Ruri ga se ga Lefeela!

BORAPEDI bja Lapa le thuto ya Beibele di bohlokwa gore bana ba godišwe “ka tayo le temošo ya Jehofa.” (Baef. 6:4) Lega go le bjalo, ge e ba o le motswadi, o a tseba gore bana ba tenega ka pela. O ka tanya bjang šedi ya bona? Ela hloko seo batswadi ba bangwe ba ilego ba se dira.

George wa kua California, U.S.A., o re: “Ge bana ba rena e be e sa le ba banyenyane, nna le mosadi wa ka re ile ra leka go boloka thuto ya Beibele ya lapa e kgahliša. Ka dinako tše dingwe, ka moka ga rena re be re apara bjalo ka baanegwa ba ka Beibeleng gomme ra diragatša seo re se balago go Puku Ya-ka ya Ditaba tša Beibele. Re be re bile re na le didirišwa—ditšhoša, melamo, diroto, bjalo bjalo. Le gona re be re bapala dipapadi tša Beibele tša ‘ke nna mang’ ra ba ra dira dipapadi tša Beibele tšeo di nago le dipotšišo tše bonolo le tše thata. Ke moka go be go eba le mediro e itšego, e bjalo ka go aga areka ya Noa goba go thala nako ya tatelano ya ditiragalo tša ka Beibeleng. Ka dinako tše dingwe, re be re thala baanegwa goba go thala kanegelo yeo e diregago ka Beibeleng. Ga bjale re rulaganya mošomo wa go ithuta go thala ditlhamo tša moya tšeo di hlaloswago go Baefeso 6:11-17 gomme yo mongwe le yo mongwe a hlalose seo tlhamo e nngwe le e nngwe e se swantšhetšago. Mekgwa ye e re thušitše go ipshina ka thuto ya rena ya lapa.”

Debi e lego mma yo mongwe wa kua Michigan, U.S.A., o laodiša ka gore: “Nna le monna wa ka re be re na le bothata bja go tanya šedi ya morwedi wa rena ge a be a na le nywaga e ka bago e meraro. Ka gona, ka letšatši le lengwe ge ke be ke bala kanegelo ya Isaka le Rebeka ka go hlaboša go Puku Ya-ka ya Ditaba tša Beibele, ke ile ka topa dipopi tše pedi gomme ka thoma go di diriša go raloka dikarolo tša baanegwa. Bjale o ile a theetša ka kelohloko! Dikgweding tše di latetšego, dipopi tšeo tše pedi di ile tša fetoga baanegwa ba fapafapanego ba ka Beibeleng. Ge re fetša go bala pego, morwedi wa rena o be a tla dikologa ntlo a tsomana le dibapadišwa goba dilo tše dingwe tšeo a ka di dirišago go diragatša kanegelo yeo. Go be go swana le go tsoma lehumo! Lepokisi la dieta le lenti le lehwibidu e ile ya ba ntlo ya Rahaba e nago le thapo e hwibidu. Noga yeo e sego ya kgonthe ya botelele bja mithara o tee le seripa yeo e bego e tateditšwe koteng ya leswielo e ile ya swantšhetša gabotse noga ya koporo ya Numeri 21:4-9. Re ile ra boloka didirišwa tše ka gare ga mokotla o mogolo wa seila. Seo se thabišago ke gore gantši morwedi wa rena o be a tla fetša nako e telele a dutše ka phapošing ya bodulo gomme a nyakana le ‘mokotla wa gagwe wa ditaba tša Beibele.’ Ruri go a thabiša go mmona a diragatša dikanegelo ka tsela ya gagwe ya bjana!”

Ga go bonolo go godiša bana e bile go nyakega se se fetago thuto ya beke le beke go dira gore ba rate Jehofa. Eupša borapedi bja lapa le thuto ya Beibele e ka ba motheo wa tlhahlo e nngwe ya moya. Ruri ga se ga lefeela!