“Dišang Mohlape wa Modimo Woo le o Hlokometšego”
“Dišang Mohlape wa Modimo Woo le o Hlokometšego”
“Dišang mohlape wa Modimo woo le o hlokometšego, e sego ka go gapeletšwa, eupša e be ka go rata.”—1 PET. 5:2.
1. Bakriste ba be ba lebeletšane le maemo afe ge Petro a be a ngwala lengwalo la gagwe la pele?
LEBAKA le itšego pele Nero a thoma go hlasela Bakriste kua Roma, moapostola Petro o ile a ngwala lengwalo la gagwe la pele. O be a nyaka go matlafatša badumedigotee le yena. Diabolo o be a “sepelasepela” a nyaka go metša Bakriste. Gore ba mo lwantšhe ba tiile, ba be ba swanetše go ‘dula ba hlaphogetšwe,’ le go “[ikokobetša] tlase ga seatla se matla sa Modimo.” (1 Pet. 5:6, 8) Le gona ba be ba swanetše go dula ba le boteeng. Ba be ba se ba swanela go “lomana le go jana,” ka ge ba be ba ka feleletša ba ‘fedišane.’—Bagal. 5:15.
2, 3. Ke mang yo re swanetšego go ba re elwa le yena, gona re tla hlahloba’ng dihlogong tše?
2 Lehono, re lebeletšane le boemo bjo bo swanago. Diabolo o tsoma dibaka tša go re metša. (Kut. 12:12) Le gona ka pele ga rena go tla “masetlapelo a magolo a sa kago a ba gona ga e sa le go tloga mathomong a lefase.” (Mat. 24:21) Go swana le ge Bakriste ba lekgolong la pele la nywaga ba ile ba swanelwa ke go itšhireletša gore ba se lwantšhane ka bobona, le rena re swanetše go dira bjalo. Gore re phethe se, ka dinako tše dingwe re nyaka thušo go banna ba bagolo ba swanelegago.
3 Anke re hlahlobeng kamoo bagolo ba ka bontšhago ka mo go oketšegilego gore ba tšeela godimo tokelo ya go diša ‘mohlape wa Modimo woo ba o hlokometšego.’ (1 Pet. 5:2) Ka morago ga moo, re tla sekaseka tsela e nepagetšego ya go phetha modiro wa bodiši. Sehlogong se se latelago, re tla hlahloba kamoo phuthego e ka ‘hlomphago bao ba šomago ka thata gare ga yona gomme ba okametše’ mohlape. (1 Bathes. 5:12) Go hlahloba dintlha tše go tla re thuša go ema re tiile kgahlanong le Lenaba la rena le legolo, re lemoga gore ke lona leo re lwago le lona.—Baef. 6:12.
Dišang Mohlape wa Modimo
4, 5. Banna ba bagolo ba swanetše go lebelela mohlape bjang? Bontšha.
4 Petro o ile a kgothaletša banna ba bagolo gare ba Bakriste ba lekgolong la pele la nywaga gore ba be le pono ya Modimo ka mohlape woo ba o hlokometšego. (Bala 1 Petro 5:1, 2.) Gaešita le ge a be a lebelelwa e le kokwane ka phuthegong, Petro o be a sa bolele ka tsela e bontšhago e ka o phagametše bagolo ba bangwe. Go e na le moo, o ile a ba eletša e le mogologotee le bona. (Bagal. 2:9) Ka mokgwa o swanago le wa Petro, Sehlopha se Bušago lehono se kgothaletša bagolo ba diphuthego go phetha boikarabelo bja bona bjo boima bja go diša mohlape wa Modimo.
