Ba Hweditše Mesia!

“Re hweditše Mesia.”—JOHANE 1:41.

1. Ke’ng seo se dirilego gore go bolelwe mantšu a rego: “Re hweditše Mesia”?

JOHANE MOKOLOBETŠI o eme le barutiwa ba gagwe ba babedi. Ge Jesu a dutše a batamela, Johane o goeletša ka gore: “Bonang, Kwana ya Modimo!” Gateetee Andrea le morutiwa yo a nago le yena ba latela Jesu gomme ba fetša letšatši ba na le yena. Ka moragonyana, Andrea o hwetša ngwanabo, e lego Simone Petro, gomme o mo iša go Jesu ka morago ga ge a mmoditše mantšu a makatšago a gore: “Re hweditše Mesia.”—Joh. 1:35-41.

2. Re tla holega bjang ka go hlahloba diporofeto tše dingwe gape tša mabapi le Mesia?

² Ge nako e dutše e feta, Andrea, Petro le ba bangwe ba tla ba le sebaka se sebotse sa go nyakišiša ka Mangwalong gomme ba feleletše ba bolela ka kgodišego e feletšego gore Jesu wa Natsaretha ke Mesia yo a holofeditšwego. Tumelo ya rena Lentšung la Modimo le go Motlotšwa wa gagwe e tla matlafala ge ga bjale re tšwela pele re hlahloba diporofeto tša mabapi le Mesia.

‘Bona! Kgoši ya Gago e a tla’

3. Ke diporofeto dife tšeo di ilego tša phethagala ge Jesu a be a tsena Jerusalema ka phenyo?

³ Mesia o tla tsena Jerusalema ka phenyo. Boporofeta bja Sakaria bo boletše gore: “Hlalala kudu wena morwedi wa Tsione. Hlaba mekgolokwane ya phenyo, wena morwedi wa Jerusalema. Bona! Kgoši ya gago e tla go wena. Ke yeo e lokilego, e bile e a phološa; e ikokobeditše gomme e nametše pokolo, yona pokolwana e nago le mmago yona.” (Sak. 9:9) Mopsalme o ngwadile gore: “A go šegofatšwe Yo a tlago ka leina la Jehofa.” (Ps. 118:26) Ga go ka tsela yeo Jesu a bego a ka dira gore mašaba a itshware ka tsela yeo a ilego a itshwara ka yona. Lega go le bjalo, ge go phethagala boporofeta bjo, lešaba leo le ile la goelela ka bolona le tletše lethabo. Ge o dutše o bala pego yeo, bona tiragalo yeo ka leihlo la kgopolo gomme o kwe mantšu ao a bona a ge ba thabile.—Bala Mateo 21:4-9.

4. Hlalosa seo se ilego sa direga ge go be go phethagala Psalme 118:22, 23.

⁴ Le ge ba bantši ba be ba tla gana Jesu le ge a  na le ditshwanelego tša gore ke Mesia, Modimo o mo tšea e le yo bohlokwa. Go etša ge go boletšwe e sa le pele, Jesu ‘o ile a nyatšwa gomme a tšewa e se wa bohlokwa’ ke bao ba bego ba gana go dumela bohlatse bja gagwe. (Jes. 53:3; Mar. 9:12) Lega go le bjalo, Modimo o be a buduletše mopsalme go bolela gore: “Leswika leo baagi ba le gannego le fetogile hlogo ya sekhutlo. Se se tšwa go Jehofa.” (Ps. 118:22, 23) Jesu o ile a botša baganetši ba gagwe ba bodumedi mantšu ao, gomme Petro o ile a bolela gore mantšu ao a ile a phethagala ka Kriste. (Mar. 12:10, 11; Dit. 4:8-11) Jesu o ile a ba “leswika le legolo la sekhutlo” la phuthego ya Bokriste. Le ge a gannwe ke batho ba sa boifego Modimo, ke yo a “kgethilwego e bile [ke yo] bohlokwa go Modimo.”—1 Pet. 2:4-6.

O Ekilwe Gomme a Lahlwa!

5, 6. Ke’ng seo se ilego sa bolelwa e sa le pele ka go ekwa ga Mesia gomme sa phethagala?

