Na o Tsene Boikhutšong bja Modimo?

“Lentšu la Modimo le a phela e bile ke le matla.”—BAHEB. 4:12.

1. Tsela e nngwe yeo re ka tsenago boikhutšong bja Modimo lehono ke efe, eupša ke ka baka la’ng seo se ka ba bonolo go bolelwa go ena le go dirwa?

SEHLOGONG se se fetilego, re bone gore re ka tsena boikhutšong bja Modimo ka go šoma ka go dumelelana le merero ya gagwe. Go ka ba bonolo go bolela seo go ena le go se dira. Ka mohlala, ge re ithuta gore Jehofa ga a dumelelane le selo seo re se ratago, selo sa pele seo re ka se dirago e ka ba go rabela. Seo se bontšha gore re swanetše go bontšha tšwelopele tabeng ya go ‘ikemišetša go kwa.’ (Jak. 3:17) Sehlogong se, re tla hlahloba maemo a sego kae moo go ikemišetša ga rena go ba karolo ya merero ya Modimo—go kwa go tšwa pelong—go ka lekwago ka gona.

2, 3. Ke maiteko afe ao re swanetšego go tšwela pele re a dira e le gore re dule re kgahliša mahlong a Jehofa?

² O šoma bjang tabeng ya go amogela keletšo yeo e theilwego Beibeleng? Mangwalo a re botša gore thato ya Modimo ke gore a kgoboketše go yena “matsaka a ditšhaba ka moka.” (Hag. 2:7) Go ba gona, bontši bja rena re be re le kgole le go ba dilo tše di kgahlišago ge re be re ithuta therešo la mathomo. Lega go le bjalo, go rata Modimo le Morwa wa gagwe yo a ratwago go re gapeleditše go dira diphetogo tše di swanetšego  tseleng yeo re bego re bona dilo ka yona le mekgweng ya rena e le gore re kgahle Modimo. Mafelelong, ka morago ga go rapela gantši le go katana kudu, letšatši le le thabišago le ile la fihla ge re be re kolobetšwa gomme re e ba Bakriste.—Bala Bakolose 1:9, 10.

³ Lega go le bjalo, ntwa ya go lwantšha go se phethagale ga se ya fela ge re kolobetšwa. Ntwa e ile ya tšwela pele e bile e tla tšwela pele ge feela re sa dutše re se ra phethagala. Lega go le bjalo, re kgonthišeditšwe gore ge re tšwela pele re elwa gomme re ikemišeditše go ba ba kgahlišago kudu mahlong a Modimo, Jehofa o tla šegofatša maiteko a rena.

Ge Keletšo e Nyakega

4. Re ka amogela keletšo ya Mangwalo ka ditsela dife tše tharo?

⁴ Pele ga ge re ka lokiša mafokodi a rena, re swanetše go tseba gore ke afe. Polelo e hlahlobago dipelo Holong ya Mmušo goba sehlogo seo se šišinyago kgopolo ka go e nngwe ya dikgatišo tša rena se ka pepentšha mafokodi a rena a magolo. Ka lehlakoreng le lengwe, ge e ba re lahlegelwa ke ntlha yeo e tšweletšwago polelong yeo goba re palelwa ke go diriša keletšo yeo e ngwadilwego, Jehofa a ka diriša Mokristegotee le rena go re bontšha mafokodi a rena.—Bala Bagalatia 6:1.

5. Bolela ditsela tše dingwe tšeo re ka arabelago keletšong yeo re e newago, gomme hlalosa lebaka leo badiši ba Bakriste ba swanetšego go phegelela maitekong a bona a go re thuša.

