Na o Tsebja ke Jehofa?
Na o Tsebja ke Jehofa?
“Jehofa o tseba ba gagwe.”—2 TIM. 2:19.
1, 2. (a) Jesu o be a tshwenyegile ka’ng? (b) Ke dipotšišo dife tšeo re swanetšego go di ahlaahla?
KA LETŠATŠI le lengwe mofarisei o ile a tla go Jesu gomme a mmotšiša gore: “Taelo e kgolokgolo Molaong wa Moshe ke efe?” Jesu o ile a mo araba ka gore: “O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.” (Mat. 22:35-37) Jesu o be a rata Tatagwe wa legodimong kudu gomme o ile a phelela mantšu ao a gagwe. Le gona Jesu o be a tshwenyegile ka boemo bja gagwe pele ga Jehofa, ka gona o ile a bontšha seo ka tsela yeo a ilego a phela ka yona ka potego. Ke ka baka leo pejana ga lehu la gagwe a bego a ka bolela gore Modimo o be a mo tseba e le yoo a ilego a theetša ditaelo tša Gagwe ka potego. Ka go re’alo Jesu o ile a dula a le leratong la Jehofa.—Joh. 15:10.
2 Ba bantši lehono ba bolela gore ba rata Modimo. Ga go pelaelo gore le rena re ipala gare ga bona. Lega go le bjalo, dilo tše bohlokwa tšeo re swanetšego go di hlahloba ke tše: ‘Na ke tsebja ke Modimo? Jehofa o ntebelela bjang? Na batho ba ntseba ke le wa gagwe?’ (2 Tim. 2:19) E tloga e le tokelo e kgolo go naganišiša ka tswalano yeo ya kgauswi le Mmuši wa legohleng!
3. Ke ka baka la’ng ba bangwe ba belaela ge e ba ba tsebja ke Jehofa, gomme ke’ng seo se ka ba thušago go lwantšha maikwelo ao?
3 Lega go le bjalo, ba bangwe bao ba ratago Jehofa kudu ba hwetša go le thata go dumela gore Modimo o tloga a ba tseba. Ba bangwe ba ikwa ba se na mohola, ka gona ba belaela ge e ba ba tsebja ke Jehofa. Lega go le bjalo, re tloga re thabišwa ke go tseba gore Modimo a ka re lebelela ka tsela e sa swanego le yeo! (1 Sam. 16:7) Moapostola Paulo o boditše Bakristegotee le yena gore: “Ge e ba motho a rata Modimo, yena yoo o tsebja ke yena.” (1 Bakor. 8:3) Lerato leo o ratago Modimo ka lona ke selo sa bohlokwa seo se dirago gore o tsebje ke Modimo. Naganišiša ka se: Ke ka baka la’ng o bala makasine wo? Ke ka baka la’ng o katanela go hlankela Jehofa ka pelo, moya, monagano le matla a gago ka moka? Ge e ba o ineetše go Modimo gomme o kolobeditšwe, ke’ng seo se ilego sa dira gore o gate megato yeo? Beibele e bolela gore Jehofa, e lego yo a hlahlobago dipelo, o goga bao a ba ratago. (Bala Hagai 2:7; Johane 6:44.) Ka gona, o ka phetha ka gore o hlankela Jehofa ka gobane o ile a go goga. Le ka mohla a ka se tlogele bao a ilego a ba goga ge e ba ba dula ba botega. Modimo o ba lebelela e le ba bohlokwa kudu, gomme o ba rata ka pelo ka moka.—Ps. 94:14.
4. Ke ka baka la’ng re swanetše go tšwela pele re naganišiša ka boemo bja rena bja go tsebja ke Modimo?
4 Ge Jehofa a re gogetše go yena, re swanetše go tshwenyega ka gore re dule re le leratong la gagwe. (Bala Juda 20, 21.) Gopola gore Beibele e bontšha gore go a kgonega go gogolega goba go katologela kgole le Modimo. (Baheb. 2:1; 3:12, 13) Ka mohlala, pele ga ge moapostola Paulo a ka bolela mantšu a lego go 2 Timotheo 2:19, o boletše ka Himeneo le Fileto. Go molaleng gore lebakeng le lengwe banna bao ka bobedi ba ile ba tsebja ke Jehofa, eupša ka morago ba tlogela therešo. (2 Tim. 2:16-18) Le gona, gopola gore le diphuthegong tša Galatia, ba bangwe bao ba bego ba tsebja ke Modimo ga se ba ka ba dula ba le seetšeng sa moya seo ba kilego ba thabela go ba go sona. (Bagal. 4:9) Anke le ka mohla re se ke sa tšeela fase boemo bjo bobotse bjo re nago le bjona pele ga Modimo.
