Tsheko ya Nako e Telele e Feleletša ka Phenyo!

E THOMILE ka 1995 gomme ya tšea lebaka la nywaga e 15. Lebakeng leo ka moka, Bakriste ba therešo kua Russia ba be ba hlasetšwe ke baganetši ba tokologo ya bodumedi. Baganetši ba ba be ba ikemišeditše gore Dihlatse tša Jehofa di se dumelelwe ka molao kua Moscow le metseng e mengwe. Lega go le bjalo, Jehofa o bone go swanela gore a šegofatše potego ya bana babo rena le dikgaetšedi ba ba rategago ba Russia ka gore ba fenye tshekong yeo. Lega go le bjalo, ke’ng seo se dirilego gore ntwa ye e thome?

TOKOLOGO—MAFELELONG!

Nywageng ya mathomo ya bo-1990, bana babo rena ba kua Russia ba ile ba newa gape tokologo ya bodumedi yeo ba e amogilwego ka 1917. Ka 1991 ba ile ba ngwadišwa ke mmušo wa Soviet Union e le bodumedi bja molao. Ka morago ga ge dinaga tša Soviet Union di kgaogane, Dihlatse tša Jehofa di ile tša ngwadišwa go Russian Federation. Go feta moo, Dihlatse tšeo di ilego tša tlaišetšwa bodumedi nywagasome pejana di ile tša lemogwa ke mmušo e le bahlaselwa ba kgatelelo ya dipolitiki. Ka 1993, Lefapha la Toka la Moscow le ile la ngwadiša Moscow Community of Jehovah’s Witnesses, e lego leina la molao leo re tsebjago ka lona moo. Wona ngwageng woo, molaotheo o mofsa wa Russia, woo o šireletšago tokologo ya bodumedi, le wona o ile wa thoma go dirišwa. Ga go makatše ge ngwanabo rena yo mongwe a ile a bolela gore: “Ga se ra ka ra lora gore re tla bona tokologo e swanago le ye!” Ke moka o ile a tšwela pele ka gore: “Re feditše nywaga e 50 re letetše se!”

Bana babo rena le dikgaetšedi ba Russia ba ile ba diriša gabotse “dinako [tšeo] tše di loketšego” ka go oketša kapejana modiro wa bona wa boboledi, gomme batho ba bantši ba ile ba arabela gabotse. (2 Tim. 4:2) Motho yo a bego a šeditše o boletše gore: “Batho bao ba be ba rata bodumedi kudu.” Ka nako e kopana palo ya bagoeledi, ya babulamadibogo le ya diphuthego e ile ya gola ka lebelo. Ge e le gabotse, go tloga ka 1990 go fihla ka 1995, palo ya Dihlatse kua Moscow e ile ya gola go tloga go 300 go ya go ya ka godimo ga 5 000! Ge palo ya bahlanka ba bafsa ba Jehofa kua Moscow e oketšega, baganetši ba ile ba thoma go tšhoga. Bogareng bja bo-1990, ba ile ba hlasela ka go thoma ntwa ya molao. Ntwa yeo e be e tla feta megatong e mene pele e ka rarollwa.

