“Go kwa go Phala Sehlabelo”

SAULO e be e le kgoši ya pele ya Isiraele ya bogologolo. Le ge Saulo a be a kgethilwe ke Modimo wa therešo, mafelelong o ile a hloka tsebe.

Saulo o dirile diphošo dife? Na o be a ka kgona go di phema? Go hlahloba mohlala wa gagwe go ka re hola bjang?

Jehofa o Tsebatša Kgoši ye a e Kgethilego

Pele ga ge Saulo e ka ba kgoši, moporofeta Samuele o be a hlankela e le moemedi wa Modimo Isiraeleng. Ga bjale Samuele o be a tšofetše gomme barwa ba gagwe ba sa botege. Ka yona nako yeo, setšhaba se be se tšhošetšwa ke manaba a sona. Ge banna ba bagolo ba Isiraele ba be ba kgopela Samuele gore a bee kgoši e tlago go ba ahlolela le go ba etelela pele go ya ntweng, Jehofa o ile a laela moporofeta yo go tlotša Saulo gore e be moetapele gomme a re: “O tla phološa setšhaba sa ka seatleng sa Bafilisita.”—1 Sam. 8:4-7, 20; 9:16.

Saulo e be e le “yo mofsa e bile a le botse.” Lega go le bjalo, ga se ponagalo ya gagwe feela yeo e bego e dira gore a ratege. E bile o be a ikokobeditše. Ka mohlala, Saulo o ile a botšiša Samuele gore: “Na ga ke Mobenjamini wa moloko o monyenyane kudu go meloko ya Isiraele, gomme na lapa lešo ga se leo le nyatšegago kudu go malapa ka moka a moloko wa Benjamini? Bjale ke ka baka la’ng o mpotša selo sa go swana le se?” Saulo o be a sa ikgodiše goba go godiša lapa labo gaešita le ge tatagwe, Kishe, a be “a humile kudu.”—1 Sam. 9:1, 2, 21.

Le gona, ela hloko tsela yeo Saulo a ilego a arabela ka yona ge Samuele a be a tsebatša yo Jehofa a mo kgethilego gore e be kgoši ya Isiraele. Samuele o thomile ka go tlotša Saulo ka sephiring gomme a mmotša gore: “Dira seo o ka se kgonago, ka gobane Modimo wa therešo o na le wena.” Ka morago ga moo, moporofeta o ile a bitša batho gore a ba tsebiše yo Jehofa a mo kgethilego. Lega go le bjalo, Saulo o be a jelwe ke bjelele ge go be go utollwa gore go kgethilwe yena. Saulo o be a iphihlile ka baka la dihlong. Jehofa o ile a mo utolla mo a bego a iphihlile gona gomme gwa tsebatšwa gore Saulo ke kgoši.—1 Sam. 10:7, 20-24.

Ntweng

Kapejana, Saulo o ile a tswalela melomo ya bao go ka diregago gore ba be ba mmelaela. Ge Baamoni ba be ba tšhošetša motse wa Isiraele, ‘moya wa Modimo o ile wa theogela go Saulo.’ O ile a bitša bahlabani ba naga, a ba rulaganya gomme a ba etelela pele go ya ntweng yeo ba  ilego ba e fenya. Eupša Saulo o ile a tumiša Modimo ka baka la phenyo ye, a re: “Lehono Jehofa o phološitše Isiraele.”—1 Sam. 11:1-13.

Saulo o be a na le dika tše dibotse gomme Modimo o be a mo šegofatša. O ile a lemoga gore Jehofa o na le matla. Lega go le bjalo, go be go nyakega selo se tee se bohlokwa kudu gore Baisiraele le kgoši ya bona ba tšwele pele ba atlega. Samuele o boditše Baisiraele gore: “Ge le ka boifa Jehofa, la mo hlankela la ba la kwa lentšu la gagwe, la se rabele taelong ya Jehofa, lena gotee le kgoši yeo e tlago go le buša le tla ba balatedi ba Jehofa Modimo wa lena.” Baisiraele ba be ba ka kgonthišega ka’ng ge ba be ba ka botegela Modimo? Samuele o itše: “Jehofa a ka se lahle batho ba gagwe ka baka la leina la gagwe le legolo, ka gobane Jehofa o bone go swanetše gore a le dire setšhaba sa gagwe.”—1 Sam. 12:14, 22.

