ya batho e ka se kgone go ba šireletša; go fo ba bjalo ka tšhireletšo ya nuclear goba mahumo. Jesaya 28:17 e bontšha gore: “Sefako se tla šwalalanya botšhabelo bja maaka, meetse a tla gogola lefelo la go ikuta.”

21. Go dira seo se bolelwago ke temana ya ngwaga wa 2011 go ka re hola bjang?

²¹ Gona bjale le nakong e tlago ya diphetogo, batho ba Modimo ba tla hwetša tšhireletšego ya kgonthe go Modimo wa bona, Jehofa. Leina la Tsefanya, leo le bolelago gore “Jehofa o Utile,” le šupa lefelong le la kgonthe la go ikuta. Ke mo go swanetšego ge temana ya ngwaga wa 2011 e na le keletšo e bohlale e rego: “Bota leina la Jehofa.” (Tsef. 3:12) Gaešita le gona bjale re ka kgona e bile re swanetše go tšhabela leineng la Jehofa, re mmote ka mo go feletšego. (Ps. 9:10) Ka mehla a re duleng re gopola kgonthišetšo ye yeo e buduletšwego: “Leina la Jehofa ke tora e matla. Moloki o tšhabela go lona gomme a šireletšwa.”—Die. 18:10.

Na o a Gopola?

• Re ka tšhabela leineng la Jehofa bjang gona bjale?

• Ke ka baka la’ng re sa swanela go bota “botšhabelo bja maaka”?

• Re kgonthišetšwa botšhabelo bofe bja nakong e tlago?

[Dipotšišo tša Thuto]

[Ntlhakgolo go letlakala 6]

Temana ya ngwaga wa 2011 e re: “Bota leina la Jehofa.”—Tsefanya 3:12.

[Mothopo wa Seswantšho go letlakala 7]

Thüringer Landesmuseum Heidecksburg Rudolstadt, Waffensammlung “Schwarzburger Zeughaus”