Go Bota Jehofa ka mo go Feletšego go Dira Gore re be le Kgodišego

“Jehofa yena o tla nkwa ge ke mmitša.”—PS. 4:3.

1, 2. (a) Ke boemo bofe bjo kotsi bjoo Dafida a ilego a lebeletšana le bjona? (b) Re tlo ahlaahla dipsalme dife?

KGOŠI DAFIDA o bušitše Isiraele ka nako e telele, eupša bjale o lebeletšane le boemo bjo kotsi kudu. Morwa wa gagwe Abesalomo yo a logilego maanomabe o ipeile kgoši, ka go re’alo Dafida o gapeletšega go tloga Jerusalema. Le gona o ekilwe ke moeletši wa gagwe wa paala, bjale a sepela le bagwera ba sego kae bao ba botegago, o tšama a lla e bile a se a rwala dieta ge a rotoga Thaba ya Mehlware. Godimo ga moo, Shimei wa ka lapeng la ntlo ya Kgoši Saulo, o betša Dafida ka maswika le go mo gaša ka mmu ge a le gare a mo roga.—2 Sam. 15:30, 31; 16:5-14.

² Na boemo bjo bo tla dira gore Dafida a theogele Bodulabahu a nyamile e bile a se na seriti? Aowa, ka gobane o bota Jehofa. Se se bonagala Psalmeng ya boraro yeo e hlamilwego ke yena Dafida mabapi le go tšhaba ga gagwe. Le gona o ngwadile le Psalme ya bone. Dipsalme tše ka bobedi di re kgodiša gore Modimo o kwa dithapelo le go di araba. (Ps. 3:4; 4:3) Di re kgonthišetša gore bošego le mosegare Jehofa o na le bahlanka ba gagwe ba botegago, o ba šegofatša ka thekgo ya gagwe gotee le khutšo le go ikwa ba bolokegile. (Ps. 3:5; 4:8) Ka gona, anke re hlahlobeng dipsalme tše gomme re boneng kamoo di dirago gore re be le kgodišego le go re kgothaletša go bota Modimo.

Ge ‘ba Bantši ba re Tsogela Matla’

3. Go etša ge go bontšhitšwe go Psalme 3:1, 2, boemo bja Dafida e be e le bofe?

³ Moromiwa o re: “Dipelo tša setšhaba sa Isiraele di ema le Abesalomo.” (2 Sam. 15:13) A ipotšiša gore Abesalomo o kgonne bjang go ba le bathekgi ba bantši ka mokgwa wo, Dafida o botšiša gore: “Ao Jehofa, ke ka baka la’ng manaba a ka e le a mantši? Ke ka baka la’ng ba bantši ba ntsogela matla? Ba bantši ba bolela ka moya wa ka ba re: ‘A ka se phološwe ke Modimo.’” (Ps. 3:1, 2) Baisiraele ba bantši ba nagana gore Jehofa a ka se hlakodiše Dafida mathateng ao a mo wetšego ka diatleng tša Abesalomo le bathekgi ba gagwe.

4, 5. (a) Dafida o be a kgodišegile ka eng? (b) Ke eng seo se bolelwago ke mantšu a rego, “Yo a tsošago hlogo ya ka”?

⁴ Eupša Dafida o na le kgodišego ka gobane o bota Modimo ka mo go feletšego. O opela ka gore: “Eupša ge e le wena Jehofa, o kotse ya ka, letago la ka le Yo a tsošago hlogo ya ka.” (Ps. 3:3) Dafida o kgodišegile gore Jehofa o tla mo šireletša go etša ge kotse e šireletša mohlabani. Ee, kgoši ye e tšofetšego e a tšhaba, e ikhurumeditše hlogo e bile e inametše fase ka baka la kgobogo. Eupša Yo Godimodimo o tla fetoša boemo bja Dafida gore e be bja letago. Jehofa o tla dira gore a kgone go ema ka go otlologa, a inamološe hlogo ya gagwe. Dafida o kgopela thušo a kgodišegile gore Modimo o tla mo araba. Na le wena o bota Jehofa ka tsela e swanago?

