‘A Bodiba bja Bohlale bja Modimo!’

“A bodiba bja mahumo a Modimo, bohlale le tsebo! Ruri dikahlolo tša gagwe ke tšeo di sa nyakišišegego gomme ditsela tša gagwe ke tše di sa latišegego!”—BAROMA 11:33.

1. Tokelo e kgolokgolo yeo Bakriste bao ba kolobeditšwego ba nago le yona ke efe?

TOKELO e kgolokgolo yeo o kilego wa e newa ke efe? Mathomong o ka nagana ka kabelo e itšego yeo o kilego wa e newa goba tlhompho yeo o kilego wa e bontšhwa. Lega go le bjalo, go Bakriste bao ba kolobeditšwego, tokelo e kgolokgolo yeo re nago le yona ke go dumelelwa go ba le tswalano ya kgauswiuswi le Modimo a nnoši wa therešo e lego Jehofa. Se se dirile gore re ‘tsebje ke yena.’—1 Bakor. 8:3; Bagal. 4:9.

2. Ke ka baka la’ng go tseba Jehofa le go tsebja ke yena e le tokelo e kgolo gakaakaa?

² Ke ka baka la’ng go tseba Jehofa le go tsebja ke yena e le tokelo e kgolo gakaakaa? Ke ka gobane ga se feela gore ke Motho yo a phagamego kudu legohleng ka moka eupša gape ke Mošireletši wa bao a ba ratago. Moporofeta Nahume o ile a budulelwa go ngwala gore: “Jehofa o lokile, ke sebo se tiilego letšatšing la tlalelo. Le gona o tseba bao ba tšhabelago go yena.” (Nah. 1:7; Ps. 1:6) Ge e le gabotse, kholofelo ya rena ya go hwetša bophelo bjo bo sa felego e ithekgile ka go tseba Modimo wa therešo le Morwa wa gagwe Jesu Kriste.—Joh. 17:3.

3. Go tseba Modimo go akaretša’ng?

³ Go tseba Modimo go bolela go feta go fo tseba leina la gagwe. Re swanetše go mo tseba bjalo ka Mogwera, re kwešiše dilo tšeo a di ratago le tšeo a sa di ratego. Le gona go phela ka go dumelelana le tsebo yeo go kgatha tema ya bohlokwa go bontšheng ga rena gore re tseba Modimo gabotse. (1 Joh. 2:4) Eupša go na le selo se sengwe gape seo se nyakegago ge e ba re tloga re kganyoga go tseba Jehofa. Ga se ra swanela go tseba feela seo a se dirilego eupša re swanetše go tseba mokgwa le lebaka leo ka lona a dirilego seo. Ge re kwešiša merero ya Jehofa kudu, ke moo re tutueletšegago go makatšwa ke ‘bodiba bja bohlale bja Modimo.’—Baroma 11:33.

Modimo wa Morero

4, 5. (a) Lentšu “morero” le šupa go eng go etša ge le dirišitšwe ka Beibeleng? (b) Bontšha kamoo morero o ka fihlelelwago ka ditsela tše dintši.

⁴ Jehofa ke Modimo yo a nago le morero, le gona Beibele e bolela ka “morero [wa gagwe] wa neng le neng.” (Baef. 3:10, 11) Polelwana ye ge e le gabotse e ra go re’ng? Lentšu “morero,” go etša ge le dirišitšwe ka Beibeleng, le šupa go pakane e itšego goba leano leo le ka fihlelelwago ka ditsela tše dintši.

⁵ Ka mohlala: Motho a ka kganyoga go tšea leeto la go ya lefelong le itšego. Ke moka go fihla lefelong leo eba pakane goba morero wa gagwe. A ka ba le dikgetho tše di fapafapanego tabeng ya gore o tla diriša senamelwa sa mohuta ofe le gore o tla sepela ka ditsela dife. Ge a dutše a sepela tseleng yeo a e kgethilego, a ka lebeletšana le maemo a sa letelwago a leratadima, pitlagano ya dinamelwa le go tswalelwa ga ditsela, e lego dilo tšeo di ka dirago gore a sepele ka tsela e nngwe. Lega go le bjalo, go sa šetšwe gore o swanetše go dira diphethogo dife, o sa dutše a tla fihlelela pakane ya gagwe ge a fihla mo a yago.

