Na o ka Swana le Finease ge o Lebana le Ditlhohlo?

KE TOKELO e kgolo go hlankela o le mogolo ka phuthegong. Lega go le bjalo, Lentšu la Modimo le a dumela gore bagolo ba lebeletšana le ditlhohlo. Ka dinako tše dingwe, ba swanetše go swaragana le ditaba tša boahlodi tšeo go tšona ba ‘ahlolelago Jehofa.’ (2 Dikor. 19:6) Goba molebeledi a ka newa kabelo yeo a naganago gore ga a swanelege go e phetha, go swana le Moshe yoo ka boikokobetšo a ilego a botšiša mabapi le e nngwe ya dikabelo tša gagwe gore: “Ke nna mang nka yago go Farao?”—Ek. 3:11.

Mangwalo, e lego ao a ngwadilwego ka tlhahlo ya moya o mokgethwa woo o kgethago bagolo, a re nea mehlala ya balebeledi bao ba ilego ba lebeletšana le diteko ka katlego. Finease e be e le morwa wa Eleasara le setlogolo sa Arone, ka baka leo o be a tla ba moperisita yo a phagamego. Ditiragalo tše tharo bophelong bja gagwe di bontšha kamoo bagolo ba swanetšego go lebeletšana le ditlhohlo ka sebete, temogo le go ithekga ka Jehofa.

“O Ile a Ema Gateetee”

Finease e be e le lesogana ge Baisiraele ba be ba hlomile mešaša Leganateng la Moaba. Pego ya Beibele e re: “Setšhaba sa thoma go dira bootswa le barwedi ba Moaba. . . . Setšhaba sona sa ja sa ba sa khunamela medimo yeo ya bona.” (Num. 25:1, 2) Jehofa o ile a otla badiri bao ba bobe ka lehu. Na o ka kgona go bona ka leihlo la kgopolo kamoo pego ye ya go dira sebe le kotlo di ilego tša kgoma Finease?

Pego e tšwela pele ka gore: “Gwa tšwelela monna yo mongwe wa bana ba Isiraele gomme a feta le mosadi wa Momidiane kgauswi le bana babo pele ga mahlo a Moshe le pele ga mahlo a setšhaba ka moka sa bana ba Isiraele, nakong ya ge ba be ba lla ba le mojakong wa tente ya kopano.” (Num. 25:6) Moperisita Finease o be a tla dira’ng? E be e sa le yo mofsa, gomme Moisiraele yo a bego a dira sebe e be e le kgošana yeo e bego e etelela batho pele borapeding.—Num. 25:14.

Eupša Finease o be a boifa Jehofa, e sego batho. Ge a be a bona batho bao ba babedi, kapelapela o ile a tšea lerumo a ba šala morago go fihla ka tenteng gomme a ba hlaba ka lona. Jehofa o ile a lebelela bjang sebete sa Finease gotee le go dira ga gagwe phetho ya kapejana e nepagetšego? Gateetee Jehofa o ile a kgaotša kotlo gomme a putsa Finease ka go dira kgwerano le yena ya gore boperisita bo ka se tloge lešikeng la gagwe “go iša mehleng ya neng le neng.”—Num. 25:7-13.

Go ba gona, bagolo ba Bakriste lehono ga ba lwe le motho. Eupša go swana le Finease, ba swanetše go ikemišetša go dira diphetho tše di nepagetšego le go ba le sebete. Ka mohlala, Guilherme o be a hlanketše e le mogolo ka dikgwedi tše mmalwa feela ge a be a kgopelwa go ba komiting ya boahlodi. Bobe bjo bo bego bo dirilwe bo be bo akaretša mogolo yo a ilego a thuša Guilherme ge e be e sa le yo monyenyane. O re: “Ke ile ka ikwa ke sa lokologe go ba boemong bjoo. Ke be ke palelwa ke go robala bošego. Ke be ke dula ke nagana ditsela tšeo nka swaraganago le taba ye ntle le gore pono ya ka dilong tša moya e širege. Ke ile ka rapela ka matšatši a  mmalwa gomme ka nyakišiša dikgatišong tšeo di theilwego Beibeleng.” Se se ile sa mo thuša go ba le sebete sa go swaragana le boemo bjoo bja moswananoši le go nea ngwanabo yo a dirilego sebe thušo ya moya.—1 Tim. 4:11, 12.