5 Moapostola o ngwadile gore banna ba bagolo ba be ba swanetše go ‘diša mohlape wa Modimo woo ba o hlokometšego.’ Go be go le bohlokwa kudu go bona go lemoga gore mohlape woo ke wa Jehofa le Jesu Kriste. Bagolo ba be ba swanetše go ikarabela tseleng yeo ba hlokometšego dinku tša Modimo. A re re mogwera wa gago yo mogolo o go kgopetše gore o hlokomele bana ba gagwe ge yena a sa ile maeto. Na o be o ka se ba hlokomele gabotse le go ba nea dijo? Ge yo mongwe wa bana bao a ka babja, na o be o ka se kgonthišetše gore o hwetša thušo ya tša kalafo? Ka mo go swanago, bagolo ka phuthegong ba swanetše “gore [ba] diše phuthego ya Modimo yeo a e rekilego ka madi a Morwa wa gagwe.” (Dit. 20:28) Ba dula ba gopola gore nku e nngwe le e nngwe e rekilwe ka madi a bohlokwa a Kriste Jesu. Ka ge bagolo ba ikarabela, ba fepa mohlape, ba a o šireletša le go o hlokomela.
6. Boikarabelo bja badiši ba bogologolo e be e le bofe?
6 Nagana ka boikarabelo bjoo badiši ba bogologolo ba bego ba na le bjona mehleng ya Beibele. Ba be ba swanetše go kgotlelela phišo ya mosegare le phefo ya bošego e le gore ba hlokomele mohlape. (Gen. 31:40) Ba ile ba ba ba bea maphelo a bona kotsing ka baka la dinku. Mošemanyana wa modiši e lego Dafida o ile a phološa mohlape wa gagwe dibateng tša naga, tšeo di akaretšago tau le bere. Dafida o boletše ka e nngwe le e nngwe ya tšona gore o ile a ‘e swara ka mariri a yona a e itia gomme a e bolaya.’ (1 Sam. 17:34, 35) A sebete se sekaakang! Ruri o swanetše go ba a phonyokgile meno a sebata ka lešobana la nalete! Lega go le bjalo, o ile a dira sohle seo a ka se kgonago go phološa dinku.
7. Ka tsela ya seswantšhetšo, bagolo ba ka ubula bjang nku menong a Sathane?
7 Lehono, bagolo ba swanetše go šetša ditlhaselo tša Diabolo tšeo di swanago le tša tau. Se se ka akaretša go gata mogato ka sebete go swana le go ubula nku menong a Diabolo. Ka go swara sebata sa naga ka mariri, bagolo ba ka phološa nku. Ba ka bontšhana mabaka le bana babo rena bao ba sego šedi bao ba lekwago ke melaba ya Sathane. (Bala Juda 22, 23.) Go ba gona, bagolo ba ka se fihlelele seo ge ba sa thušwe ke Jehofa. Ba swara ka borutho nku e gobetšego, ba e tlema ntho ka lešela le go e tlotša ka setlolo sa Lentšu la Modimo.
8. Bagolo ba lebiša mohlape kae, gona bjang?
8 Le gona modiši wa kgonthe o be a lebiša mohlape lefelong le le swanetšego leo le nago le mafulo le meetse. Ka mo go swanago, bagolo ba lebiša mohlape ka phuthegong, ba o kgothaletša go ba gona ka mehla dibokeng e le gore o ka fepša gabotse le go hwetša “dijo tša [ona] ka nako e swanetšego.” (Mat. 24:45) Go nyakega gore bagolo ba fetše nako e oketšegilego ba thuša ka borutho bao ba babjago moyeng gore ba amogele phepo ya Lentšu la Modimo. Nku e arogilego e ka ba e leka go boela mohlapeng. Go e na le go tšhošetša ngwanabo bona, bagolo ka borutho ba mo hlalosetša melao ya Beibele ya motheo le go mmontšha kamoo a ka e dirišago bophelong bja gagwe.
9, 10. Bagolo ba swanetše go hlokomela bjang batho ba babjago moyeng?