DINYAKIŠIŠO TŠA BOSENYI DI FELELETŠA KA TSELA E NNGWE

Mogato wa pele wa ntwa ye o thomile ka June 1995. Sehlopha seo se lego Moscow seo se tswalanego kgauswi le Kereke ya Russia ya Orthodox se ile sa bula molato wa go latofatša bana babo rena wa gore ba dira ditiro tša bosenyi. Sehlopha se se ile sa bolela gore se emela ditho tša malapa ao a bego a sa rate gore balekane ba ona goba bana ba ona ba be Dihlatse. Ka June 1996, banyakišiši ba ile ba thoma go dira dinyakišišo tša go nyaka go bona ge e ba go dirilwe bobe, eupša ba ile ba se hwetše selo. Lega go le bjalo, sona sehlopha seo se ile sa bula molato o mongwe—se latofatša gape bana babo rena ka ditiro tša bosenyi. Banyakišiši ba ile ba dira dinyakišišo tše dingwe, eupša ditatofatšo tšeo ka moka di hlokile bohlatse. Lega go le bjalo, baganetši ba ile ba bula molato la boraro, ka ditatofatšo tšona tšeo. Le lebakeng le, Dihlatse tša Jehofa tša Moscow di ile tša nyakišišwa, eupša motšhotšhisi o ile a fihlelela phetho e swanago le ya pele—go be go se na lebaka la go bula molato wa bosenyi. Ke moka baganetši bao ba ile ba bula molato o swanago ka lekga la bone, gomme le lebakeng le gape, motšhotšhisi ga se a hwetša bohlatse bja gore go dirilwe seo. Se se makatšago le go feta ke gore sona sehlopha seo se ile sa kgopela gore go dirwe nyakišišo e nngwe gape. Mafelelong, ka April 13, 1998, monyakišiši yo mofsa o ile a fediša molato woo.

Ramolao yo a bego a swaragane le molato woo  o bolela gore: “Eupša, go ile gwa direga selo se sengwe sa go makatša.” Gaešita le ge moemedi yo a tšwago ofising ya motšhotšhisi yo a dirilego nyakišišo ye ya bohlano a ile a dumela gore go be go se na bohlatse bja gore go dirilwe bosenyi, o ile a nea keletšo ya gore bana babo rena ba lefišwe ke kgoro ya tsheko ka ge ba senyeditše setšhaba. Moemedi yoo o ile a šišinya gore Moscow Community of Jehovah’s Witnesses e tshetše molao wa naga le wa ditšhabatšhaba. Motšhotšhisi wa Northern Administrative Circuit of Moscow o ile a dumela gomme a bula molato woo. * Ka September 29, 1998, theeletšo ya molato e ile ya thoma Kgorotshekong ya Selete ya Golovinsky kua Moscow. Mogato wa bobedi o be o thomile.

BEIBELE KA KGORONG YA TSHEKO

Ka kgorong e pitlaganego ya tsheko ka borwa bja Moscow, Motšhotšhisi Tatyana Kondratyeva o ile a thoma go hlasela a diriša molao wa profense woo o saennwego ka 1997 woo o bolelago gore Bokriste bja Orthodox, Bomoseleme, Bojuda le Bobuddha ke madumedi a setlogo. * Wona molao woo, ge o dirišwa, o ile wa dira gore madumedi a mangwe a thatafalelwe ke go ngwadišwa semmušo. O be o dumelela dikgorotsheko go thibela madumedi ao a godišago lehloyo. A diriša molao wo, motšhotšhisi o ile a bolela maaka a gore Dihlatse tša Jehofa di godiša lehloyo le go senya malapa, ka gona di swanetše go thibelwa.

Ramolao yo a bego a emela bana babo rena o ile a botšiša gore: “Ke bomang go Moscow Congregation bao ba nago le molato wa go tshela molao wo?” Motšhotšhisi ga se a kgona go ntšha le o tee. Lega go le bjalo, o ile a bolela gore dipuku tša Dihlatse tša Jehofa di tutueletša lehloyo la bodumedi. Go hlatsela ntlha ya gagwe, o ile a bala dimakasine tša Morokami le Phafoga! le dikgatišo tše dingwe (bona ka godimo). Ge a botšišwa gore ke ka tsela efe dikgatišo tše di bakago bonaba, o ile a araba ka gore: “Dihlatse tša Jehofa di ruta gore tšona ke bodumedi bja therešo.”

Ramolao yo mongwe yo e lego ngwanabo rena, o ile a nea moahlodi le motšhotšhisi dikopi tša Beibele gomme a bala Baefeso 4:5 e rego: “Go na le Morena o tee, tumelo e tee, kolobetšo e tee.” Go se go ye kae, moahlodi, motšhotšhisi le ramolao—ka moka ba swere Dibeibele ka diatleng—ba be ba ahlaahla mangwalo a bjalo ka Johane 17:18 le Jakobo 1:27. Kgoro e ile ya botšiša gore: “Na Mangwalo a a tutuetša bonaba bja bodumedi?” Motšhotšhisi o ile a araba ka gore ga a swanelege go hlalosa Beibele. Ramolao o ile a ba bontšha dipuku tša Kereke ya Russia ya Orthodox tšeo di bego di bolela gampe ka Dihlatse tša Jehofa gomme a botšiša gore: “Na dipolelo tše di tshela molao?” Motšhotšhisi o ile a araba ka gore: “Ga ke swanelege go hlalosa dingangišano tša baruti.”

