‘Homotša Bohle Bao ba Llago’

‘Jehofa o ntloleditše go homotša bohle bao ba llago.’—JES. 61:1, 2.

1. Ke’ng seo Jesu a se diretšego bao ba llago, gomme ka baka la’ng?

JESU KRISTE o itše: “Dijo tša ka ke gore ke dire thato ya yo a nthomilego le go phetha modiro wa gagwe.” (Joh. 4:34) Ge Jesu a be a phetha kabelo yeo a bego a e neilwe ke Modimo, o ile a bonagatša dika tše di kgahlišago tša Tatagwe. Gare ga dika tšeo go akaretšwa le lerato le legolo leo Jehofa a bego a rata batho ka lona. (1 Joh. 4:7-10) Moapostola Paulo o boletše ka e nngwe ya ponagatšo ya lerato leo ge a be a hlalosa Jehofa e le “Modimo wa khomotšo yohle.” (2 Bakor. 1:3) Jesu o bonagaditše lerato le bjalo ge a be a dira seo se bego se boletšwe e sa le pele boporofeteng bja Jesaya. (Bala Jesaya 61:1, 2.) Jesu o ile a bala boporofeta bjo a le sinagogeng kua Natsaretha gomme a bolela gore mantšu ao a be a šupa go yena. (Luka 4:16-21) Nakong ya bodiredi bja gagwe ka moka, Jesu ka lerato o ile a homotša bao ba llago, a ba kgothatša le go ba thuša gore ba be le khutšo ya monagano.

2, 3. Ke ka baka la’ng balatedi ba Kriste ba swanetše go mo ekiša ka gore ba homotše ba bangwe?

² Balatedi ba Jesu ka moka ba swanetše go mo ekiša ka gore ba homotše bao ba llago. (1 Bakor. 11:1) Paulo o itše: “Tšwelang pele le  kgothatšana e bile le agana.” (1 Bathes. 5:11) Go tloga go nyakega kudu gore re homotše ba bangwe, ka ge batho gona bjale ba lebane le “dinako tše di hlobaetšago tšeo go lego thata go lebeletšana le tšona.” (2 Tim. 3:1) Batho ba bantši ba botegago go dikologa lefase ba lebana le batho bao mantšu a bona le ditiro tša bona di ba bakelago mahlomola, bohloko le manyami.

³ Go etša ge boporofeta bja Beibele bo boletše e sa le pele, mehleng ye ya bofelo ya tshepedišo e kgopo ya dilo, batho ba bantši ke “baithati, barati ba tšhelete, ba go ikgantšha, ba ikgogomošago, barogaki, ba go se kwe batswadi, ba go se leboge, ba go se botege, ba ba se nago lerato la tlhago, ba ba sa ikemišetšago go amogela tumelelano le ge e le efe, bathomeletši, ba se nago boitshwaro, ba bogale, ba go se rate go loka, baeki, ba hlogothata, ba tletšego boikgantšho, ba ratago maipshino go e na le go rata Modimo.” Ga bjale maemo ao ke a mabe go feta le ge e le neng pele, ka gobane ‘batho ba kgopo le baikgakanyi ba feteletše ka bobe.’—2 Tim. 3:2-4, 13.

