Re Matlafaletšwa go Fenya Teko le ge e le Efe

“Dilong tšohle ke na le matla ka baka la yo a mphago matla.” —BAFIL. 4:13.

1. Ke ka baka la’ng batho ba Jehofa ba lebeletšana le diteko tše dintši?

BATHO ba Jehofa le bona ba lebeletšana le diteko tša mehutahuta. Diteko tše dingwe di bakwa ke go se phethagale ga rena goba tshepedišo ya dilo yeo re phelago go yona. Tše dingwe di bakwa ke bonaba bjo bo lego gona magareng ga bao ba hlankelago Modimo le bao ba sa mo hlankelego. (Gen. 3:15) Go tloga mathomong a histori ya motho, Modimo o thušitše bahlanka ba gagwe bao ba botegago go fenya tlaišo ya bodumedi, go ganetša kgatelelo e mpe ya dithaka le go kgotlelela diteko tše dingwe. Moya wa gagwe o mokgethwa o ka re nea matla a go dira se se swanago.

Re Thušwa go Fenya Tlaišo ya Bodumedi

2. Morero wa tlaišo ya bodumedi ke ofe, gona e ka tla ka ditsela dife?

² Tlaišo ya bodumedi ke go tshwenya goba go gobatša batho ka boomo ka baka la tumelo ya bona. Morero wa tlaišo yeo ke go fediša ditumelo tšeo, go di thibela gore di se ke tša ata goba go senya potego ya badumedi. Tlaišo e ka tla ka ditsela tše di sa swanego, e nngwe e a bonagala, e nngwe ga e bonagale. Beibele e swantšha ditlhaselo tša Sathane le tša tawana le peetla.—Bala Psalme 91:13.

3. Tlaišo e swanago le ya tau le ya peetla di bonagala ka’ng?

³ Go swana le tau e bogale, gantši Sathane o hlasela ka tsela e bonagalago a diriša bošoro, kgolego goba dithibelo. (Ps. 94:20) Dipego tše dintši tša Yearbook di bolela gore Dihlatse tša Jehofa tša mehleng yeno di hlaselwa ka ditsela tše bjalo. Dihlopha tše šoro tša batho bao ba hlokago molao bao ka dinako tše dingwe ba etelelwago pele ke baruti goba boradipolitiki bao ba fišegelago thoko, di ile tša swara batho ba Modimo gampe mafelong a mantši. Ditlhaselo tše bjalo tšeo di swanago le tša tau di dirile gore ba mmalwa ba tlogele go hlankela Jehofa. Bjalo ka peetla, Diabolo o hlasela batho ka tsela ya boradia a iphihlile gore a tšhele mpholo  menaganong ya batho le go ba fora gore ba dire thato ya gagwe. Morero wa tlhaselo ye ke go re fokodiša goba go re senya moyeng. Eupša moya o mokgethwa wa Modimo o ka re thuša go lebeletšana le mehuta ka moka ya tlaišo.

4, 5. Tsela e kaone kudu ya go itokišeletša diteko ke efe, gona ka baka la’ng? Nea mohlala.

⁴ Go fo nagana ka ditlaišo tšeo mohlomongwe re ka tlago ra lebeletšana le tšona ka moso ga se tsela e botse ya go itokišeletša tšona. Ditlalemeso ga di tsebje, e bile go ka se re hole ka selo go hlwa re tshwenyega ka dilo tšeo mohlomongwe di ka se diregego. Lega go le bjalo, go na le seo re ka se dirago. Ba bantši bao ba ilego ba kgona go kgotlelela tlaišo ba thušitšwe ke go naganišiša ka mehlala ya babotegi bao Mangwalo a bolelago ka bona, go akaretša le dithuto le mohlala wa Jesu. Se se dirile gore ba rate Jehofa kudu. Lerato leo le ba thušitše gore ba kgone go fenya diteko le ge e le dife tšeo di bego di ba wela.