⁵ Go boletšwe e sa le pele gore Mesia o be a tla ekwa ke modirišani wa gagwe wa moradia. Dafida o porofetile gore: “Le gona motho yo a bego a phedišana le nna ka khutšo, yoo ke bego ke mmota, e bile a eja senkgwa sa ka, o mphetogetše.” (Ps. 41:9) Motho yo a bego a eja senkgwa le yo mongwe o be a lebelelwa e le mogwera wa gagwe. (Gen. 31:54) Ka gona, go ekwa ga Jesu ke Judase Isikariote e be e le go radiiwa ga motho ka tsela e sehlogo kudu. Jesu o ile a bolela ka go phethagatšwa ga mantšu ao a Dafida a boporofeta ge A be a bolela ka moeki wa gagwe gomme a botša baapostola ba gagwe gore: “Ga ke bolele ka lena ka moka; ke tseba bao ke ba kgethilego. Eupša ke gore go phethege Lengwalo leo le rego: ‘Yo a bego a fela a eja senkgwa sa ka o mphetogetše.’”—Joh. 13:18.

⁶ Moeki wa Mesia o be a tla amogela ditšhelete tše 30 tša silifera, e lego theko ya go reka lekgoba! Ge Mateo a be a bolela ka Sakaria 11:12, 13, o ile a bontšha gore Jesu o ile a ekwa ka tšhelete yeo e nyenyane. Eupša ke ka baka la’ng Mateo a bolela gore seo se ile sa bolelwa e sa le pele “ka moporofeta Jeremia”? Mehleng ya Mateo, puku ya Jeremia e ka ba e be e beilwe mathomong a sehlopha sa dipuku tša Beibele tšeo di bego di akaretša le ya Sakaria. (Bapiša le Luka 24:44) Judase ga se a ka a diriša tšhelete yeo a ilego a e hwetša ka boradia, ka gobane o ile a e lahlela ka tempeleng gomme a tloga a ya go ipolaya.—Mat. 26:14-16; 27:3-10.

7. Sakaria 13:7 e ile ya phethagala bjang?

⁷ Barutiwa ba Mesia be ba ba tla gašana. Sakaria o ngwadilwe gore: “Hlaba modiši gore mohlape o gašane.” (Sak. 13:7) Ka Nisani 14, 33 C.E., Jesu o boditšwe barutiwa ba gagwe gore: “Ka moka ga lena le tla kgopša mabapi le nna bošegong bjo, gobane go ngwadilwe gwa thwe: ‘Ke tla hlaba modiši gomme dinku tša mohlape tša gašana.’” Seo ke sona seo se ilego sa direga, ka gobane Mateo o begile gore “barutiwa  bao ka moka ba . . . tlogela [Jesu] ba tšhaba.”—Mat. 26:31, 56.

O Latofaditšwe Gomme a Otlwa

8. Jesaya 53:8 e ile ya phethagala ka tlase ga maemo afe?

⁸ Mesia o be a tla sekišwa gomme a ahlolwa. (Bala Jesaya 53:8.) Mantšiboeng a Nisani 14, lekgotla ka moka la Sanhedrine le ile la kopana, la tlema Jesu gomme la mo gafela go Mmuši wa Roma e lego Pontio Pilato. O ile a botšološiša Jesu gomme a hwetša a se na molato le o tee. Lega go le bjalo, ge Pilato a be a nyaka go lokolla Jesu, lešaba le ile la goelela ka gore: “Mo kokotele koteng!” gomme la nyaka le gore go lokollwe Baraba wa sesenyi. Ka ge Pilato a be a nyaka go kgotsofatša lešaba leo, o ile a lokolla Baraba, a otla Jesu gomme a mo gafela gore a kokotelwe koteng.—Mar. 15:1-15.

9. Ke’ng seo se ilego sa direga mehleng ya Jesu seo se bego se boletšwe e sa le pele go Psalme 35:11?

⁹ Dihlatse tša maaka di be di tla nea bohlatse bja maaka ka Mesia. Mopsalme Dafida o boletše gore: “Go tsogile dihlatse tše šoro; di mpotšiša tše ke sa di tsebego.” (Ps. 35:11) Ka go dumelelana le boporofeta bjoo, “baperisita ba bagolo le ditho tša Sanhedrine ka moka ba be ba nyaka bohlatse bja maaka bja go latofatša Jesu e le gore ba mmolaye.” (Mat. 26:59) Ge e le gabotse, “ba bantši ba be ba tloga ba nea bohlatse bja maaka ka yena, eupša bohlatse bja bona bo be bo sa dumelelane.” (Mar. 14:56) Bohlatse bja maaka bo be bo sa tshwenye manaba a Jesu a šoro, e lego ao a bego a nyaka go mmona a hwile.

