Malapa a Bakriste—‘Dulang le Phafogile’

“Anke re duleng re phafogile gomme re dule re hlaphogetšwe monaganong.”—1 BATHES. 5:6.

1, 2. Go nyakega’ng gore lapa le kgone go dula le phafogile moyeng?

GE MOAPOSTOLA PAULO a be a ngwalela Bakriste ba Thesalonika ka “letšatši le legolo le le boifišago la Jehofa,” o itše: “Bana bešo, ga le leswiswing moo letšatši leo le tla le fihlelago bjalo ka ge le be le tla fihlela mahodu, gobane ka moka le barwa ba seetša le ba mosegare. Ga re ba bošego goba ba leswiswi.” Paulo o okeditše ka gore: “Ka gona, anke re se ke ra robala go etša ge ba bangwe ka moka ba robala, eupša anke re duleng re phafogile gomme re dule re hlaphogetšwe monaganong.”—Joele 2:31; 1 Bathes. 5:4-6.

² Keletšo yeo Paulo a e neilego Bathesalonika e tloga e swanela Bakriste bao ba phelago “mehleng ya bofelo.” (Dan. 12:4) Ge bofelo bja tshepedišo ye e kgopo ya dilo bo dutše bo batamela, Sathane o ikemišeditše go dira gore barapedi ba bantši ba therešo ba kgaotše go hlankela Modimo. Ka gona re dira gabotse ge re tšeela godimo keletšo ya Paulo ya gore re dule re phafogile moyeng. E le gore lapa la Bakriste le kgone go dula le phafogile, go bohlokwa gore setho se sengwe le se sengwe se phethe boikarabelo bja sona bja Mangwalo. Ka gona, ke tema efe yeo e kgathwago ke banna, basadi le bana go thušeng malapa a bona go ‘dula a phafogile’?

Banna—Ekišang “Modiši yo Boleta”

3. Go ya ka 1 Timotheo 5:8, boikarabelo bja monna bja go ba hlogo ya lapa bo akaretša eng?

³ Beibele e re “hlogo ya mosadi yona ke monna.” (1 Bakor. 11:3) Boikarabelo bja monna bja go ba hlogo ya lapa bo akaretša eng? Ge Mangwalo a bolela ka boikarabelo bjo bongwe bja bohlogo, a re: “Ge e ba motho a sa babalele bao e lego ba gabo, kudukudu ditho tša lapa la gagwe, o latotše tumelo gomme ke yo mobe go feta motho yo a se nago tumelo.” (1 Tim. 5:8) Ruri monna o swanetše go hlokomela lapa la gagwe nameng. Lega go le bjalo, ge e ba a nyaka go thuša lapa la gagwe gore le dule le phafogile moyeng, o swanetše go dira se se fetago go fo le hlokomela nameng. O swanetše go aga lapa la gagwe moyeng, a thuše bohle ka lapeng go matlafatša tswalano ya bona le Modimo. (Die. 24:3, 4) A ka dira seo bjang?

4. Ke’ng seo se ka thušago monna gore a atlege go aga lapa la gagwe moyeng?

⁴ Ka ge “monna [e le] hlogo ya mosadi wa gagwe go etša ge Kriste e le hlogo ya phuthego,” monna yo a nyetšego o swanetše go hlahloba bohlogo bjoo Jesu a bo bontšhago phuthego gomme a bo ekiše. (Baef. 5:23) Bona kamoo Jesu a hlalositšego tswalano ya gagwe le balatedi ba gagwe. (Bala Johane 10:14, 15.) Senotlelo seo se ka dirago gore monna yo a nyakago go aga lapa la gagwe moyeng a atlege ke sefe? Ke se: Go ithuta seo Jesu a se boletšego le seo a se dirilego e le “modiši yo boleta,” le go “[latela] dikgato tša gagwe kgauswi.”—1 Pet. 2:21.