6. Jehofa o ile a bontšha bjang go fetofetoga le maemo go phethagatšeng morero wa gagwe?

 ⁶ Ka mo go swanago, Jehofa o bontšhitše go fetofetoga le maemo ka tsela e kgolo e le gore a phethe morero wa gagwe wa neng le neng. Ka go naganela tokologo ya boikgethelo ya dibopiwa tša gagwe tše bohlale, ga a dikadike go fetoša tsela yeo a fihlelelago morero wa gagwe ka yona. Ka mohlala, a re ahlaahleng kamoo Jehofa a phethago morero wa gagwe mabapi le Peu e holofeditšwego. Mathomong, Jehofa o boditše batho ba babedi ba pele gore: “Tswalang le ate le tlale lefase le be le le fenye.” (Gen. 1:28) Na morero wo woo o bego o kgonthišeditšwe o ile wa folodišwa ke borabele bja tšhemong ya Edene? Ga go bjalo le gatee! Gateetee Jehofa o ile a gata mogato ka boemo bjo bjoo bo bego bo sa tšwa go tšwelela ka go diriša seo re ka rego ke tsela e nngwe gore a fihlelele morero wa gagwe. O ile a bolela e sa le pele ka go tšwelela ga “peu” yeo e bego e tla lokiša tshenyo yeo e bakilwego ke marabele ao.—Gen. 3:15; Baheb. 2:14-17; 1 Joh. 3:8.

7. Re ithuta’ng tseleng yeo Jehofa a itlhalositšego ka yona go Ekisodo 3:14?

⁷ Bokgoni bja Jehofa bja go itumelelanya le maemo a mafsa ge a dutše a phetha morero wa gagwe bo dumelelana le kamoo a ilego a itlhalosa ka gona. Ge Moshe a be a botša Jehofa ka mapheko ao a bego a ka lebeletšana le ona kabelong yeo a bego a mo neile yona, Jehofa o ile a mo kgonthišetša ka gore: “‘Ke tla ba seo ke nyakago go ba sona.’ A oketša ka gore: ‘Se ke seo o tlago go se botša bana ba Isiraele wa re: “Mo go lena ke romilwe ke: Ke tla ba seo ke nyakago go ba sona.”’” (Ek. 3:14) Ee, Jehofa o kgona go ba selo le ge e le sefe seo a swanetšego go ba sona e le gore a phethe morero wa gagwe ka botlalo! Se se bontšhitšwe gabotse ke moapostola Paulo go kgaolo 11 ya puku ya Baroma. Kgaolong yeo o bolela ka mohlware wa seswantšhetšo. Go hlahloba papišo ye go tla oketša go tšeela ga rena godimo bodiba bja bohlale bja Jehofa, go sa šetšwe gore kholofelo ya rena ke go ya legodimong goba ke go hwetša bophelo bjo bo sa felego mo lefaseng.

Morero wa Jehofa ka Peu e Boletšwego e sa le Pele

8, 9. (a) Ke dintlha dife tše nne tša motheo tšeo di tlago go re thuša go kwešiša papišo ya mohlware? (b) Ke karabo ya potšišo efe yeo e utollago go fetofetoga ga Jehofa le maemo ge a phethagatša morero wa gagwe?

⁸ Pele ga ge re ka kwešiša papišo ya mohlware, re swanetše go tseba dintlha tše nne mabapi le go utologa ga morero wa Jehofa ka peu e boletšwego e sa le pele. Sa pele, Jehofa o holofeditše Aborahama gore “ditšhaba ka moka tša lefase di tla šegofatšwa” ka peu ya gagwe goba ditlogolwana tša gagwe. (Gen. 22:17, 18) Sa bobedi, setšhaba sa Isiraele seo se tšwilego go Aborahama se ile sa newa kholofelo ya go tšweletša “mmušo wa baperisita.” (Ek. 19:5, 6) Sa boraro, ge Baisiraele ba bantši ba nama ba be ba sa amogele Mesia, Jehofa o ile a gata megato e mengwe go tšweletša “mmušo wa baperisita.” (Mat. 21:43; Baroma 9:27-29) Mafelelong, le ge Jesu e le karolo ya pele ya peu ya Aborahama, ba bangwe ba neilwe tokelo ya go ba karolo ya peu yeo.—Bagal. 3:16, 29.