⁵ Ga go bonolo go amogela keletšo e tšwago go motho yo a sa phethagalago, go sa šetšwe gore keletšo yeo e newa ka tsela e bohlale goba e lerato. Lega go le bjalo, ka ge Bagalatia 6:1 e bontšha, Jehofa o laela bao ba nago le ditshwanelego tša moya gore ba ‘leke’ go re lokiša, ba dire bjalo “ka moya wa boleta.” Ge e ba re arabela gabotse, re tla ba ba kgahlišago kudu mahlong a Modimo. Se se makatšago ke gore ge re rapela, re dumela phatlalatša gore ga se ra phethagala. Lega go le bjalo, ge motho yo mongwe a re bontšha bofokodi bja rena bjo itšego, tshekamelo ya rena e ka ba go leka go itokafatša, go nyenyefatša bothata, go belaela maikemišetšo a moeletši goba go gana tsela yeo keletšo e newago ka yona. (2 Dikg. 5:11) Ge e ba keletšo e le mabapi le selo seo go sego bonolo go bolela ka sona—ditiro tša setho sa lapa, mokgwa wa rena wa go apara le go itokiša, bohlweki bja rena, goba mokgwa wa go ithabiša woo re o ratago eupša e le woo Jehofa a o hloilego—re ka arabela ka tsela e sa kgahlišego, mohlomongwe ra ba ra makatšwa ke karabelo yeo ya rena ra ba ra nyamiša moeletši! Eupša ka morago ga ge re theotše maswafo, gantši re dumela gore keletšo e be e swanetše.

6. Lentšu la Modimo le utolla bjang “dikgopolo le maikemišetšo a pelo”?

⁶ Temana ya sehlogo se e re gopotša gore lentšu la Modimo “ke le matla.” Ee, lentšu la Modimo le na le matla a go fetoša maphelo. Le kgona go re thuša go fetoša maphelo a rena ka morago ga ge re kolobeditšwe go swana le ge le be le re thuša pele re kolobetšwa. Lengwalong la gagwe leo le yago go Baheberu, Paulo o ile a ngwala le gore lentšu la Modimo “le phuleletša gaešita le go arola moya le seo motho a lego sona ka gare le malokololo le moko, e bile le kgona go lemoga dikgopolo le maikemišetšo a pelo.” (Baheb. 4:12) Ka mantšu a mangwe, ge re kwešiša morero wa Modimo gabotse, tsela yeo re arabelago keletšong ya lona e utolla seo re lego sona ka garegare ga rena. Na go na le phapano magareng ga seo re bonagalago re le sona (moya [“soul”]) le seo re lego sona (moya [“spirit”])? (Bala Mateo 23:27, 28.) Bona kamoo o ka arabelago ka gona maemong a latelago.

Sepedišana le Mokgatlo wa Jehofa

7, 8. (a) Ke’ng seo se ka bago se tutueleditše Bajuda ba bangwe ba Bakriste go kgomarela mekgwa e itšego ya Molao wa Moshe? (b) Maiteko a bona a ile a thulana bjang le morero wa Jehofa woo o bego o tšwela pele o utologa?

⁷ Ba bantši ba rena ba ka tsopola Diema 4:18 ka hlogo. Lengwalo leo le re: “Tsela ya baloki e bjalo ka seetša se se phadimago ganyenyane-ganyenyane go fihlela e eba mosegare o mogolo.” Seo se ra gore boitshwaro bja rena le go kwešiša ga rena morero wa Modimo go tla kaonefala ge nako e dutše e feta.

 ⁸ Ka ge re ahlaahlile sehlogong se se fetilego, ka morago ga lehu la Jesu Bajuda ba bantši ba Bakriste ba ile ba thatafalelwa ke go tlogela Molao wa Moshe. (Dit. 21:20) Le ge Paulo a ile a diriša bokgoni go bolelela taba ya gore Bakriste ga ba sa le ka tlase ga Molao, ba bangwe ba ile ba gana mabaka a gagwe a buduletšwego. (Bakol. 2:13-15) Mohlomongwe ba ile ba nagana gore ge ba ka tšwela pele ba latela dikarolo tše itšego tša Molao, ba tla efoga go tlaišwa. Go sa šetšwe gore maemo e be e le afe, Paulo o ile a ngwalela Bakriste ba Baheberu gomme a ba botša ka go lebanya gore ba ka se tsene boikhutšong bja Modimo ge feela ba tšwela pele ba gana go šoma ka go dumelelana le morero wa Gagwe woo o bego o utologa ganyenyane-ganyenyane. * (Baheb. 4:1, 2, 6; bala Baheberu 4:11) E le gore ba amogelwe ke Jehofa, ba be ba swanetše go dumela gore o be a lebiša batho ba gagwe thokong e nngwe.