5. (a) Ke dika dife tše dingwe tšeo Modimo a di tšeelago godimo? (b) Re tlo ahlaahla mehlala efe?
5 Go na le dika tše itšego tšeo Jehofa a di tšeelago godimo ka mo go kgethegilego. (Ps. 15:1-5; 1 Pet. 3:4) Tumelo le boikokobetšo di ile tša hlaola ba bangwe ba bao ba bego ba tsebja ke Modimo. Anke re ahlaahleng mehlala ya banna ba babedi gomme re bone kamoo dika tše di ilego tša dira gore Jehofa a ba rate. Re tla ahlaahla le mohlala wa monna yo mongwe yo a ilego a nagana gore o tsebja ke Modimo eupša yo a ilego a latela tsela ya boikgogomošo gomme a hwetša gore Jehofa ga a mo amogele. Re ka ithuta dithuto tše bohlokwa go tšwa mehlaleng ye.
Tatago Bao ba Nago le Tumelo
6. (a) Aborahama o ile a bontšha bjang gore o na le tumelo dikholofetšong tša Jehofa? (b) Aborahama o be a tsebja bjang ke Jehofa?
6 Aborahama e be e le motho yo a bego ‘a na le tumelo go Jehofa.’ Ge e le gabotse, o bitšwa “tatago bohle bao ba nago le tumelo.” (Gen. 15:6; Baroma 4:11) Ka tumelo Aborahama o ile a tlogela legae la gagwe, bagwera ba gagwe le dithoto tša gagwe gomme a ya nageng ya kgole. (Gen. 12:1-4; Baheb. 11:8-10) Tumelo ya Aborahama e be e sa dutše e tiile le ka morago ga ge go fetile nywaga e mentši. Se se ile sa bonagala ge go be go le “bjalo ka ge eka o gafile Isaka” morwa wa gagwe e le ge a be a ekwa taelo ya Jehofa. (Baheb. 11:17-19) Aborahama o ile a bontšha gore o na le tumelo dikholofetšong tša Jehofa, ka gona Modimo o ile a mo lebelela e le wa bohlokwa kudu; o be a tloga a tseba Aborahama. (Bala Genesi 18:19.) Jehofa o be a sa fo tseba gore Aborahama o a phela; o be a tšeela Aborahama godimo e le mogwera wa gagwe.—Jak. 2:22, 23.
7. Ke’ng seo re se lemogago ka go phethagatšwa ga dikholofetšo tša Jehofa, gomme se se ile sa kgoma bjang Aborahama?
7 Go bohlokwa go lemoga gore bohwa bja naga yeo Aborahama a bego a e holofeditšwe ga se a bo amogela nakong ya bophelo bja gagwe. Le gona ga se a bona ge peu ya gagwe e “etša dinaledi tša magodimong le go etša lešabašaba la lešing la lewatle.” (Gen. 22:17, 18) Le ge dikholofetšo tše di se tša phethagala nakong ya ge Aborahama a sa phela, o ile a dula a na le tumelo e tiilego go Jehofa. O be a tseba gore ge e ba Modimo a ka holofetša selo, go be go le bjalo ka ge e ka se šetše se phethagetše. Ee, Aborahama o ile a phela bophelo bja gagwe ka go dumelelana le tumelo yeo. (Bala Baheberu 11:13.) Na re tsebja ke Jehofa re le ba nago le tumelo e swanago le ya Aborahama?
Go Leta Jehofa ke Leswao la Gore Motho o na le Tumelo
8. Ke dikganyogo dife tše di swanetšego tšeo ba bangwe ba kganyogago ka pelo ka moka go di bona di phethagala?
8 Go ka ba go na le dilo tšeo re kganyogago ka pelo ka moka go di bona di phethagatšwa. Lenyalo, go ba le bana le go phela gabotse mmeleng ka moka ke dikganyogo tša tlhago le tšeo di swanetšego. Lega go le bjalo, go ba bangwe ba bantši, se sengwe sa dikganyogo tšeo goba tše dingwe tša tšona di ka no se phethagale. Ge e ba go le bjalo go wena, tsela yeo o lebeletšanago le boemo bjoo e ka nyaka tumelo yeo o nago le yona.