5. Modiši yo Boleta o tseba’ng ka phuthego?

⁵ Anke re ahlaahleng seo hlogo ya lapa e ka ithutago sona mohlaleng wa Kriste. Ge re bolela ka tsela ya seswantšhetšo, tswalano ya magareng ga modiši le dinku tša gagwe e theilwe go go tsebana le go botana. Modiši o tseba sohle ka dinku tša gagwe gomme dinku le tšona di tseba modiši wa tšona le go mmota. Di tseba lentšu la gagwe e bile di a le theetša. Jesu o itše: “Ke tseba dinku tša ka le dinku tša ka di a ntseba.” Ga a fo tseba phuthego ka kakaretšo. Lentšu la Segerika leo le fetoletšwego mo e le “tseba” le  bolela “go tseba selo ka mo go tseneletšego.” Ee, Modiši yo Boleta o tloga a tseba dinku tša gagwe. O tseba dinyakwa tša nku e nngwe le e nngwe, mafokodi a yona le seo e ka kgonago go se dira. Ga go na selo seo Jesu Mohlala wa rena a sa se tsebego ka dinku tša gagwe. Le gona dinku di tseba modiši wa tšona ka mo go tseneletšego e bile di bota boetapele bja gagwe.

6. Banna ba ka ekiša bjang Modiši yo Boleta?

⁶ E le gore monna a diriše bohlogo bja gagwe go swana le Kriste, o swanetše go ithuta go ipona e le modiši gomme a bone bao a ba hlokometšego e le dinku. O swanetše go katanela go tseba lapa la gagwe ka mo go tseneletšego. Na go a kgonega gore monna a dire bjalo? Ee, ge e ba a boledišana gabotse le ditho ka moka tša lapa la gagwe, a theetša dilo tšeo di ba tshwenyago, a etelela pele medirong ya lapa e bile a leka ka thata go dira diphetho tše dibotse tšeo di akaretšago ditaba tša go swana le borapedi bja lapa, go ba gona dibokeng, go ya bodireding bja tšhemo, go itapološa le go ithabiša. Ge monna wa Mokriste a etelela lapa pele e sego feela ka tsebo ya Lentšu la Modimo eupša le ka go tseba bao a ba hlokometšego, go na le kgonagalo ya gore ditho tša lapa la gagwe di bote bohlogo bja gagwe le go kgotsofatšwa ke go di bona di dula di momagane borapeding bja therešo.

7, 8. Monna a ka ekiša bjang Modiši yo Boleta ge a bontšha bao a ba hlokometšego lerato?

⁷ Go oketša moo, modiši yo botse o rata dinku tša gagwe. Ge re ithuta dipego tša Diebangedi tša mabapi le bophelo le bodiredi bja Jesu, dipelo tša rena di tlala tebogo ka baka la lerato leo a le bontšhitšego barutiwa ba gagwe. O ile a ba a ‘gafa moya wa gagwe ka baka la dinku.’ Banna ba swanetše go ekiša Jesu ka gore ba bontšhe bao ba ba hlokometšego lerato. Go e na le go swara mosadi wa gagwe makgwakgwa, monna yo a nyakago go amogelwa ke Modimo o tšwela pele a rata mosadi wa gagwe “go etša ge Kriste le yena a ratile phuthego.” (Baef. 5:25) Mantšu a gagwe e swanetše go ba a botho le a go naganela, ka ge mosadi a swanelwa ke kgodišo.—1 Pet. 3:7.

⁸ Ge hlogo ya lapa e ruta bana, e swanetše go kgomarela melao ya motheo ya Modimo. Eupša, ga se ya swanela go palelwa ke go bontšha bana ba yona lerato. Tayo yeo e nyakegago e swanetše go newa ka lerato. Bana ba bangwe ba ka diega go kwešiša seo se letetšwego go bona go feta ba bangwe. Boemong bjo bjalo, tate o swanetše go ba bontšha go se fele pelo kutšwanyana. Ge banna ba latela mohlala wa Jesu ka mehla, ba dira gore boemo bja ka lapeng e be bjo bo šireletšegilego le bjo bo bolokegilego. Malapa a bona a thabela tšhireletšego ya moya yeo mopsalme a opetšego ka yona.—Bala Psalme 23:1-6.

9. Go etša mopatriareka Noa, banna ba Bakriste ba na le boikarabelo bofe, gona ke’ng seo se tlago go ba thuša go bo phetha?