Ge bagolo ba gata mogato ka sebete le go dira diphetho tše swanetšego kapejana ge maemo ka phuthegong a nyaka bjalo, e ba mehlala ya tumelo le potego. Go ba gona, Bakriste ba bangwe le bona ba swanetše go gata mogato ka sebete, ba bege dibe tšeo ba di tsebago. Ka mo go swanago, go nyakega potego gore motho a kgaotše go gwerana goba go ba le ditswalano le setho sa leloko seo se kgaotšwego.—1 Bakor. 5:11-13.

Temogo e Fokotša Mathata

Sebete sa Finease e be e se sa mahlahla a bofsa. Ela hloko kamoo a bontšhitšego temogo ka gona—a gata mogato ka bohlale le temogo—ge a be a ekwa pego e nngwe. Moloko wa Rubene, wa Gada le seripagare sa moloko wa Manase e ile ya aga aletare kgauswi le Noka ya Jorodane. Baisiraele ba bangwe ba ile ba phetha ka gore aletare yeo ke ya borapedi bja maaka gomme ba be ba ikemišeditše go hlasela meloko yeo.—Josh. 22:11, 12.

Finease o ile a dirang? Finease gotee le dikgošana tša Isiraele ka bohlale ba ile ba boledišana ka taba ye le bao ba bego ba agile aletare. Meloko yeo e bego e latofatšwa e ile ya hlalosa boemo bja yona, ya re aletare yeo e be e le ya go “direla Jehofa.” Ka gona ntwa e ile ya efogwa.—Josh. 22:13-34.

Ge Mokriste a e kwa ditatofatšo goba pego e sa kgahlišego ka mohlankagotee le yena wa Jehofa, ruri e tla ba gabohlale go ekiša Finease! Temogo e re thibela go kgopišwa goba go utolla dilo tše di sa kgahlišego ka bana babo rena.—Die. 19:11.

Temogo e ka thuša bagolo bjang go gata mogato bjalo ka Finease? Jaime, yo a nago le nywaga ya ka godimo ga e lesome e le mogolo, o re: “Ge mogoeledi a mpotša ka bothata bjo a nago le bjona le motho yo mongwe, kapejana ke kgopela Jehofa gore a nthuše gore ke se tšee lehlakore eupša ke mo nee tlhahlo ya Mangwalo. Kgaetšedi yo mongwe o kile a tla go nna ka bothata bjoo a bego a na le bjona mabapi le tsela yeo ngwanabo rena yo a nago le boikarabelo phuthegong e nngwe a ilego a mo swara ka yona. Ka ge ngwanabo rena yoo e be e le mogwera wa ka, go be go ka ba bonolo gore ke bolele le yena. Go e na le moo, nna le kgaetšedi yoo re ile ra bolela ka melao e mentšinyana ya motheo ya Beibele. Sa pele o ile a dumela go yo boledišana le ngwanabo rena yoo ka boyena. (Mat. 5:23, 24) Ga se ba kgona go tsošološa khutšo le semeetseng. Ka gona ke ile ka mo kgothaletša go hlahloba melao e mengwe ya motheo ya Mangwalo. O ile a phetha ka gore o tla rapela ka taba ye gape gomme a katanele go mo lebalela.”

Mafelelo e bile afe? Jaime o gopola gore: “Ka morago ga dikgwedi tše sego kae kgaetšedi yoo o ile a tla go nna. O ile a mpotša gore ge nako e dutše e eya ngwanabo rena yoo o ile a itsholela seo a ilego a se bolela. Ngwanabo rena yoo o ile a rulaganyetša go šoma le yena bodireding gomme a hlalosa ka mokgwa woo a mo lebogago ka  gona. Bothata bjoo bo ile bja lokišwa. Na nkabe ke ile ka dira gore go be le mafelelo a mabotse ka tsela ye ge nkabe ke ile ka tsena ditaba gare mola ke be nka lebelelwa ke le yo a tšeago lehlakore?” Beibele e eletša ka gore: “O se ke wa hlaganela go bega molato.” (Die. 25:8) Ka bohlale bagolo bao ba nago le temogo ba kgothaletša Bakriste bao ba nago le mathata a go se kwešišane le bana babo bona go diriša melao ya motheo ya Beibele e le gore ba godiše khutšo le go e fihlelela.

O Ile a Botšiša Jehofa

Finease o ile a ba le tokelo ya go hlankela e le moperisita bakeng sa batho ba kgethilwego ba Modimo. Go etša ge go bontšhitšwe, o bile le sebete se segolo le temogo le ge e be e sa le yo mofsa. Lega go le bjalo, go atlega ga gagwe go lebeletšaneng le ditlhohlo go be go ithekgile ka go bota ga gagwe Jehofa.

