Go Amogelwa ke Modimo go Iša Bophelong bjo bo sa Felego

“Wena Jehofa o tla šegofatša le ge e le mang yo a lokilego; ka ge o ba amogela, o tla ba šireletša bjalo ka ge eka ke ka kotse e kgolo.”—PS. 5:12.

1, 2. Eliya o ile a kgopela’ng go mohlologadi wa Tsarepata gomme o ile a mo kgonthišetša’ng?

MMA, morwa wa gagwe le moporofeta wa Modimo ba be ba swerwe ke tlala. Mohlologadi yo yo a bego a dula Tsarepata o be a itokišeletša go gotša mollo wa go apea ge moporofeta Eliya a be a mo kgopela meetse le senkgwa. O be a ikemišeditše go mo nea sa go nwa, eupša dijo feela tšeo a bego a na le tšona e be e le “bupi bjo bo ka tlalago seatla ka pitšeng e kgolo le makhura a manyenyane ka legapaneng.” O be a ikwa a ka se kgone go nea moporofeta dijo gomme o ile a ba a mmotša seo.—1 Dikg. 17:8-12.

² Eliya o ile a mo phegelela ka gore: “Fela ka seo o nago le sona [thoma] ka go ntirela senkgwanyana o ntlišetše sona, ke moka e be gona o direlago wena le morwa wa gago. Ka gobane se ke seo Jehofa Modimo wa Isiraele a se boletšego: ‘Bupi bjo bo lego ka pitšeng e kgolo bo ka se ke bja fela, le makhura ao a lego ka legapaneng a ka se ke a fela.’”—1 Dikg. 17:13, 14.

3. Re lebeletšane le kgang efe e bohlokwa?

³ Tabakgolo yeo mohlologadi yo a bego a lebeletšane le yona e be e se go fo dira phetho ya gore o tla dira eng ka dijo tša gagwe tša mafelelo. Na o be a tla bota Jehofa gore a mo phološe gotee le morwa wa gagwe, goba na o be a tla tshwenyega kudu ka dikgahlego tša nama go e na le go amogelwa ke Modimo le go gwerana le yena? Ka moka ga rena re lebeletšane le phetho e bjalo. Na re tla tshwenyega kudu ka go amogelwa ke Jehofa go e na le go tshwenyega ka go phegelela dilo tše di bonagalago? Re na le mabaka a kwagalago a go bota Modimo le go mo hlankela. E bile go na le megato yeo re ka e gatago gore re tsome kamogelo ya gagwe le go e hwetša.

‘O Swanelwa ke go Rapelwa’

4. Ke ka baka la’ng Jehofa a swanelwa ke gore re mo rapele?

⁴ Ke tshwanelo gore Jehofa a letele gore batho  ba mo hlankele ka tsela yeo a e amogelago. Sehlopha sa bahlanka ba gagwe ba legodimong se ile sa kgonthišetša taba ye ge se be se dumelelana ka gore: “Wena Jehofa Modimo wa rena o swanelwa ke go amogela letago, kgodišo le matla, gobane o bopile dilo ka moka gomme di bile gona le go bopša ka baka la thato ya gago.” (Kut. 4:11) Jehofa o swanelwa ke gore re mo rapele ka ge e le Mmopi.

5. Ke ka baka la’ng lerato la Modimo le swanetše go re tutueletša gore re mo hlankele?

⁵ Lebaka le lengwe leo le dirago gore re hlankele Jehofa ke ka gobane o re rata ka tsela e sa bapišwego le selo. Beibele e re: “Modimo a bopa motho ka seswantšho sa gagwe, a mmopa ka go swantšha ka yena Modimo; a bopa yo motona le yo motshadi.” (Gen. 1:27) Modimo o bopile motho a na le bokgoni bja go nagana le bja go dira diphetho. Ge Jehofa a be a re nea bophelo, o ile a fetoga Tatago batho ka moka. (Luka 3:38) Go swana le tate yo mongwe le yo mongwe yo a lokilego, o neile barwa le barwedi ba gagwe selo se sengwe le se sengwe gore ba ipshine ka bophelo. O “hlabišetša ba kgopo le baloki letšatši” a ba “a nešetša ba ba lokilego le ba sa lokago pula” gore polanete ya Lefase e kgone go re nea dijo tše dintši tikologong e botse.—Mat. 5:45.