4. Go diregile’ng ka maemo a lefase mo mehleng ya rena?

⁴ Dilo tše ka moka ga se tša swanela go re makatša, ka gobane Lentšu la Modimo le bolela gabotse gore “lefase ka moka le rapaletše matleng a yo kgopo.” (1 Joh. 5:19) “Lefase ka moka” le akaretša makoko a dipolitiki, a bodumedi le a kgwebo, gotee le mekero ya go phatlalatša ditaba tša maaka. Ka ntle le pelaelo, Sathane Diabolo o bitšwa ka tshwanelo gore ke “mmuši wa lefase” le “modimo wa lefase le.” (Joh. 14:30; 2 Bakor. 4:4) Maemo a dilo go dikologa lefase a tšwela pele a phuhlama ka gobane Sathane ga bjale o galefile kudu, ka ge a tseba gore o šaletšwe ke nako e kopana pele ga ge Jehofa a mo tloša tseleng. (Kut. 12:12) Ruri go a homotša go tseba gore kgauswinyane Modimo a ka se sa kgotlelela Sathane le tshepedišo ya gagwe ya dilo, le gore kgang yeo Sathane a ilego a e rotoša ka bogoši bja Jehofa e tlo lokišwa!—Gen., kgao. 3; Jobo, kgao. 2.

Ditaba tše Dibotse di Bolelwa Lefaseng ka Bophara

5. Boporofeta bja mabapi le modiro wa boboledi bo phethagatšwa bjang mo mehleng ye ya bofelo?

⁵ Nakong ye e thata historing ya batho, go phethagala seo Jesu a se boletšego e sa le pele. O itše: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.” (Mat. 24:14) Modiro wa lefase ka bophara wa go nea bohlatse ka Mmušo wa Modimo o dirwa ka tekanyo e golago ka lebelo. Lehono, Dihlatse tša Jehofa tša ka godimo ga 7 500 000, tšeo di kopanelago diphuthegong tša ka godimo ga 107 000 lefaseng ka bophara, di bolela ka Mmušo wa Modimo, go swana le ge Jesu a ile a dira gore seo e be sehlogo sa modiro wa gagwe wa boboledi le wa go ruta. (Mat. 4:17) Ka baka la modiro wa rena wa mehleng yeno wa boboledi, bao ba llago ba homotšwa ka tsela e kgolo. Nywageng e mebedi e sa tšwago go  feta, batho ba 570 601 ba ile ba kolobetšwa gore e be Dihlatse tša Jehofa!

6. O nagana’ng ka tekanyo yeo re dirago modiro wa rena wa boboledi?

⁶ Karolo e kgolo ya modiro wo wa boboledi e ka lemogwa ka go ela hloko gore ga bjale Dihlatse tša Jehofa di fetolela le go phatlalatša dikgatišo tše theilwego Beibeleng ka maleme a ka godimo ga a 500. Ga se gwa ka gwa bonwa selo sa mohuta wo go tloga mola batho ba bago gona! Ruri go a makatša go bona karolo ya lefaseng ya mokgatlo wa Jehofa, mošomo woo e o dirago le go gola ga yona. Ge nkabe go se na tlhahlo le thušo ya moya wa Modimo o matla o mokgethwa, go be go ka se kgonege gore selo se bjalo se direge mo lefaseng le leo le laolwago ke Sathane. Ka ge ditaba tše dibotse di bolelwa lefaseng ka moka, khomotšo e tšwago Mangwalong ga e kwewe feela ke badumedigotee le rena, eupša e kwewa le ke bao ba llago bao ba amogelago molaetša wa Mmušo.

Go Homotša Barapedigotee le Rena

7. (a) Ke ka baka la’ng re sa letela gore Jehofa a tloše maemo ka moka ao a re gateletšago gona bjale? (b) Re tseba bjang gore go a kgonega gore re kgotlelele tlaišego le masetlapelo?

⁷ Mo lefaseng le leo le tletšego bokgopo le tlaišego, ga go pelaelo gore re tla lebeletšana le maemo a gateletšago. Re ka se letele gore Modimo a fediše dilo ka moka tšeo di bakago manyami goba sello go ba go fihlela ge a fediša tshepedišo ye ya dilo. Eupša ge re hlomarwa go etša ge go boletšwe e sa le pele, go botegela ga rena Jehofa ke selo sa bohlokwa go rena bao re thekgago bogoši bja gagwe bja legohleng. (2 Tim. 3:12) Lega go le bjalo, ge re thekgwa le go homotšwa ke Tatago rena wa legodimong, re ka swana le Bakriste ba tloditšwego ba Thesalonika ya bogologolo, bao ba ilego ba fenya tlaišego le masetlapelo ka kgotlelelo le ka tumelo.—Bala 2 Bathesalonika 1:3-5.