⁹ Go oketša dintlheng tše tše nne tša motheo, re ithuta go tšwa pukung ya Kutollo gore batho ba 144 000 ba tla buša le Jesu e le dikgoši le baperisita legodimong. (Kut. 14:1-4) Ba go bolelwa ka bona gape e le “barwa ba Isiraele.” (Kut. 7:4-8) Eupša na batho ba ba 144 000 ka moka ga bona ke Baisiraele goba Bajuda ba tlhago? Karabo ya potšišo yeo e utolla go fetofetoga ga Jehofa le maemo ge a phethagatša morero wa gagwe. Bjale anke re boneng kamoo lengwalo la moapostola Paulo leo le yago go Baroma le re thušago ka gona go hwetša karabo.

“Mmušo wa Baperisita”

10. Ke kholofelo efe yeo setšhaba sa Isiraele e bego e le sona se nnoši seo se nago le yona?

¹⁰ Go etša ge go boletšwe pejana, setšhaba sa Isiraele ke sona se nnoši seo se bego se na le kholofelo ya go tšweletša ditho tšeo di bego di tla bopa “mmušo wa baperisita le setšhaba se sekgethwa.” (Bala Baroma 9:4, 5.) Eupša go tla direga’ng ge Peu e holofeditšwego e fihlile? Na Isiraele  ya tlhago e be e tla tšweletša palo e feletšego ya Baisiraele ba moya ba 144 000 bao e tlago go ba karolo ya bobedi ya peu ya Aborahama?

11, 12. (a) Go kgethwa ga bao ba tlago go bopa Mmušo wa legodimong go thomile neng, le gona karabelo ya Bajuda ba bantši bao ba bego ba phela ka nako yeo e bile efe? (b) Jehofa o ile a dira bjang gore “palo e tletšego” ya bao e bego e tla ba peu ya Aborahama e felele?

¹¹ Bala Baroma 11:7-10. E le setšhaba, Bajuda ba lekgolong la pele la nywaga ba ile ba gana Jesu. Ka gona tokelo ya go tšweletša peu ya Aborahama e ile ya se sa ba ya bona ba nnoši. Lega go le bjalo, ge go kgethwa ga bao ba tlago go bopa “mmušo wa baperisita” wa legodimong go be go thoma ka Pentekoste ya 33 C.E., go be go na le Bajuda ba bangwe ba dipelo tše dibotse bao ba ilego ba amogela taletšo yeo. Ka ge e be e le ba dikete tše sego kae feela, ba ba be ba fo swana le “mašaledi” ge ba bapetšwa le setšhaba ka moka sa Bajuda.—Baroma 11:5.

¹² Lega go le bjalo, Jehofa o be a tla dira bjang gore “palo e tletšego” ya bao e bego e tla ba peu ya Aborahama e felele? (Baroma 11:12, 25) Ela hloko karabo yeo e neilwego ke moapostola Paulo, o itše: “Ga go bjalo ka ge eka lentšu la Modimo le paletšwe. Gobane ga se bohle bao ba tšwago go Isiraele [ya tlhago] bao e lego ‘Isiraele’ e le ka kgonthe. Le gona ga se gore gobane e le peu [bana] ya Aborahama ka moka ga bona ke bana ba gagwe e le ka kgonthe [karolo ya peu ya Aborahama] . . . Ke gore, bana bao ba belegwego molokong wa Aborahama ga se gore ruri ke bana ba Modimo, eupša bana ka kholofetšo ba balwa e le peu.” (Baroma 9:6-8) Ka gona go belegelwa molokong wa Aborahama e be e se sona senyakwa se nnoši bakeng sa go phethagatša morero wa Jehofa mabapi le peu.

Mohlware wa Seswantšhetšo

13. Ke’ng seo se swantšhetšwago ke (a) mohlware, (b) modu wa wona, (c) kutu ya wona le (d) makala a wona?

¹³ Moapostola Paulo o tšwela pele go bapetša bao e bago karolo ya peu ya Aborahama le makala a mohlware wa seswantšhetšo. * (Baroma 11:21) Mohlware wo o bjetšwego o swantšhetša go phethagala ga morero wa Modimo mabapi le kgwerano ya Aborahama. Modu wa wona ke o mokgethwa gomme o swantšhetša Jehofa e le yoo a phedišago Isiraele ya moya. (Jes. 10:20; Baroma 11:16) Kutu ya wona e swantšhetša Jesu e le karolo ya pele ya peu ya Aborahama. Makala ka moka a swantšhetša “palo e tletšego” ya bao ba akaretšwago karolong ya bobedi ya peu ya Aborahama.