⁹ Mohlala o mongwe o mobotse go banna ba Bakriste ke Noa. Mopatriareka Noa o phetše nakong ya bofelo bja lefase la mehleng ya gagwe. Eupša Jehofa o ile a mo “lota . . . le ba bangwe ba šupago ge a be a tliša meetsefula lefaseng la batho ba go se boife Modimo.” (2 Pet. 2:5) Noa o be a na le boikarabelo bja go thuša lapa la gagwe gore le phologe Meetsefula. Dihlogo tša malapa a Bakriste le tšona di na le boikarabelo bjo bo swanago mehleng ye ya bofelo. (Mat. 24:37) Ruri go bohlokwa gore di ithute mohlala wa “modiši yo boleta” gomme di katanele go mo ekiša!

Basadi—‘Agang Malapa a Lena’

10. Go ikokobeletša ga mosadi monna wa gagwe go akaretša eng?

¹⁰ Moapostola Paulo o ngwadile gore: “Basadi ba ikokobeletše banna ba bona go etša ge ba ikokobeletša Morena.” (Baef. 5:22) Mantšu a a tloga a sa bolele gore mosadi o a nyatšega. Pele ga ge a ka bopa mosadi wa pele e lego Efa, Modimo wa therešo o boletše gore: “Ga go botse gore monna a tšwele pele a dula a nnoši. Ke tla mo direla mothuši yo e tlago go ba molekane yo a mo swanelago.” (Gen. 2:18) Karolo ya mosadi ya go ba “mothuši” le “molekane”—ya go thuša monna wa gagwe ge a phetha boikarabelo bja lapa—ke e hlomphegago e le ruri.

11. Mosadi yo e lego mohlala ‘o aga bjang lapa la gagwe’?

¹¹ Mosadi yo e lego mohlala o direla lapa la  gagwe dilo tše dibotse. (Bala Diema 14:1.) Ka go se swane le mosadi wa lešilo yoo a sa hlomphego tokišetšo ya bohlogo, mosadi yo bohlale yena o hlompha tokišetšo ye kudu. Go e na le go se kwe le go bontšha moya wa boipušo wo o tletšego lefaseng le, o ikokobeletša molekane wa gagwe. (Baef. 2:2) Mosadi wa lešilo ga a dikadike go bolela gampe ka monna wa gagwe, mola mosadi yo bohlale yena a katanela go dira gore monna wa gagwe a hlompšhe kutšwanyana ke bana ba gagwe le batho ba bangwe. Mosadi yo bjalo o ela hloko gore a se ke a tšeela fase bohlogo bja monna wa gagwe ka go mo tshwenya goba go ngangišana le yena. Taba e nngwe ke ya go seketša. Gantši mosadi wa lešilo o tšitlanya dilo tšeo lapa la gagwe le di šometšego ka thata. Mosadi yo a thekgago monna wa gagwe ga a dire bjalo. O dirišana le monna wa gagwe ditabeng tša ditšhelete. Tsela yeo a dirago dilo ka yona e bontšha gore o bohlale e bile o seketša dilo. Ga a gapeletše monna wa gagwe go šoma diiri tše di oketšegilego.

12. Mosadi a ka dira’ng go thuša lapa la gagwe gore le ‘dule le phafogile’?

¹² Mosadi yo e lego mohlala o thuša lapa la gagwe gore le ‘dule le phafogile’ ka go thuša monna wa gagwe go ruta bana dilo tša moya. (Die. 1:8) O thekga lenaneo la Borapedi bja Lapa ka mafolofolo. Go feta moo, o ema le monna wa gagwe ge a eletša bana ba bona le go ba laya. Ruri o fapana kudu le mosadi yo a sa dirišanego le monna wa gagwe, yoo bana ba gagwe ba tlaišegago nameng le moyeng!

13. Ke ka baka la’ng e le gabohlokwa gore mosadi a thekge monna wa gagwe ge a tšea karolo ka mafolofolo medirong ya pušo ya Modimo?