9. Re swanetše go ba le pono efe ge go dirwa diphetogo kwešišong ya rena ditabeng tša Mangwalo?

⁹ Mehleng ya lehono, go bile le dikaonefatšo kwešišong ya dithuto tše itšego tša Beibele. Se ga se sa swanela go re tshwenya; se swanetše go matlafatša go bota ga rena sehlopha sa mohlanka yo a botegago le wa temogo. Ge baemedi ba “mohlanka” ba lemoga gore pono ya rena ntlheng e itšego ya therešo e nyaka go hlaloswa ka botlalo goba go lokišwa, ga ba dikadike go dira diphetogo. Sehlopha sa mohlanka se tshwenyegile kudu ka go dirišana le morero wa Modimo woo o utologago ganyenyane-ganyenyane go ena le gore se itšhireletše gore se se ke sa solwa ge se dira phetogo kwešišong e itšego. Wena o arabela bjang ge go dirwa phetogo kwešišong ya rena ya Mangwalo?—Bala Luka 5:39.

10, 11. Ke thuto efe yeo re ka ithutago yona tseleng yeo ba bangwe ba ilego ba arabela ka yona ge mekgwa e mefsa ya go bolelwa ga ditaba tše dibotse e be e thoma go dirišwa?

¹⁰ A re eleng hloko mohlala o mongwe. Mafelelong a lekgolo la bo-19 la nywaga le mathomong a lekgolo la bo-20 la nywaga, Barutwana ba bangwe ba Beibele bao e bego e le diboledi tše dibotse tša phatlalatša ba ile ba bona go le kaone gore ba phethe boikarabelo bja go dira boboledi ka go beela batheetši ba ba kgahlegago dipolelo tšeo di lokišeditšwego gabotse. Ba be ba thabela go nea dipolelo phatlalatša, gomme ba bangwe ba bona ba be ba kgahlwa ke go retwa ke batheetši ba bona. Lega go le bjalo, ka morago go ile gwa bonagala gabotse gore Jehofa o be a nyaka gore batho ba gagwe ba tsene fase ka mekgwa e fapafapanego ya go dira boboledi, go akaretša le modiro wa go bolela ka ntlo le ntlo. Tše dingwe tša diboledi tša phatlalatša tšeo di nago le bokgoni di ile tša gana nnang go leka selo le ge e le sefe se sefsa. Ka ntle ba be ba bonala e le batho ba moya, ba ineetšego ka mo go feletšego go Morena. Lega go le bjalo, ge ba be ba lebane le bohlatse bjo bo kwagalago ka morero wa Modimo mabapi le modiro wa boboledi, dikgopolo tša bona tša kgonthe, maikemišetšo a bona le merero ya bona di ile tša bonagala gabotse. Jehofa o ile a ikwa bjang ka bona? Ga se a ka a ba šegofatša. Ba ile ba tlogela mokgatlo.—Mat. 10:1-6; Dit. 5:42; 20:20.

¹¹ Se ga se bolele gore go ile gwa ba bonolo go bohle bao ba ilego ba botegela mokgatlo go dira modiro wa boboledi phatlalatša. Ba bantši ba ile ba hwetša mošomo wa bona o le thata, kudukudu mathomong. Eupša ba ile ba kwa. Ge nako e dutše e feta, ba ile ba fenya dipelaelo tša bona, gomme Jehofa o ile a ba šegofatša kudu. Na wena o arabela bjang ge o laletšwa go tšea karolo modirong o itšego wa boboledi woo o sego wa o tlwaela? Na o ikemišeditše go leka mokgwa o mofsa?

Ge Motho yo re mo Ratago a Tlogela Jehofa

12, 13. (a) Morero wa Jehofa ke ofe ka go dumelela bafoši ba sa itsholego gore ba kgaolwe? (b) Ke teko efe yeo batswadi ba bangwe ba Bakriste ba lebeletšanego le yona, gona ke’ng seo se dirago gore teko yeo e thatafe?

¹² Ga go pelaelo gore ka moka ga rena re dumelelana le molao wa motheo wa gore re swanetše go hlweka mmeleng, boitshwarong le moyeng  e le gore re kgahle Modimo. (Bala Tito 2:14.) Lega go le bjalo, go ka ba le maemo ao potego ya rena mabapi le morero wa Modimo e lekwago o šoro. Ka mohlala, a re re morwa a nnoši wa banyalani ba Bakriste bao ba beago mohlala o tlogela therešo. Ka go kgetha ga gagwe “go thabela boipshino bja nakwana bja sebe” go e na le go ba le tswalano e botse le Jehofa le batswadi ba gagwe ba ratago Modimo, mofsa yoo o a kgaolwa.—Baheb. 11:25.