6, 7. (a) Adama o baketše ditlogolo tša gagwe mathata afe? (b) Bao ba nyakago go amogelwa ke Modimo ba tla holwa bjang ke sehlabelo sa Kriste?

⁶ Le gona, Jehofa o re hlakodišitše ditlamoragong tše di gobatšago tša sebe. Ge Adama a be a dira sebe, o ile a swana le monna yo a yago go petšha ka tšhelete yeo a e utsweditšego lapa la gagwe. Ka go rabela go Jehofa, Adama o amogile bana ba gagwe kholofelo ya bona—lethabo la ka mo go sa felego. Tsela ya gagwe ya boithati e išitše batho bokgobeng bja go se phethagale. Ka baka leo, batho ka moka ke makgoba a bolwetši, manyami gomme mafelelong ba a hwa. Lekgoba le swanetše go lefelelwa gore le lokollwe gomme Jehofa o re lefeletše gore re lokollwe ditlamoragong tše tše mpe. (Bala Baroma 5:21.) Jesu Kriste o ile a dira dilo ka go dumelelana le thato ya Tatagwe ge a be a “nea moya wa gagwe gore e be topollo bakeng sa ba bantši.” (Mat. 20:28) Go se go ye kae, bao ba amogelwago ke Modimo ba tla holwa ka botlalo ke topollo yeo.

⁷ Mmopi wa rena, Jehofa, o re neile bophelo bjo bo thabišago le bjo bo nago le morero go feta motho le ge e le ofe. Ge re ka amogelwa ke yena, re tla bona kamoo a tlago go lokiša dilo ka moka tšeo di tshwentšego batho. Jehofa o tla bontšha yo mongwe le yo mongwe wa rena gore “e ba moputsi wa bao ba mo tsomago ka phišego.”—Baheb. 11:6.

“Batho ba Gago ba tla Ithaopa”

8. Seo se diragaletšego Jesaya se re ruta’ng ka go hlankela Modimo?

⁸ Re swanetše go diriša tokologo ya rena ka tshwanelo gore re amogelwe ke Modimo. Se se dirwa ke gore Jehofa ga a gapeletše motho go mo hlankela. Mehleng ya Jesaya, O ile a botšiša gore: “Ke tla roma mang, gomme ke mang a tlago go re yela?” Jehofa o ile a godiša moporofeta yo ka go hlompha tshwanelo ya gagwe ya go kgetha seo a nyakago go se dira. Nagana kamoo Jesaya a bego a kgotsofetše ka gona ge a be a araba ka gore: “Ke nna yo! Roma nna.”—Jes. 6:8.

9, 10. (a) Re swanetše go hlankela Modimo re na le kgopolo efe? (b) Ke ka baka la’ng re swanetše go hlankela Jehofa ka pelo ka moka?

⁹ Batho ba na le tokologo ya go ikgethela go hlankela Modimo goba go se dire bjalo. Jehofa o nyaka gore re mo hlankele ka go rata. (Bala Joshua 24:15.) Modimo ga a kgahlwe ke motho yo a sa mo rapelego; e bile ga a kgahlwe ke bao ba mo rapelago e le gore ba kgahliše batho ba bangwe. (Bakol. 3:22) Modimo a ka se re amogele ge e ba re “dikadika” go dira tirelo e kgethwa ka ge re dumelela dikgahlego tša lefase gore di šitišane le borapedi bja rena. (Ek. 22:29) Jehofa o a tseba gore go mo hlankela ka pelo ka moka go hola rena. Moshe o ile a kgothaletša Baisiraele gore ba ikgethele bophelo ‘ka gore ba rate Jehofa Modimo wa bona, ka go  theetša lentšu la gagwe le ka go mo kgomarela.’—Doit. 30:19, 20.