9, 10. (a) Ba bangwe ba kgotsofaditše dikganyogo tša bona ka ditsela dife? (b) O ikwa bjang ka go phethagatšwa ga dikholofetšo tša Modimo?
9 E tloga e se gabohlale go nyaka gore re kgotsofatše dikganyogo tše ka tsela yeo e sa dumelelanego le bohlale bja Modimo. Seo se ka gobatša motho moyeng. Ka mohlala, ba bangwe ba ile ba kgetha go alafša ka ditsela tšeo di thulanago le keletšo ya Jehofa. Ba bangwe ba kgethile mešomo yeo e dirago gore ba be kgole le malapa a bona goba diboka tša phuthego. Goba go thwe’ng ka go ratana le motho yo e sego modumedi? Ge e ba Mokriste a latela tsela e bjalo, na ruri o tla ba a nyaka go tsebja ke Jehofa? Jehofa o be a tla ikwa bjang ge nkabe Aborahama a ile a thoma go fela pelo ka baka la go se phethagale ga dikholofetšo tšeo a bego a mo holofeditše tšona? Go thwe’ng ge nkabe Aborahama a ile a itirela dilo ka tsela ya gagwe ka gore a boele a phele bophelo bjo bo tlwaelegilego gomme a itirele leina le le tumilego go e na le gore a lete Jehofa? (Bapiša le Genesi 11:4.) Na nkabe a ile a dula a tsebja ke Jehofa?
10 Ke dilo dife tšeo o kganyogago go di bona di phethagatšwa? Na tumelo ya gago e tiile ka mo go lekanego gore o letele Jehofa, e lego yoo a holofetšago go kgotsofatša dikganyogo tša gago tša maleba? (Ps. 145:16) Go swana le ge go bile bjalo tabeng ya Aborahama, go phethagatšwa ga dikholofetšo tše dingwe tša Modimo go ka no se direge ka pela kamoo rena re ka bago re nyaka ka gona. Eupša, Jehofa o tšeela godimo go aga ga rena tumelo e swanago le ya Aborahama le go dira dilo ka go dumelelana le yona. Re tla holega e le ruri ge e ba re ka dira bjalo.—Baheb. 11:6.
Phapano Magareng ga Boikokobetšo le Boikgogomošo
11. Kora a ka be a ile a thabela ditokelo dife, e lego seo se bontšhago gore o be a na le pono efe ka Modimo?
11 Moshe le Kora ba tloga ba fapane ge go tliwa tabeng ya go bontšha go hlompha ditokišetšo tša Jehofa le diphetho tša gagwe. Tsela yeo ba ilego ba dira dilo ka yona e ile ya kgoma tsela yeo Jehofa a bego a ba lebelela ka yona. Kora e be e le Molefi wa Mokohathe, gomme o ile a thabela ditokelo tše dintši, tšeo di ka bago di be di akaretša go bona ga gagwe ge setšhaba se be se lopollwa Lewatleng le Lehwibidu, go thekga ga gagwe kahlolo ya Jehofa malebana le Baisiraele ba sa kwego Thabeng ya Sinai, le go tšea karolo ge go be go sepedišwa areka ya kgwerano. (Ek. 32:26-29; Num. 3:30, 31) Ga go pelaelo gore o ile a botegela Jehofa ka nywaga e mentši gomme ka baka la seo o be a tšeelwa godimo ke ba bantši bao ba bego ba le mešašeng ya Isiraele.
