Dipotšišo tše Tšwago go Babadi

Na go a kgonega go bolela ka go lebanya gore ke diporofeto tše kae tša mabapi le Mesia tšeo di lego ka Mangwalong a Seheberu?

Go ithuta ka kelohloko Mangwalo a Seheberu go re thuša go lemoga diporofeto tše dintši tšeo di ilego tša phethagala ka Jesu Kriste. Diporofeto tše di boletše ditaba tša mabapi le setlogo sa Mesia, nako yeo a bego a tla tšwelela ka yona, seo a bego a tlo se dira, kamoo a bego a tla swarwa ka gona le boemo bja gagwe thulaganyong ya Jehofa Modimo. Di kopana go bopa seswantšho se segolo seo se re thušago go hlaola Jesu e le Mesia. Lega go le bjalo, re swanetše go ba šedi ge e ba re leka go tseba gore ke diporofeto tše kae tša mabapi le Mesia tšeo di hwetšwago ka Mangwalong a Seheberu.

Batho ba bantši ga ba dumelelane tabeng ya gore ke boporofeta bofe bjo bo lego mabapi le Mesia le gore ke bofe bjo bo sego mabapi le yena. Ka pukung ya gagwe ya The Life and Times of Jesus the Messiah, Alfred Edersheim o ngwadile gore dingwalwa tša boRabi ba bogologolo di kgethile dikarolo tše 456 go tšwa Mangwalong a Seheberu e le tšeo di lebišitšwego go Mesia, gaešita le ge tše dintši tša tšona di sa bolele ka go lebanya ka Mesia. Go lebeledišiša dikarolo tše tše 456 ka šedi go rotoša dipotšišo mabapi le ge e ba tše dingwe tša tšona di be di porofeta ka Jesu Kriste. Ka mohlala, Edersheim o boletše gore Bajuda ba be ba lebelela Genesi 8:11 e bolela ka Mesia. Ba be ba dumela gore “letlakala la mohlware leo le tlilego le leeba, le be le e tšwa Thabeng ya Mesia.” Mongwadi yo o boletše gape le ka Ekisodo 12:42. Ge a hlalosa tsela e fošagetšego yeo Bajuda ba bego ba kwešišitše temana ye ka yona, o ngwadile gore: “Ka ge Moshe a tšwile leganateng, le Mesia o be a tla tšwa Roma.” Ka ntle le pelaelo diithuti tše dintši le batho ba bangwe ba ka hwetša go le thata go tswalanya Jesu Kriste le ditemana tše tše pedi gotee le ditlhaloso tšeo tše di fošagetšego.

Le ge re ka lebeledišiša feela diporofeto tšeo di ilego tša phethagala ka Jesu Kriste, re ba le bothata bja go dumelelana ka palo e lebanyago. Tšea ka mohlala Jesaya kgaolo 53, yeo e nago le dibopego tše mmalwa tša diporofeto tša mabapi le Mesia. Jesaya 53:2-7 e porofeta gore: “Ga a na ponagalo e kgahlišago . . . O ile a nyatšwa le go phengwa ke batho . . . Malwetši a rena o ile a a rwala . . . O ile a hlabja ka baka la go tshela ga rena molao . . . O ile a tlišwa tlhabong go etša nku.” Na karolo ye ka moka ya Jesaya 53 e swanetše go balwa e le boporofeta bjo tee bja mabapi le Mesia, goba na se sengwe le se sengwe sa dibopego tše tša mabapi le Mesia se swanetše go lebelelwa e le boporofeta bjo bo ikemetšego?

Le gona, ela hloko Jesaya 11:1, yeo e rego: “Go tlo tšwa thabe kutung ya Jese; medung ya gagwe go tla hloga lehlogedi le le enywago.” Boporofeta bjo bo tšwelela gape ka mantšu a swanago go temana 10. Na re swanetše go lebelela ditemana tše e le diporofeto tše pedi tšeo di ikemetšego goba e le boporofeta bjo tee bjoo bo boeleditšwego? Go molaleng gore phetho yeo e ka fihlelelwago ka Jesaya kgaolo 53 le Jesaya kgaolo 11 e ka kgoma palo ya diporofeto tšeo di lego mabapi le Mesia.

Ka gona, re dira gabotse go phema go bolela palo e lebanyago ya diporofeto tša mabapi le Mesia tša ka Mangwalong a Seheberu. Mokgatlo wa Jehofa o gatišitše malokelelo ao a bontšhago diporofeto tše dintši tša mabapi le Jesu le go phethagatšwa ga tšona. * Malokelelo a a ka re thuša le go re kgothatša thutong ya rena ya motho ka noši le ya lapa gotee le bodireding bja rena bja phatlalatša. Go oketša moo, diporofeto tše dintši tša mabapi le Mesia, go sa šetšwe palo ya tšona, di re nea bohlatse bjo bo tiilego bja gore Jesu ke Kriste, goba Mesia.

[Mongwalo wa tlase]