14, 15. Ke bomang bao ba ilego ba “thokgwa” mohlwareng o bjetšwego, gomme ke bomang bao ba ilego ba hlomesetšwa go wona?

 ¹⁴ Papišong ya mohlware, Bajuda ba tlhago bao ba ilego ba gana Jesu ba swantšhwa le makala a mohlware ao a ilego a “thokgwa.” (Baroma 11:17) Ka go re’alo ba ile ba lahlegelwa ke sebaka sa go ba karolo ya peu ya Aborahama. Eupša ba be ba tla tšeelwa legato ke bomang? Go ya ka pono ya Bajuda ba tlhago bao ba bego ba ikgantšha ka gore ke ditlogolwana tša Aborahama, ba be ba ka se kgolwe karabo ya potšišo yeo. Eupša Johane Mokolobetši o be a šetše a ba lemošitše gore ge e ba Jehofa a rata, a ka tsošetša Aborahama bana maswikeng.—Luka 3:8.

¹⁵ Ka gona, Jehofa o ile a dira’ng gore a phethagatše morero wa gagwe? Paulo o hlalosa gore makala a mohlware wa naga a ile a hlomesetšwa mohlwareng wo o bego o bjetšwe gore a tšeele legato ao a ilego a thokgwa. (Bala Baroma 11:17, 18.) Ka go re’alo, Bakriste bao ba tloditšwego ka moya ba ba ditšhaba, go etša ba bangwe go tšwa phuthegong ya Roma, ba ile ba hlomesetšwa ka tsela ya seswantšhetšo mohlwareng wo wa seswantšhetšo. Ka tsela ye ba ile ba ba karolo ya peu ya Aborahama. Mathomong ba be ba swana le makala a mohlware wa naga, ba se na sebaka le ge e le sefe sa go ba karolo ya kgwerano ye e kgethegilego. Eupša Jehofa o ile a ba bulela tsela gore e be Bajuda ba moya.—Baroma 2:28, 29.

16. Moapostola Petro o hlalositše bjang go bopša ga setšhaba se sefsa sa moya?

¹⁶ Moapostola Petro o hlalosa boemo bjo ka tsela ye: “Ka gona [Jesu Kriste] o bohlokwa go lena [Baisiraele ba moya, go akaretša Bakriste ba ba ditšhaba] gobane le badumedi; eupša go bao ba sa dumelego, ‘leswika lona le baagi ba le gannego ke lona le fetogilego hlogo ya sekhutlo,’ le ‘leswika la kgopišo le letlapa la sekgopi.’ . . . Eupša lena le ‘morafo wo o kgethilwego, boperisita bja bogoši, setšhaba se sekgethwa, batho ba e lego leruo le le kgethegilego, gore le bolele gohle mabothakga’ a yo a le biditšego leswiswing gomme a le biletša seetšeng sa gagwe se se makatšago. Gobane le kile la se be setšhaba sa Modimo, eupša  bjale le setšhaba sa Gagwe; le be le sa bontšhwe kgaugelo, eupša bjale le a e bontšhwa.”—1 Pet. 2:7-10.

17. Ke bjang seo Jehofa a ilego a se dira se bego se ‘fapane le tlhago’?

¹⁷ Jehofa o ile a dira selo seo batho ba bantši ba bego ba tla se tšea e le seo se tlogago se sa letelwa. Paulo o hlalosa seo se diragetšego e le seo se ‘fapanego le tlhago.’ (Baroma 11:24) Ke bjang seo se bego se le bjalo? Go ba gona, e be e tla ba mo go sa tlwaelegago le mo e sego ga tlhago go hlomesetša lekala la sehlare sa nageng sehlareng seo se bjetšwego; lega go le bjalo, se ke seo balemi ba bangwe ba ilego ba se dira lekgolong la pele la nywaga. * Ka tsela e swanago, Jehofa o ile a dira selo se itšego seo se makatšago. Go ya ka pono ya Sejuda, batho ba ba ditšhaba ba be ba ka se kgone go tšweletša dienywa tše di amogelegago. Lega go le bjalo, Jehofa o ile a dira gore bona ba ditšhaba bao e be karolo ya “setšhaba” seo se ilego sa tšweletša dienywa tša Mmušo. (Mat. 21:43) Go thoma ka go tlotšwa ga Koronelio ka 36 C.E., e lego moditšhaba wa mathomo yo a sa bollago yo a ilego a sokologa, sebaka se ile sa bulegela batho ba sa bollago bao e bego e se Bajuda gore ba hlomesetšwe mohlwareng wo wa seswantšhetšo.—Dit. 10:44-48. *