10. Hlalosa kamoo Jesaya 53:7 e ilego ya phethagala ka gona.

¹⁰ Mesia o tla homola ge a eme pele ga balatofatši ba gagwe. Jesaya o porofetile gore: “O be a gateletšwe, fela o ile a ikgafela go hlakišwa; lega go le bjalo ga se a ka a bula molomo wa gagwe. O ile a tlišwa tlhabong go etša nku; go etša nku ya tshadi yeo e homotšego pele ga bakoti ba yona, le yena a ka se ahlamiše molomo wa gagwe.” (Jes. 53:7) Ge Jesu “a be a latofatšwa ke baperisita ba bagolo le banna ba bagolo, ga se a ka a araba.” Pilato o ile a mmotšiša gore: “Na ga o kwe gore ke dilo tše kae tše ba go latofatšago ka tšona?” Eupša Jesu “a se mo arabe, aowa, le ge e le ka lentšu letee, moo mmuši a ilego a makala kudu.” (Mat. 27:12-14) Jesu ga se a ka a roga balatofatši ba gagwe.—Baroma 12:17-21; 1 Pet. 2:23.

11. Ke’ng seo se ilego sa direga ge go be go phethagatšwa Jesaya 50:6 le Mika 5:1?

¹¹ Jesaya o porofetile gore Mesia o be a tla otlwa. Moporofeta Jesaya o ngwadile gore: “Ke neile baotli mokokotlo wa ka, bao ba hlothago ditedu ka ba nea marama a ka. Ga se ka uta sefahlego sa ka ge ba nthoga le ge ba ntshwela ka mare.” (Jes. 50:6) Mika o boletše e sa le pele gore: “Moahlodi wa Isiraele ba tlo mo itia ka kgati lerameng.” (Mika 5:1) Ge mongwadi wa Ebangedi e lego Mareka a be a kgonthišetša diporofeto tše o itše: “Ba bangwe ba thoma go mo tshwela ka mare, go khupetša sefahlego sa gagwe gomme ba mo itia ka matswele, ba re go yena: ‘Porofeta!’ Ka morago ga ge ba mo phasotše sefahlego, bahlankedi ba kgoro ba tloga le yena.” Mareka o bolela gore bahlabani “ba be ba mo itia hlogo ka lehlaka, ba mo tshwela ka mare gomme ba [mo kwera ka go] thinya matolo pele ga gagwe ba mo khunamela.” (Mar. 14:65; 15:19) Therešo ke gore ga go selo le setee seo Jesu a ilego a se dira go ba hlohleletša gore ba mo goboše ka tsela yeo.

Go Botega go Fihla Lehung

12. Psalme 22:16 le Jesaya 53:12 di ile tša šoma bjang go Jesu?

¹² Ditiragalo tša go kokotelwa ga Mesia koteng di ile tša bolelwa e sa le pele. Mopsalme Dafida o boletše gore: “Ke dikaneditšwe ke lešaba la badirabobe. Ba loma diatla tša ka le dinao tša ka go etša tau.” (Ps. 22:16) Ge mongwadi wa Ebangedi e lego Mareka a be a bega ka tiragalo e tsebjago gabotse ke babadi ba Beibele o re: “Bjale e be e le iri ya boraro [mo e ka bago ka iri ya senyane mesong], gomme ba mo kokotela koteng.” (Mar. 15:25) Le gona go ile gwa bolelwa e sa le pele gore Mesia o be o tla balwa le badiradibe. Jesaya o ngwadile gore: “O tšholotše  moya wa gagwe go fihla lehung, le gona o badilwe le batshedi ba molao.” (Jes. 53:12) Ke ka baka leo “bahlakodi ba babedi ba [ilego ba] kokotelwa le [Jesu], yo mongwe a le ka go la gagwe la le letona, yo mongwe a le ka go la le letshadi.”—Mat. 27:38.

