Ba Ile ba Letela Mesia

“Batho ba be ba letile, gomme bohle ba be ba ipotšiša ka Johane dipelong tša bona, ba ipotšiša ge e ba e be e se Mesia.”—LUKA 3:15, THE EMPHATIC DIAGLOTT.

1. Ke mantšu afe ao badiši ba bangwe ba ilego ba a kwa go tšwa go morongwa?

KE BOŠEGO. Badiši ba dutše merakeng, ba dišitše mehlape ya bona. Ba thoma go makala ge ba bona morongwa wa Jehofa a ema kgauswi le bona gomme ba dikanetšwa ke letago la Modimo! Bjale theetša! Morongwa o ba botša taba ye e makatšago: “Se boifeng, gobane ke le tsebiša ditaba tše dibotse tša lethabo le legolo leo batho ka moka ba tlago go ba le lona, gobane lehono le belegetšwe Mophološi, yo e lego Kriste Morena,” yena yo e tlago go ba Mesia. Badiši bao ba be ba tla hwetša lesea leo le letše legopong motseng woo o lego kgauswi le moo ba lego gona. Gateetee, “lešaba la madira a legodimo” le thoma go tumiša Jehofa, le re: “Letago a le ye go Modimo magodimodimong, lefaseng go be le khutšo bathong bao a ba amogelago.”—Luka 2:8-14.

2. Leina “Mesia” le ra go re’ng, gomme a ka tsebja bjang?

² Go ba gona, badiši ba ba Bajuda ba a tseba gore leina “Mesia,” goba “Kriste,” le bolela gore “Motlotšwa” wa Modimo. (Ek. 29:5-7) Eupša ba be ba ka ithuta ka mo go oketšegilego bjang le go kgodiša ba bangwe gore ngwana yoo morongwa a boletšego ka yena e be e tla ba Mesia yo a kgethilwego ke Jehofa? Ka gore ba hlahlobe diporofeto tšeo di hwetšwago ka Mangwalong a Seheberu gomme ba di bapetše le ditiragalo gotee le kamoo ngwana yo a bego a tla phela ka gona.

Ke ka Baka La’ng Batho ba be ba Letile?

3, 4. Re kwešiša bjang Daniele 9:24, 25?

³ Ge Johane Mokolobetši a be a thoma modiro wa gagwe nywaga e mmalwa ka morago ga mo, ditaba tša gagwe le ditiro tša gagwe di ile tša dira gore ba bangwe ba ipotšiše ge e ba mohlomongwe Mesia a šetše a fihlile. (Bala Luka 3:15.) Go ka direga gore ba bangwe ba be ba kwešišitše gabotse boporofeta bjo bo bolelago ka Mesia bja mabapi le “dibeke tše masomešupa.” Ge e ba go le bjalo, ba be ba ka ba ba tsebile gore Mesia o be a tla tšwelela neng. Ka boripana, boporofeta bjoo bo  itše: “Go tloga nakong ya ge go etšwa lentšu la gore Jerusalema e tsošološwe le gore e agwe lefsa go ba go fihla ge Mesia Moetapele a etla, e tla ba dibeke tše šupago, le dibeke tše masometshela-pedi.” (Dan. 9:24, 25) Diithuti tše mmalwa di dumelelana ka gore dibeke tše di emela nywaga. Ka mohlala, phetolelo ya Beibele ya Revised Standard Version e re: “Go tsebaditšwe dibeke tše masomešupa tša nywaga.”

⁴ Lehono, bahlanka ba Jehofa ba a tseba gore dibeke tše 69, goba nywaga e 483, tša Daniele 9:25 di thomile ka 455 B.C.E. ge Kgoši Arithasasitha wa Peresia a laela Nehemia gore a tsošološe Jerusalema le go e aga lefsa. (Neh. 2:1-8) Dibeke tšeo di fedile ka morago ga nywaga e 483, ka 29 C.E., ge Jesu wa Natsaretha a be a kolobetšwa gomme a tlotšwa ka moya o mokgethwa, ka go re’alo a fetoga Mesia.—Mat. 3:13-17. *

5. Ke diporofeto dife tšeo re tlago go di ahlaahla ga bjale?

⁵ Anke ga bjale re hlahlobeng tše dingwe tša diporofeto tša mabapi le Mesia tšeo di ilego tša phethagala ge Jesu a be a belegwa, ge e be e sa le yo monyenyane le nakong ya bodiredi bja gagwe. Ga go pelaelo gore seo se tla matlafatša tumelo ya rena lentšung la Modimo la boporofeta. Le gona se tla re nea bohlatse bjo bo kwagalago gabotse bja gore Jesu e be e tloga e le yena Mesia yo a bego a letetšwe ka nako e telele.

