Na Bafsa ba Swanetše go Kolobetšwa?

CARLOS, * e lego tate wa Mokriste wa kua Philippines, o itše: “Ke thabišitšwe kudu ke gore ga bjale morwedi wa ka ke mohlanka wa Jehofa, gomme ke a tseba gore le yena o thabile.” Tate yo mongwe yo a tšwago Gerika o ngwadile gore: “Nna le mosadi wa ka re thabetše kudu gore bana ba rena ba bararo ba kolobeditšwe gore e be Dihlatse tša Jehofa nakong ya bona ya mahlalagadi. Ba dira tšwelopele ya moya gomme ba thabela go hlankela Jehofa.”

Batswadi ba Bakriste ba na le lebaka la go thaba kudu ge bana ba bona ba kolobetšwa, eupša ka dinako tše dingwe lethabo la bona le sepedišana le go tshwenyega. Mma yo mongwe o boletše gore: “Ke be ke thabile kudu e bile ke tshwenyegile kudu.” Ke ka baka la’ng mma yo a na le maikwelo a thulanago? O re: “Ke a kwešiša gore ga bjale morwa wa ka o be a ikarabelela ka mo go tletšego go Jehofa.”

Go hlankela Jehofa o le yo mongwe wa Dihlatse tša gagwe tšeo di kolobeditšwego ke pakane yeo mofsa yo mongwe le yo mongwe a swanetšego go ba le yona. Lega go le bjalo, batswadi bao ba boifago Modimo ba ka ipotšiša gore: ‘Ke a tseba gore ngwanaka o dirile tšwelopele e botse, eupša na o na le matla a lekanego go ka ganetša dikgateletšo tša boitshwaro bjo bo gobogilego le go dula a hlwekile pele ga Jehofa?’ Ba bangwe ba ka ipotšiša gore: ‘Ge ngwanaka a lebeletšane le teko ya go rata dilo tše di bonagalago, na o tla tšwela pele a hlankela Modimo ka lethabo le phišego?’ Ka baka leo, ke tlhahlo efe ya Beibele yeo e ka thušago batswadi go lemoga ge e ba bana ba bona ba loketše go kolobetšwa?

Kolobetšo ke Senyakwa sa Bohlokwa Kudu sa go ba Morutiwa wa Kriste

Go e na le go bea ngwaga wa go kolobetšwa, Lentšu la Modimo le hlalosa boemo bja moya bja bao ba swanelegelago go tšea kgato yeo. Jesu o laetše balatedi ba gagwe gore: “Le dire batho ba ditšhaba ka moka barutiwa, le ba [kolobetše].” (Mat. 28:19) Lega go le bjalo, kolobetšo ke ya bao e šetšego e le barutiwa ba Kriste.

Morutiwa ke’ng? Insight on the Scriptures e hlalosa gore: “Lentšu leo le šoma kudu go bohle bao ba sa dumelego feela dithuto tša Kriste eupša  gape ba di latelago kgauswi.” Na ruri bafsa ba na le bokgoni bja go ba barutiwa ba kgonthe ba Kriste? Kgaetšedi yo mongwe yo a hlanketšego e le moromiwa kua Latin Amerika ka nywaga e fetago e 40, o ngwala ka yena le dikgaetšedi tša gagwe tše pedi gore: “Re be re godile ka mo go lekanego go tseba gore re nyaka go hlankela Jehofa le go phela Paradeiseng. Go ineela ga rena go re thušitše go tia matla ge re be re lebeletšane le diteko tša bofsa. Ga re itshole le ka mohla ka go ineela ga rena go Modimo nywageng yeo ya bofsa.”

O ka tseba bjang ge e ba ngwana wa gago e šetše e le morutiwa wa Kriste? Beibele e re: “Mošemane o ipontšha ka ditiro tša gagwe ge e ba modiro wa gagwe o sekile e bile o lokile.” (Die. 20:11) Ela hloko e mengwe ya mekgwa yeo e utollago gore mofsa o dira gore “tšwelopele ya [gagwe] e bonagale” e le morutiwa.—1 Tim. 4:15.