⁵ Ela hloko mohlala wa dikgaetšedi tša rena tše pedi tša kua Malawi. Sehlopha se sešoro sa bahlolampherefere se ile sa ba betha, sa ba hlobodiša le go ba tšhošetša ka gore se tla ba kata e le ge se ba gapeletša gore ba reke dikarata tša mokgatlo wa dipolitiki. Sehlopha seo se ile sa botša dikgaetšedi tše maaka se re gaešita le ditho tša lapa la Bethele di rekile dikarata tša mokgatlo woo. Dikgaetšedi tše di ile tša re’ng? Di ile tša re: “Wa rena Modimo ke Jehofa feela. Ge e ba bana babo rena bao ba lego ofising ya lekala ba rekile dikarata, yeo ke taba ya bona. Le ge le ka re le a re bolaya, rena re ka se kwanantšhe!” Ka morago ga go bontšha sebete ka tsela yeo, dikgaetšedi tše di ile tša lokollwa.

6, 7. Jehofa o matlafatša bahlanka ba gagwe bjang gore ba lebeletšane le tlaišo?

⁶ Moapostola Paulo o boletše gore Bakriste ba kua Thesalonika ba be ba amogetše therešo ka “tlase ga ditlaišego tše dintši,” eupša ba dirile bjalo “ka lethabo la moya o mokgethwa.” (1 Bathes. 1:6) Bakriste ba bantši, ba mehleng e fetilego le ba mehleng yeno, bao ba ilego ba lebeletšana le diteko gomme ba kgona go di fenya ba bega gore ge diteko tša bona di be di thoma go gakala, ba be ba ikwa ba tlala khutšo, e lego se sengwe sa dika tšeo di enywago ke moya o mokgethwa wa Modimo. (Bagal. 5:22) Khutšo yeo e ile ya ba thuša gore ba šireletše dipelo le menagano ya bona. Lega go le bjalo, Jehofa o diriša matla a gagwe a šomago go matlafatša bahlanka ba gagwe gore ba lebeletšane le diteko le gore ba dire dilo ka bohlale ge ba hlagelwa ke mathata. *

⁷ Bao ba re bogetšego ba ile ba šala ba ahlame ge ba bona kamoo batho ba Modimo ba ikemišeditšego ka gona go dula ba botega gaešita le ge ba lebeletšana le tlaišo e šoro. Dihlatse di be di bonagala di na le matla a fetago a tlwaelegilego gomme ruri di be di na le ona. Moapostola Petro o re kgonthišetša ka gore: “Ge e ba le gobošwa ka baka la leina la Kriste, le a thaba, gobane moya wa letago, wona moya wa Modimo, o godimo ga lena.” (1 Pet. 4:14) Taba ya gore re tlaišetšwa go kgomarela ditekanyetšo tša go loka e bontšha gore re amogelwa ke Modimo. (Mat. 5:10-12; Joh. 15:20) Ruri bohlatse bjo bja gore re kgahla Jehofa bo a re thabiša!

Re Thušwa go Fenya Kgatelelo ya Dithaka

8. (a) Joshua le Kalebe ba thušitšwe ke’ng gore ba fenye kgatelelo ya dithaka? (b) Re ka ithuta’ng mohlaleng wa Joshua le Kalebe?

⁸ Mohuta o mongwe wo o sa bonagalego wa kganetšo woo Bakriste ba lebeletšanago le wona ke kgatelelo e mpe ya dithaka. Lega go le bjalo, ka ge moya wa Jehofa o le matla kudu go feta moya wa lefase, o ka re thuša go fenya batho bao ba re kwerago, bao ba phatlalatšago maaka ka rena goba bao ba re gapeletšago go dira dilo ka tsela yeo ba di nyakago ka yona. Ka mohlala, Joshua le Kalebe ba thušitšwe ke’ng go ganetša pego ya dihlodi tše lesome tšeo di bego di romilwe go yo hlola naga ya Kanana? Moya o mokgethwa o ile wa ba tutuetša gore ba  be le “moya,” goba kgopolo e sa swanego le ya ba bangwe.—Bala Numeri 13:30; 14:6-10, 24.

9. Ke ka baka la’ng Bakriste ba swanetše go ikemišetša go se ye le mogofe?

⁹ Ka mo go swanago, moya o mokgethwa o ile wa matlafatša baapostola ba Jesu gore ba kwe Modimo go e na le go kwa batho bao bontši bo bego bo ba lebelela e le barutiši ba bodumedi bja therešo. (Dit. 4:21, 31; 5:29, 32) Batho ba bantši ba kgetha go ya le mogofe e le ge ba phema dintwa goba diphapano. Lega go le bjalo, gantši Bakriste ba therešo ba gapeletšega go emela seo ba tsebago gore se nepagetše. Eupša ka baka la matla ao ba a newago ke Modimo, ga ba boife go se ye le mogofe. (2 Tim. 1:7) Ela hloko boemo bjo bongwe bjo go bjona re sa swanelago go ineela kgatelelong ya dithaka.