⁵ Ka mantšu a rego “Yo a tsošago hlogo ya ka,” Dafida o bontšha gore o a tseba gore thušo yeo a tlago go e hwetša e tšwa go Jehofa. Today’s English Version e balega ka gore: “Eupša wena MORENA, ka mehla o kotse ya ka ge ke le kotsing; o dira gore ke fenye gomme ke buše ke be le sebete.” Mabapi le polelwana e rego “Yo a tsošago hlogo ya ka,” puku e nngwe ya ditšhupetšo e re: “Ge Modimo a tsoša . . . ‘hlogo’ ya motho, O  dira gore a be le kholofelo le kgodišego.” Ka ge a gapeleditšwe go fologa sedulong sa bogoši sa Isiraele, Dafida o na le lebaka la go felelwa ke kholofelo. Lega go le bjalo, ‘go tsošwa ga hlogo ya gagwe’ go tla dira gore a boele a be le sebete, kgodišego le go bota Modimo ka mo go feletšego.

‘Jehofa o tla Araba!’

6. Ke ka baka la’ng Dafida a ile a bolela gore thapelo ya gagwe e tla arabja go tšwa thabeng e kgethwa ya Jehofa?

⁶ A bota Jehofa e bile a na le kgodišego, Dafida o tšwela pele ka gore: “Ke tla bitša Jehofa ka lentšu la ka, yena o tla nkaraba a le thabeng ya gagwe e kgethwa.” (Ps. 3:4) Ka go latela ditaelo tša Dafida, areka ya kgwerano yeo e swantšhetšago go ba gona ga Modimo, e be e išitšwe Thabeng ya Tsione. (Bala 2 Samuele 15:23-25.) Ka gona, ke mo go swanetšego gore Dafida o bolela gore thapelo ya gagwe e tla arabja go tšwa thabeng e kgethwa ya Jehofa.

7. Ke ka baka la’ng Dafida a be a sa boife?

⁷ A kgodišegile gore go rapela Modimo e ka se be ga lefeela, Dafida ga a boife. Go e na le moo, o opela ka gore: “Ge e le nna ke tla sekama gore ke robale; ke tla phafoga, ka gobane Jehofa yena o dula a nthekga.” (Ps. 3:5) Gaešita le bošego, ge go na le kgonagalo e kgolo ya gore a hlaselwe ka tšhoganetšo, Dafida ga a tšhabe go robala. O kgodišegile gore o tla tsoga, ka gobane diphihlelo tša gagwe tša nakong e fetilego di dirile gore a tloge a kgodišega gore a ka bota thekgo ya kgonthe ya Modimo. Le rena re ka mmota ge e ba re kgomarela “ditsela tša Jehofa” gomme le ka mohla re sa aroge go yena.—Bala 2 Samuele 22:21, 22.

8. Psalme 27:1-4 e bontšha bjang gore Dafida o be a bota Modimo?

⁸ Kgodišego ya Dafida le go bota Modimo ka mo go feletšego di bonagala go e nngwe ya dipsalme tša gagwe yeo e nago le mantšu a buduletšwego ao a rego: “Jehofa ke seetša sa ka le mophološi wa ka. Ke tla boifa mang? Jehofa ke sebo sa bophelo bja ka. Ke tla tšhoga mang? . . . Le ge madira a ka ntlhomela ditente, pelo ya ka e ka se boife. . . . Ke selo setee seo ke se kgopetšego go Jehofa—ke sona seo ke tlago go se nyaka, ke gore ke dule ka ntlong ya Jehofa matšatši  ohle a bophelo bja ka, gore ke bone botse bja Jehofa le gore ke kgahlwe ke go lebelela tempele ya gagwe.” (Ps. 27:1-4) Ge e ba o dumelelana le mantšu ao gomme maemo a gago a go dumelela, ka mehla o tla bokana le barapedigotee le wena ba Jehofa.—Baheb. 10:23-25.

9, 10. Ka ntle le mantšu a Psalme 3:6, 7, ke ka baka la’ng o ka re Dafida o be a se na moya wa go itefeletša?

⁹ Gaešita le ge Dafida a lebeletšane le go radiiwa ke Abesalomo le go se botegelwe ke ba bangwe ba bantši, o opela ka gore: “Nka se boife batho ba dikete tše lesome (10 000) bao ba ntikologilego e bile ba itokišeditše go lwa le nna. Ema hle Jehofa! Mphološe, hle Modimo wa ka! Ka gobane manaba a ka ka moka o tla a otla mohlagareng. Meno a ba kgopo o tla a pšhatla.”—Ps. 3:6, 7.