TSHEKO E FELELWA KE MATLA

Ge a latofatša Dihlatse gore di senya malapa, motšhotšhisi o ile a bolela gore ga di keteke matšatši a maikhutšo a bjalo ka Keresemose. Lega go le bjalo, o ile a dumela ka morago gore molao wa Russia ga o gapeletše badudi ba yona go keteka Keresemose. Marussia—go akaretša Dihlatse tša Jehofa tša Russia—a na le kgetho. Motšhotšhisi o ile a ba a bolela gore mokgatlo wa rena ‘o tima bana nako e tlwaelegilego ya go khutša le ya go thaba.’ Lega go le bjalo, ge a botšološišwa, o ile a dumela gore ga se a ka a boledišana le bafsa bao  ba godišwago ke batswadi ba Dihlatse. Ge ramolao a botšiša motšhotšhisi ge e ba a kile a ba gona dibokeng tša Dihlatse tša Jehofa, o ile a araba ka gore: “Go be go sa nyakege.”

Botšhotšhisi bo ile bja tla le moprofesara yo e lego setsebi sa monagano go hlatsela taba ya bjona. O ile a bolela gore go bala dikgatišo tša rena go baka mathata a monagano. Ge moemedi wa molao a lemoga gore pego yeo moprofesara a e ngwaletšego kgoro ya tsheko e be e swana le ya Patriarchate ya Moscow, goba baetapele ba Kereke ya Orthodox ya Moscow, moprofesara yoo o ile a dumela gore dikarolo tše dingwe tša tšona di be di swana, lentšu ka lentšu. O ile a dumela gore o kopišitše dilo tše dintši tšeo a di ngwadilego ka ga molato wo. Ge a be a botšološišwa go ya pele go ile gwa bonagala gore ga go le ka mohla moo a ilego a hlahloba yo mongwe wa Dihlatse tša Jehofa. Go fapana le yena, moprofesara yo mongwe yo e lego setsebi sa monagano o neile bohlatse ka kgorong yeo gore o dirile nyakišišo ka Dihlatse tša ka godimo ga tše 100 kua Moscow. O ile a hwetša gore sehlopha seo se be se phetše gabotse monaganong, a tlaleletša ka gore ditho tša sehlopha seo di kgona go kgotlelela batho ba madumedi a mangwe ga e sa le go tloga mola e bago Dihlatse.

PHENYO YEO E BEGO E SE YA MAKGAOLAKGANG

Ka March 12, 1999, moahlodi o ile a kgetha dirutegi tše tlhano gore di hlahlobe dikgatišo tša Dihlatse tša Jehofa, ke moka a fega molato. Tiragalong e nngwe yeo e sa sepedišanego le tsheko ye ya Moscow, Lefapha la Toka la mmušo wa diprofense wa Russia le be le šetše le laetše gore go be le dirutegi tšeo di hlahlobago dikgatišo tša rena. Sehlopha seo se se bego se romilwe ke Lefapha leo la mmušo se ile sa buša pego ya sona ka April 15, 1999, sa bolela gore ga se sa hwetša selo se kotsi ka dikgatišong tša rena. Ka gona, ka April 29, 1999, Lefapha la Toka le ile la tsošološa go ngwadišwa ga rena setšhabeng re le Dihlatse tša Jehofa. Gaešita le ge go be go na le nyakišišo yeo e bontšhago gore ga re na molato, kgoro ya tsheko ya Moscow e ile ya gapeletša gore sehlopha seo se sefsa seo e se kgethilego se hlahlobe dikgatišo tša rena. Se se ile sa dira gore go be le  boemo bja go makatša—Lefapha la Toka le be le amogela gore Dihlatse tša Jehofa di lebelelwa e le bodumedi bjo bo amogelwago nageng ka moka go ya ka molao, eupša ka nako e swanago di be di nyakišišwa ke Lefapha la Toka la Moscow ka ditatofatšo tša gore di tshetše molao!