13. Psalme 22:7, 8 e ile ya phethagala bjang go Jesu?

¹³ Dafida o ile a porofeta gore Mesia o tla kwerwa. (Bala Psalme 22:7, 8.) Jesu o ile a kwerwa ge a dutše a ekwa bohloko a le koteng ya tlhokofatšo, ka gobane Mateo o begile gore: “Ka gona bafeti ba tsela ba mo goboša ka mantšu, ba šišinya dihlogo ba re: ‘Wena yo o bego o re o tla phušola tempele wa e aga ka matšatši a mararo, iphološe! Ge e ba o le morwa wa Modimo, theoga moo koteng ya tlhokofatšo!’ Ka mokgwa o swanago, baperisita ba bagolo le bamangwalo le banna ba bagolo ba thoma go dira metlae ka yena ba re: ‘Ba bangwe o ba phološitše; yena ga a kgone go iphološa! Ke Kgoši ya Isiraele; bjale a a theoge koteng ya tlhokofatšo gomme re tla mo dumela. O botile Modimo; A a mo hlakodiše ge e ba A mo rata, gobane o itše: “Ke nna Morwa wa Modimo.”’” (Mat. 27:39-43) Lega go le bjalo, Jesu o ile a kgotlelela tše ka moka ka seriti. Ruri o re beetše mohlala o mobotse!

14, 15. Bontšha kamoo diporofeto tše di lebanyago di ilego tša phethagala ka diaparo tša Mesia le go newa ga gagwe binika.

¹⁴ Diaparo tša Mesia di be di tla direlwa matengwa. Mopsalme o ngwadile gore: “A abelana diaparo tša ka, A direla seaparo sa ka matengwa.” (Ps. 22:18) Seo ke sona seo se ilego sa direga, ka gobane “ge [bahlabani ba Roma] ba kokotetše [Jesu] koteng ba abaganya diaparo tša gagwe tša ka ntle ka go dira matengwa.”—Mat. 27:35; Bala Johane 19:23, 24.

¹⁵ Mesia o be a tla newa binika le sabohloko. Mopsalme o itše: “Go e na le gore ba nnee dijo ba ile ba nnea semela sa mpholo, ge ke be ke nyorilwe ba ile ba leka go nnweša binika.” (Ps. 69:21) Mateo o re botša gore: “Ba . . . nea [Jesu] beine yeo e tswakilwego le sabohloko gore a e nwe, eupša o itše go kwa tatso ya yona, a gana go e nwa.” Ka moragonyana “yo mongwe wa bona a kitima a tšea sepontšhe a se ina beineng e bodila a se hlomela lehlakeng a mo nweša.”—Mat. 27:34, 48.

16. Hlalosa kamoo mantšu a Psalme 22:1 a ilego a phethagatšwa ka gona.

¹⁶ Mesia o tla bonagala a lahlilwe ke Modimo. (Bala Psalme 22:1.) Ka go dumelelana le boporofeta, “ka iri ya senyane [mo e ka bago ka iri ya boraro thapama] Jesu a goeletša ka lentšu le le hlabošago a re: ‘Eli, Eli, lama sabakthani?’ Yeo e bolelago gore: ‘Modimo wa ka, Modimo wa ka, o ntlogeletše’ng?’” (Mar. 15:34) Ga se  gore Jesu o be a se sa dumela go Tatagwe wa legodimong. Modimo o ile a gafela Jesu go manaba a gagwe ka gore A se mo šireletše e le gore potego ya Kriste e ka lekwa ka mo go feletšego. Le gona tsela yeo Jesu a ilego a goelela ka yona, e be e le go phethagatša Psalme 22:1.

17. Sakaria 12:10 le Psalme 34:20 di ile tša phethagala bjang?

¹⁷ Mesia o tla hlabja, eupša marapo a gagwe a ka se robje. Badudi ba Jerusalema ba be ba tla “lebelela Yo ba mo hlabilego.” (Sak. 12:10) Le gona Psalme 34:20 e re: “[Modimo] o šireletša marapo ka moka a yena yoo; ga go le letee la ona leo le robegilego.” Ge moapostola Johane a be a hlatsela dintlha tše, o ngwadile gore: “Yo mongwe wa bahlabani a hlaba lehlakore la gagwe [la Jesu] ka lerumo, gwa napa gwa tšwa madi le meetse. Ke moka yo a di bonego [Johane] o hlatsetše, e bile bohlatse bja gagwe ke bja therešo . . . Dilo tše di diregile e le gore go phethege lengwalo le le rego: ‘Ga go lerapo la gagwe leo le tlago go pšhatlwa.’ Le gona lengwalo le lengwe le re: ‘Ba tla lebelela Yo ba mo hlabilego.’”—Joh. 19:33-37.