9 Ge o babja, ke ngaka ya mohuta mang yeo o bego o tla rata e go hlahloba? Na o ka kgetha yeo e fetšago nako e nyenyane e go theeditše gomme kapejana ya go nea dihlare e le feela gore e kitimele go bona molwetši yo a latelago? Goba na o be o tla rata go ya go ngaka yeo e go theetšago, ya go hlalosetša gore bothata e ka ba e le eng ka wena gomme ya go bontšha mekgwa ya kalafo yeo o ka e dirišago?
10 Ka mo go swanago, bagolo ba ka theetša motho yo a babjago moyeng gomme ba thuša go fodiša ntho ya gagwe, ka baka leo ka tsela ya seswantšhetšo “ba mo [tlotša] ka makhura leineng la Jehofa.” (Bala Jakobo 5:14, 15.) Go swana le balesamo e tšwago Gileada, Lentšu la Modimo le ka alafa molwetši. (Jer. 8:22; Hesek. 34:16) Ge melao ya Beibele ya motheo e dirišwa e ka thuša mofoši go dira diphetho tšeo di tla mo thušago go hlankela Jehofa ka botlalo. Ee, bagolo ba dira gabotse kudu gore ka morago ga ge ba kwele ka mathata a nku yeo e babjago ba rapele le yona.
E Sego ka go Gapeletšwa Eupša e be ka go Rata
11. Ke’ng seo se šušumeletšago bagolo go diša mohlape wa Modimo ka go rata?
11 Se se latelago Petro o ile a gopotša banna ba bagolo kamoo modiro wa bodiši o swanetšego go dirwa ka gona le kamoo o sa swanelago go dirwa ka gona. Bagolo ba swanetšego diša mohlape wa Modimo, “e sego ka go gapeletšwa, eupša e be ka go rata.” Ke’ng seo se šušumeletšago bagolo go hlankela bana babo bona ka go rata? Go ba gona, ke’ng seo se bego se šušumeletša Petro go diša le go fepa dinku tša Jesu? Selo se bohlokwa seo se bego se mo šušumetša ke go rata Morena wa gagwe kudu. (Joh. 21:15-17) Ka baka la lerato, bagolo ga ‘ba sa hlwa ba iphelela, eupša ba phelela yena yo a ba hwetšego.’ (2 Bakor. 5:14, 15) Lerato le, go akaretša go rata ga bona Modimo le bana babo bona, le tutuetša bagolo go hlankela mohlape ba diriša matla a bona, dilo tša bona tše di bonagalago le nako ya bona. (Mat. 22:37-39) Ba ikgafa ka go rata e sego ka go kgokgona.
12. Moapostola Paulo o ile a ikgafa go fihla bokgoleng bofe?
12 Bagolo ba swanetše go ikgafa go fihla bokgoleng bofe? Ge ba hlokomela dinku, ba ekiša moapostola Paulo, go etša ge yena a be a ekiša Jesu. (1 Bakor. 11:1) Ka ge Paulo le badirišani ba gagwe ba be ba rata bana babo bona ba Thesalonika, ba ile ba kgahlwa ke go ba fetišetša “e sego feela ditaba tše dibotse tša Modimo, eupša le meoya ya [bona].” Ge ba be ba dira bjalo, ba ile ba ba bonolo, “go etša ge mma yo a amušago a babalela bana ba gagwe.” (1 Bathes. 2:7, 8) Paulo o be a kwešiša kamoo mma yo a amušago a bego a ikwa ka gona ka bana ba gagwe. Mma o be a tla ba direla selo se sengwe le se sengwe, go akaretša go tsoga gare ga mpa ya bošego gore a ba nee dijo.