Go ile gwa feta nako e ka bago nywaga e mebedi pele ga ge tsheko e ka thomološa, gomme ka February 23, 2001, Moahlodi Yelena Prokhorycheva o ile a fihlelela phetho. Ka morago ga go hlahloba nyakišišo ya sehlopha seo a bego a se romile go dira nyakišišo, o ile a phetha ka gore: “Ga go na lebaka la gore modiro wa sehlopha sa bodumedi sa Dihlatse tša Jehofa mo Moscow o fedišwe le go thibelwa.” Mafelelong, e ile ya ba taba ya semmušo gore bana babo rena ba be ba se na molato ditatofatšong ka moka tšeo ba bego ba pharwa ka tšona! Lega go le bjalo, motšhotšhisi o ile a gana phetho yeo gomme a ipelaetša Kgorotshekong ya Moscow City. Dikgwedi tše tharo ka morago, ka May 30, 2001, kgoro yeo ya tsheko e ile ya fediša phetho ya Moahlodi Prokhorycheva. E ile ya laela gore tsheko e thomološwe gomme e swarwe ke motšhotšhisi yoo eupša e sepedišwe ke moahlodi yo mongwe. Mogato wa boraro o be o le kgauswi le go thoma.

GO FENYWA MO E SEGO GA MAKGAOLAKGANG

Ka October 30, 2001, Moahlodi Vera Dubinskaya o ile a thomološa tsheko. * Motšhotšhisi Kondratyeva o ile a boeletša tatofatšo ya gore Dihlatse tša Jehofa di godiša lehloyo, eupša o ile a oketša ka gore go thibela Dihlatse tša Jehofa semmušo e be e le tsela ya go šireletša ditshwanelo tša Dihlatse tšeo moo Moscow! Ge Dihlatse tša Moscow di arabela mantšung ao a sa tlwaelegago, di ile tša dira gore ka moka ga tšona di le 10 000 di saene gateetee kgopelo ya gore kgoro ya tsheko e ganetše polelo ya motšhotšhisi ya go bolela gore di šireletšwe.

Motšhotšhisi o ile a bolela gore go be go sa nyakege gore a nee bohlatse go thekga taba ya gore Dihlatse di be di na le molato. O ile a re tsheko e be e le mabapi le dikgatišo le ditumelo tša Dihlatse tša Jehofa, e sego mediro ya tšona. O ile a tsebiša gore o tla tliša mmoleledi wa Kereke ya Russia ya Orthodox gore e be hlatse yeo e lego setsebi ditabeng tše. Go ba gona, tsebišo yeo e ile ya kgonthišetša gore baruti ba be ba akaretšwa kudu mogatong wa go nyaka go thibela Dihlatse. Ka May 22, 2003, moahlodi o ile a laela gore sehlopha sa ditsebi se ithute dikgatišo tša Dihlatse tša Jehofa—ka lekga le lengwe gape.

