Ditšhišinyo tša Borapedi bja Lapa le Thuto ya Motho ka Noši

MATHOMONG a 2009, diphuthego tša Dihlatse tša Jehofa lefaseng ka bophara di ile tša fetoša lenaneo la tšona la diboka. Diboka tše pedi tša gare ga beke di ile tša kopanywa, gomme bohle ba ile ba kgothaletšwa go diriša a mangwe a mantšiboa a gare ga beke bakeng sa borapedi bja lapa goba thuto ya motho ka noši. Na o šetše o diriša tokišetšo ye e mpsha? Na e tloga e go tšwela mohola?

Ba bangwe ba be ba ipotšiša gore ba swanetše go diriša kgatišo efe nakong ya borapedi bja lapa. Sehlopha se Bušago ga se sa ikemišetša go hloma mokgwa o tee woo o ka latelwago ke malapa ka moka. Ka ge maemo a fapana, ke mo go swanetšego gore hlogo ya lapa goba motho yo mongwe le yo mongwe a lekole kamoo tiragalo ye ya beke le beke e ka dirwago ka gona ka tsela e kaone.

Ba bangwe ba be ba dutše ba lokišetša diboka tša phuthego, eupša borapedi bja lapa ga se bja swanela go felela moo. Ba bangwe ba be ba dutše ba bala, ba ahlaahla gaešita le go diragatša dipego tša Mangwalo, kudukudu bakeng sa go hola bana ba banyenyane. Ga se ka mehla go lego bohlokwa goba go nyakegago gore go dirišwe mokgwa wa dipotšišo le dikarabo, bjalo ka ge go dirwa dibokeng. Boemo bja go iketla gantši bo dira gore dipoledišano e be tše di agago le tšeo go abelanwago dikgopolo. Boemo bjo bjalo bo godiša bokgoni bja motho bja go nagana, e bile bo ka dira gore tiragalo e gopolwe le go thabiša bohle.

Tate yo mongwe wa bana ba bararo o ngwala gore: “Seo re bego re se dira gantši se be se theilwe kudu mmalong wa Beibele. Yo mongwe le yo mongwe wa rena o bala dikgaolo tšeo e sa le pele, bana ba kgetha ditaba tšeo ba ka dirago nyakišišo ka tšona gomme ba hlalosa seo ba se hweditšego nyakišišong ya bona. Gantši Michael [wa nywaga e šupa] o thala seswantšho goba a ngwala taodišo e kopana. David le Kaitlyn [ba nywaga e 13 le 15] ba ka ngwala ka tiragalo ya Beibele ba ipeile boemong bjoo ekego ba bona tiragalo yeo. Ka mohlala, ge re be re bala tlhathollo ya Josefa ya ditoro tša moapei wa dinkgwa wa Farao le motšheledi wa gagwe wa dino, Kaitlyn o ile a ngwala taodišo a le bjalo ka mogolegwa yo a bogetšego ge tiragalo yeo e direga.”—Gen., kgao. 40.

Gantši maemo a a fapana. Seo se šomelago motho yo mongwe goba lapa le lengwe se ka no se šomele ba bangwe. Lepokisi leo le sepedišanago le sehlogo se le bontšha ditšhišinyo tše dingwe tšeo le ka di dirišago nakong ya lena ya borapedi bja lapa goba thutong ya motho ka noši. Ga go pelaelo gore o tla nagana tše dingwe tše dintši.

[Box/​Picture on pages 6, 7]

 Bakeng sa malapa ao a nago le bana bao ba lego mahlalagading:

• Balang gomme le ahlaahleng puku ya Dipotšišo tša Bafsa le Dikarabo tše Šomago.

• Inaganeng eka le phela mehleng ya Beibele. (Bona Morokami wa May 15, 1996, letlakala 14, dirapa 17-18.)

• Bolelang ka dipakane tša nako e telele le tša nako e kopana.

• Nako le nako, bogelang gomme le ahlaahle bidio ye e theilwego Beibeleng.

• Hlahlobang sehlogo sa Morokami sa “Bakeng sa Bafsa.”

Bakeng sa banyalani bao ba se nago bana:

• Ahlaahlang dikgaolo 1, 3, 11-16 tša puku ya Sephiri sa Lethabo la Lapa.

• Abelanang seo le se hweditšego ge le be le dira nyakišišo ka dintlha tša mmalo wa Beibele.

• Lokišetšang Thuto ya Beibele ya Phuthego goba Thuto ya Morokami.

• Ahlaahlang ditsela tša go katološa bodiredi bja lena le le banyalani.

Bakeng sa bana babo rena le dikgaetšedi bao ba sego lenyalong goba go bao ba lego malapeng a aroganego ka tumelo:

• Ithuteng dikgatišo tše difsa tšeo le di hweditšego dikopanong tša selete.

• Balang di-Yearbook tša morago bjale le tša kgale.

• Dirang nyakišišo ka dipotšišo tšeo di tlwaelegilego tšhemong ya gabo lena.

• Lokišetšang dithero bakeng sa bodiredi bja tšhemo.

Bakeng sa malapa ao a nago le bana ba banyenyane:

• Diragatšang ditiragalo tša Beibele.

• Bapalang dipapadi tšeo di dirago gore motho a nagane, tše bjalo ka tšeo di lego go letlakala 30 le 31 la Awake!

• Ka nako e nngwe, dirang selo sa boikgopolelo. (Bona sehlogo seo se rego: “Go Ithuta—Beibele Serapeng sa Diphoofolo!” ka go Phafoga! ya March 8, 1996, matlakala 16-19.)

• Hlahlobang sehlogo seo se rego: “Ruta Bana ba Gago” seo se tšwelelago ka go Morokami.