8. Ke bohlatse bofe bja Mangwalo bjo bo bontšhago gore Jehofa o homotša bahlanka ba gagwe?

⁸ Ga go pelaelo gore Jehofa o homotša bahlanka ba gagwe ge go nyakega. Ka mohlala, ge Mohumagadi Isebele yo kgopo a be a nyaka go bolaya moporofeta Eliya, moporofeta yoo o ile a felelwa ke sebete gomme a tšhaba, a ba a bolela le gore yena o nyaka go hwa. Eupša go e na le gore Jehofa a omanye Eliya, o ile a mo homotša gomme a mo nea sebete sa gore a tšwele pele a phetha modiro wa gagwe e le moporofeta. (1 Dikg. 19:1-21) Taba ya gore Jehofa o homotša batho ba gagwe e ka bonwa gape le phihlelong ya phuthego ya Bokriste ya lekgolong la pele la nywaga. Ka mohlala, re bala ka nako yeo ka yona ‘phuthego go la Judea ka moka, Galilea le Samaria e bego e tsene lebakeng la khutšo, e agwa.’ Go oketša moo, “ge e dutše e sepela ka go boifa Jehofa le ka go homotšwa ke moya o mokgethwa, ya tšwela pele e ata.” (Dit. 9:31) Re leboga kudu gore le rena re “homotšwa ke moya o mokgethwa”!

9. Go ithuta ka Jesu go ka re homotša bjang?

⁹ Ka ge re le Bakriste, re homoditšwe ke go tseba Jesu Kriste le go sepela dikgatong tša gagwe. Jesu o itše: “Tlang go nna, lena bohle bao le lapišitšwego le go imelwa, ke tla le lapološa. Rwalang joko ya ka le ithute go nna, gobane ke wa moya o boleta e bile ke wa pelo e ikokobeditšego gomme le tla hweletša meoya ya lena tapologo. Gobane joko ya ka e botho, morwalo wa ka o bohwefo.” (Mat. 11:28-30) Go ithuta ka tsela ya Jesu e agago ya go swara batho le go latela mohlala wa gagwe o mobotse ke selo se segolo seo se re thušago go imologa kgateletšong yeo re ka bago le yona.

10, 11. Ke bomang ka phuthegong bao ba ka kgonago go homotša ba bangwe?

¹⁰ Le gona, re ka homotšwa ke Bakristegotee le rena. Ka mohlala, ela hloko kamoo bagolo ba phuthego ba thušago bao ba lebeletšanego le maemo a gateletšago. Morutiwa Jakobo o ngwadile gore: “Na go na le motho yo a babjago [moyeng] gare ga lena? A a bitše bagolo ba phuthego ba mo rapelele, ba mo tlotše ka makhura.” Ka mafelelo afe? “Thapelo ya tumelo e tla fodiša yo a babjago gomme Jehofa o tla mo tsoša. Le gona ge e ba a dirile dibe, o tla lebalelwa.” (Jak. 5:14, 15) Ditho tše dingwe tša phuthego le tšona di ka homotša ba bangwe.

 ¹¹ Gantši basadi ba hwetša go le bonolo go boledišana le basadi ba bangwe ka mathata a bona. Dikgaetšedi tšeo e sa lego bafsa di ka eletšwa kudukudu ke dikgaetšedi tše di godilego tšeo gape di nago le phihlelo. Basadi ba ba Bakriste bao ba nago le phihlelo ba ka ba ba fetile maemong a bjalo maphelong a bona. Kwelobohloko ya bona le dika tša bona tša bosadi e ka ba tše di holago kudu. (Bala Tito 2:3-5.) Go ba gona, bagolo le ba bangwe le bona ba swanetše go “[bolela] ka mo go homotšago le bao ba nyamilego.” (1 Bathes. 5:14, 15) Le gona ke mo gobotse go gopola gore Modimo ke “yo a re homotšago ditlaišegong tša rena tšohle, e le gore re kgone go homotša ba bangwe ditlaišegong tša mohuta le ge e le ofe.”—2 Bakor. 1:4.