Ka February 17, 2004, kgoro e ile ya thoma go hlahloba diphetho tšeo di dirilwego ke sehlopha seo sa ditsebi. Ditsebi di ile tša hwetša gore dikgatišo tša rena di kgothaletša babadi go “hlompha lapa le thulaganyo ya lenyalo” le gore polelo ya gore dikgatišo tša rena di godiša lehloyo “e be e se na bohlatse.” Diithuti tše dingwe di ile tša dumelelana le seo. Moprofesara wa histori ya bodumedi o ile a botšišwa gore: “Ke ka baka la’ng Dihlatse tša Jehofa di dira bodiredi?” O ile a araba kgoro ka gore: “Modiro wa bodiredi o swanetše go dirwa ke Mokriste yo mongwe le yo mongwe. Ke seo se bolelwago ke Ebangedi le gona ke seo Kriste a laetšego barutiwa ba gagwe go se dira—‘eyang le rute dinageng ka moka.’” Go sa šetšwe seo, ka March 26, 2004, moahlodi o ile a thibela mediro ya Dihlatse tša Jehofa kua Moscow. Ka June 16, 2004, Kgoro ya tsheko ya Moscow City e ile ya thekga phetho yeo. * Ge Hlatse ya nako e telele e bolela ka kahlolo yeo e dirilwego e ile ya bolela gore: “Mehleng ya mmušo wa Soviet, Morussia yo mongwe le yo mongwe o be a swanetše go ba moilamodimo. Lehono, Morussia e swanetše go ba setho sa Orthodox.”

Bana babo rena ba ile ba arabela bjang thibelong yeo? Ba ile ba arabela go swana le Nehemia wa bogologolo. Mehleng ya gagwe ge manaba a batho ba Modimo a be a šitiša maiteko a gagwe a go tsošološa morako wa Jerusalema, Nehemia le batho ba gagwe ga se ba dumela go šitišwa ke kganetšo ya mohuta le ge e le ofe. Go e na le moo, ba ile ba “aga” gomme “ba šoma ka pelo ka moka.” (Neh. 4:1-6) Ka mo go swanago, bana  babo rena ba Moscow ga se ba ka ba dumelela baganetši ba ba šitiša modirong woo o swanetšego go dirwa lehono—go bolelwa ga ditaba tše dibotse. (1 Pet. 4:12, 16) Ba be ba kgodišegile gore Jehofa o tla ba hlokomela, gomme ba be ba itokišeleditše mogato wa bone ntweng ye yeo e sa felego.

GO GOLA GA KGANETŠO

Ka August 25, 2004, bana babo rena ba ile ba iša kgopelo ya bona go mmušo wa Russia e lebišitšwe go Vladimir Putin, yoo ka nako yeo e bego e le mopresidente. Dikgopelo tšeo di bego di bontšha go tshwenyega kudu ka thibelo yeo, di be di na le dibolumo tše 76 gomme di saennwe ke batho ba fetago 315 000. Go sa le bjalo, baruti ba Kereke ya Russia ya Orthodox ba ile ba bontšha mebala ya bona ya kgonthe. Mmoleledi wa Patriarchate ya Moscow, goba baetapele ba Kereke ya Orthodox ya Moscow, o ile a bolela gore: “Re tloga re thulana le mediro ya Dihlatse tša Jehofa.” Moetapele wa Mamoseleme o boletše gore kahlolo yeo e be e le “mogato o bohlokwa le o holago.”

Ga go makatše ge ditho tša setšhaba sa Russia tšeo di forilwego di ile tša ikwa di na le matla a go hlasela Dihlatse tša Jehofa. Dihlatse tše dingwe tšeo di bego di tšea karolo modirong wa boboledi kua Moscow di ile tša otlwa ka matswele le go ragwa. Monna yo mongwe yo a bego a galefile kudu o ile a raka kgaetšedi ka ntlong gomme a mo raga ka matla mokokotlong moo kgaetšedi yoo a ilego a wa gomme a betha fase ka hlogo. O ile a swanelwa ke gore a alafše; lega go le bjalo, maphodisa ga se a dira selo ka motho yoo a mo hlasetšego. Dihlatse tše dingwe di ile tša golegwa ke maphodisa, tša gatišwa menwana, tša tšewa dinepe gomme tša robatšwa kgolegong bošego botee. Balaodi ba mafelo ao diboka di bego di swarelwa go ona kua Moscow ba ile ba tšhošetšwa ka gore ba tla rakwa mešomong ge e ba ba tšwela pele ba hirišetša Dihlatse diholo. Ka nakwana, diphuthego tše dintši di ile tša lahlegelwa ke mafelo a hirišitšwego a go swarela diboka. Diphuthego tše 40 di ile tša swanelwa ke go hlakanela moago o nago le Diholo tše nne tša Mmušo. Phuthego e nngwe yeo e dirišago holo yeo e be e  gapeletšega go thoma Polelo ya Phatlalatša ka seripagare go tšwa iring ya bošupa mesong. Molebeledi yo mongwe wa mosepedi o boletše gore: “E le gore bagoeledi ba be gona ba be ba swanetše go tsoga ka iri ya bohlano, eupša ba ile ba dira bjalo ka go rata ka lebaka la ka godimo ga ngwaga.”