13. Ke tekatekano efe yeo bagolo ba swanetšego go dula ba na le yona?
13 Bagolo ba swanetše go ba šedi gore ba dule ba na le tekatekano ge ba phetha boikarabelo bja bodiši le bja ka malapeng a bona. (1 Tim. 5:8) Nako yeo bagolo ba e fetšago le phuthego ke nako e bohlokwa yeo ba ka bego ba e fetša le malapa a bona. Tsela ya go lekalekanya boikarabelo bjo ke gore ka dinako tše dingwe ba laletše ba bangwe mantšiboeng a Borapedi bja Lapa. Ka nywaga e mentši, Masanao e lego mogolo wa kua Japane, o be a laletša batho ba se nago balekane le malapa a se nago botate thutong ya lapa la gagwe. Ge nako e dutše e sepela, ba bangwe bao Masanao a ilego a ba thuša ba ile ba ba bagolo gomme ba ekiša mohlala wa gagwe o mobotse.
Phemang Leruo la go se Botege—Dišang Mohlape ka go Fišega
14, 15. Ke ka baka la’ng bagolo ba swanetše go phema go “rata leruo la go se botege,” gona ba ka ekiša Paulo bjang boemong bjo?
14 Petro le yena o ile a kgothaletša bagolo go diša mohlape, ‘e sego ka go rata leruo la go se botege, eupša ka go fišega.’ Modiro wa bagolo o tšea nako e ntši, lega go le bjalo ga ba letele go lefša. Petro o ile a bona go swanetše gore a lemoše bagologotee le yena ka kotsi ya go diša mohlape ka go “rata leruo la go se botege.” Kotsi yeo e bonagala gabotse bophelong bja manobonobo bjoo bo phelwago ke baetapele ba bodumedi bja “Babilona o Mogolo” mola batho ba bantši ba gapeletšega go phela bophelo bja bodiidi. (Kut. 18:2, 3) Bagolo lehono ba na le lebaka le le kwagalago la gore ba pheme mokgwa le ge e le ofe woo o ka ba lebišago moo.
15 Paulo o beetše bagolo ba Bakriste mohlala o mobotse. Gaešita le ge e be e le moapostola e bile e be e ka ba “morwalo o boima” go Bakriste kua Thesalonika, ga se a ka a “ja dijo tša motho le ge e le ofe ntle le tefo.” Go e na le moo, o ile a ‘šoma ka boitapišo le ka thata bošego le mosegare.’ (2 Bathes. 3:8) Bagolo ba bantši lehono, go akaretša le bao ba dirago modiro wa bosepedi, ba bea mohlala o mobotse tabeng ye. Le ge ba thabela go amogelwa ke badumedigotee le bona magaeng a bona, ga e be “morwalo o boima” go motho le ge e le ofe.—1 Bathes. 2:9.
16. Go diša mohlape “ka go fišega” go bolela’ng?
16 Bagolo ba diša mohlape “ka go fišega.” Phišego ya bona e bonagala gabotse tseleng yeo ba ikgafago ka yona ge ba thuša mohlape. Lega go le bjalo, seo ga se bolele gore ba gapeletša mohlape go hlankela Jehofa; goba gore bagolo ba lerato ba kgothaletša mohlape go hlankela Modimo ka moya wa phadišano. (Bagal. 5:26) Bagolo ba kwešiša gore nku e nngwe le e nngwe ke ya moswananoši. Ba fišegela go thuša bana babo bona go hlankela Jehofa ka lethabo.
E se be ka go Buša Mohlape Eupša e be ka go o Beela Mohlala
17, 18. (a) Ke ka baka la’ng ka dinako tše dingwe baapostola ba be ba e ba le bothata bja go kwešiša thuto ya Jesu ka boikokobetšo? (b) Re ka ikhwetša re le boemong bofe bjo bo swanago le bja baapostola?
17 Ka ge re šetše re ahlaahlile taba ye, bagolo ba swanetše go dula ba gopola gore mohlape woo ba o dišago ga se wa bona, eupša ke wa Modimo. Ba ba šedi gore ba se “[buše] bao e lego bohwa bja Modimo.” (Bala 1 Petro 5:3.) Ka dinako tše dingwe, baapostola ba Jesu ba ile ba katanela go swanelega ka maikemišetšo a fošagetšego. Go swana le bao ba bego ba buša ditšhaba, ba be ba nyaka maemo a phagamego.—Bala Mareka 10:42-45.
