‘O ka Atlegiša Tsela ya Gago’—Bjang?

“KATLEGO”—le ke lentšu leo le kgahlago batho ba bantši! Ba bangwe ba fihleletše maemo a phagamego mešomong gomme ba atlega kudu ka go huma le ka go itirela maina. Ba bangwe ba duma go atlega eupša ba palelwa wa go šiiša.

Go fihla bokgoleng bjo bo itšego, go atlega go ithekgile ka seo o se nyakago bophelong. Dilo tše dingwe tše pedi tša bohlokwa ke ge eba o dira maiteko gotee le kamoo o dirišago nako le matla a gago.

Bakriste ba bantši ba lemogile gore go tšea karolo ka botlalo bodireding go ba kgotsofaditše kudu. Go ipeela pakane ya go tsenela tirelo ya nako e tletšego go thušitše ba bagolo le ba banyenyane gore ba atlege. Lega go le bjalo, ba bangwe ba ka bona eka bodiredi bo a tšwafiša ka tsela e itšego, ke moka ba thoma go se sa bo etiša pele maphelong a bona ba feleletša ba phegelela dipakane tše dingwe. Se se ka bakwa ke’ng? O ka dira’ng go phema go hlokomologa selo seo ruri se lego bohlokwa? Le gona o ka ‘atlegiša bjang tsela ya gago’?—Josh. 1:8.

Mediro ya ka Morago ga Sekolo le ya go Itloša Bodutu

Bafsa ba Bakriste ba swanetše go ba le pono e lekalekanego ka go hlankela Modimo wa therešo le go tšea karolo medirong e mengwe. Bao ba dirago bjalo ba tla atlega bophelong gomme ba swanetše go retwa.

Lega go le bjalo, bafsa ba bangwe ba Bakriste ba fetša nako e ntši dipapading le medirong e mengwe ya go itloša bodutu ka morago ga sekolo. Mediro e bjalo ka boyona ga e na bothata. Lega go le bjalo, bafsa ba Bakriste ba swanetše go ipotšiša gore: ‘Mediro e bjalo e ka nnyaka nako e kae? E tla dira gore ke tlwaelane le batho ba mohuta mang? Ge ke tšea karolo medirong e bjalo ke tla ba ke ipea boemong bja mohuta mang? Le gona, ke’ng seo ke tlago go se etiša pele bophelong bja ka?’ O ka lemoga gore motho a ka swarega kudu medirong e bjalo moo a šalelwago ke nako le matla a manyenyane a go boloka tswalano le Modimo. Ka gona, o ka bona lebaka leo go lego bohlokwa go etiša pele dilo tšeo di tlago pele bophelong.—Baef. 5:15-17.

Ela hloko mohlala wa Wiktor. * O re: “Ge ke be ke na le nywaga e 12, ke ile ka tsenela sehlopha sa go bapala volleyball. Ge nako e dutše e eya ke ile ka thopa difoka tše dintši. Ke be ke na le sebaka sa go ba naletšana.” Ge nako e dutše e feta, go phegelela ga Wiktor papading ye go ile gwa kgoma bomoya bja gagwe. Letšatši le lengwe o ile a robala ge a be a leka go bala Beibele. Le gona o ile a lemoga gore tšhemo ga e sa mo thabiša gakaalo. O re: “Papadi ye e be e nkamoga matla, e bile go se go ye kae ke ile ka lemoga gore e nkamoga mafolofolo ao ke bego ke na le ona dilong tša moya. Ke be ke tseba gore ga ke dire sohle seo ke bego ke swanetše go se dira.”

Thuto e Phagamego

Mokriste o na le boikarabelo bja Mangwalo bja go hlokomela lapa la gagwe gomme se se akaretša go hlokomela dinyakwa tša bona tša nama. (1 Tim. 5:8) Lega go le bjalo, na se se nyaka gore motho a hwetše mangwalo a kholetšheng goba a yunibesithing?

Ke gabohlokwa go ela hloko gore go phegelela thuto e phagamego go ka kgoma bjang tswalano ya motho le Jehofa. Anke re bontšheng se ka go hlahloba mohlala wa ka Mangwalong.