“GORE E BE BOHLATSE”

Go bontšha gore thibelo ya Moscow e be e se molaong, ka December 2004 boramolao ba rena ba ile ba nyaka thušo Kgorong ya Yuropa ya Ditshwanelo tša Batho. (Bona lepokisi le le rego: “Lebaka Leo Kahlolo ya Russia e Hlahlobjago Fora,” go letlakala 6.) Ka morago ga nywaga e tshela, ka June 10, 2010, Kgoro yeo e ile ya ntšha kahlolo yeo e ilego ya bontšha gore Dihlatse tša Jehofa ga di na molato le gatee! * Kgoro yeo e ile ya hlahloba ditatofatšo ka moka tšeo di bego di lebišitšwe go rena gomme ya hwetša gore di hloka ntlha le thito. Le gona e ile ya bolela gore Russia e na le tshwanelo ya molao ya go “fediša tlaišo yeo Kgoro e e lemogilego le go lokiša ditlamorago tša yona ka mo go ka kgonegago.”—Bona lepokisi le le rego: “Kahlolo ya Kgoro,” go letlakala 8.

Diphetho tše bohlale tša Kgoro yeo tšeo di bontšhago kamoo Tumelelano ya Yuropa Ditshwanelong tša Batho e šireletšago mediro ya Dihlatse tša Jehofa, di be di sa tlame feela Russia eupša di tlama le ditšhaba tše dingwe tše 46 tšeo e lego ditho tša Lekgotla la Yuropa. Go feta moo, ka baka la bogolo bja ditaba tša molao gotee le ditherešo tša wona tšeo di hlahlobilwego, e tla balwa ka kelohloko ke ditsebi tša molao, baahlodi, bahlami ba melao le bao e lego ditsebi tša ditshwanelo tša batho go dikologa lefase. Ke ka baka la’ng go le bjalo? Kgoro e fihleletše kahlolo ye ka go se bolele feela ka dikahlolo tše seswai tšeo yona e bego e šetše e di fihleletše go thekga Dihlatse tša Jehofa, eupša e boletše le ka ditsheko tše senyane tšeo Dihlatse tša Jehofa di di fentšego dikgorong tše dikgolo tša Afrika Borwa, Argentina, Canada, Japane, Russia, Spain, United Kingdom le United States. Mehlala ye gotee le kahlolo e bogale ya Kgoro yeo ya go ganetša ditatofatšo tšeo di bego di dirilwe ke motšhotšhisi wa Moscow di nea Dihlatse tša Jehofa lefaseng ka bophara sedirišwa se matla seo di ka se dirišago go lwela tumelo ya tšona le mediro ya tšona.

Jesu o boditše balatedi ba gagwe gore: “Le tla gogelwa pele ga babuši le dikgoši ka baka la ka, gore e be bohlatse go bona le go ditšhaba.” (Mat. 10:18) Ntwa ye ya molao yeo e feditšego nywaga e lesome le seripa e ile ya nea bana babo rena sebaka sa gore ba tsebatše leina la Jehofa le tsebje go feta le ge e le neng pele kua Moscow gotee le mafelong a mangwe. Nako yeo banyakišiši, dikgoro tša tsheko le kahlolo ya kgoro ya ditšhabatšhaba di e feditšego le Dihlatse, ruri e bile “bohlatse” gomme e kgathile tema ‘go tšwetšeng pele ditaba tše dibotse.’ (Bafil. 1:12) Ge e le gabotse, ge Dihlatse kua Moscow di tšea karolo modirong wa boboledi lehono, beng ba bantši ba dintlo ba ba botšiša gore: “Na ga se la thibelwa?” Gantši potšišo yeo e nea bana babo rena sebaka sa go botša beng ba dintlo ka mo go oketšegilego ka ditumelo tša rena. Ga go pelaelo gore ga go lenaba leo le ka re thibelago modirong wa rena wa go bolela ka Mmušo. Re rapelela gore Jehofa a tšwele pele a šegofatša le go thekga bana babo rena le dikgaetšedi ba rategago le ba nago le sebete ba Russia.