¹³ Mosadi yo a thekgago monna wa gagwe o ikwa bjang ge a mmona a tšea karolo ka mafolofolo ka phuthegong ya Bokriste? O a thaba e le ruri! Go sa šetšwe gore monna wa gagwe ke mohlanka wa bodiredi, mogolo goba mohlomongwe ke setho sa Komiti ya go Hloma Kwano le Sepetlele goba Komiti ya Meago ya Tikologo, o thabišwa ke tokelo ya monna wa gagwe. Ruri go tla nyakega boikgafo gore a thekge monna wa gagwe ka mafolofolo ka mantšu le ka ditiro. Eupša o a tseba gore ge monna wa gagwe a swaregile ka mediro ya pušo ya Modimo, seo se thuša lapa ka moka gore le dule le phafogile moyeng.

14. (a) Ke’ng seo e ka bago tlhohlo go mosadi yo a thekgago monna wa gagwe, gona a ka fenya bjang tlhohlo yeo? (b) Mosadi o thuša bjang gore lapa ka moka le thabe?

¹⁴ Go ba mohlala tabeng ya go thekga monna e ka ba tlhohlo go mosadi ge monna a dira phetho yeo a sa dumelelanego le yona. Le gona moo, mosadi o bontšha “moya wo o homotšego le o boleta” e bile o dirišana le monna wa gagwe go mo thuša gore phetho ya gagwe e atlege. (1 Pet. 3:4) Mosadisadi o leka go latela mehlala e mebotse ya basadi ba bogologolo bao ba bego ba boifa Modimo, ba bjalo ka Sara, Ruthe, Abigaile le Maria mmago Jesu. (1 Pet. 3:5, 6) Le gona o ekiša basadi ba ba godilego ba mehleng yeno bao ba “hlomphegago boitshwarong.”  (Tito 2:3, 4) Ka go rata monna wa gagwe le go mo hlompha, mosadi yo e lego mohlala o thuša kudu gore lenyalo la bona le atlege le gore lapa ka moka le dule le thabile. Lapeng la gagwe ke gae ga mahlaku. Go monna wa moya, mosadi yo a mo thekgago o bohlokwa kudu!—Die. 18:22.

Bafsa—‘Išang Mahlo a Lena Dilong tše di sa Bonwego’

15. Bafsa ba ka thušana bjang le batswadi ba bona gore malapa a gabo bona a ‘dule a phafogile’?

¹⁵ Bafsa, le ka thušana bjang le batswadi ba lena gore malapa a gabo lena a ‘dule a phafogile’ moyeng? Bonang moputso woo Jehofa a o beilego pele ga lena. Mohlomongwe go tloga ge o be o sa le ngwana batswadi ba gago ba ile ba go laetša diswantšho tšeo di bontšhago bophelo Paradeiseng. Ge o dutše o gola, go ka direga gore ba ile ba diriša Beibele le dikgatišo tša Bokriste go go thuša go bona ka leihlo la kgopolo gore bophelo bjo bo sa felego bo tla ba bjang lefaseng le lefsa. Go dula o tsepamišeditše mahlo a gago tirelong ya Jehofa le go rulaganya bophelo bja gago ka go dumelelana le seo go tla go thuša go ‘dula o phafogile.’

16, 17. Ke’ng seo bafsa ba ka se dirago e le gore ba kitime lebelo la bophelo ka katlego?

¹⁶ Tšeela godimo mantšu a moapostola Paulo ao a hwetšagalago go 1 Bakorinthe 9:24. (Bala.) Moapostola Paulo o swantšha tirelo ya rena go Jehofa le lebelo gomme bophelo bjo bo sa felego le moputso. Ka gona, kitima lebelo la bophelo ka maikemišetšo a magolo a go thopa sefoka. Kgetha tsela yeo e tlago go dira gore o hwetše moputso wa bophelo bjo bo sa felego. Ba bantši ba dumeletše go phegelela dilo tše di bonagalago go ba šitiša go tsepamišetša mahlo a bona moputsong. A bošilo bjo bogolo gakaakang! Go phela ka tsela ya gore re be le mahumo ga go lebiše lethabong la kgonthe. Dilo tšeo tšhelete e ka di rekago ke tša nakwana. Lega go le bjalo, wena dula o išitše mahlo a gago “dilong tše di sa bonwego.” Ka baka la’ng? Ka gobane “dilo tše di sa bonwego ke tša ka mo go sa felego.”—2 Bakor. 4:18.