¹⁰ Dafida ga a na moya wa go itefeletša. Ge e ba manaba a gagwe a be a swanetše go ‘otlwa mohlagareng,’ Modimo o be a tla dira seo. Kgoši Dafida o be a ingwaletše kopi ya Molao gomme a tseba gore ka go yona Jehofa o re: “Tefetšo le kotlo ke tša ka.” (Doit. 17:14, 15, 18; 32:35) Le gona ke Modimo yo a ka ‘pšhatlago meno a ba kgopo.’ Go pšhatla meno a bona go bolela go ba dira gore ba se be le matla a go gobatša ba bangwe. Jehofa o a tseba gore ba kgopo ke bomang ka gobane “o bona dipelo.” (1 Sam. 16:7) Re leboga gakaakang gore Modimo o re nea tumelo le matla a go ema re tiile kgahlanong le motho yo kgopo kudu e lego Sathane, yoo kgauswinyane a tlago go lahlelwa sekoting go etša tau e rorago eupša e se na meno, yeo e swanelwago feela ke go fedišwa!—1 Pet. 5:8, 9; Kut. 20:1, 2, 7-10.

“Phološo e tšwa go Jehofa”

11. Ke ka baka la’ng re swanetše go rapelela badumedigotee le rena?

¹¹ Dafida o a lemoga gore ke Jehofa feela yo a ka mo neago phološo yeo a tlogago a e nyaka. Eupša mopsalme ga a nagane ka yena feela. Go thwe’ng ka batho ba rategago ba Jehofa ka kakaretšo? Ka mo go swanetšego, Dafida o phetha psalme ya gagwe e buduletšwego ka mantšu a rego: “Phološo e tšwa go Jehofa. Tšhegofatšo ya gago e go batho ba gago.” (Ps. 3:8) Ke therešo gore Dafida o na le mathata a magolo, eupša o gopola batho ba Jehofa ka kakaretšo gomme o kgodišegile gore Modimo o tla ba šegofatša. Na le rena ga se ra swanela go gopola badumedigotee le rena? Anke re gopoleng go ba rapelela, re kgopele Jehofa gore a ba nee moya wa gagwe o mokgethwa e le gore ba ka rapa sebete gomme ba bolele ditaba tše dibotse ka kgodišego.—Baef. 6:17-20.

12, 13. Go ile gwa direga’ng ka Abesalomo, gona Dafida o ile a arabela bjang?

¹² Bophelo bja Abesalomo bo fela ka tsela e lešago dihlong gomme seo ke temošo go bohle bao ba tlago go swara ba bangwe ka sehlogo, kudukudu batlotšwa ba Modimo ba bjalo ka Dafida. (Bala Diema 3:31-35.) Go tsoga ntwa ke moka madira a Abesalomo a a fenywa. Abesalomo yena o tšhaba a nametše meila ge moriri wa gagwe o mogolo o kgakgelwa makaleng a raraganego ao a lego tlasana a sehlare se segolo. O lekeletše moo—o sa phela eupša ga a kgone go dira selo—go fihlela Joaba a mmolaya ka go mo hlaba ka mesebe e meraro pelong.—2 Sam. 18:6-17.

¹³ Na Dafida o a thaba ge a ekwa ka seo se diragaletšego morwa wa gagwe? Aowa. Go e na le moo o ya godimo le fase a lla, le gona o goeletša ka gore: “Joo, morwa wa ka Abesalomo, morwa wa ka, wena Abesalomo morwa wa ka! E ka re nkabe go hwile nna e sego wena Abesalomo morwa wa ka, wena morwa wa ka Abesalomo!” (2 Sam. 18:24-33) Mantšu a Joaba ke ona a ntšhago Dafida bohlokong bjo bo nyakilego bo mo gateletša. Abesalomo o hwile gabohloko gakaakang, yena yoo boithati bja gagwe bo ilego bja mo šušumeletša go lwa le tatagwe, e lego motlotšwa wa Jehofa, ka go re’alo a itlišetša madimabe!—2 Sam. 19:1-8; Die. 12:21; 24:21, 22.

Dafida o Bontšha go Bota Modimo Gape

14. Ke eng seo se ka bolelwago ka go hlangwa ga Psalme ya bone?

¹⁴ Ka go swana le Psalme ya boraro, Psalme ya bone ke thapelo ya Dafida e tšwago pelong yeo e bontšhago gore o bota Jehofa ka mo go feletšego. (Ps. 3:4; 4:3) Mohlomongwe Dafida o hlamile koša ye gore a bontšhe go imologa ga  gagwe le go leboga Modimo ka morago ga go folotša ga maano a Abesalomo a go menola mmušo. Goba mohlomongwe a ka ba a e ngwadile a naganne ka baopedi ba Balefi. Go sa šetšwe gore boemo e be e le bofe, go naganišiša ka yona go ka matlafatša go bota ga rena Jehofa.

