Go Bala Beibele—Ke Selo Seo se Mmatlafaditšego Bophelong

Ka ge go anega Marceau Leroy

KE THOMILE go balela ka sephiring ke le ka phaphošing ya ka mantšu a rego: “Mathomong Modimo o hlodile magodimo le lefase.” Ke ka baka la’ng ke be ke bala ka sephiring? Tate yo e lego moilaModimo wa kgonthe o be a ka se dumele go bona ke swere puku yeo e bego e le ka diatleng tša ka—Beibele.

Ke be ke se ka ka ka bala Beibele pele ga mo, gomme mantšu ao a go bula a Genesi a nkgomile pelo. Ke ile ka nagana gore: ‘Ye ke tlhaloso yeo e dumelelanago le melao ya tlhago yeo e bego e dutše e mmakatša!’ Ka ge ke be ke kgahlwa ke seo ke bego ke se bala, ke ile ka bala go tloga ka iri ya seswai bošego go fihla ka iri ya bone mesong. Ka go re’alo ka thoma mokgwa wa bophelo ka moka wa go bala Lentšu la Modimo. E re ke hlalose kamoo go bala Beibele go bilego mothopo wa matla bophelong bja ka ka moka.

“O tlo e Bala Letšatši le Letšatši”

Ke belegwe ka 1926, kua Vermelles, motsaneng wa moepo wa malahla ka leboa la Fora. Nakong ya ntwa ya bobedi ya lefase, malahla a be a lebelelwa e le selo se bohlokwa kudu setšhabeng. Ka gona, ka ge ke be ke šoma moepong wa malahla, ke be ke sa letelwa gore ke tsenele tirelo ya tša bohlabani. Lega go le bjalo, e le gore ke kaonefatše bophelo bja ka, ke ile ka thoma go ithuta radio le mohlagase, e lego seo se ilego sa gatelela go nna go dumelelana ga melao ya tlhago. Ge ke be ke na le nywaga e 21, morutwanagotee le nna o ile a nnea Beibele, a re: “Ke puku yeo e swanetšwego go balwa.” Ge ke be ke fetša go e bala, ke be ke kgodišegile gore Beibele ke Lentšu la Modimo, ke selo se bohlokwa kudu bathong.

Ka ge ke be ke nagana gore le baagišani ba ka ba tla thabela go bala Beibele, ke ile ka ba hweletša dikopi tše seswai. Seo se mmakaditšego ke gore ba ile ba nkwera le go nkganetša. Ba leloko bao ba dumelago go ditumelakhwele, ba ile ba ntemoša ka gore: “Ge o ka thoma go bala puku ye, o tlo e bala letšatši le letšatši!” Ke tloga ke ile ka e bala, gomme ga se ka ka ka itsholela go dira seo. E ile ya ba mokgwa wa ka wa bophelo.

Ge baagišani ba bangwe ba lemoga gore ke rata Beibele, ba ile ba thoma go nnea dikgatišo tše dingwe tšeo ba bego ba di neilwe ke Dihlatse tša Jehofa. Dipukwana tše bjalo ka One World, One Government * (yeo e bontšhitšwego mo ka Sefora) di be di hlalosa lebaka leo Beibele e bolelago gore Mmušo wa Modimo ke wona kholofelo e nnoši bakeng sa batho ka moka. (Mat. 6:10) Ke be ke tloga ke ikemišeditše go feta le ge e le neng pele go abelana le batho ba bangwe kholofelo ye.

Motho wa pele yo a ilego a amogela Beibele yeo ke bego ke mo nea yona ke Noël, mogwera wa ka wa go tloga bjaneng. Ka ge e be e le Mokatholika yo mafolofolo, o ile a rulaganya gore re kopane le  monna yo a bego a ithutela boruti. Ke ile ka ikwa ke boifa, lega go le bjalo ke be ke badile go Psalme 115:4-8 le Mateo 23:9, 10 gore Modimo ga a kgahlwe ke go dirišwa ga diswantšho borapeding le go bitšwa ga baruti ka direto tša bodumedi. Se se ile sa nnea sebete sa go lwela tumelo ya ka e mpsha. Ka baka leo, Noël o ile a amogela therešo, gomme go fihla le lehono e sa dutše e le Hlatse e botegago.