¹⁷ “Dilo tše di sa bonwego” di akaretša ditšhegofatšo tša Mmušo. Rulaganya go phela ka tsela yeo e tlago go go thuša go di hwetša. Lethabo la kgonthe le tlišwa ke go diriša bophelo bja gago tirelong ya Jehofa. Go hlankela Modimo wa therešo go go nea dibaka tša go fihlelela dipakane tša gona bjale gotee le tša nakong e tlago. * Go ipeela dipakane tša moya tšeo o ka di fihlelelago go ka go thuša go dula o tsepamišeditše monagano go hlankeleng Modimo o na le kholofelo ya go tlo hwetša moputso wa bophelo bjo bo sa felego.—1 Joh. 2:17.

18, 19. Mofsa a ka tseba bjang gore o dirile gore therešo e be ya gagwe?

¹⁸ Bafsa, mogato wa mathomo tseleng e išago bophelong ke go dira gore therešo e be ya lena. Na o šetše o gatile mogato wo? Ipotšiše gore: ‘Na ke motho wa moya, goba na ke tšea karolo dilong tša moya feela ka baka la batswadi ba ka? Na ke hlagolela dika tšeo di dirago gore ke kgahle Modimo? Na ke dira maiteko a go kgomarela lenaneo la ka mehla la go tšea karolo medirong yeo e sepedišanago le borapedi bja therešo, e bjalo ka go rapela ka mehla, go ithuta, go ba gona dibokeng le go ya tšhemong? Na ke batamela Modimo ka go hlagolela tswalano ya motho ka noši le yena?’—Jak. 4:8.

¹⁹ Nagana ka mohlala wa Moshe. Gaešita le  ge a be a phela setšong sa batho bašele, o ile a kgetha go bitšwa morapedi wa Jehofa go e na le go bitšwa morwa wa morwedi wa Farao. (Bala Baheberu 11:24-27.) Lena bafsa ba Bakriste, le lena le swanetše go ikemišetša go hlankela Jehofa ka potego. Ka go dira bjalo, le tla hwetša lethabo la kgonthe, bophelo bjo bobotse kudu gona bjale gotee le kholofelo ya go “[swarelela] ka go tia bophelong bja kgonthe.”—1 Tim. 6:19.

20. Ke bomang bao ba tlago go hwetša moputso lebelong la bophelo?

²⁰ Dipapading tša bogologolo, ke mokitimi o tee feela yo a bego a thopa sefoka. Ga go bjalo ka lebelo la bophelo. Thato ya Modimo ke “gore mehuta yohle ya batho e phološwe gomme e fihle tsebong e nepagetšego ya therešo.” (1 Tim. 2:3, 4) Ba bantši ba šetše ba kitimile ka katlego pele ga gago, gomme ba bantši ba sa dutše ba kitima kgauswi le wena. (Baheb. 12:1, 2) Moputso o tla hwetšwa ke bohle bao ba kitimago go fihla mafelelong. Ka gona, ikemišetše go thopa sefoka!

21. Ke’ng seo se tlago go ahlaahlwa sehlogong se se latelago?

²¹ Ga go na motho yo a tlago go phema “[go tla ga] letšatši le legolo le leo le boifišago la Jehofa.” (Mal. 4:5) Letšatši leo ga se la swanela go hwetša malapa a Bakriste a sa itebetše. Go bohlokwa gore bohle ka lapeng ba phethe boikarabelo bja bona bja Mangwalo. Ke’ng se sengwe gape seo le ka se dirago gore le dule le phafogile moyeng le go matlafatša tswalano ya lena le Modimo? Sehlogo se se latelago se tla ahlaahla dikarolo tše tharo tšeo di kgomago go phela gabotse moyeng ga lapa ka moka.

[Mongwalo wa tlase]

O Ithutile’ng?

• Ke ka baka la’ng go le bohlokwa gore malapa a Bakriste a ‘dule a phafogile’?

• Monna a ka ekiša bjang Modiši yo Boleta?

• Mosadi yo e lego mohlala a ka dira’ng gore a thekge monna wa gagwe?

• Bafsa ba ka thuša malapa a gabo bona bjang gore a dule a phafogile moyeng?

[Dipotšišo tša Thuto]

[Seswantšho go letlakala 9]

Go monna wa moya, mosadi yo a mo thekgago o bohlokwa kudu