18 Lehono, bana babo rena bao ba “[katanelago] go fihlelela bolebeledi” ba dira gabotse go hlahloba lebaka leo ba nyakago go fihlelela tokelo yeo. (1 Tim. 3:1) Go ka nyakega gore bao e lego bagolo gona bjale ba ipotšiše ka potego ge eba ba na le kganyogo ya go buša goba ya go nyaka botumo go swana le ge baapostola ba dirile bjalo. Ge eba baapostola ba be ba na le bothata tabeng ye, gona bagolo ba ka kwešiša gore ba swanetše go šoma ka thata go efoga mokgwa le ge e le ofe wa go thabela go buša ba bangwe.
19. Ke’ng seo bagolo ba swanetšego go se gopola ge ba gata mogato wa go šireletša mohlape?
19 Ke therešo gore ka dinako tše dingwe bagolo ba swanetše go tia, bjalo ka nakong ya ge ba swanetše go šireletša mohlape go “diphiri tše di gatelelago.” (Dit. 20:28-30) Paulo o ile a botša Tito gore a dule a “eletša e bile [a] kgalemela ka matla ka moka.” (Tito 2:15) Lega go le bjalo, gaešita le ge bagolo ba swanetše go dira bjalo, ba leka go nea bao ba akaretšwago seriti. Ba lemoga gore go e na le go sola motho ka bogale, gantši go kgothatša ka borutho ke kgato yeo e šomago kudu go fihlelela dipelo le go šušumeletša motho go latela tsela e nepagetšego.
20. Bagolo ba ka ekiša Jesu bjang ge ba bea mohlala o mobotse?
20 Mohlala o mobotse wa Kriste o tutueletša bagolo go rata mohlape. (Joh. 13:12-15) Dipelo tša rena di a thaba ge re bala kamoo a ilego a ruta barutiwa ba gagwe modiro wa boboledi le wa go dira barutiwa. Mohlala wa gagwe wa boikokobetšo o kgomile dipelo tša barutiwa ba gagwe, wa ba šušumeletša go latela tsela yeo e bontšhago gore ba ‘ikokobeditše e bile ba tšea gore ba bangwe ba ba feta ka bogolo.’ (Bafil. 2:3) Bagolo ka mo go swanago lehono ba šušumeletšega go latela mohlala wa Jesu, gomme ka lehlakoreng le lengwe ba nyaka go ba “mehlala go mohlape.”
21. Ke moputso ofe woo bagolo ba ka fagahlelago go o hwetša?
21 Petro o ile a phetha keletšo ya gagwe go banna ba bagolo ka go bolela ka kholofetšo yeo e bego e tla ba gona nakong e tlago. (Bala 1 Petro 5:4.) Balebeledi ba tloditšwego ba “tla amogela mphapahlogo wo o sa onalego wa letago” ba na le Jesu legodimong. Badiši ba lego ka tlase ga gagwe ba “dinku tše dingwe” ba tla ba le tokelo ya go diša mohlape wa Modimo mo lefaseng pušong ya gagwe, yena “modiši yo mogolo.” (Joh. 10:16) Sehlogo se se latelago se tla ahlaahla ditsela tšeo ditho tša phuthego di ka thekgago bao ba kgethilwego go etelela pele.
E le Poeletšo
• Ke ka baka la’ng go be go nyakega gore Petro a eletše bagologotee le yena gore ba diše mohlape wa Modimo woo ba o hlokometšego?
• Bagolo ba swanetše go diša bjang bao ba babjago moyeng?
• Ke’ng seo se tutueletšago bagolo go diša mohlape wa Modimo woo ba o hlokometšego?
[Dipotšišo tša Thuto]
[Seswantšho go letlakala 21]
Go swana le badiši ba mehleng ya bogologolo, bagolo lehono ba swanetše go šireletša “dinku” tšeo ba di hlokometšego