Le gona ke ile ka etela kgaetšedi ya ka. Monna wa gagwe o be a na le dipuku tšeo di bolelago ka meoya gomme o be a tlaišwa ke batemona. Le ge mathomong ke ile ka ikwa ke se na matla, ditemana tša Beibele tše bjalo ka Baheberu 1:14 di ile tša nkgodiša gore barongwa ba Jehofa ba be ba nthekga. Ge molamo wa ka a be a diriša melao ya motheo ya Beibele gomme a lahla selo se sengwe le se sengwe seo se tswalanago le meoya, o ile a kgona go itokolla tutuetšong ya batemona. Yena le kgaetšedi ya ka ba ile ba ba Dihlatse tše mafolofolo.

Ka 1947, Hlatse ya Moamerika e lego Arthur Emiot e ile ya nketela. Ka ge ke be ke thabile, ke ile ka mmotšiša moo Dihlatse di bego di kopanela gona. O ile a mpotša gore go be go na le sehlopha kua Liévin, moo e ka bago bokgole bja dikhilomithara tše lesome. Gaešita le dipaesekela di be di sa hwetšagale gabonolo mehleng yeo, ka gona ke ile ka swanelwa ke go sepela ka maoto go ya le go boa dibokeng. Modiro wa Dihlatse tša Jehofa o be o thibetšwe ka nywaga e seswai Fora. Go be go na le Dihlatse tše 2 380 feela nageng ka moka—bontši bja tšona e le bafaladi ba tšwago Poland. Eupša ka September 1, 1947, modiro wa rena Fora o ile wa amogelwa semolao gape. Ofisi ya lekala e ile ya tsošološwa gape Villa Guibert kua Paris. Ka ge go be go se na le ge e le mmulamadibogo o tee kua Fora, tokollo ya December ya Informant (ga bjale e bitšwa Tirelo ya Rena ya Mmušo) e ile ya dira boipiletšo bja gore go nyakega babulamadibogo ba ka mehla, bao ba bego ba ka bolela diiri tše 150 ka kgwedi. (Diiri tšeo di ilego tša fokotšwa go ba diiri tše 100 ka 1949.) Ka go dumelelana ka mo go feletšego le mantšu a Jesu ao a lego go Johane 17:17 a gore “lentšu la [Modimo] ke therešo,” ke ile ka kolobetšwa ka December 1948, gomme ka December 1949 ka ba mmulamadibogo.

Go tšwa Kgolegong go Boela Toropong ya Dunkerque

Kabelo ya ka ya mathomo kua Agen, yeo e lego ka borwa bja Fora, e bile e kopana. Ka ge ke be ke tlogetše mošomo wa meepong, ke be ke swanetše go tsenela tirelo ya tša bohlabani. Ke ile ka gana go tsenela tirelo ya tša bohlabani, ka gona ke ile ka golegwa. Le ge ke be ke sa dumelelwa go ba le Beibele, ke ile ka kgona go hwetša matlakala a sego kae a puku ya Dipsalme. Ke kgothaditšwe ke go a bala. Ge ke be ke lokollwa, ke be ke swanetše go dira phetho ye: Na ke swanetše go tlogela tirelo ya nako e tletšego e le gore ke hwetše madulo le mošomo wa boiphedišo? Le gona moo gape, seo ke se badilego Beibeleng se ile sa nthuša. Ke ile ka naganišiša ka mantšu a Paulo a lego go Bafilipi 4:11-13 ao a rego: “Dilong tšohle ke na le matla ka baka la yo a mphago matla.” Ke ile ka fetša le monagano gore ke tla tšwela pele ke bula madibogo. Ka 1950, ke ile ka amogela kabelo e mpsha—ya go ya Dunkerque, e lego toropo yeo ke ilego ka bolela ditaba tše dibotse go yona pele.

Ge ke fihla moo ke be ke se na selo. Toropo e be e hlagaditšwe ke Ntwa ya Bobedi ya Lefase, gomme madulo a be a sa hwetšagale ga bonolo. Ke ile ka phetha ka go etela lapa leo ke bego ke le ruta Beibele, gomme mma wa lapa leo o be a thabile kudu moo a ilego a ba a re: “Morena Leroy, ke thabile kudu gore o lokolotšwe! Monna wa ka o re ge nkabe go na le banna ba bantši bao ba swanago le wena, ntwa nkabe e sa ka ya ba gona.” Ba be ba na le ntlo ya baeng yeo e hirišwago, ka gona ba ile ba re ke dule go yona go ba go fihla ge go etla baeng. Lona letšatšing leo, mogolo wa Arthur Emiot e lego Evans o ile a nnea mošomo. * E be e le toloki boemakepeng gomme o be a nyaka motho yo a bego a ka hlokomela sekepe bošego. O ile a ntsebiša yo mongwe wa bahlankedi ba bagolo ba sekepe. Ge ke be ke lokollwa kgolegong, ke be ke otile ke lekana le lehlokwa. Ge Evans a sa hlalosa lebaka leo le dirilego gore ke ote, mohlankedi yoo o ile a mpotša gore ke ye go itšeela dijo ka setšidifatšing. Lona letšatšing leo, ke ile ka hwetša madulo, mošomo le dijo! Go bota ga ka mantšu a Jesu ao a begilwego go Mateo 6:25-33 ruri go ile gwa matlafala.