 Baruke e be e le mongwaledi wa moporofeta Jeremia. Nakong e nngwe, go e na le gore a ele hloko tokelo yeo a nago le yona ya go hlankela Jehofa, Baruke o ile a thoma go ba le megabaru. Jehofa o ile a lemoga se gomme a diriša Jeremia go mo eletša gore: “O duletše go itsomela dilo tše dikgolo. O se ke wa di tsoma.”—Jer. 45:5.

“Dilo tše dikgolo” tšeo Baruke a bego a di tsoma ke’ng? Mohlomongwe o be a lekega go itirela leina tshepedišong ya dilo ya Sejuda. Goba dilo tše dikgolo e ka ba e be e le mahumo a dilo tše di bonagalago. Go sa šetšwe gore e be e le eng, o ile a hlokomologa dilo tša bohlokwa kudu, e lego go ba le ditekanyetšo tša moya. (Bafil. 1:10) Eupša go molaleng gore Baruke o ile a kwa keletšo ya Jehofa yeo e tlilego ka Jeremia ke moka a phološa bophelo bja gagwe.—Jer. 43:6.

Re ka ithuta’ng pegong ye? Keletšo yeo Baruke a e hweditšego e bontšha gore go be go na le bothata. O be a itsomela dilo tše dikgolo. Ge eba o na le tsela ya go iphediša, na go tloga go nyakega gore o fetše nako, tšhelete le maiteko a gago o phegelela thuto e phagamego e le feela go kgotsofatša dinyakwa tša gago, tša batswadi ba gago goba ba bangwe ba leloko?

Ela hloko mohlala wa Grzegorz, e lego setsebi sa dikhomphutha. A tutuetšwa ke bašomigotee le yena, o ile a tsenela thuto e nngwe ya kokeletšo gore a hwetše tlwaetšo e kgethegilego. Go se go ye kae, o be a se na nako ya go phegelela dilo tša moya. O gopola gore: “Ka mehla ke be ke ikwa ke tshwenyegile. Letswalo la ka le be le ntlaiša ka ge ke be ke sa kgone go fihlelela dipakane tša moya tšeo ke ipeetšego tšona.”

Go Swarega ka Mošomo wa Boiphedišo

Lentšu la Modimo le kgothaletša Bakriste gore ba šome ka thata le go ba bašomi le bathwadi ba botegago. Moapostola Paulo o ngwadile gore: “Selo le ge e le sefe seo le se dirago, se direng ka moya ka moka bjalo ka ge eka le se direla Jehofa, e sego batho.” (Bakol. 3:22, 23) Lega go le bjalo, le ge e le mo gobotse go šoma ka thata, go na le selo se sengwe se se oketšegilego seo se nyakegago—tswalano e botse le Mmopi wa rena. (Mmo. 12:13) Ge e ba Mokriste a swarega kudu mošomong wa boiphedišo, go ba bonolo gore a hlokomologe dilo tša moya.

Go swarega kudu mošomong wa boiphedišo go ka amoga Mokriste matla a nyakegago a go boloka tekatekano ya gagwe ya moya le go thuša lapa la gagwe. Kgoši Solomone o lemogile gore “diatla tše pedi tše di tletšego boitapišo” gantši di sepedišana le “go kitimiša phefo.” Ge e ba Mokriste a swaregile kudu ka mošomo wa boiphedišo, a ka feleletša a na le kgateletšego e telele le e boima. Le gona motho yo bjalo a ka ba lekgoba la mošomo moo a ka feleletšago a felelwa ke matla. Ge eba go le bjalo, na ruri a ka  ‘thaba le go thabela tše botse tša boitapišo bja gagwe’? (Mmo. 3:12, 13; 4:6) Sa bohlokwa le go feta, na o tla ba le matla a lekanego le go ikwa a kgona go phetha mediro ya gagwe ka lapeng le go tšea karolo medirong ya moya?