Go Boletšwe e sa le Pele ka Bophelo bja ge e sa le yo Monyenyane

6. Hlalosa kamoo Genesi 49:10 e ilego ya phethagatšwa ka gona.

⁶ Mesia o be a tla belegelwa molokong wa Isiraele wa Juda. Ge mopatriareka Jakobo a be a le kgauswi le go hwa gomme a šegofatša barwa ba gagwe o ile a re: “Molamo o ka se tloge go Juda, le molamo wa mmuši o ka se tloge magareng ga dinao tša gagwe, go ba go fihlela ge Shilo a etla; le gona merafo ka moka e tla mo kwa.” (Gen. 49:10) Diithuti tše dintši tša Bajuda tša nakong e fetilego di be di tswalanya mantšu ao le Mesia. Go thoma ka pušo ya Kgoši Dafida wa Mojuda, molamo (bogoši) le molamo wa mmuši (maatla a go laola) di be di le magetleng a moloko wa Juda. Leina “Shilo” le bolela gore “Yoo [Bogoši] e Lego bja Gagwe.” Dikgoši tša Juda di be di tla felela ka “Shilo” yo e bego e tla ba kgoši ya sa ruri yeo e lego Mojabohwa, ka gobane Modimo o boditše Tsedekia, e lego kgoši ya mafelelo ya Juda, gore bogoši bo be bo tla newa yoo a bego a na le tshwanelo ya molao ya go buša. (Hesek. 21:26, 27) Ka morago ga Tsedekia, Jesu e be le setlogolo se nnoši sa Dafida seo se ilego sa holofetšwa bogoši. Pele ga ge Jesu a ka belegwa, morongwa Gabariele o boditše Maria gore: “Jehofa Modimo o tla mo nea sedulo sa bogoši sa Dafida tatagwe, o tla buša e le Kgoši ntlong ya Jakobo ka mo go sa felego gomme Mmušo wa gagwe o ka se fele.” (Luka 1:32, 33) Shilo e swanetše go ba e le Jesu Kriste, yoo e bego e le wa leloko la Juda le la Dafida.—Mat. 1:1-3, 6; Luka 3:23, 31-34.

7. Mesia o belegetšwe kae, gomme ke ka baka la’ng seo se le bohlokwa?

⁷ Mesia o be a tla belegelwa Betlelehema. Moporofeta Mika o ngwadile gore: “Wena Betlelehema Efurata, wena o lego yo monyenyane kudu gare ga metse ya Juda, go wena go tla tšwa yo e tlago go ba mmuši wa Isiraele, yoo setlogo sa gagwe e lego sa mehla ya pele, matšatšing a bogologolo.” (Mika 5:2) Mesia o be a tla belegelwa motseng wa Juda wa Betlelehema, e lego woo go lego molaleng gore o kile wa bitšwa wa Efurata. Gaešita le mmago Jesu, e lego Maria, le tatagwe wa mogodiši, e lego Josefa, ba be ba dula Natsaretha, ba ile ba išwa Betlelehema ke taelo ya Baroma ya gore ba ngwadišwe, e lego moo Jesu a belegetšwego gona ka 2 B.C.E. (Mat. 2:1, 5, 6) A go phethagatšwa ga boporofeta ka tsela e makatšago gakaakang!

8, 9. Ke’ng seo se ilego sa bolelwa e sa le pele ka go belegwa ga Mesia le ditiragalo tšeo di ilego tša latela seo?