¹³ Batswadi bao ba ba tlalelong! Go ba gona, tabeng ya go kgaolwa ga motho ba tseba seo se bolelwago ke Beibele, ge e re: “Le lese go gwerana le motho yo a bitšwago ngwanabo rena yo e lego seotswa goba motho wa megabaru goba morapedi wa medimo ya diswantšho goba wa maroga goba letagwa goba mohlakodi, le go ja le se ke la ja le motho yo bjalo.” (1 Bakor. 5:11, 13) Le gona ba lemoga gore lentšu “motho” mo temaneng ye le akaretša ditho tša lapa tšeo di sa dulego le bona. Eupša ba rata morwa wa bona kudu! Maikwelo a tseneletšego a ka dira gore ba bee mabaka ka gore: ‘Re tla thuša ngwana rena bjang go boela go Jehofa ge e ba re fokotša kudu tswalano ya rena le yena? Na re ka se mo thuše gakaone ge re ka mmona kgafetšakgafetša?’ *

14, 15. Ke phetho efe ya kgonthe yeo batswadi ba ngwana yo a kgaotšwego ba swanetšego go e dira?

¹⁴ Re kwa bohloko le batswadi ba bjalo. Eupša morwa wa bona o bile le kgetho gomme o kgethile go tšwela pele ka bophelo bja gagwe bjo e sego bja Bokriste go e na le go tšwela pele a thabela tswalano ya kgaufsi le batswadi ba gagwe le badumedigotee le yena. Batswadi ka lehlakoreng le lengwe ga ba na seo ba ka se dirago tabeng ye. Ke ka baka leo ba ikwago ba feletšwe ke matla!

¹⁵ Eupša batswadi bao ba rategago ba ka dira’ng? Na ba tla kwa taelo ya Jehofa e kwagalago? Goba na ba tla phetha ka gore ba tla bonana kgafetšakgafetša le morwa wa bona yo a kgaotšwego gomme ba bitša seo gore ke “nako ya go phetha ditaba tše bohlokwa tša lapa”? Ge ba dira phetho ya bona, ba swanetše go nagana le kamoo Jehofa a ikwago ka gona ka seo ba se dirago. Morero wa gagwe ke go boloka mokgatlo o hlwekile, gomme ge e ba go kgonega, le go dira gore bafoši ba hlaphogelwe. Batswadi ba Bakriste ba ka thekga bjang morero woo?

16, 17. Ge re naganišiša ka mohlala wa Arone re ka ithuta’ng?

¹⁶ Ngwanabo Moshe, e lego Arone, o ile a lebeletšana le boemo bjo thata ka barwa ba gagwe ba babedi. Nagana kamoo a ka bego a ile a ikwa ka gona ge barwa ba gagwe e lego Nadaba le Abihu ba be ba neela Jehofa mollo o sa swanelago gomme A ba otla ka lehu. Therešo ke gore seo se ile sa fediša tswalano lege e le efe yeo banna bao ba bego ba na le yona le batswadi ba bona. Eupša go sa na le se sengwe gape. Jehofa o ile a laela Arone le barwa ba gagwe ba botegago gore: “Le se ke la tlogela dihlogo tša lena di le mahlafarara, le gona le se ke la gagola diaparo tša lena [le ba llela] e le gore le se ke la hwa le gore [Jehofa] a se ke a galefela setšhaba ka moka.” (Lef. 10: 1-6) Molaetša o kwagala gabotse tabeng ye. Lerato leo re ratago Jehofa ka lona le swanetše go feta leo re ratago ditho tša malapa a rena tšeo di sa botegego.

¹⁷ Lehono, Jehofa ga a fediše le semeetseng batho bao ba tshelago melao ya gagwe. Ka lerato o ba nea nako ya gore ba itshole medirong ya bona e sa lokago. Lega go le bjalo, Jehofa o be a tla ikwa bjang ge e ba batswadi ba mofoši yo a sa itsholego ba be ba tšwela pele ba Mo leka ka go kopana go sa nyakege le morwa goba morwedi wa bona yo a kgaotšwego?