10. Bakriste ba bangwe ba ka ikhwetša ba le tlalelong efe?

¹⁰ Bafsa ba bangwe ba ikhwetša ba tlaletšwe ge ba lemoga gore mogwera wa bona o itshwere ka tsela yeo e sa dumelelanego le Mangwalo. Ba ka nagana gore go tsomela mogwera wa bona thušo ya moya e tla ba e le go se mmotegele; ka baka leo, ba ka gana go bolela ka taba yeo ka baka la ge ba re ba nyaka go dula ba mmotegela ka go se kwanantšhe. Modiri wa bobe a ka botša bagwera ba gagwe tsebegokwa gore ba se ke ba rothiša mmutla madi. Go ba gona, bothata bjo bo tlwaelegile kudu bafseng. Batho ba bangwe ba bagolo le bona ba thatafalelwa ke go iša taba go bagolo ba phuthego ge e ba phošo e dirilwe ke mogwera wa bona goba setho sa lapa. Eupša Bakriste ba therešo ba swanetše go dira’ng ge ba lebeletšane le kgatelelo e bjalo?

11, 12. Tsela e kaone kudu ya go araba setho sa phuthego seo se go kgothaletšago gore o se ke wa bega phošo ya sona ke efe, gona ka baka la’ng?

¹¹ Nagana ka se. Anke re re Karabo, ngwanabo rena yo monyenyane, o sa tšwa go lemoga gore Pule, mogwera wa gagwe wa ka phuthegong, o hlagoletše mokgwa wa go bogela diswantšho tše di kgothaletšago bootswa. Karabo o botša Pule gore seo a se dirago se mo tshwenya kudu. Lega go le bjalo, Pule ga a mo tšeele hlogong. Ge Karabo a mo kgothaletša gore a boledišane le bagolo ka taba ye, Pule o araba ka gore ge e ba ruri Karabo e le mogwera wa gagwe, gona a ka se ke a mo tlalea. Na Karabo o swanetše go tšhoga gore o tla lahlegelwa ke mogwera? A ka ipotšiša gore bagolo ba tla kgolwa mang ge e ba Pule a ka gana dilo ka moka. Lega go le bjalo, ge e ba Karabo a ka fo ikhomolela, go ka se thuše selo. Ge e le gabotse, tswalano ya Pule le Jehofa e ka feleletša e senyegile. Karabo o swanetše go gopola gore “go tšhaba batho go wetša molabeng, eupša bao ba botilego Jehofa ba tla šireletšwa.” (Die. 29:25) Karabo o swanetše go dira’ng bjale? A ka ya go Pule gomme a fihla a mmotša gore seo a se dirilego se fošagetše. Seo se nyaka sebete. Lega go le bjalo, mo nakong ye go ka direga gore Pule a dumele go bolela ka bothata bja gagwe. Karabo o swanetše go kgothaletša Pule gore a boledišane le bagolo gomme a mmotše gore ge e ba a sa dire bjalo go fihlela ge go fetile lebaka le itšego, gona yena o tla ba botša.—Lef. 5:1.

 ¹² Ge e ba le wena o ka swanelwa ke go dira selo se bjalo, mogwera wa gago a ka no se kgahlwe ke thušo yeo o lekago go mo nea yona. Eupša a ka thoma go lemoga ge nako e dutše e eya gore o leka go thuša yena. Ge e ba modiri yo wa bobe a ka newa thušo gomme a e amogela, gona a ka dula a go leboga kudu ka baka la ge o ile wa bontšha sebete le go mmotegela. Ka lehlakoreng le lengwe, ge a ka thoma go go swara makgwakgwa, na ruri e tla ba e le mohuta wa mogwera yo o mo nyakago? Go kgahla Mogwera wa rena yo mogolo, Jehofa, e dula e le selo se se nepagetšego seo re ka se dirago. Ge re mo etiša pele, ba bangwe bao ba mo ratago ba tla re hlompha ka baka la potego ya rena gomme e tla ba bagwera ba rena ba paale. Ga se ra swanela go nea Diabolo sebaka ka phuthegong ya Bokriste. Ge re ka dira bjalo, ruri re tla nyamiša moya o mokgethwa wa Jehofa. Lega go le bjalo, re tla ba re dira dilo ka go dumelelana le wona ge re katanela go boloka phuthego ya Bokriste e sekile.—Baef. 4:27, 30.