⁸ Mesia o be a tla belegwa ke kgarebe. (Bala Jesaya 7:14.) Lentšu la Seheberu e lego bethu·lahʹ le bolela gore “kgarebe,” eupša lentšu le lengwe  e lego (ʽal·mahʹ) le tšwelela go Jesaya 7:14. Gona moo ke gona go ilego gwa porofetwa gore “kgarebe [ha·ʽal·mahʹ]” e tla belega morwa. Lentšu ʽal·mahʹ le šupa go Rebeka wa kgarebe pele ga ge a nyalwa. (Gen. 24:16, 43) Mateo yo a bego a buduletšwe o dirišitše lentšu la Segerika la “kgarebe” (par·theʹnos) ge a be a bontšha gore Jesaya 7:14 e ile ya phethagala ge Jesu a be a belegwa. Bangwadi ba Diebangedi e lego Mateo le Luka ba boletše gore Maria e be e le kgarebe yeo e ilego ya ima ka baka la go šoma ga moya o mokgethwa wa Modimo.—Mat. 1:18-25; Luka 1:26-35.

⁹ Bana ba banyenyane ba be ba tla bolawa ka morago ga go belegwa ga Mesia. Go ile gwa direga selo sa go swana le seo nywagakgolo pejana ga moo ge Farao wa Egipita a laela gore bana ba Baheberu ba bašemane ba lahlelwe ka Nokeng ya Nile. (Ek. 1:22) Eupša seo re tlogago re se hlokomela ke lengwalo la Jeremia 31:15, 16, moo Ragele a hlaloswago a llela barwa ba gagwe bao ba išitšwego “nageng ya lenaba.” Sello sa gagwe se ile sa kwagala le Rama yeo e bego e le kgole, tikologong ya Benjamini ka leboa la Jerusalema. Mateo o bontšha gore mantšu a Jeremia a ile a phethagatšwa ge Kgoši Heroda a be a laela gore go bolawe bana ba bašemane kua Betlelehema le go bapa le yona. (Bala Mateo 2:16-18.) E fo nagana ka bohloko bjo bo bego bo le tikologong yeo!

10. Hlalosa kamoo Hosea 11:1 e ilego ya phethagala ka gona go Jesu.

¹⁰ Go fo swana le Baisiraele, Mesia le yena o be a tlo bitšwa a le Egipita. (Hos. 11:1) Pele ga ge Heroda a ka ntšha taelo yeo e sehlogo, morongwa o ile a laela gore Josefa, Maria le Jesu ba ye Egipita. Ba ile ba dula moo “go fihla Heroda a ehwa. Se se ile sa phethagatša seo se boletšwego ke Jehofa ka moporofeta wa gagwe, ge a be a re: ‘Ka bitša morwa wa ka kua Egipita.’” (Mat. 2:13-15) Therešo ke gore Jesu ka boyena o be a ka se rulaganye ka katlego ditiragalo tše tšeo di boletšwego e sa le pele tša mabapi le go belegwa ga gagwe gotee le tša bophelo bja gagwe ge e be e sa le yo monyenyane.

Mesia o Thoma go Gata Mogato!

11. Motlotšwa wa Jehofa o ile a lokišetšwa bjang tsela?

¹¹ Tsela e be e swanetše go lokišwa pele ga ge go etla Motlotšwa wa Modimo. Maleaki o boletše e sa le pele gore “moporofeta Eliya” o be a tla dira modiro wo, a lokišetša dipelo tša batho ka go tla ga Mesia. (Bala Maleaki 4:5, 6.) Jesu ka boyena o boletše gore “Eliya” yo, e be e le Johane Mokolobetši. (Mat. 11:12-14) Le gona Mareka o bontšhitše gore bodiredi bja Johane bo be bo phethagatša boporofeta bja Jesaya. (Jes. 40:3; Mar. 1:1-4) Jesu ga se a ka a rulaganya gore Johane a dire modiro o swanago le wa Eliya wa gore a Mo kgorele ditsela. Modiro wa “Eliya” yo yo go bego go boletšwe ka yena e sa le pele o ile wa dirwa ka go dumelelana le thato ya Modimo e le tsela ya gore Mesia a tle a tsebje.