Go kwa e be e le gabohlokwa kudu gore ba amogelwe ke Modimo gomme go sa dutše go le bjalo. Jehofa o šegofatša bahlanka ba gagwe ge ba ekwa ditaelo tša gagwe. Eupša go thwe’ng ge e ba ba sa kwe Jehofa?

“O Dirile tša Bošilo”

Ka morago, Saulo o ile a dira dilo tšeo di ilego tša galefiša Bafilisita. Madira ao a “etšago lešabašaba la lewatle ka bontši” a ile a tsogela Saulo matla. “Banna ba Isiraele ba ile ba bona gore ba wetšwe ke mathata a šiišago, ka gobane batho ba be ba gateletšwe kudu; batho ba khuta maweng le meleteng le magageng le mafelong a ka tlase gotee le megobeng.” (1 Sam. 13:5, 6) Saulo o be a tla dira’ng?

Samuele o be a boditše Saulo gore ba kopane Giligala moo moporofeta yo a bego a tla dira dihlabelo. Saulo o ile a leta, eupša Samuele o be a sa bonale, gomme madira a Saulo a be a thoma go phatlalala. Ka gona, Saulo o ile a itšeela molao matsogong gomme a dira dihlabelo. Ge a sa tšwa go dira bjalo, ke ge Samuele a goroga. Ka morago ga gore Samuele a kwe seo Saulo a se dirilego, o ile a mmotša gore: “O dirile tša bošilo. Ga se wa latela taelo ya Jehofa Modimo wa gago yeo a go laetšego yona, ka gore ge nkabe o ile wa e latela, Jehofa o be a tla tiiša mmušo wa gago Isiraeleng go iša mehleng ya neng le neng. Bjale mmušo wa gago o ka se ke wa ema go ya go ile. Jehofa o tla ikhweletša monna yo a kwanago le pelo ya gagwe; Jehofa o tla mo kgetha go ba moetapele wa setšhaba sa gagwe, ka gobane wena ga se wa latela seo Jehofa a go laetšego sona.”—1 Sam. 10:8; 13:8, 13, 14.

Saulo o ile a bontšha go hloka tumelo, ka boikgogomošo a kgetha go se kwe taelo ya Modimo ya gore a letele Samuele gore a tle a dire sehlabelo. Ruri seo Saulo a se dirilego se be se fapane kgole le seo se ilego sa dirwa ke Gideone, moetapele wa madira a Isiraele wa nakong e fetilego! Jehofa o ile a laela Gideone gore a fokotše madira a gagwe go tloga go 32 000 go ya go 300, gomme Gideone o ile a kwa. Ka baka la’ng? Ka gobane o be a na le tumelo go Jehofa. Ka thušo ya Modimo, o ile a fenya bahlasedi ba 135 000. (Baa. 7:1-7, 17-22; 8:10) Jehofa o be a ka thuša le Saulo. Lega go le bjalo, ka baka la go se kwe ga Saulo, Bafilisita ba ile ba thopa Isiraele.—1 Sam. 13:17, 18.

Re dira bjang diphetho ge re lebeletšane le mathata? Bao ba se nago tumelo ba ka bona go se na bothata go hlokomologa melao ya motheo ya Modimo. Pele Samuele a fihla, mohlomongwe Saulo o ile a nagana gore seo a se dirilego se be se bontšha gore o bohlale. Lega go le bjalo, bao ba ikemišeditšego go amogelwa ke Modimo ba bona e le gabohlale go latela melao ya motheo ya Mangwalo ge ba dira diphetho.

Jehofa o Lahla Saulo

Nakong ya ge ba elwa le Baamaleke, Saulo o ile a dira sebe se sengwe se segolo. Modimo o be a ahlotše Baamaleke ka ge ba ile ba rumola Baisiraele ka morago ga go Huduga Egipita. (Ek. 17:8; Doit. 25:17, 18) Go oketša moo, Baamaleke ba ile ba thekga batho bao ba bego ba hlasela batho ba Modimo ba ba kgethilwego mehleng ya Baahlodi. (Baa. 3:12, 13; 6:1-3, 33)  Ka gona Jehofa o ile a ahlola Baamaleke gomme a laela Saulo gore a ba fediše.—1 Sam. 15:1-3.