18. Go tlile bjang gore Jesu a bolokwe le bahumi?

¹⁸ Mesia o tla bolokwa le bahumi. (Bala Jesaya 53:5, 8, 9.) Mafelelong a mantšiboa a Nisani 14, “monna wa mohumi wa Arimathea, yo a bitšwago Josefa,” o ile a kgopela Pilato setopo sa Jesu, gomme Pilato o ile a mo nea sona. Pego ya Mateo e oketša ka gore: “Josefa a tšea setopo, a se phuthela ka lešela le lebotse le le hlwekilego la leokodi, a se bea lebitleng la gagwe le lefsa, leo a bego a le epile letlapeng. Ka morago ga go kgokološetša leswika le legolo molomong wa lebitla, a tloga.”—Mat. 27:57-60.

Retang Kgoši Mesia!

19. Ke’ng seo se ilego sa direga ka go dumelelana le mantšu a boporofeta a Psalme 16:10?

¹⁹ Mesia o be a tlo tsošwa bahung. Dafida o ngwadile gore: “[Jehofa] o ka se tlogele moya wa ka o le Bodulabahu.” (Ps. 16:10) Nagana semaka seo se bilego difahlegong tša basadi bao ba bego ba tlile lebitleng leo setopo sa Jesu se bego se bolokilwe go lona. Ba ile ba bona morongwa yo a bego a le ka mmele wa nama, gomme a ba botša gore: “Le se ke la makala. Ke a tseba gore le nyaka Jesu wa Monatsaretha yo a bego a kokotetšwe koteng. O tsošitšwe; ga a gona mo. Bonang moo ba bego ba mmolokile gona.” (Mar. 16:6) Moapostola Petro o boditše lešaba leo le bego le le Jerusalema ka letšatši la Pentekoste ya 33 C.E., gore: “[Dafida] o bone e sa le pele gomme a bolela ka tsogo ya Kriste gore ga se a ka a tlogelwa a le Bodulabahu le gore nama ya gagwe ga se ya bona go bola.” (Dit. 2:29-32) Modimo ga se a dumelela gore mmele wa Morwa wa gagwe yo a botegago o bole. Go oketša moo, Jesu o ile a tsošetšwa ka mohlolo bophelong e le sebopiwa sa moya!—1 Pet. 3:18.

20. Ke’ng seo diporofeto di se bolelago ka pušo ya Mesia?

²⁰ Go etša ge go boletšwe e sa le pele, Modimo o ile a tsebatša gore Jesu ke Morwa wa gagwe. (Bala Psalme 2:7; Mateo 3:17.) Le gona, mašaba a ile a reta Jesu le Mmušo wa gagwe o sa tlago, gomme le rena re bolela ka lethabo ka yena le ka pušo ya gagwe e kgahlišago. (Mar. 11:7-10) Go se go ye kae Kriste o tla fediša manaba a gagwe ge a dutše a ‘nametše pere ya gagwe a lwela baikokobetši, a lwela therešo le toko.’ (Ps. 2:8, 9; 45:1-6) Ke moka bogoši bja gagwe bo tla tliša khutšo le katlego tša lefase ka bophara. (Ps. 72:1, 3, 12, 16; Jes. 9:6, 7) Re tloga re neilwe tokelo e kgolo gakaakang ya go tsebatša ditherešo tše re le Dihlatse tša Jehofa, yoo Morwa wa gagwe yo a rategago a šetšego a buša legodimong e le Kgoši Mesia!

O be o tla Araba Bjang?

• Jesu o ile a ekwa bjang gomme a lahlwa?

• Ke dilo dife tše dingwe tšeo di bego di boletšwe e sa le pele ka go kokotelwa ga Jesu Kriste koteng?

• Ke ka baka la’ng o kgodišegile gore Jesu ke Mesia yo a holofeditšwego?

[Dipotšišo tša Thuto]

[Seswantšho go letlakala 13]

Go tsena ga Jesu ka phenyo Jerusalema go be go phethagatša diporofeto dife?

[Diswantšho go letlakala 15]

Jesu o hwetše dibe tša rena, eupša ga bjale o buša e le Kgoši Mesia