12. Ke modiro ofe woo o re thušago go hlaola Mesia?

¹² Modiro wo o tšwago go Modimo o thuša go hlaola Mesia. Ge Jesu a be a le sinagogeng ya kua Natsaretha, e lego motse woo a godišeditšwego go wona, o ile a bala lengwalo la go phuthwa la Jesaya gomme a bolela gore mantšu ao a šupa go yena ge a re: “Moya wa Jehofa o go nna, gobane o ntloleditše go tsebiša badiidi ditaba tše dibotse; o nthomile gore ke bolele tokologo go mathopša le go bolela gore difofu di bone gape, go lokolla ba ba gateletšwego, go bolela ngwaga wo o amogelegago wa Jehofa.” Ka ge e be e le Mesia wa kgonthe, Jesu o be a swanelega go bolela gore: “Lehono lengwalo le leo le sa tšwago go le kwa le phethagetše.”—Luka 4:16-21.

13. Bodiredi bja Jesu bja phatlalatša kua Galilea bo ile bja bolelwa bjang e sa le pele?

¹³ Bodiredi bja Mesia bja phatlalatša kua Galilea bo ile gwa bolelwa e sa le pele. Jesaya o ngwadile mabapi le “naga ya Sebulone le naga ya Nafutali . . . e lego Galilea ya ditšhaba,” gore: “Batho bao ba bego ba sepela leswiswing ba bone seetša se segolo. Ge e le bao ba dulago nageng ya leswiswi le lesoleso, ba hlabetšwe ke seetša.” (Jes. 9:1, 2) Jesu o thomile bodiredi bja gagwe bja phatlalatša kua Galilea, a dula Kaperenaume, moo bontši bja badudi ba Sebulone  le Nafutali ba bego ba thabela mehola ya seetša sa moya seo a bego a ba tlišeditše sona. (Mat. 4:12-16) Gona moo Galilea, Jesu o ile a nea polelo ya gagwe e šišinyago kgopolo e bitšwago Thuto ya Thabeng, o ile a kgetha baapostola ba gagwe, a dira mohlolo wa gagwe wa mathomo, e bile go bonagala a iponagaditše go barutiwa ba gagwe ba 500 ka morago ga tsogo ya gagwe gona moo. (Mat. 5:1–7:27; 28:16-20; Mar. 3:13, 14; Joh. 2:8-11; 1 Bakor. 15:6) Ka go re’alo o ile a phethagatša boporofeta bja Jesaya ka go bolela molaetša wa gagwe “[nageng] ya Sebulone le [nageng] ya Nafutali.” Go ba gona, Jesu o ile a bolela molaetša wa Mmušo le mafelong a mangwe a Isiraele.

Mediro e Mengwe ya Mesia e Ile ya Bolelwa e sa le Pele

14. Psalme 78:2 e ile ya phethagatšwa bjang ke Jesu?

¹⁴ Mesia o be a tla bolela a diriša dipapišo, goba diswantšho. Mopsalme Asafa o opetše ka gore: “Ke tla bula molomo wa ka ka hlaba diema.” (Ps. 78:2) Re tseba bjang gore se se ile sa šupa go Jesu ka tsela ya boporofeta? Mateo o re botša gore go bjalo. Ka morago ga go bolela ka diswantšho tšeo Jesu a ilego a swantšha Mmušo le komelo le thoro ya mosetata yeo e bego e gola, Mateo o bolela gore: “Ka kgonthe [Jesu] o be a sa bolele le bona ge e se ka diswantšho, e le gore go phethagale se se bego se boletšwe ka moporofeta yo a itšego: ‘Ke tla bula molomo wa ka ka diswantšho; ke tla tsebatša dilo tše di bipilwego ga e sa le go tloga go theweng ga lefase.’” (Mat. 13:31-35) Go diriša diema, goba dipapišo, e be e le o mongwe wa mekgwa yeo Jesu a bego a e diriša go ruta ka katlego.