Janusz, yo a dulago ka Bohlabela bja Yuropa, o ile a swarega kudu ka kgwebo ya gagwe ya go lema. O gopola gore: “Batho ba lefase ba be ba nthata ka ge ke be ke dula ke ikemišeditše e bile ke kgona go phetha mošomo o mongwe le o mongwe wo ke o neilwego. Eupša bomoya bja ka bo be bo fokola, e bile ke ile ka kgaotša go tšea karolo tšhemong. Kapejana ke ile ka kgaotša go ba gona dibokeng. Ke be ke ikgantšha kudu moo ke bego ke tšeela fase keletšo ya bagolo gomme ke ile ka ikaroganya le phuthego.”

O ka Atlega Bophelong

Re hlahlobile dikarolo tše tharo tšeo Mokriste a ka swaregago kudu ka tšona a  hlokomologa bomoya bja gagwe. Na o swaregile ka e nngwe ya tše? Ge e ba go le bjalo, dipotšišo, mangwalo le dintlha tše di latelago di ka go thuša go lemoga ge e ba ruri o tla atlega.

Mediro ya ka morago ga sekolo le ya go itloša bodutu: O swaregile gakaaka’ng ka mediro e bjalo? Na dilo tše di tšea nako yeo peleng o bego o e fetša o phegelela dilo tša moya? Na o thoma go tšwafišwa ke go gwerana le badumedigotee le wena? Ge eba go le bjalo, go ka ba kaone gore o ekiše Kgoši Dafida, yo a kgopetšego Jehofa gore: “Ntsebiše tsela yeo ke swanetšego go sepela ka yona.”—Ps. 143:8.

Molebeledi wa mosepedi o ile a thuša Wiktor, yoo go boletšwego ka yena pejana. Molebeledi yo o ile a mo reta ka gore: “O bolela o tiišitše ka ganong ge o bolela ka volleyball.” Wiktor o re: “Seo se ile sa mphafoša. Ke ile ka lemoga gore bjale gona ke feteletše. Go se go ye kae, ke ile ka kgaotša go gwerana le batho ba lefase sehlopheng sa rena ke moka ka tsoma bagwera ka phuthegong.” Lehono, Wiktor o hlankela Jehofa ka mafolofolo ka phuthegong ya gabo. O eletša ka gore: “Botšiša bagwera ba gago, batswadi ba gago goba bagolo ka phuthegong ge e ba ba bona eka mediro ya gago ya sekolo e go batametša kgauswi le Jehofa goba e go tloša kgauswi le yena.”

Go re’ng o sa botše bagolo ka phuthegong ya geno gore o nyaka go fihlelela ditokelo tše di oketšegilego tša go hlankela Modimo? Na o ka thuša batšofadi bao ba lewago ke bodutu goba bao ba nyakago thušo, mohlomongwe ka go ba yela mabenkeleng goba go ba thuša ka mešomo ya ka gae? Go sa šetšwe nywaga ya gago, o ka kgona go tšea karolo bodireding bja nako e tletšego, wa abelana le ba bangwe seo se go thabišago.

Thuto e phagamego: Jesu o eleditše mabapi le go “inyakela letago.” (Joh 7:18) Go sa šetšwe gore o phetha ka go hwetša thuto e kae e phagamego, na o ‘kgonthišeditše dilo tše bohlokwa kudu’?—Bafil. 1:9, 10.

Grzegorz, e lego setsebi sa dikhomphutha, o ile a dira diphetogo bophelong bja gagwe. O itše: “Ke ile ka tšeela godimo keletšo ya bagolo gomme ka nolofatša bophelo bja ka. Ke ile ka lemoga gore ga go nyakege gore ke oketše thuto ya ka. Seo se be se tla fo ntshenyetša nako le matla.” Grzegorz o ile a swarega kudu ka mediro ya phuthego. Go se go ye kae, o ile a aloga go seo ga bjale se bitšwago Sekolo sa Beibele sa Bana Babo Rena ba Sego Lenyalong. Ee, o ile a ‘ithekela nako’ ya go oketša thuto ya gagwe ka Modimo.—Baef. 5:16.

Mošomo wa boiphedišo: Na o swaregile kudu ka mošomo wa gago moo o beelago ka thoko dikgahlego tša Mmušo? Na o ipha nako e lekanego ya go boledišana le lapa la gago? Na o kaonefatša mekgwa ya gago ya go nea dipolelo ka phuthegong? Go thwe’ng ka go ba le dipoledišano tše di agago le ba bangwe? “Boifa Modimo wa therešo gomme o lote ditaelo tša gagwe,” ke moka o tla thabela ditšhegofatšo tša Jehofa gomme wa ‘bona botse ka baka la boitapišo bja gago.’—Mmo. 2:24; 12:13.