Re Thušwa go Kgotlelela Mehuta ka Moka ya Mathata

13. Batho ba Jehofa ba lebeletšana le mathata a mohuta mang, gona ke ka baka la’ng dilo tše bjalo di atile gakaakaa?

¹³ Mathata a ka tla ka ditsela tše dintši—mathata a ditšhelete, go lahlegelwa ke mošomo, go hwelwa ke motho yo re mo ratago, go se phele gabotse mmeleng, bjalo bjalo. Ka ge re phela ‘dinakong tše di hlobaetšago,’ ka moka ga rena re tla lebeletšana le teko e itšego, bjang goba bjang. (2 Tim. 3:1) Ge seo se direga, go bohlokwa gore o se ke wa tshwenyega. Moya o mokgethwa o ka re matlafaletša go kgotlelela mehuta ka moka ya mathata.

14. Jobo o matlafaditšwe ke’ng gore a kgotlelele mathata a gagwe?

¹⁴ Jobo o ile a welwa ke mathata ka go latelana. O ile a lahlegelwa ke tšohle tšeo a bego a na le tšona, bana, bagwera, a thoma go babja gomme mosadi wa gagwe a se sa bota Jehofa. (Jobo 1:13-19; 2:7-9) Lega go le bjalo, Jobo o ile a homotšwa kudu ke Elihu. Seo ge e le gabotse a bego a se bolela, go akaretša le tabakgolo ya seo Jehofa a bego a se botša Jobo, e be e le gore: “Ema o re tuu! O ele hloko mediro e makatšago ya Modimo.” (Jobo 37:14) Jobo o thušitšwe ke’ng gore a kgotlelele diteko? Gona re tla thušwa ke’ng gore re kgotlelele diteko tša rena? Re tla thušwa ke go gopola le go naganišiša ka ditsela tše di fapafapanego tša go šoma ga moya o mokgethwa wa Jehofa le matla. (Jobo 38:1-41; 42:1, 2) Mohlomongwe re gopola dinako tšeo re bonego bohlatse bja gore Modimo o a re kgahlegela. E bile o sa re kgahlegela.

15. Moapostola Paulo o matlafaditšwe ke’ng gore a kgotlelele diteko?

¹⁵ Moapostola Paulo o kgotleletše mathata a mantši ka baka la tumelo ya gagwe. (2 Bakor. 11:23-28) O kgonne bjang go dula a na le tekatekano le go dula a theošitše maswafo maemong a bjalo a thata? O thušitšwe ke go ithekga ka Jehofa ka thapelo. Nakong ya teko yeo go bonagalago e ile ya feleletša e mo dira mohwelatumelo, Paulo o ngwadile gore: “Morena o ile a ema le nna gomme a mpha matla, e le gore boboledi bo phethwe ka botlalo ka nna le gore ditšhaba ka moka di bo kwe; le gona ke hlakodišitšwe molomong wa tau.”  (2 Tim. 4:17) Ka baka la phihlelo yeo Paulo a bilego le yona, o be a ka kgona go kgonthišetša badumedigotee le yena gore ga go nyakege gore ba ‘belaele ka selo.’—Bala Bafilipi 4:6, 7, 13.

16, 17. Nea mohlala wa kamoo Jehofa a matlafatšago batho ba gagwe bao ba lebeletšanago le mathata lehono.