15. Bontšha kamoo Jesaya 53:4 e ilego ya phethagala ka gona.

¹⁵ Malwetši a rena a be a tla rwalwa ke Mesia. Jesaya o boletše e sa le pele gore: “Ruri malwetši a rena o ile a a rwala; ge e le mahloko a rena o a šikere.” (Jes. 53:4) Mateo o bontšhitše gore ka morago ga gore Jesu a fodiše mmatswale wa Petro, o ile a fodiša ba bangwe e le gore “go phethagale seo se boletšwego ka Jesaya moporofeta, ge a re: ‘Yena o tšere malwetši a rena, a rwala mefokolo ya rena.’” (Mat. 8:14-17) Yeo e fo ba tiragalo e nngwe ya tše dintši tšeo go begilwego ka tšona tša ge Jesu a be a fodiša balwetši.

16. Moapostola Johane o bontšhitše bjang gore Jesu o phethagaditše Jesaya 53:1?

¹⁶ Go sa šetšwe dilo tše dibotse tšeo Mesia a bego a tla di dira, batho ba bantši ba be ba ka se mo dumele. (Bala Jesaya 53:1.) Ge moapostola Johane a be a bontšha gore boporofeta bjo bo ile bja phethagala, o ngwadile gore: “Gaešita le ge [Jesu] a dirile dipontšho tše dintši gakaakaa pele ga bona, ba be ba sa dumele go yena, moo go ilego gwa phethagala lentšu la moporofeta Jesaya le a le boletšego ge a re: ‘Jehofa, ke mang yo a dumetšego seo re se kwelego? Le gona Jehofa o utolletše bomang matla a gagwe?’” (Joh. 12:37, 38) Le nakong ya bodiredi bja moapostola Paulo, ke batho ba sego kae bao ba ilego ba dumela ditaba tše dibotse tša mabapi le Jesu, yena Mesia.—Baroma 10:16, 17.

17. Johane o boleletše bjang Psalme 69:4?

¹⁷ Mesia o be a tla hloiwa ka ntle le lebaka. (Ps. 69:4) Moapostola Johane o tsopola mantšu a Jesu ge a re: “Ge nkabe ke se ka . . . direla [batho ba] mediro ye go sego motho yo a e dirilego, ba ka be ba se na sebe; eupša bjale ba mpone gomme ba ntlhoya, nna gotee le Tate. Eupša se se diregile gore go phethege lentšu leo le ngwadilwego Molaong wa bona ge le re: ‘Ba ntlhoile ka ntle le lebaka.’” (Joh. 15:24, 25) Gantši lentšu “Molao” le šupa go Mangwalo ka moka. (Joh. 10:34; 12:34) Dipego tša diebangedi di hlatsela gore Jesu o be a hloilwe, kudukudu ke baetapele ba bodumedi bja Sejuda. Go oketša moo, Kriste o itše: “Lefase ga le na lebaka la go le hloya, eupša le hloile nna, gobane ke le hlatsela gore mediro ya lona ke e kgopo.”—Joh. 7:7.

18. Ke selo sefe se sengwe seo re tlago go se ahlaahla seo se tla matlafatšago kgodišego ya rena ya gore Jesu ke Mesia?

¹⁸ Balatedi ba Jesu ba lekgolong la pele la nywaga ba be ba kgodišegile gore Jesu e be e le Mesia, ka gobane o ile a phethagatša ka botlalo diporofeto tša mabapi le Mesia tšeo di hwetšwago Mangwalong a Seheberu. (Mat. 16:16)  Go etša ge re bone, tše dingwe tša tšona di phethagetše nakong ya ge Jesu wa Natsaretha e be e sa le yo monyenyane le nakong ya bodiredi bja gagwe. Diporofeto tše di oketšegilego tša mabapi le Mesia di tla ahlaahlwa sehlogong se se latelago. Ga go pelaelo gore go naganišiša ka tšona gomme ra rapela go tla matlafatša kgodišego ya rena ya gore Jesu Kriste ke Mesia yo a ilego a kgethwa ke Tatago rena wa legodimong, Jehofa.

[Mongwalo wa tlase]

O be o tla Araba Bjang?

• Ke diporofeto dife tšeo di ilego tša phethagala mabapi le matswalo a Jesu?

• Mesia o ile a lokišetšwa bjang tsela e sa le pele?

• Mantšu a boporofeta ao a lego go Jesaya kgaolo 53 a ile a phethagala bjang go Jesu?

[Dipotšišo tša Thuto]