Bohlatse bja Gore Ngwana wa Gago ke Morutiwa wa Kriste

Na ngwana wa gago o a go kwa? (Bakol. 3:20) Na o dira mediro yeo a e abetšwego ka gae? Beibele e bolela ka Jesu wa nywaga e 12 gore: “A tšwela pele a ikokobeleditše [batswadi ba gagwe].” (Luka 2:51) Ee, lehono ga go na ngwana yo a tlago go kwa batswadi ba gagwe ka mo go feletšego. Eupša Bakriste ba therešo ba swanetše gore ba “latele dikgato tša [Jesu] kgauswi.” Ka go re’alo, bafsa bao ba kgahlegelago go kolobetšwa ba swanetše go tsebja e le bao ba kwago batswadi ba bona.—1 Pet. 2:21.

Naganišiša ka dipotšišo tše di latelago: Na ngwana wa gago o ‘tšwela pele a tsoma Mmušo pele’ bodireding bja gagwe? (Mat. 6:33) Na o ikemišeditše go boledišana le ba bangwe ka ditaba tše dibotse, goba na wena o swanelwa ke go mo kgothaletša ka matla gore a ye tirelong ya tšhemo le go bolela ka ntlo le ntlo? Na o tšeela godimo boikarabelo bja gagwe e le mogoeledi yo a sa kolobetšwago? Na o na le kganyogo ya go boela go bao ba bontšhitšego kgahlego bao a kopanago le bona tšhemong? Na o tsebiša bao a tsenago le bona sekolo le barutiši ba gagwe gore yena ke Hlatse ya Jehofa?

Na go ba gona dibokeng tša phuthego ke selo sa bohlokwa go yena? (Ps. 122:1) Na o thabela go araba Thutong ya Morokami le Thutong ya Beibele ya Phuthego? Na o mafolofolo go tšeeng karolo Sekolong sa Bodiredi sa Pušo ya Modimo?—Baheb. 10:24, 25.

Na ngwana wa gago o katanela go dula a hlwekile boitshwarong ka go phema ditlwaelano tše gobatšago sekolong le lefelong le ge e le lefe? (Die. 13:20) O rata mmino wa mohuta mang, difilimi tša mohuta mang, mananeo a thelebišene a mohuta mang, dipapadi tša bidio tša mohuta mang le go etela mekero efe ya Inthanete? Na dipolelo le ditiro tša gagwe di utolla gore o nyaka go dumelelana le ditekanyetšo tša Beibele?

Ngwana wa gago o tseba Beibele go fihla kae? Na a ka hlalosa ka mantšu a gagwe seo a ithutago sona mantšiboeng a Borapedi bja Lapa? Na a ka hlalosa dithuto tša motheo tša Beibele? (Die. 2:6-9) Na o kgahlwa ke go bala Beibele le go ithuta dikgatišo tša sehlopa sa mohlanka yo a botegago le wa temogo? (Mat. 24:45) Na o botšiša dipotšišo ka dithuto gotee le ditemana tša Beibele?

 Dipotšišo tše bjalo di ka go thuša go bona tšwelopele ya moya ya ngwana wa gago. Ka morago ga go di hlahloba, o ka phetha ka gore ngwana wa gago o swanetše go kaonefatša dikarolong tše itšego pele a ka kolobetšwa. Lega go le bjalo, ge eba a bontšha gore ke morutiwa wa Kriste gomme a tloga a neetše bophelo bja gagwe go Modimo, gona o ka dira phetho ya go mo dumelela gore a kolobetšwe.

Bafsa ba ka Tumiša Jehofa

Bahlanka ba bantši ba Modimo ba bontšhitše potego nakong ya mahlalagadi goba pele ga moo. Nagana ka Josefa, Samuele, Josia le Jesu. (Gen. 37:2; 39:1-3; 1 Sam. 1:24-28; 2:18-20; 2 Dikor. 34:1-3; Luka 2:42-49) Barwedi ba bane ba Filipi, bao ba bego ba porofeta, ba swanetše go ba ba be ba tlwaeditšwe gabotse go tloga e sa le ba banyenyane.—Dit. 21:8, 9.