15. Ke ka baka la’ng re ka rapela Jehofa ka kgodišego ka leina la Morwa wa gagwe?

¹⁵ Dafida gape o bontšha go bota Modimo ka mo go feletšego e bile o bontšha gore o kgodišegile gore Modimo o kwa dithapelo tša gagwe le go di araba. O opela ka gore: “Ge ke goeletša, o nkarabe, wena Modimo wa ka yo a lokilego. Ge ke le tlalelong o mpulele tsela ya go tšwa. Nkgaugele gomme o kwe thapelo ya ka.” (Ps. 4:1) Re ka ba le kgodišego e swanago ge e ba re dira se se lokilego. Ka go lemoga gore Jehofa ‘Modimo yo a lokilego’ o šegofatša batho ba gagwe bao ba lokilego, re ka mo rapela ka kgodišego ka leina la Morwa wa gagwe e bile re bontšha tumelo sehlabelong sa Jesu sa topollo. (Joh. 3:16, 36) Se se re nea khutšo e le ruri!

16. Ke ka baka la’ng Dafida a ka ba a ile a nolega moko?

¹⁶ Ka dinako tše dingwe, re ka lebeletšana le boemo bjo bo nolago moko bjoo bo dirago gore re se ke ra ba le kgodišego. Mohlomongwe Dafida a ka ba a ile a ikwa bjalo ka nakwana, ka gobane o opela ka gore: “Lena bana ba batho, letago la ka le tla rogakwa go fihla neng, mola le duletše go rata dilo tša lefeela, mola le duletše go nyaka gore le hwetše maaka?” (Ps. 4:2) Go molaleng gore polelwana e rego “bana ba batho” e šupa go batho ka kgopolo e sa kgahlišego. Manaba a Dafida a be a “rata dilo tša lefeela.” New International Version e fetolela karolo ye ka gore: “Le tla rata go iphora le go tsoma medimo ya maaka go fihlela neng?” Gaešita le ge re ka nolwa moko ke seo ba bangwe ba se dirago, anke re tšweleng pele re rapela ka go tšwa pelong le go bota ka mo go feletšego Modimo a nnoši wa therešo.

17. Hlalosa kamoo re ka dirago dilo ka go dumelelana le Psalme 4:3.

¹⁷ Go bota Modimo ga Dafida go bonagala gabotse mantšung ao a rego: “Ka gona tsebang gore Jehofa o tla hlaola yo a mmotegelago; Jehofa yena o tla nkwa ge ke mmitša.” (Ps. 4:3) Go nyakega sebete le go ithekga ka Jehofa ka mo go feletšego e le gore re dule re mmotegela. Ka mohlala, lapa la Bakriste le swanetše go bontšha dika tše ge wa leloko yo a sa itsholego a kgaotšwe. Modimo o šegofatša bao ba botegelago yena le ditsela tša gagwe. Ka baka leo, go botegela Jehofa le go ithekga ka yena ka mo go feletšego go dira gore go be le lethabo gare ga batho ba gagwe.—Ps. 84:11, 12.

18. Ka go dumelelana le Psalme 4:4, re swanetše go dira’ng ge e ba re botšwa mantšu a sego botho goba re swarwa gampe?

¹⁸ Go thwe’ng ge e ba motho yo mongwe a bolela goba a dira dilo tšeo di re befedišago? Re ka dula re thabile ge e ba re dira seo Dafida a se bolelago ge a re: “Ge le ferekane, le se ke la dira sebe. Bolelang le nnoši ka dipelong tša lena le le malaong a lena gomme le ikhomolele.” (Ps. 4:4) Ge e ba re botšwa mantšu a sego botho goba re swarwa gampe, anke re se ke ra dira sebe ka go itefeletša. (Baroma 12:17-19) Re ka ntšha sa mafahleng ka go rapela ka taba yeo ge re le malaong. Ge e ba re rapela ka taba yeo, re ka e bona ka tsela e fapanego gomme lerato la re tutueletša go lebalela. (1 Pet. 4:8) Sa bohlokwa tabeng ye ke keletšo ya moapostola Paulo, yeo go bonagalago e theilwe go Psalme 4:4, yeo e rego: “Ge le galefile, le se ke la dira sebe; letšatši le se ke la sobela le galefile, le gona le se ke la nea Diabolo sebaka.”—Baef. 4:26, 27.