12. Ka ge go bontšhitšwe go letlakala 28, boikgogomošo bo ile bja kgoma bjang go tsebja ga Kora ke Modimo?
12 Lega go le bjalo, ge setšhaba sa Isiraele se be se lebile Nageng ya Kholofetšo, Kora o ile a thoma go nagana gore go be go na le mathata ka thulaganyo ya Modimo. Ke moka banna ba bangwe ba 250 ba eteletšego pele setšhabeng ba ile ba ema le Kora tabeng ya go leka go dira diphetogo. Kora le ba bangwe ba ka ba ba ile ba ikwa ba kgodišegile ka tswalano ya bona le Jehofa. Ba boditše Moshe gore: “Le re lapišitše ka gobane setšhaba ka moka le sona ke se sekgethwa gomme Jehofa o gare ga sona.” (Num. 16:1-3) Bona kamoo ba bego ba ikholofela le go ikgogomoša ka gona! Moshe o ile a ba botša gore: “Jehofa o tla tsebatša yoo e lego wa gagwe.” (Bala Numeri 16:5.) Pele ga ge le le latelago le sobela, ke ge Kora le bohle bao ba emago le yena borabeleng bja gagwe ba hwile.—Num. 16:31-35.
13, 14. Moshe o ile a bontšha boikokobetšo ka ditsela dife?
13 Ka go fapana le Kora, Moshe e be e le “motho yo boletaleta go feta batho bohle bao ba bego ba phela lefaseng.” (Num. 12:3) O ile a bonagatša boleta bja gagwe le boikokobetšo ka tsela yeo a bego a ikemišeditše go latela tlhahlo ya Jehofa. (Ek. 7:6; 40:16) Ga go bonagale Moshe a be a tlwaetše go belaela tsela ya Jehofa ya go dira dilo goba go tenwa ke go latela ditaelo tšeo Jehofa a bego a di ntšhitše. Ka mohlala, Jehofa o ile a ntšha ditaelo tše di tseneletšego ka go agwa ga tabarenakele, tše bjalo ka mmala wa tlhale le palo ya digole tšeo di bego di swanetše go dirišwa ge go dirwa mašela a tente. (Ek. 26:1-6) Ge e ba motho yo e lego molebeledi ka mokgatlong wa Modimo a go nea ditaelo tšeo di ka bonagalago di tseneletše, go ka direga gore ka dinako tše dingwe o ikwe o tenega. Lega go le bjalo, Jehofa ke molebeledi yo a phethagetšego, yoo a neago bahlanka ba gagwe mošomo ka bolokologi e bile a ba bota. Ge a re nea ditaelo tše di tseneletšego, o dira seo ka lebaka le le kwagalago. Eupša ela hloko gore Moshe ga se a ka a tenwa ke Jehofa ka ge a mo neile ditaelo tše bjalo, go le bjalo ka ge e ka Jehofa o be a mo nyenyefatša goba a nyatša tokologo goba bokgoni bja gagwe bja go hlama dilo. Go e na le moo, Moshe o ile a kgonthišetša gore bašomi ka moka ba “dirile ka wona mokgwa woo” ge ba be ba latela ditaelo tša Modimo. (Ek. 39:32) Ruri bjoo ke boikokobetšo! Moshe o ile a lemoga gore mošomo woo e be e le wa Jehofa gomme yena e be e fo ba sedirišwa sa go o phetha.
14 Boikokobetšo bja Moshe bo ile bja bonagala ge a be a lebeletšana le maemo a sa thabišego ao a ilego a mo kgoma ka go lebanya. Lebakeng le lengwe, Moshe o ile a palelwa ke go itshwara gomme a se kgethagatše Modimo ge a be a dirišana le setšhaba seo se bego se ipelaetša. Ka baka leo, Jehofa o ile a botša Moshe gore o be a ka se tsene le setšhaba seo Nageng ya Kholofetšo. (Num. 20:2-12) Yena le Arone ngwanabo, ba be ba kgotleletše dingongorego tša Baisiraele ka nywaga e mentši. Ke moka, ka baka la go dira ga Moshe phošo lebakeng leo, o ile a palelwa ke go tlo thabela seo e bego e le kgale kudu a se letetše! Moshe o ile a arabela bjang? Le ge go be go kwešišega gore o ile a nyama, Moshe o ile a amogela phetho ya Jehofa ka boikokobetšo. O be a tseba gore Jehofa ke Modimo yo a lokilego, yoo go yena go se nago go hloka toka. (Doit. 3:25-27; 32:4) Ge o nagana ka Moshe, na ga o mmone e le motho yo a bego a tsebja ke Jehofa?—Bala Ekisodo 33:12, 13.