¹⁶ Mmulamadibogo yo a bitšwago Roxana ke yo mongwe wa batho bao ba bonego kamoo Jehofa a hlokomelago batho ba gagwe. Ge a be a kgopela matšatši a go ya kopanong ya rena ya selete go mothwadi wa gagwe, ka bogale mothwadi yo o ile a botša kgaetšedi gore ge a ka ya kopanong, e tla ba e le gona ge a laetše mošomo. Roxana o ile a fo ya gomme a rapela ka go tšwa pelong gore a se ke a lahlegelwa ke mošomo. Ka morago ga moo, o ile a ikwa a le kaone. Mošupologo wa ka morago ga kopano, mong wa gagwe o ile a mo raka mošomong, bjalo ka ge a be a boletše. Roxana o be a tshwenyegile. Mošomo woo o be o tloga o le bohlokwa gore a kgone go hlokomela lapa la gagwe, le ge a be a sa gole tšhelete e ntši. O ile a rapela gape gomme a nagana gore ge e ba Modimo a ile a mo hlokomela moyeng kua kopanong gona o tla mo hlokomela le nameng. Tseleng ya go ya gae, Roxana o ile a bona leswao leo le ngwadilwego gore “Go Nyakega Thušo” ya batho bao ba nago le phihlelo ya go diriša metšhene ya go roka gomme o ile a romela kgopelo ya mošomo. Molaodi o ile a lemoga gore ga a na phihlelo eupša o ile a fo mo thwala, a mo holofetša mogolo wo o nyakilego o feta wo a bego a o hwetša gabedi. Roxana o ile a nagana gore dithapelo tša gagwe di arabilwe. Lega go le bjalo, tšhegofatšo e kgolo yeo a e hweditšego e bile ya gore o kgonne go boledišana le bašomigotee le yena ka ditaba tše dibotse. Ba bahlano, go akaretša le molaodi wa gagwe, ba ile ba amogela therešo gomme ba kolobetšwa.

¹⁷ Ka dinako tše dingwe, re ka nagana gore dithapelo tša rena ga di arabje—mohlomongwe ga di arabje ka pela goba ka tsela yeo re bego re nagana ka yona. Ge e ba go le bjalo, ruri go na le lebaka. Jehofa o a le tseba, eupša mohlomongwe re ka tla ra le tseba ge nako e dutše e eya. Re ka kgodišega ka selo se tee—Modimo ga a lahle batho ba gagwe bao ba mmotegelago.—Baheb. 6:10.

Re Thušwa go Kgotlelela Diteko

18, 19. (a) Ke ka baka la’ng re sa swanela go makala ge re lebeletšana le diteko? (b) Re ka lebeletšana bjang le diteko ka katlego?

¹⁸ Diteko, manyami, tlaišo le kgatelelo ya dithaka tšeo batho ba Jehofa ba lebeletšanago le tšona ga di ba makatše. Ge e le gabotse, lefase ga le re rate. (Joh. 15:17-19) Lega go le bjalo, moya o mokgethwa o ka re thuša go fenya tlhohlo le ge e le efe yeo re ka lebeletšanago le yona ge re dutše re hlankela Modimo. Jehofa a ka se ke a dumelela gore re lekwe go feta kamoo re ka kgonago go kgotlelela ka gona. (1 Bakor. 10:13) Le ka mohla a ka se re tlogele goba go re lahla. (Baheb. 13:5) Go kwa Lentšu la gagwe le le buduletšwego go a re šireletša le go re matlafatša. Go oketša moo, moya wa Modimo o ka tutuetša badumedigotee le rena gore ba re thuše ge re tloga re hloka thušo.

¹⁹ Eka ka moka ga rena re ka tšwela pele re tsoma moya o mokgethwa ka go rapela le ka go ithuta Mangwalo. Anke re tšweleng pele re “matlafatšwa ka matla ohle go ya ka matla a [Modimo] a letago e le gore [re] kgotlelele ka mo go tletšego ka go se fele pelo le ka lethabo.”—Bakol. 1:11.

[Mongwalo wa tlase]

O be o tla Araba Bjang?

• O ka itokišeletša go lebeletšana le tlaišo ka ditsela dife?

• O swanetše go dira’ng ge motho a go kgopela gore o se ke wa utolla sebe?

• O ka kgodišega ka’ng ge o lebeletšane le mathata le ge e le afe?

[Dipotšišo tša Thuto]

[Seswantšho go letlakala 28]

Re ka ithuta’ng go Joshua le Kalebe?

[Seswantšho go letlakala 29]

Re ka thuša bjang mogwera yo a dirago phošo?