Go e na le go kwa taelo ya Jehofa ya go fediša manaba ao a Baamaleke le go senya dilo ka moka tšeo ba nago le tšona, Saulo o ile a thopa kgoši ya gona gomme a itšeela diruiwa tša bona tšeo di phetšego gabotse. Go ile gwa direga’ng ge Samuele a be a botšiša Saulo ka taba ye? Saulo o ile a šupa ba bangwe ka monwana ka gore: “Batho . . . ba ile ba šokela mehlape ya dihuswane le ya dikgomo tše di phetšego gabotse, gore ba tle ba direle Jehofa . . . sehlabelo ka tšona.” Go sa šetšwe gore ruri Saulo o be a ikemišeditše go dira sehlabelo ka diphoofolo tšeo goba go se bjalo, o hlokile tsebe. Saulo o be a se sa “ipona bonyenyane.” Ka baka leo, moporofeta wa Modimo o ile a bolela gore Saulo ga se a kwa Modimo. Ke moka Samuele o ile a re: “Na Jehofa o kgahlwa kudu ke dibego tša go fišwa le dihlabelo go phala go kwa lentšu la Jehofa? Tseba gore go kwa go phala sehlabelo . . . Ka ge o ganne lentšu la Jehofa, le yena o tlo go tloša gore o se sa ba kgoši.”—1 Sam. 15:15, 17, 22, 23.

Ge Jehofa a be a tloša moya wa gagwe o mokgethwa go Saulo gomme a se sa hlwa a mo šegofatša, “moya o mobe” o ile wa thoma go tlaiša kgoši ye ya pele ya Isiraele. Saulo o ile a thoma go belaela le go hufegela Dafida—monna yoo ka morago Jehofa a bego a tla mo kgetha gore e be kgoši. Saulo o ile a leka go bolaya Dafida ka makga a mantši. Beibele e re ge a lemoga gore “Jehofa o be a ema le Dafida, . . . Saulo a ba lenaba la Dafida ka mehla yohle.” Saulo o ile a leka go mo tsoma ka mahlo a mahwibidu gomme a ba a laela gore go bolawe baperisita ba 85 le ba bangwe. Ga go makatše ge Jehofa a ile a lahla Saulo!—1 Sam. 16:14; 18:11, 25, 28, 29; 19:10, 11; 20:32, 33; 22:16-19.

Ge Bafilisita ba be ba hlasela Baisiraele, Saulo o ile a ya go senoge gomme gwa se thuše selo. Letšatšing le le latetšego, o ile a gobatšwa o šoro ntweng gomme a ipolaya. (1 Sam. 28:4-8; 31:3, 4) Ge Mangwalo a bolela ka kgoši e sa kwego ya pele ya Isiraele a re: “Saulo a hwela go se botege ga gagwe ka ge a ile a se be le tumelo go Jehofa mabapi le lentšu la Jehofa leo a sego a le lota, le ka ge a ile a ya go motho yo a dirišanago le meoya e mebe gomme a botšiša yena. Ga se a ka a botšiša Jehofa.”—1 Dikor. 10:13, 14.

Mohlala o mobe wa Saulo o bontšha gore go kwa Jehofa go phala go mo direla sehlabelo le ge e le sefe. Moapostola Johane o ngwadile gore: “Se ke seo lerato la Modimo le se bolelago, gore re boloke ditaelo tša gagwe gomme ditaelo tša gagwe ga di boima.” (1 Joh. 5:3) Anke le ka mohla re se ke ra hlokomologa therešo ye e bohlokwa: Gore segwera sa rena le Modimo se tie go ithekgile ka gore re mo kwe.

[Seswantšho go letlakala 21]

Mathomong Saulo e be e le moetapele yo a ikokobeditšego

[Seswantšho go letlakala 23]

Ke ka baka la’ng Samuele a ile a botša Saulo gore “go kwa go phala sehlabelo”?