Hlatse e nngwe ya kua Gerika e boletše gore: “Ke kolobeditšwe ke na le nywaga e 12. Ga se ka ka ka itsholela phetho ya ka. Ga e sa le go tloga ka nako yeo, go fetile nywaga e 24, e 23 ya yona ke e feditše ke le tirelong ya nako e tletšego. Ka mehla go rata Jehofa go nthušitše go lebeletšana le mathata a bofsa. Ge ke be ke na le nywaga e 12, ke be ke se na tsebo ya Mangwalo yeo ke nago le yona ga bjale. Eupša ke be ke tseba gore ke rata Jehofa e bile ke nyaka go mo hlankela ka mo go sa felego. Ke tloga ke thabela gore o nthušitše go tšwela pele tirelong ya gagwe.”

Motho yo a tlogago a bontšha gore ke morutiwa wa Kriste o swanetše go kolobetšwa, go sa šetšwe gore ke yo mogolo goba yo monyenyane. Moapostola Paulo o ngwadile gore: “Motho o dumela ka pelo bakeng sa toko, eupša motho o bolela phatlalatša ka molomo bakeng sa phološo.” (Baroma 10:10) Ge morutiwa wa Kriste yo e sa lego mofsa a tšea kgato ya bohlokwa ya go kolobetšwa, bobedi yena le batswadi ba gagwe ba fihleletše selo sa bohlokwa kudu. O se dumelele selo le ge e le sefe se thibela wena le bana ba gago go hwetša lethabo le legolo leo le letšego ka pele.

[Mongwalo wa tlase]

[Lepokisi go letlakala 5]

Pono e Nepagetšego ka Kolobetšo

Batswadi ba bangwe ba tšea go kolobetšwa ga bana ba bona e le kgato yeo e holago eupša e le kotsi—go swana le go hwetša lengwalo la go otlela. Eupša na kolobetšo le tirelo e kgethwa di ka bea bokamoso bja motho kotsing? Karabo ya Beibele ke aowa. Diema 10:22 e re: “Tšhegofatšo ya Jehofa e a humiša, ga a e okeletše ka bohloko.” Paulo o ngwaletše Timotheo yo mofsa gore: “Ka kgonthe, boineelo go Modimo bo tliša leruo le legolo ge e ba re kgotsofaletše seo re nago le sona.”—1 Tim. 6:6.

Ke therešo gore go hlankela Jehofa ga go bonolo. Jeremia o lebeletšane le mathata a mantši modirong wa gagwe e le moporofeta wa Modimo. Lega go le bjalo, o ngwadile mabapi le borapedi bja gagwe go Modimo wa therešo gore: “Lentšu la gago le ntlišetša tlhalalo le lethabo pelong ya ka; gobane ke bitšwa ka leina la gago, wena Jehofa Modimo wa madira.” (Jer. 15:16) Jeremia o be a tseba gore tirelo ya Modimo e be e le mothopo wa lethabo. Lefase la Sathane ke mothopo wa mathata. Batswadi ba swanetše go thuša bana ba bona go lemoga phapano yeo.—Jer. 1:19.

 [Box/​Picture on page 6]

Na Ngwanaka o Swanetše go Emanyana ka go Kolobetšwa?

Ka dinako tše dingwe, gaešita le ge bana ba banyenyane ba swanelegela go ka kolobetšwa, batswadi ba bona ba ka phetha ka gore ba emenyana. Mabaka a bona e ka ba e le afe?