¹⁰ Kgoši Dafida wa Isiraele ya bogologolo o ile a opelela Jehofa ka gore: “Batho ba gago ba tla ithaopa mohlang o etšwa dira. Bokgethweng bjo bo kgahlišago, O na le sehlopha sa gago sa bafsa bao ba etšago marothodi a phoka ya masa.” (Ps. 110:3) Batho ba bantši lehono ba phelela tšhelete le maipshino. Lega go le bjalo, bao ba ratago Jehofa ba etiša pele tirelo ya bona e kgethwa. Phišego yeo ba e bontšhago ge ba bolela ditaba tše dibotse e bontšha seo ba se etišago pele maphelong a bona. Ba tloga ba kgodišegile gore Jehofa o kgona go hlokomela dinyakwa tša bona tša letšatši le letšatši.—Mat. 6:33, 34.

Dihlabelo Tšeo di Amogelwago ke Modimo

11. Baisiraele ba be ba holofetše go hwetša moputso ofe ge ba direla Jehofa dihlabelo?

¹¹ Ka tlase ga kgwerano ya Molao, batho ba Modimo ba be ba mo direla dihlabelo tše dibotse gore a ba amogele. Lefitiko 19:5 e re: “Bjale ge e ba le direla Jehofa sehlabelo sa mohlakanelwa, le se dire e le gore le amogelwe.” Pukung yeo ya Beibele re bala gore: “Ge le direla Jehofa sehlabelo sa ditebogo, le se dire e le gore le amogelwe.” (Lef. 22:29) Ge Baisiraele ba be ba direla Jehofa sehlabelo se se amogelegago aletareng, muši wo o bego o rotoga o be o le bjalo ka “monko o bose” o yago go Modimo wa therešo. (Lef. 1:9, 13) O be a kgahlišwa ke pontšho yeo ya lerato e tšwago go batho ba gagwe. (Gen. 8:21, mongwalo wa tlase wa Reference Bible.) Karolong ye ya Molao, re hwetša molao wa motheo wo o sa šomago le lehono. Bao ba direlago Jehofa dihlabelo tšeo a di amogelago ba a mo kgahla. O amogela dihlabelo tša mohuta mang? Ela hloko dikarolo tše pedi tša maphelo a rena: boitshwaro le dipolelo tša rena.

12. Ke dilo dife tšeo di ka dirago gore go ‘neela mebele ya rena e le sehlabelo’ go se kgahliše Modimo?

¹² Ge moapostola Paulo a be a ngwalela Baroma lengwalo, o itše: “[Neelang] mebele ya lena e le sehlabelo se se phelago, se sekgethwa, se se amogelegago go Modimo, tirelo e kgethwa ka matla a lena a tlhaologanyo.” (Baroma 12:1) Motho o swanetše go dira gore mmele wa gagwe o amogelege go Modimo gore a mo kgahle. Ge a ka itšhilafatša ka motšoko, betel nut, dihlaretagi goba ka botagwa, sehlabelo seo se be se ka se be le mohola. (2 Bakor. 7:1) Go feta moo, ka ge yo “a tlwaetšego go dira bootswa [a] direla mmele wa gagwe sebe,” boitshwaro bja gagwe bjo bo gobogilego bo dira gore dihlabelo tšeo a di dirago di se ke tša kgahliša Jehofa. (1 Bakor. 6:18) Motho o swanetše go ba yo ‘mokgethwa boitshwarong ka moka’ gore a kgahliše Modimo.—1 Pet. 1:14-16.

13. Ke ka baka la’ng re swanetše go tumiša Jehofa?

¹³ Sehlabelo se sengwe seo Jehofa a se amogelago se mabapi le tsela yeo re bolelago ka yona. Ka mehla bao ba ratago Jehofa ba mmolela gabotse phatlalatša le ge ba le gae ka sephiring.  (Bala Psalme 34:1-3.) Bala Dipsalme 148-150, gomme o bone makga ao ka ona dipsalme tše tše tharo di re kgothaletšago go tumiša Jehofa. Ruri “go a swanela ge baloki ba nea tumišo.” (Ps. 33:1) Le gona Mohlala wa rena, Jesu Kriste, o ile a gatelela bohlokwa bja go tumiša Modimo ka go bolela ditaba tše dibotse.—Luka 4:18, 43, 44.

14, 15. Hosea o ile a kgothaletša Baisiraele go dira dihlabelo tša mohuta mang, gona Jehofa o ile a ikwa bjang ka se?