 Ge baeti ba be ba thoma go tla, nna le Simon Apolinarski yo a bego a bula madibogo le nna re ile ra swanela ke go hwetša madulo go gongwe, eupša re be re ikemišeditše go dula kabelong ya rena. Re ile ra newa madulo setaleng sa kgale sa dipere, moo re bego re robala materaseng a mahlaka. Re be re fetša letšatši ka moka re le tirelong. Re ile ra botša mong wa setala ditaba tše dibotse, gomme e ile ya ba yo mongwe wa ba bantši bao ba ilego ba amogela therešo. Go se go ye kae ke ge go tšwelela sehlogo ka kuranteng, seo se bego se lemoša badudi ba Dunkerque ka “modiro wa Dihlatse tša Jehofa wo o bego o gola ka lebelo mo tikologong.” Lega go le bjalo, Dihlatse tšeo di bego di le moo e be e le nna le Simon gotee le bagoeledi ba ka tlalago seatla! Ge re lebane le mathata, re be re kgothatšwa ke go naganišiša ka kholofelo ya rena ya Bokriste le go ela hloko tsela yeo Jehofa a ilego a re hlokomela ka yona. Ka 1952 ge kabelo ya ka e be e fetošwa, Dunkerque go be go na le bagoeledi ba 30 ba mafolofolo.

Go Matlafaletšwa Boikarabelo bjo Bofsa

Ka morago ga ge ke feditše nako e kopana ke le motseng wa Amiens, ke ile ka kgethelwa go ba mmulamadibogo yo a kgethegilego gore ke hlankele Boulogne-Billancourt, e lego motse woo o lego kantlenyana ga Paris. Ke be ke na le dithuto tša Beibele tše dintši, gomme tše dingwe tša tšona di ile tša tsenela tirelo ya nako e tletšego le modiro wa boromiwa. Lesogana le lengwe leo le bitšwago Guy Mabilat, le ile la amogela therešo gomme la ba la tla la hlankela e le molebeledi wa tikologo le molebeledi wa selete. Ka morago, le ile la okamela modiro ge go be go agwa moago wa bogatišetšo Bethele ya lehono kua Louviers, yeo e lego dikhilomithara tše mmalwa go tloga Paris. Go bolela ka Beibele ka mehla ge ke le bodireding go ile gwa nweletša Lentšu la Modimo mogopolong wa ka, gwa ntira gore ke thabe le go nthuša go kaonefatša bokgoni bja ka bja go ruta.

Ke moka kapejana ka 1953, ke ile ka kgethelwa go ba molebeledi wa tikologo kua Alsace-Lorraine, tikologong yeo magareng ga 1871 le 1945 e ilego ya thopša gabedi ke Jeremane. Ka baka leo, ke ile ka swanelwa ke go ithuta Sejeremane. Ge ke be ke thoma go ba molebeledi wa tikologo, go be go na le dikoloi tše sego kae, dithelebišene tše mmalwa goba metšhene e mmalwa ya go tlanya tikologong yeo e bile go se na diradio goba dikhomphutha. Lega go le bjalo, bophelo bja ka bo be le bonolo eupša bo sa nyamiše. Ge e le gabotse, e be e le nako e thabišago kudu. Go latela keletšo ya Beibele ya gore re boloke ‘mahlo a rena a lokile’ go be go bolela gore go be go na le dilo tše mmalwa tšeo di šitišago motho go hlankela Jehofa ge go bapetšwa le lehono.—Mat. 6:19-22.

Kopanong ya “Mmušo o Fenyago” yeo e bego e swaretšwe kua Paris ka 1955 e bile tiragalo yeo nka se kego ka e lebala. Gona moo ke ile ka kopana le Irène Kolanski yoo e bego e tla ba mosadi wa ka; yena o thomile tirelo ya nako e tletšego ngwaga pele ga ka. Batswadi ba gagwe ba Mapolishi e be e le Dihlatse tša nako e telele tše mafolofolo. Ge ba  be ba le Fora ba ile ba etelwa ke Adolf Weber. O be a hlokomela serapana sa Ngwanabo rena Russell gomme o be a tlile Yuropa go tla go bolela ditaba tše dibotse. Nna le Irène re ile ra nyalana ka 1956, gomme o ile a ba le nna modirong wa tikologo. Ruri o nthekgile kudu ka nywaga e mentši!