Ka morago ga gore banna ba Gibea, e lego ba moloko wa Benjamini, ba dire sehlogo sa go kata le go bolaya mosadi wa serethe wa Molefi, meloko e mengwe e ile ya ikemišetša go lwa le moloko wa Benjamini. (Baa. 20:1-11) Pele ba ka lwa ba ile ba rapela Jehofa gore a ba thuše, eupša ba ile ba fenywa gabohloko ka makga a mabedi. (Baa. 20:14-25) Na ba be ba tla phetha ka gore dithapelo tša bona ga di kwagale? Na Jehofa o be a tloga a nyaka go bona kamoo ba tla arabelago ka gona phošong yeo e dirilwego?

Finease, yoo ga bjale e bego e le moperisita yo a phagamego wa Isiraele, le lebakeng le o ile a etelela pele a sa boife. O ile a rapela ka gore: “Na nka buša ka tšwa ka yo lwa le bana ba Benjamini ngwanešo goba na ke kgaotše?” Jehofa o ile a araba ka go neela moloko wa Benjamini ka diatleng tša bona, gomme Gibea e ile ya fišwa lorelore.—Baa. 20:27-48.

Ke thuto efe yeo re ka ithutago yona tiragalong ye? Mathata a mangwe ka diphuthegong a tšwela pele go ba gona go sa šetšwe maiteko a tseneletšego ao bagolo ba a dirago go a rarolla gotee le dithapelo tša go kgopela thušo go Modimo. Ge e ba se se direga, bagolo ba dira gabotse go gopola mantšu a Jesu a rego: “Tšwelang pele le kgopela [goba le rapela] gomme le tla newa; tšwelang pele le tsoma gomme le tla hwetša; tšwelang pele le kokota gomme le tla bulelwa.” (Luka 11:9) Le ge karabo ya thapelo e ka bonagala e diega, balebeledi ba ka kgodišega gore Jehofa o tla araba ka nako ya gagwe e swanetšego.

Ka mohlala, phuthego e nngwe kua Ireland e be e tloga e nyaka Holo ya Mmušo eupša e sa ratwe ke mohlankedi wa dithulaganyo tša motse tša meago. O ile a se dumelelane le dikgopelo ka moka tšeo phuthego e di dirilego tša go hwetša setsha seo bana babo rena ba bego ba holofela go aga go sona. Go be go bonagala eka motho yo mongwe yo a nago le matla yo a bego a ka ba thuša e be e le mohlankedi yo a phagamego wa dithulaganyo tša motse tša meago wa profense yeo. Na thapelo e be e ka thuša, go etša ge e ile ya thuša mehleng ya Finease?

Mogolo wa phuthego yeo o itše: “Ka morago ga ge re rapetše le go lopa ka mo go tseneletšego, re ile ra ya ofising ye e phagamego ya go rulaganya meago ya motse. Ke ile ka botšwa gore go be go tla feta dibeke tše mmalwa pele ga ge re ka bonana le mohlankedi yo a phagamego. Lega go le bjalo, re ile ra kgona go bonana le yena ka metsotso e mehlano. Ka morago ga ge a bone polane yeo e bego e thadilwe ka bofsa, kapejana o ile a re nea tumelelo ya go aga gomme go tloga ka nako yeo go ya pele mohlankedi wa dithulaganyo tša motse tša meago o ile a dira maiteko a go re thuša. Phihlelo yeo e ile ya gatelela matla a thapelo menaganong ya rena.” Ee, Jehofa o tla araba dithapelo tše tšwago pelong tša bagolo bao ba ithekgilego ka yena.

Finease o be a rwele boikarabelo bjo boima Isiraeleng ya bogologolo; eupša ka sebete, temogo le go ithekga ka Modimo, o be a kgona go lebeletšana le ditlhohlo ka katlego. Le gona Jehofa o ile a thabišwa ke ge Finease a ile a hlokomela phuthego ya Gagwe ka mafolofolo. Nywaga e 1 000 ka morago, Esera o ile a budulelwa go ngwala gore: “Ba be ba kile ba etwa pele ke Finease morwa wa Eleasara. Jehofa o be a na le yena.” (1 Dikor. 9:20) Eka go ka ba bjalo go bao ba etelelago batho ba Modimo pele lehono, ge e le gabotse go Bakriste ka moka bao ba mo hlankelago ka potego.