¹⁴ Ge re dira boboledi ka mafolofolo, re hlatsela gore re rata Jehofa le gore re nyaka gore a re amogele. Ka mohlala, ela hloko kamoo moporofeta Hosea a ilego a ipiletša go Baisiraele bao ba rapelago medimo ya maaka gomme ba se sa amogelwa ke Modimo. (Hos. 13:1-3) Hosea o ba boditše gore ba lope ka gore: “Re swarele molato wa rena [Jehofa]; o amogele botse bjo re bo dirago gomme rena re tla go nea dienywa tša melomo ya rena, e lego dipowana tša theto.”—Hos. 14:1, 2.

¹⁵ Poo e be e le phoofolo ya theko ya godimo kudu yeo Moisiraele a bego a ka direla Jehofa sehlabelo ka yona. Ka baka leo, “dienywa tša melomo ya rena, e lego dipowana tša theto” di šupa mantšung a tšwago pelong ao a nagannwego gabotse ao re a bolelago ge re tumiša Modimo wa therešo. Jehofa o ile a ikwa bjang ge batho ba be ba dira dihlabelo tša mohuta wo? O itše: “Ke tla ba rata ka la ka.” (Hos. 14:4) Jehofa o ile a lebalela batho bao ba bego ba dira dihlabelo tše bjalo tša theto, a ba amogela gomme ya ba bagwera ba gagwe.

16, 17. Jehofa o amogela bjang sehlabelo sa motho yo a tutuetšwago ke tumelo gore a bolele ditaba tše dibotse?

¹⁶ Go tumiša Jehofa phatlalatša go be go dutše go tšeelwa godimo kudu borapeding bja therešo. Go tagafatša Modimo wa therešo phatlalatša go be go le bohlokwa kudu go mopsalme moo a ilego a kgopela Modimo gore: “Anke o thabele dibego tša boithaopo tše di tšwago molomong wa ka, hle Jehofa.” (Ps. 119:108) Go thwe’ng ka lehono? Jesaya o ile a porofeta ka lešaba le legolo la batho ba mehleng ya rena gore: “Ba tla tumiša Jehofa phatlalatša. . . . [Dimpho tša bona] di tla tla aletareng ya ka [ya Modimo] ka go amogelwa.” (Jes. 60:6, 7) E le go phethagatša se, ba dimilione ba direla Modimo “sehlabelo sa tumišo ka mehla, ke gore seenywa sa melomo . . . yeo e bolelago ka leina la gagwe phatlalatša.”—Baheb. 13:15.

¹⁷ Go thwe’ng ka wena? Na o direla Modimo dihlabelo tšeo di mo kgahlago? Ge e ba go se bjalo, na o tla dira diphetogo gomme wa thoma go tumiša Jehofa phatlalatša? Ge tumelo e go tutueletša gore o thome go bolela ditaba tše dibotse, dihlabelo tša gago di tla ‘kgahla Jehofa kudu go feta poo.’ (Bala Psalme 69:30, 31.) Kgodišega gore “monko o bose” wa dihlabelo tša gago o tla fihla go Jehofa gomme seo sa dira gore a go amogele. (Hesek. 20:41) Seo se tla dira gore o thabe kudu.

“Jehofa o tla Šegofatša le ge e le Mang yo a Lokilego”

18, 19. (a) Batho ba bantši lehono ba na le pono efe mabapi le go hlankela Modimo? (b) Go se amogelwe ke Modimo go feleletša ka’ng?

¹⁸ Ba bantši lehono ba ikwa go swana le batho ba mehleng ya Maleaki, bao ba itšego: “Ga go hole selo go hlankela Modimo. Re boetšwe ke eng tabeng ya go latela melao ya gagwe?” (Mal. 3:14) Ka ge ba gogwa ke dikganyogo tša dilo tše di bonagalago, ba lebelela morero wa  Modimo e le wo o sa kgonegego le melao ya gagwe e se sa šoma. Ba lebelela go bolela ditaba tše dibotse e le go itshenyetša nako e bile go tena.