Janusz, yo go boletšwego ka yena pejana, o ile a se atlege gakaalo kgwebong ya gagwe ya go lema; go e na le moo, o ile a palelwa. Ka ge a be a sa hwetše selo e bile a nweletše dikolotong, o ile a retologela go Jehofa. Janusz o ile a lokiša maemo a gagwe a ditšhelete gomme ga bjale o hlankela e le mmulamadibogo le mogolo ka phuthegong. O re: “Ge ke kgotsofatšwa ke dilo tša motheo e bile ka nako e swanago ke ikgafa dilong tša moya, ke ba le khutšo ya monagano le go ikwa ke imologile.”—Bafil. 4:6, 7.

Iphe nako gomme o hlahlobe ka potego maikemišetšo a gago le dilo tšeo o di etišago pele. Go hlankela Jehofa ke tsela ya go atlega ka mo go sa felego. Dira gore se e be selo seo o se etišago pele bophelong bja gago.

Go ka nyakega gore o dire diphetogo tše itšego, go akaretša le go tlogela dilo tšeo di se nago mohola e le gore o itlhatselele “thato e botse le e amogelegago le e phethegilego ya Modimo.” (Baroma 12:2) Lega go le bjalo o ka kgona go ‘atlegiša tsela ya gago’ ka go mo hlankela ka moya wa gago ka moka.

[Mongwalo wa tlase]

[Box/​Picture on page 31]

O ka Dira Bjang Gore Tsela ya Gago e Atlege?

Ka ge go na le dilo tše dintši tšeo o swanetšego go di šetša, o ka efoga bjang go lahlegelwa ke pono ya seo se tlogago se le bohlokwa? Iphe nako ya go hlahloba maikemišetšo a gago le dipakane tša gago ka go naganišiša ka dipotšišo tše di latelago:

DIPAPADI TŠA KA MORAGO GA SEKOLO LE DILO TŠA GO ITLOŠA BODUTU

▪ Ke ba le batho ba nago le boemo bofe bja kgopolo ge ke tšea karolo dilong tše bjalo?

▪ Di nyaka nako e kae?

▪ Na di ka ba dilo tšeo o di šetšago kudu bophelong bja gago?

▪ Na di tšea nako yeo pele o bego o e dirišetša go phegelela dilo tša moya?

▪ Go thwe’ng ka batho bao o tlago go kopana le bona moo?

▪ Na o bona batho bao e le bona ba kgahlišago go feta badumedigotee le wena?

THUTO E PHAGAMEGO

▪ Ge eba o kgona go itlhokomela, na o tloga o nyaka go fetša nako ya gago, tšhelete ya gago le matla a gago o tšwetša dithuto tša gago pele?

▪ E le gore o itlhokomele, na go tloga go nyakega gore o be le lengwalo la kholetšhe goba degree ya yunibesithi?

▪ Di tla kgoma bjang go ba ga gago dibokeng?

▪ Na o ‘kgonthišitše dilo tše bohlokwa kudu’?

▪ Na o swanetše go matlafatša kgodišego ya gago tabeng ya gore Jehofa a ka kgona go go hlokomela?

MOŠOMO

▪ Na mošomo woo o o kgethago o go dumelela gore o ‘thabele tše botse tša boitapišo bja gago ka moka’?

▪ Na o na le matla a lekanego mmeleng le moyeng gore o phethagatše mediro ya gago ya ka lapeng le go tšea karolo dilong tša moya?

▪ Na o diriša nako e lekanego o boledišana le ba lapa?

▪ Na o swaregile kudu ka mošomo moo e lego gore dilo tša moya di beelwa ka thoko?

▪ Na mošomo wa gago o fetotše tsela e botse yeo o bego o nea dipolelo dibokeng ka yona?

[Seswantšho go letlakala 30]

Jehofa o ile a lemoša Baruke ka megabaru