18, 19. Ke tšhegofatšo efe yeo e ka tlelago ditho tša lapa tšeo di latelago ditaelo tša Jehofa ka batho bao ba kgaotšwego?

¹⁸ Batho ba bantši bao ba ilego ba kgaolwa ga bjale ba hlalosa gore go ema ka go tia ga bagwera ba bona le ditho tša lapa go ba thušitše go hlaphogelwa. Ge bagolo ba bangwe ba be ba dumelelana le kgopelo ya go bušetšwa ya kgaetšedi yo mongwe wa mofsa, ba ngwadile gore o itše o hlwekišitše bophelo bja gagwe “ka gobane le lengwe la mabaka ke gore kgaetšedi ya gagwe ya nama e be e hlompha thulaganyo ya go kgaola.” Kgaetšedi yoo o itše “go kgomarela ga ngwanabo tlhahlong ya Mangwalo go mo thušitše gore a nyake go bušetšwa.”

¹⁹ Ke thuto efe yeo re e hwetšago mo? Re ithuta gore re swanetše go lwantšha tshekamelo ya dipelo tša rena tšeo di sego tša phethagala ya go rabela keletšong ya Mangwalo. Re swanetše go kgodišega ka mo go feletšego gore tsela ya Modimo ya go lokiša mathata a rena e dula e le e kaonekaone.

“Lentšu la Modimo le a Phela”

20. Baheberu 4:12 e ka dirišwa bjang ka ditsela tše pedi? (Bona mongwalo wa ka tlase.)

²⁰ Ge Paulo a be a ngwala gore “lentšu la Modimo le a phela,” o be a sa bolele ka go lebanya ka Lentšu la Modimo leo le ngwadilwego, Beibele. * Taba e dikologilego e bontšha gore o be a bolela ka lentšu la Modimo la kholofetšo. Ntlha ya Paulo e be e le gore Modimo ga a dire kholofetšo gomme a e lebala. Jehofa o ile a gatelela se ka moporofeta Jesaya, ge a be a re: “Lentšu la ka . . . le ka se boele go nna le le feela, eupša le tla . . . atlega ka seo ke le rometšego sona.” (Jes. 55:11) Ka baka leo, ga go nyakege gore re fele pelo ge dilo di sa tšwele pele ka lebelo go ya ka moo re bego re ka rata. Jehofa ‘o tšwela pele a šoma’ e le gore morero wa gagwe o fihle mafelelong.—Joh. 5:17.

21. Baheberu 4:12 e ka ba kgothatšo bjang go batšofadi ba ba botegago ba “lešaba le legolo”?

²¹ Batšofadi ba ba botegago ba “lešaba le legolo” ba hlanketše Jehofa ka nywaga e mentši. (Kut. 7:9) Ba bantši ba be ba sa letela go tšofalela tshepedišong ye ya dilo. Lega go le bjalo, ga se ba ka ba nyama. (Ps. 92:14) Ba a lemoga gore kholofetšo ya lentšu la Modimo ga se ya hwa—e a phela, gomme Jehofa o šomela go e phethagatša. Ka ge morero wa Modimo o le bohlokwa go yena, re a mo thabiša ge re o boloka o le wa bohlokwa menaganong ya rena. Nakong ya letšatši le la bošupa, Jehofa o be a le boikhutšong, a kgodišegile gore morero wa gagwe o tla phethagala le gore batho ba gagwe e le sehlopha ba tla o thekga. Go thwe’ng ka wena? Na o tsene boikhutšong bja Modimo?

[Mengwalo ya tlase]

O se ke wa Lahlegelwa ke Morero

• Ke’ng seo se nyakegago e le gore re tsene boikhutšong bja Modimo lehono?

• Go na le tswalano efe magareng ga morero wa Modimo le go ikemišetša ga rena go amogela keletšo ya Mangwalo?

• Ke maemong afe moo go latela tlhahlo ya Mangwalo go ka bago thata, eupša ke ka baka la’ng go le bohlokwa go e latela?

• Baheberu 4:12 e ka dirišwa bjang ka ditsela tše pedi?

[Dipotšišo tša Thuto]

[Seswantšho go letlakala 31]

Batswadi ba tlalelong!