Ka morago ga nywaga e mebedi, ke ile ka diragalelwa ke selo se sengwe seo ke bego ke sa se letela—ke ile ka kgethelwa go ba molebeledi wa selete. Lega go le bjalo, ka ge go be go se na bana babo rena ba bantši ba swanelegago, ke ile ka tšwela pele ke etela diphuthego go swana le balebeledi ba tikologo. Ruri ke be ke swaregile kudu! Go tlaleletša go diiri tše 100 tšeo ke bego ke swanetše go di fetša ke le modirong wa go bolela ditaba tše dibotse, beke e nngwe le e nngwe ke be ke swanetše go nea dipolelo, ke etele dihlopha tše tharo tša thuto ya puku, ke hlahlobe dipego le go lokišetša dipego tša tirelo. Ke be ke tla hwetša kae nako ya go bala Lentšu la Modimo? Ke ile ka hwetša tharollo e le e tee feela—ke ile ka ntšha matlakala ka Beibeleng ya ka ya kgale gomme ka dula ke swere a mangwe a ona. Ge ke be ke swanetše go letela motho yo re bego re kwane go tlo bonana ka nako e itšego, ke be ke ntšha matlakala ao gomme ke a bala. Dinako tšeo tše kopana tša go lapološa moyeng di ile tša matlafatša phetho ya ka ya go tšwela pele ka kabelo ya ka.

Ka 1967, nna le Irène re ile ra laletšwa go ba ditho tša nako e tletšego tša lapa la Bethele kua Boulogne-Billancourt. Ke ile ka thoma go šoma Lefapheng la Tirelo, gomme ka morago ga nywaga ya ka godimo e 40, ke sa na le tokelo ya go šoma moo. Karolo e thabišago ya modiro wa ka e bile go araba mangwalo ao a bego a botšiša dipotšišo tša Beibele. Ruri ke thabela go nyakišiša Lentšung la Modimo le ‘go lwela ditaba tše dibotse’! (Bafil. 1:7) Le gona ke thabela go swara temana ya letšatši borapeding bja mesong pele ga sefihlolo. Ka 1976, ke ile ka kgethelwa go hlankela ke le setho sa Komiti ya Lekala kua Fora.

Tsela e Kaone ya go Phela

Gaešita le ge ke ile ka feta mathateng, nako e ntlhohlago kudu bophelong ke ge ga bjale ke tšofetše gomme mathata a tša maphelo a šitiša seo nna gotee le Irène re ka kgonago go se dira. Lega go le bjalo, go bala le go ithuta Lentšu la Modimo re le gotee go boloka kholofelo ya rena e phela. Re thabela go diriša pese go ya tšhemong ya phuthego ya rena gomme ra boledišana le batho ka kholofelo ye ya rena. Go ba ga rena le phihlelo ya nywaga e kopantšwego e 120 re le tirelong ya nako e tletšego go re tutueletša go kgothaletša ka pelo ka moka batho ba bangwe bao ba nyakago go phegelela bophelo bjo bo thabišago le bjo kgahlišago le bjo bo nago le mohola gore ba latele tsela ye. Ge kgoši Dafida a be a ngwala mantšu a Psalme 37:25, o be a “tšofetše,” eupša go swana le yena, le nna “ga se ka bona le ge e le mang yo a lokilego a tlogetšwe a le feela.”

Bophelong bja ka ka moka, Jehofa o mmatlafaditše ka Lentšu la gagwe. Ba leloko ba boletše nywaga e 60 e fetilego gore go bala Beibele e tlo ba mokgwa wa ka wa bophelo ka moka. Ba be ba nepile. Go bile bjalo—seo e ile ya ba mokgwa wa letšatši le letšatši woo ke sa kago ka itsholela wona!

[Mengwalo ya tlase]

[Seswantšho go letlakala 5]

Nna le Simon

[Seswantšho go letlakala 5]

Beibele ye e swanago le Beibele ya ka ya mathomo

[Seswantšho go letlakala 5]

Ge ke be ke hlankela ke le molebeledi wa selete

[Seswantšho go letlakala 6]

Letšatšing la lenyalo la rena

[Seswantšho go letlakala 6]

Nna le Irène re thabela go bala le go ithuta Lentšu la Modimo