19. Psalme 4:5 e ka re thuša bjang borapeding bja rena?

¹⁹ Ge a gatelela go nyakega ga go bota Modimo,  Dafida o opela ka gore: “Dirang dihlabelo tša toko, le boteng Jehofa.” (Ps. 4:5) Dihlabelo tšeo di bego di neelwa ke Baisiraele di be di na le mohola ge feela batho ba be ba di neela ka maikemišetšo a nepagetšego. (Jes. 1:11-17) E le gore borapedi bja rena bo amogelege go Modimo, le rena re swanetše go ba le maikemišetšo a nepagetšego le gona re swanetše go mmota ka mo go feletšego.—Bala Diema 3:5, 6; Baheberu 13:15, 16.

20. Polelwana e rego ‘seetša sa sefahlego sa Jehofa’ e bolela’ng?

²⁰ Dafida o tšwela pele ka gore: “Ba bantši ba re: ‘Ke mang yo a tlago go re bontšha tše botse?’ Re hlabišetše seetša sa sefahlego sa gago, hle Jehofa.” (Ps. 4:6) Polelwana e rego ‘seetša sa sefahlego sa Jehofa’ e bolela go gaugelwa ke Modimo. (Ps. 89:15) Ka gona ge Dafida a rapela ka gore: “Re hlabišetše seetša sa sefahlego sa gago,” o ra gore ‘re gaugele.’ Ka ge re bota Jehofa, o a re gaugela e bile re thaba kudu ge re dira thato ya gagwe ka kgodišego.

21. Re kgodišegile ka eng ge e ba re tšea karolo ka botlalo modirong wa lehono wa puno ya moya?

²¹ Ge Dafida a be a lebeletše pele lethabong le le tšwago go Modimo leo le fetago la nakong ya puno, o opelela Jehofa ka gore: “O tla thabiša pelo ya ka go feta nakong ya ge mabele a bona le beine ya bona e mpsha di atile.” (Ps. 4:7) Re ka kgodišega gore re tla thaba ka go tšwa pelong ge e ba re tšea karolo ka mo go tletšego modirong wa lehono wa puno ya moya. (Luka 10:2) Ka ge ‘setšhaba se se atilego’ sa batlotšwa se etelela pele, ga bjale re a thaba ge palo ya ‘babuni’ e tšwela pele go oketšega. (Jes. 9:3) Na o tšea karolo ka tsela e kgotsofatšago kudu punong ye e thabišago?

Tšwelang Pele ka Kgodišego le Bota Modimo ka mo go Feletšego

22. Ka go dumelelana le Psalme 4:8, Baisiraele ba be ba phela bjang ge ba be ba boloka Molao wa Modimo?

²² Dafida o phetha psalme ye ka mantšu a rego: “Ke tla sekama ka ba ka robala ka khutšo, gobane wena Jehofa, ke wena o nnoši o dirago gore ke dule ka polokego.” (Ps. 4:8) Ge Baisiraele ba be ba boloka Molao wa Jehofa, ba be ba eba khutšong le yena e bile ba ikwa ba bolokegile. Ka mohlala, mehleng ya pušo ya Solomone, ‘Juda le Isiraele di ile tša dula ka polokego.’ (1 Dikg. 4:25) Bao ba bego ba botile Modimo ba ile ba thabela khutšo gaešita le ge ditšhaba tše di ba dikologilego di be di na le bonaba. Ka go swana le Dafida, re robala ka khutšo ka gobane Modimo o dira gore re ikwe re bolokegile.

23. Re tla ba le eng ge e ba re bota Modimo ka mo go feletšego?

²³ Anke re tšweleng pele tirelong ya Jehofa ka kgodišego. Le gona anke re rapeleng ka tumelo gomme ka go re’alo re be le “khutšo ya Modimo yeo e fetago kwešišo yohle.” (Bafil. 4:6, 7) Ruri seo se re tlišetša lethabo le legolo! Le gona re ka lebeletšana le bokamoso ka kgodišego ge e ba re dula re bota Jehofa ka mo go feletšego.

O tla Araba Bjang?

• Dafida o ile a lebeletšana le mathata afe ka baka la Abesalomo?

• Psalme ya boraro e re thuša bjang go ba le kgodišego?

• Ke ka ditsela dife Psalme ya bone e ka matlafatšago go bota ga rena Jehofa?

• Re ka holwa bjang ke go bota Modimo ka mo go feletšego?

[Dipotšišo tša Thuto]

[Seswantšho go letlakala 29]

Gaešita le nakong ya ge a be a tšhaba ka baka la Abesalomo, Dafida o be a bota Jehofa

[Diswantšho go letlakala 32]

Na o bota Jehofa ka mo go feletšego?