¹⁹ Dikgopolo tša mohuta wo di thomile morago kua tšhemong ya Edene. Ke Sathane yo a tutueditšego Efa gore a se bone mohola wa bophelo bjo bobotse bjo Jehofa a mo neilego bjona gomme a se sa amogelwa ke Yena. Lehono, Sathane o kgothaletša batho go dumela gore go dira thato ya Modimo ga go na mohola. Lega go le bjalo, Efa le monna wa gagwe ba ile ba lemoga gore ge ba se sa amogelwa ke Modimo ba tlile go hwa. Kgauswinyane, bao ba latelago mohlala wa bona o mobe ba tla lemoga gore le bona ba tlo hwa.—Gen. 3:1-7, 17-19.

20, 21. (a) Mohlologadi wa Tsarepata o ile a dira’ng gomme taba yeo e feleleditše kae? (b) Re ka ekiša bjang mohlologadi yo wa Tsarepata, gona ke ka baka la’ng re swanetše go dira bjalo?

²⁰ Nagana ka phapano e kgolo e lego gona magareng ga seo mafelelong se ilego sa diragalela Adama le Efa gotee le seo se diragaletšego Eliya le mohlologadi wa Tsarepata. Ka morago ga gore Eliya a mo kgothatše, mosadi yo o ile a thoma go apea gomme a thoma ka go nea moporofeta senkgwanyana. Ke moka Jehofa o ile a phethagatša kholofetšo yeo a bego a e dirile ka Eliya. Pego e re: “Mosadi yoo le lapa la gagwe gotee le Eliya ba ba le dijo ka matšatši a mantši. Bupi bjo bo bego bo le ka pitšeng e kgolo bja se ke bja fela, le makhura ao a bego a le ka legapaneng a se ke a fela, feela bjalo ka ge Jehofa a boditše Eliya.”—1 Dikg. 17:15, 16.

²¹ Mohlologadi wa Tsarepata o dirile selo seo batho ba dibilione tše sego kae bao ba phelago lehono ba ikemišeditšego go se dira. Ruri o ile a bota Modimo wa phološo gomme le yena ga se a ka a fo mo tlogela nyanyeng. Pego ye ya Beibele gotee le tše dingwe di tiiša taba ya gore re swanetše go bota Jehofa. (Bala Joshua 21:43-45; 23:14.) Maphelo a Dihlatse tša Jehofa tša mehleng yeno ke bohlatse bjo bongwe bja gore a ka se ke a lahla bao a ba amogelago.—Ps. 34:6, 7, 17-19. *

22. Ke ka baka la’ng go akgofile gore re nyake go amogelwa ke Modimo?

²² Letšatši la Modimo la kahlolo la go “tlela bohle bao ba dulago lefaseng” le kgauswi. (Luka 21:34, 35) Ga le phemege. Ga go na mahumo goba manobonobo ao a ka bago bohlokwa kudu go feta go kwa Moahlodi yo a kgethilwego ke Modimo ge a re: “Tlang, lena bao le šegofaditšwego ke Tate, jang bohwa bja Mmušo wo le o lokišeditšwego.” (Mat. 25:34) Ee, ‘Jehofa o tla šegofatša le ge e le mang yo a lokilego; o tla ba šireletša bjalo ka ge eka ke ka kotse e kgolo.’ (Ps. 5:12) Na ga se ra swanela go nyaka go amogelwa ke Modimo?

[Mongwalo wa tlase]

Na o a Gopola?

• Ke ka baka la’ng Jehofa a swanelwa ke gore re mo rapele ka pelo ka moka?

• Jehofa o amogela dihlabelo tša mohuta mang lehono?

• Polelwana ‘dipowana tša theto tša melomo ya rena’ e šupa go eng, gona ke ka baka la’ng re swanetše go di neela Jehofa?

• Ke ka baka la’ng re swanetše go nyaka go amogelwa ke Modimo?

[Dipotšišo tša Thuto]

[Seswantšho go letlakala 13]

Ke kgang efe e bohlokwa yeo moporofeta wa Modimo a ilego a e rotoša go mma yo a diilago?

[Seswantšho go letlakala 15]

Go neela Jehofa sehlabelo sa tumišo go re hola bjang?

[Seswantšho go letlakala 17]

Go bota ga gago Jehofa ka pelo ka moka go ka se go nyamiše le ka mohla