“Molebeledi yo Botse le Mogwera yo a Rategago”

JOHN (JACK) BARR, yo a hlanketšego e le setho sa Sehlopha se Bušago sa Dihlatse tša Jehofa, o feditše bophelo bja gagwe bja lefaseng ka Mokibelo mesong ka December 4, 2010. O be a na le nywaga e 97. O hlalositšwe e le “molebeledi yo botse le mogwera yo a rategago.”

Ngwanabo rena Barr o belegetšwe Aberdeen, Scotland, gomme ke phejane baneng ba bararo. Batswadi ba gagwe e be e le batlotšwa. Ngwanabo rena Barr o be a fela a bolela ka lerato ka bophelo bja ka lapeng la gabo bja ge a be a sa gola; o be a leboga mohlala o mobotse woo batswadi ba gagwe bao ba rategago ba mmeetšego ona.

Ge a tsena nywageng ya mahlalagadi, Jack yo mofsa o ile a thoma go thatafalelwa kudu ke go bolela le batho bao a sa ba tsebego. Lega go le bjalo, o ile a katanela go fenya bothata bjoo gomme thapameng e nngwe ya Sontaga ka 1927, ge a be a na le nywaga e 14, o ile a botša tatagwe gore o be a ikemišeditše go sepela le yena modirong wa go ruta ka ntlo le ntlo. Ao e be e le mathomomayo. Go tloga lona letšatšing leo go fihlela lehung la gagwe, Ngwanabo rena Barr o ile a tšwela pele e le mmoledi yo mafolofolo wa ditaba tše dibotse.

Kotsi e šoro yeo e ilego ya nyaka e bolaya mmagwe yo a rategago e ile ya dira gore Jack yo mofsa a naganišiše ka morero wa bophelo gomme ka 1929 o ile a ineela go Jehofa, a bontšha boineelo bja gagwe ka go kolobetšwa ka 1934 ge sebaka se be se tšwelela. Ke moka ka 1939, o ile a ba setho sa lapa la Bethele kua London, Engelane. Ka go re’alo a thoma tirelo ya nako e tletšego yeo e tšerego nywaga e 71.

Ka October 29, 1960, Ngwanabo rena Barr o ile a tsenela seo a bego a se bitša “tswalano e bohlokwa ka mo go kgethegilego” ge a be a nyala Mildred Willett, mmulamadibogo yo a bego a dutše a fišega ka nako e telele e bile e le moromiwa. Ngwanabo rena le Kgaetšedi Barr ba be ba tsebja e le balekane bao ba beago mohlala le ba ineetšego gomme ba ile ba dula ba le bjalo go fihlela ge Mildred a fetša bophelo bja gagwe bja lefaseng ka October 2004. Ngwanabo rena le Kgaetšedi Barr ba be ba bala karolo ya Beibele ba le gotee letšatši le lengwe le le lengwe nako ka moka ya ge ba be ba nyalane.

Go bao ba bego ba mo tseba, leina Jack Barr le tla ba gopotša ka monna yo a bego a nea keletšo yeo e naganišišitšwego, ka mehla e le e lekalekanego, e le botho e bile e theilwe Mangwalong. O be a šoma ka thata, e le molebeledi yo a naganelago le yo lerato e bile e le mogwera yo a botegago. Dikarabo tša gagwe, dipolelo tša gagwe le dithapelo tša gagwe di be di utolla gore o rata therešo kudu le gore o na le tswalano ya kgauswi le Jehofa.

Le ge re tla hlologela Ngwanabo rena yo a rategago Barr, re thaba le yena ge a amogetše mpho ya go se hwe, e lego tokelo yeo a bego a dutše a e letetše le yeo a bego a bolela ka yona gantši. Ke sona seo a bego a se nyaka.—1 Bakor. 15:53, 54. *

[Mongwalo wa tlase]