18. Ke sebaka sefe seo Bajuda ba tlhago ba bilego le sona ka morago ga 36 C.E.?

¹⁸ Na se se bolela gore ka morago ga 36 C.E., go be go se sa na sebaka sa gore Bajuda ba tlhago e be karolo ya peu ya Aborahama? Aowa. Paulo o hlalosa gore: “Le bona [Bajuda ba tlhago] ge e ba ba sa dule ba hloka tumelo ba tla hlomesetšwa; gobane Modimo o kgona go ba hlomesetša gape. Gobane ge e ba o ile wa ripša sehlareng sa mohlware seo e lego sa naga ka tlhago gomme wa hlomesetšwa ka go fapana le tlhago sehlareng sa mohlware sa ka serapeng, gona ga go pelaelo gore ba bao e lego makala a tlhago ba tla upša ba hlomesetšwa gape sehlareng sa bona sa mohlware.” *—Baroma 11:23, 24.

“Isiraele ka Moka e tla Phološwa”

19, 20. Go etša ge go bontšhitšwe ke mohlware wa seswantšhetšo, Jehofa o phethagatša eng?

¹⁹ Ee, morero wa Jehofa ka “Isiraele ya Modimo” o phethagatšwa ka tsela e makatšago. (Bagal. 6:16) Go etša ge Paulo a boletše, “Isiraele ka moka e tla phološwa.” (Baroma 11:26) Ka nako e swanetšego ya Jehofa, “Isiraele ka moka,” e lego palo e feletšego ya Baisiraele ba moya, e tla ba dikgoši le baperisita legodimong. Ga go na selo seo se ka dirago gore morero wa Jehofa o folotše!

²⁰ Go etša ge go boletšwe e sa le pele, peu ya Aborahama, e lego Jesu Kriste gotee le ba 144-000, e tla tlišetša “batho ba ditšhaba” ditšhegofatšo. (Baroma 11:12; Gen. 22:18) Ka tsela ye, batho ba Modimo ka moka ba holwa ke tokišetšo ye. Ruri ge re naganišiša ka tsela yeo Jehofa a phethagaditšego morero wa gagwe wa neng le neng, re tloga re makatšwa ke “bodiba bja mahumo a Modimo, bohlale le tsebo.”—Baroma 11:33.

[Mengwalo ya tlase]

Na o a Gopola?

• Re ithuta’ng ka Jehofa tseleng yeo a phethagatšago morero wa gagwe?

• Go Baroma kgaolo 11, ke’ng seo se swantšhetšwago ke . . .

mohlware?

modu wa wona?

kutu ya wona?

makala a wona?

• Ke ka baka la’ng mokgwa wa go hlomesetša makala o be o ‘fapane le tlhago’?

[Dipotšišo tša Thuto]

[Box/​Picture on page 24]

 Ke ka Baka La’ng Makala a Mohlware wa Naga a be a Hlomesetšwa?

▪ Lucius Junius Moderatus Columella, e be e le mohlabani wa Moroma e bile e le molemi yo a phetšego lekgolong la pele la nywaga C.E. O tsebja kudu ka dipuku tše 12 tšeo a di ngwadilego mabapi le bophelo bja magaeng le tša temo.

Ka pukung ya gagwe ya bohlano, o tsopola seema sa bogologolo se se rego: “Yo a bjalago mohlware o o kgopela dienywa; yo a o tšhelago morole o rapelela go hwetša dienywa; yo a o thenelago o o gapeletša go enywa.”

Ka morago ga go hlalosa dihlare tšeo di golago eupša di sa kgone go enywa, o kgothaletša gore go dirišwe mokgwa wo o latelago: “Leano le lebotse ke gore o o bore ke moka lešobeng leo o hlomesetše lekala le letala leo le tšwago mohlwareng wa naga; seo se tlago go direga ke gore sehlare seo se tla enywa kudu ka ge se tla be se tsentšwe lekala la sehlare seo se enywago.”

[Seswantšho go letlakala 23]

Na o kwešiša papišo ya mohlware wa seswantšhetšo?