[Mengwalo ya tlase]

[Box/​Picture on page 6]

Lebaka Leo Kahlolo ya Russia e Hlahlobjago Fora

Ka February 28, 1996, Russia e ile ya saenela Tumelelano ya Yuropa Ditshwanelong tša Batho. (Ka May 5, 1998, Russia e ile ya amogela Tumelelano yeo.) Ka go saenela tumelelano yeo, mmušo wa Russia o ile wa tsebatša gore badudi ba wona ba na le:

‘tshwanelo ya tokologo ya borapedi le tshwanelo ya go latela bodumedi bja bona ba le ka gae le phatlalatša le gore ba ka fetoša bodumedi bja bona ge e ba ba nyaka.’—Article 9.

‘tshwanelo ya go bolela le go ngwala ka tsela e nago le boikarabelo seo ba se naganago le go abela ba bangwe tsebišo yeo.’—Article 10.

‘tshwanelo ya go tšea karolo dibokeng tšeo di nago le khutšo.’—Article 11.

Batho goba mekgatlo yeo e bilego bahlaselwa ba tumelelano ye e bile ba lekile go latela megato ka moka ya molao nageng ya gabo bona, ba ka tliša melato ya bona Kgorong ya Yuropa ya Ditshwanelo tša Batho kua Strasbourg, Fora (yeo e bontšhitšwego ka mo godimo). E na le baahlodi ba 47, e lego palo e lekanago le ya dinaga tšeo di saenetšego Tumelelano ya Yuropa Ditshwanelong tša Batho. Dikahlolo tša kgoro yeo di a tlama. Dinaga tšeo di saenetšego tumelelano yeo di swanetše go latela dikahlolo tša yona.

[Lepokisi go letlakala 8]

Kahlolo ya Kgoro

Tše ke ditsopolo tše tharo tše kopana tša kahlolo ya Kgoro.

Tatofatšo e nngwe e be e le ya gore Dihlatse tša Jehofa di thuba malapa. Kgoro ga se ya dumelelana le yona. E itše:

“Seo se bakago kgohlano ke go gana le go se rate ga ditho tša lapa tšeo e sego badumedi go amogela le go hlompha tokologo ya bodumedi ya ditho tša maloko a gabo tšona ge di bolela ka tumelo ya tšona le go e latela.”—Par. 111.

Le gona Kgoro ga se e hwetše bohlatse bjo bo thekgago tatofatšo ya gore Dihlatse “di laola menagano ya batho,” gomme ya bolela gore:

“Kgoro e hwetša go makatša gore dikgoro tša [Russia] ga se tša bolela le leina letee la motho yoo tshwanelo ya gagwe ya go lokologa letswalong e šitišitšwego go dirišwa mekgwa yeo.”—Par. 129.

Tatofatšo e nngwe e boletše gore Dihlatse tša Jehofa ka go se amogele tšhelo ya madi, di gobatša badumedi mmeleng. Kgoro e ile ya ahlola taba ye ka gore:

“Tokologo ya go amogela goba go gana mohuta o itšego wa kalafo, goba go kgetha tsela e nngwe ya go alafša, ke selo se bohlokwa kudu go melao ya motheo ya go ikemela le ya go itirela diphetho. Molwetši yo e lego motho yo mogolo yo a kgonago go rwala boikarabelo o lokologile go kgetha, ka mohlala, a ka kgetha ge e ba a nyaka go buiwa goba go se bjalo, go amogela kalafo goba go se bjalo, gomme go bjalo le tabeng ya go tšhelwa ga madi.”—Par. 136.