Ke boifa gore ge eba ngwanaka a ka kolobetšwa, ka morago a ka wela sebeng se segolo gomme a kgaolwa. Na go a kwagala go dumela gore mofsa yo a šuthišago nako ya go kolobetšwa a ka se ikarabele go Modimo ka boitshwaro bja gagwe? Solomone o ile a lebiša mantšu a latelago go bafsa: “Tseba gore Modimo wa therešo o tlo go ahlola ka baka la [ditiro tša gago].” (Mmo. 11:9) Paulo o be a sa hlaole batho ba nywaga e itšego ge a be a nea kgopotšo ye: “Yo mongwe le yo mongwe wa rena o tla ikarabela go Modimo.”—Baroma 14:12.

Barapedi ba Modimo bao ba kolobeditšwego le bao ba sego ba kolobetšwa ba ikarabela go yena. O se lebale gore Jehofa o šireletša bahlanka ba gagwe ka go ‘se ba lese ba lekwa go feta kamoo ba ka kgonago go kgotlelela ka gona.’ (1 Bakor. 10:13) Ge feela batho ba bjalo ba ‘dula ba hlaphogetšwe’ e bile ba lwantšhana le diteko, ba ka ithekga ka Modimo. (1 Pet. 5:6-9) Mma yo mongwe wa Mokriste o ngwala gore: “Bana bao ba kolobeditšwego ba na le mabaka a mantši a go phema dilo tše mpe tša lefase. Morwa wa ka yo a kolobeditšwego a na le nywaga e 15, o bona kolobetšo e le tšhireletšo. O mpoditše gore: ‘Ge o kolobeditšwe ga o nagane ka go dira selo seo se thulanago le molao wa Jehofa.’ Kolobetšo ke tutuetšo e matla ya gore motho a dire seo se lokilego.”

Ge e ba o tlwaeditše bana ba gago ka lentšu le ka ditiro gore ba kwe Jehofa, o ka kgodišega gore ba tla tšwela pele ba dira bjalo ka morago ga go kolobetšwa. Diema 20:7 e re: “Moloki o sepela ka potego. Go thaba barwa ba gagwe bao ba tlago ka morago ga gagwe.”

Nka thabela go bona ngwanaka a fihlelela dipakane tše itšego pele. Bafsa ba swanetše go ithuta go šoma e le gore ge nako e eya ba ka kgona go itlhokomela. Eupša go kotsi go ba kgothaletša go phegelela bophelo bja go nyaka go šireletšwa ke thuto le tšhelete go e na le borapedi bja therešo. Ge Jesu a bolela ka “peu,” goba lentšu la Mmušo, leo le sa golego, o itše: “Ge e le peu yeo e bjetšwego meetlweng, yona ke motho yo a kwago lentšu, eupša dipelaelo tša lefase le gotee le matla a forago a mahumo a bipa lentšu gomme a ba yo a sa enywego.” (Mat. 13:22) Ge e ba motswadi a kgothaletša ngwana wa gagwe go ipeela dipakane tša lefase, gomme ka baka leo a lebelela tswalano ya gagwe le Jehofa e se ya bohlokwa, seo se ka fokodiša kganyogo ya ngwana ya go hlankela Modimo.

Ge mogolo yo mongwe yo a nago le phihlelo a bolela ka bafsa bao ba swanelegelago go kolobetšwa eupša batswadi ba bona ba sa nyake, o itše: “Go thibela mofsa go kolobetšwa go ka dira gore a kgaotše go dira tšwelopele ya moya gomme gwa mo nyamiša.” Molebeledi yo mongwe wa mosepedi o ngwadile gore: “Mofsa a ka thoma go ikwa a fokola moyeng goba e se selo. A ka ya lefaseng e le gore a ikwe a kgotsofetše.”

[Seswantšho]

Na Yunibesithi e swanetše go tla pele?

[Seswantšho go letlakala 3]

Mofsa a ka bontšha gore ke morutiwa wa Kriste

[Diswantšho go letlakala 3]

Ka go lokišetša le go tšea karolo dibokeng

[Seswantšho go letlakala 4]

Ka go kwa batswadi

[Seswantšho go letlakala 4]

Ka go tšea karolo bodireding

[Seswantšho go letlakala 4]

Ka go rapela a nnoši