Dipotšišo tše Tšwago go Babadi

Ke ka baka la’ng Moshe a ile a galefela barwa ba Arone e lego Eleasara le Ithamara ka morago ga go hwa ga barwarrago bona e lego Nadaba le Abihu, gona kgalefo ya gagwe e ile ya okobala bjang?—Lef. 10:16-20.

Nakwana ka morago ga go hlongwa ga boperisita, Jehofa o ile a ahlolela barwa ba Arone, Nadaba le Abihu, lehu ka gobane ba ile ba tliša mollo o šele pele ga Gagwe. (Lef. 10:1, 2) Moshe o ile a laela barwa ba ba šetšego ba Arone gore ba se ke ba llela barwarrago bona bao ba hwilego. Nakwana ka morago ga moo, Moshe o ile a galefela Eleasara le Ithamara ka gobane ba be ba se ba ja pudi ya sebego yeo go bego go tla dirwa sehlabelo ka yona. (Lef. 9:3) Ke ka baka la’ng Moshe a ile a galefa?

Melao yeo Jehofa a bego a e neile Moshe e be e bolela ka mo go kwagalago gore moperisita yo a bego a neela sebego o be a swanetše go ja karolo ya sona a le ka lapeng la ka gare la ngwako wa kgwerano. Go dira bjalo go be go lebelelwa e le tebalelo ya dibe tša bao ba dirilego sehlabelo. Lega go le bjalo, ge a mangwe a madi a sehlabelo a be a ka išwa Lefelong le Lekgethwa, e lego karolo ya pele ya sekgethwa, gona sehlabelo se be se sa swanela go lewa. Go e na le moo, se be se swanetše go fišwa.—Lef. 6:24-26, 30.

Ka morago ga ditiragalo tša masetlapelo tša letšatšing leo, go bonagala Moshe a ile a bona go le bohlokwa go kgonthišetša gore ditaelo ka moka tša Jehofa di latetšwe. Ge a lemoga gore pudi ya sebego e fišitšwe, o ile a botšiša Eleasara le Ithamara a befetšwe gore ke ka baka la eng ba sa ka ba e ja bjalo ka ge go be go laetšwe, ka gobane madi a yona ga se a tšhollelwa pele ga Jehofa Lefelong le Lekgethwa.—Lef. 10:17, 18.

Arone o arabile potšišo ya Moshe, ka ge baperisita ba ba šetšego ba be ba dirile go ya ka ge a be a laetše. Ka morago ga lehu la barwa ba gagwe ba babedi, Arone a ka ba a ile a ipotšiša ge e ba yo mongwe wa baperisita a ka ja sebego ka letswalo le lebotse letšatšing leo. Mohlomongwe o be a nagana gore go ja ga bona sebego go be go ka se kgahle Jehofa, gaešita le ge ba be ba sa ikarabele phošong ya Nadaba le Abihu.—Lef. 10:19.

Arone a ka ba a ile a nagana gore letšatšing leo ba lapa la gagwe ba bego ba phetha karolo ya bona ya boperisita la mathomo, ba be ba swanetše go ba ba ile ba tshwenyega kudu ka go kgahla Modimo gaešita le dilong tše dinyenyane. Lega go le bjalo, Nadaba le Abihu ba be ba gobošitše leina la Jehofa gomme O ile a ba galefela. Ka gona, mohlomongwe Arone o ile a nagana gore ditho tša lapa la boperisita tšeo sebe sa mohuta woo se hweditšwego go lona ga se tša swanela go ja sehlabelo le ge e le sefe se sekgethwa.

Go bonagala Moshe a ile a amogela karabo ya ngwanabo, ka ge pego ye e feleletša ka gore: “Ge Moshe a ekwa seo sa mo kgotsofatša.” (Lef. 10:20) Go molaleng gore Jehofa o ile a kgotsofatšwa ke karabo ya Arone.