Naganišiša ka Seo Jehofa a go Diretšego Sona

NAKWANA ka morago ga go tsošwa ga Jesu, barutiwa ba gagwe ba babedi ba be ba le tseleng ya go tloga Jerusalema go ya Emause. Pego ya Ebangedi ya Luka e re: “Ge ba be ba dutše ba boledišana le go ahlaahla se, Jesu ka noši a batamela a sepela le bona, eupša mahlo a bona a be a širegile gore a se mo lemoge.” Ke moka Jesu a re go bona: “‘Ke ditaba dife tšeo le ngangišanago ka tšona ge le dutše le sepela?’ Ke moka ba ema ka difahlego tše di nyamilego.” Ba be ba nyamišitšwe ke’ng? Barutiwa ba be ba nagana gore Jesu o be a tla hlakodiša Baisiraele pušong ya Bantle, eupša seo se be se sa direga. Go e na le moo, Jesu o be a bolailwe. Ke ka baka leo ba ilego ba nyama.—Luka 24:15-21; Dit. 1:6.

Jesu o ile a thoma go hlalosetša barutiwa ba gagwe. “Ge a thoma ka Moshe le mangwalo a Baporofeta ka moka, a ba hlathollela dilo tše di lego mabapi le yena ka Mangwalong ka moka.” Go na le dilo tše dintši tše bohlokwa le tšeo di matlafatšago tumelo tšeo di diregilego nakong ya bodiredi bja Jesu! Ge barutiwa ba theeditše tlhaloso ya Jesu, ba ile ba thoma go thaba. Ka moragonyana bošegong bjoo, ba ile ba re: “Na dipelo tša rena di be di sa fse ge a be a bolela le rena tseleng, ge a be a re bulela Mangwalo ka mo go feletšego?” (Luka 24:27, 32) Re ka ithuta’ng tseleng yeo barutiwa ba Jesu ba ilego ba itshwara ka yona?

Re Ikwa Bjang ge Selo Seo re se Letetšego se sa Direge?

Barutiwa ba babedi bao ba bego ba le tseleng ya go ya Emause ba be ba nyamišitšwe ke gore dilo tšeo ba bego ba di letetše ga se tša direga. Ba diragaletšwe ke seo se bolelwago ke Diema 13:12 e rego: “Go diega ga selo seo se letetšwego go bolaiša pelo.” Ka mo go swanago, go ka direga gore ba bangwe ba rena bao ba bego ba dutše ba hlankela Jehofa ka potego ka nywagasome ba be ba nagana gore “masetlapelo a magolo” a be a tla ba a šetše a fetile kgale. (Mat. 24:21; Kut. 7:14) Go a kwagala gore ka dinako tše dingwe re ka nyamišwa ke gore dilo tše dingwe tšeo re bego re di letetše ga se tša phethagala.

Lega go le bjalo, gopola gore barutiwa bao ba babedi ba ile ba thaba ka morago ga gore Jesu a ba thuše go naganišiša ka boporofeta bjo bo bego bo šetše bo phethagetše—gaešita le bjo bo phethagetšego mehleng ya bona. Re  ka dula re thabile gomme ra kgona go lebeletšana le manyami ka tsela e swanago. Go fo ba bjalo ka ge mogolo wa Mokriste yo a nago le phihlelo yo a bitšwago Michael a boletše gore: “O se ke wa tsepamiša kgopolo go seo Jehofa a se a hlwago a se dira. Go e na le moo, naganišiša ka dilo tšeo a šetšego a di dirile.” A keletšo e botse e le ruri!

Seo Jehofa a re Diretšego Sona

Ela hloko tše dingwe tša dilo tše dibotse tšeo Jehofa a šetšego a di dirile. Jesu o itše: “Yo a dumelago go nna, le yena o tla dira mediro ye ke e dirago; o tla dira mediro e fetago ye.” (Joh. 14:12) Lehono, bahlanka ba Modimo ba phetha mediro e megolo kudu ya Bokriste. Batho ba fetago dimilione tše šupago ba fagahletše go phologa masetlapelo a magolo. Nagana feela, ga se gwa ka gwa direga gore bahlanka ba Jehofa ba ba botegago ba bantši ka tsela ye ba be mafolofolo dinageng tše dintši lefaseng ka moka! Jehofa o phethagaditše boporofeta bja Jesu bja mabapi le “mediro e fetago ye.”

Ke’ng se sengwe seo Jehofa a re diretšego sona? O dirile gore batho ba dipelo tše di botegago ba tšwe lefaseng le le kgopo gomme ba tsene paradeiseng ya moya yeo a e hlomilego. (2 Bakor. 12:1-4) Iphe nako ya go naganišiša ka tše dingwe tša dibopego tša paradeise yeo re nago le yona ga bjale. Ka mohlala, lebelela bokgobapuku bja gago goba bjo bo lego Holong ya geno ya Mmušo. Phetla Watch Tower Publications Index goba o fetleke Watchtower Library. Theetša terama e gatišitšwego ya Beibele. Nagana ka dilo tše o di bonego le go di kwa ge o be o le kopanong ya selete ya morago bjale. Go oketša moo, nagana ka bogwera bjo bo agago bjo re bo thabelago le bana babo rena le dikgaetšedi ba Bakriste. Jehofa o bile le seatla se se bulegilego gakaakang ka go re nea motlalo wo wa dijo tša moya le borwarre bjo lerato—ye ruri ke paradeise ya moya!

Mopsalme Dafida o itše: “Wena Jehofa Modimo wa ka, O dirile dilo tše dintši, o re diretše dilo tše dintši tše di makatšago, gomme tšeo o re naganetšego tšona ke tše dintši.” (Ps. 40:5) Ee, ka go naganišiša ka dilo tše dibotse tšeo Jehofa a šetšego a re diretše tšona le ka dilo tše lerato tšeo a re naganetšego tšona, re tla hwetša matla a mafsa a go kgotlelela ka potego tirelong ya rena yeo re e dirago ka pelo ka moka re e direla Tatago rena wa legodimong, Jehofa.—Mat. 24:13.

[Seswantšho go letlakala 31]

Jesu o thušitše barutiwa ba gagwe gore ba naganišiše ka seo Jehofa a ba diretšego sona

[Diswantšho go letlakala 32]

Nagana ka dilo tše o di bonego le go di kwa ge o be o le kopanong ya selete ya morago bjale