Go Nyakega Boikokobetšo Gore Motho a Theetše Jehofa
15. Re ithuta’ng tseleng ya Kora ya boikgogomošo?
15 Tsela yeo re arabelago ka yona diphetogong tšeo di bago gona ka phuthegong ya Bokriste le go diphetho tšeo di dirwago ke bao ba eteletšego pele, e kgoma tsela yeo re tsebjago ke Jehofa. Kora le bagwera ba gagwe ba ile ba ikatološetša kgole le Modimo ka baka la go ikholofela kudu ga bona, boikgogomošo le go hloka tumelo. Le ge Kora a be a tšea gore diphetho tša letšatši le letšatši di be di dirwa ke Moshe wa mokgalabje, ge e le gabotse Jehofa ke yena yo a bego a hlahla setšhaba. Kora o ile a lahlegelwa ke pono e botse ka seo gomme a feleletša a palelwa ke go botegela bao ba bego ba dirišwa ke Modimo. Nkabe e bile gabohlale go Kora gore a letele Jehofa gore dilo di tle di kwešišwe gakaone goba go letela diphetogo ge e ba di be di tloga di nyakega. Ka gona, Kora o ile a feleletša a sentše pego ya gagwe e botse ya tirelo ya potego ka baka la ditiro tša gagwe tša boikgogomošo!
16. Go latela ga rena mohlala wa Moshe wa boikokobetšo go ka kgoma bjang tsela yeo re tsebjago ke Jehofa?
16 Pego yeo e nea temošo e kgolo go bagolo le go ba bangwe ka phuthegong lehono. Go letela Jehofa le go latela tlhahlo ya bao ba kgethilwego gore ba etelele pele go nyaka boikokobetšo. Na re bontšha gore re ikokobeditše le go ba le moya o boleta go swana le kamoo Moshe a bego a le ka gona? Na re ka amogela boemo bja bao ba etelelago pele gare ga rena gomme ra ikokobeletša tlhahlo yeo re e newago? Na re kgona go fenya maikwelo a rena ge re lebeletšane le manyami? Ge e ba go le bjalo, le rena re tla tsebja ke Jehofa. Boikokobetšo bja rena le boipoetšo bja rena di tla dira gore a re rate.
Jehofa o Tseba Bao e Lego ba Gagwe
17, 18. Ke’ng seo se ka re thušago gore re tšwele pele re le bao ba tsebjago ke Jehofa?
17 Ke gabohlokwa go naganišiša ka bao Jehofa a ilego a ba goga gomme a ba tseba. Aborahama le Moshe ba be ba sa phethagala gomme ba na le diphošo, go etša ge le rena re le bjalo. Eupša, ba be ba tsebja ke Jehofa gore ke ba gagwe. Ka mohlala, taba ya Kora e bontšha gabotse gore go a kgonega gore re katologele kgole le Jehofa gomme a se sa re tseba. Yo mongwe le yo mongwe wa rena o dira gabotse go ipotšiša gore: ‘Jehofa o ntebelela bjang? Nka ithuta’ng mehlaleng ye ya Beibele?’
18 O ka homotšwa kudu ke go tseba gore batho bao ba botegago bao Jehofa a ba gogilego o ba lebelela e le ba gagwe. Tšwela pele o hlagolela tumelo, boikokobetšo le dika tše dingwe tšeo di dirago gore o ratwe ke Modimo wa rena. Go tsebja ke Jehofa e tloga e le tokelo e kgolo kudu yeo e dirago gore motho a thabele bophelo gona bjale, gomme go re swaretše ditšhegofatšo tše di kgahlišago tša ka moso.—Ps. 37:18.
Na o a Gopola?
• Ke boemo bofe bjo bohlokwa bjoo o ka bo thabelago o le pele ga Jehofa?
• O ka ekiša bjang tumelo ya Aborahama?
• Re ithuta dithuto dife go Kora le Moshe?
[Dipotšišo tša Thuto]
[Seswantšho go letlakala 26]
Ka go swana le Aborahama, na re na le tumelo ya gore Jehofa o tla phethagatša dikholofetšo tša gagwe ka botlalo?
[Seswantšho go letlakala 28]
Kora o be a sa ikemišetša go ikokobeletša tlhahlo
[Seswantšho go letlakala 29]
Na o tsebja ke Jehofa o le yo mongwe wa bao ba ikokobeletšago tlhahlo ya gagwe?