12. Ke ka baka la’ng go le bohlokwa gore re be gona dibokeng tša Bokriste?

¹² Tsela e bohlokwa yeo re ka homotšwago ka yona ke gore re be gona dibokeng tša Bokriste, e lego moo dipoledišano tša Beibele di re kgothatšago. Re bala gore Judase le Silase “ba ile ba kgothatša bana babo bona ka dipolelo tše dintši gomme ba ba matlafatša.” (Dit. 15:32) Pele ga diboka le ka morago ga tšona, go ba le dipoledišano tše di agago magareng ga ditho tša phuthego. Ka gona, gaešita le ge re tlaišwa ke boemo bjo itšego bjo bo gateletšago, anke re se ipeeng lekatana, ka gobane go dira bjalo go ka se kaonefatše ditaba. (Die. 18:1) Go e na le moo, re dira gabotse go latela keletšo e buduletšwego ya moapostola Paulo e rego: “A re hlokomelaneng gore re hlohleletšaneng leratong le medirong e mebotse, re sa tlogele go bokana ga rena gotee, go etša ge ba bangwe ba tlwaetše go dira bjalo, eupša re kgothatšana, kudukudu ka ge le bona letšatši le batamela.”—Baheb. 10:24, 25.

Homotšwa ke Lentšu la Modimo

13, 14. Bontšha kamoo Mangwalo a ka re homotšago ka gona.

¹³ Go sa šetšwe gore re Bakriste ba kolobeditšwego goba re sa tšwa go thoma go ithuta ka Modimo le merero ya gagwe, re ka homotšwa kudu ke Lentšu la Modimo leo le ngwadilwego. Paulo o ngwadile gore: “Dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.” (Baroma 15:4) Mangwalo a Makgethwa a ka re homotša gomme a dira gore re “swanelege ka botlalo, [re] hlangwe ka mo go feletšego bakeng sa modiro o mongwe le o mongwe o mobotse.” (2 Tim. 3:16, 17) Ga go pelaelo gore go tseba ga rena therešo ka merero ya Modimo le go ba le kholofelo ya kgonthe ka bokamoso go tla re homotša kudu. Ka gona, a re dirišeng ka botlalo Lentšu la Modimo le dikgatišo tšeo di theilwego Beibeleng tšeo di ka re homotšago le go re hola ka ditsela tše dintši.

¹⁴ Jesu o re beetše mohlala o mobotse ka go diriša Mangwalo ge a ruta le ge a homotša ba bangwe. Ka mohlala, tiragalong e nngwe yeo a  ilego a iponagatša go barutiwa ba gagwe ka morago ga go tsošwa, o ile a “bulela [barutiwa ba gagwe ba babedi] Mangwalo ka mo go feletšego.” Dipelo tša bona di ile tša kgomega kudu ge a be a dutše a bolela le bona. (Luka 24:32) Moapostola Paulo o ile a latela mohlala o mobotse wa Jesu ka go “fa mabaka ka Mangwalo.” Kua Berea, batheetši ba gagwe “ba amogetše lentšu ka go le fišegela kudu monaganong, ba hlahloba Mangwalo ka kelohloko letšatši le letšatši.” (Dit. 17:2, 10, 11) Ruri ke selo se se swanetšego gore re bale Beibele letšatši le letšatši, e re hole re be re holwe ke dikgatišo tša Bokriste tšeo di hlametšwego go re homotša le go re nea kholofelo dinakong tše tša mathata!

Ditsela tše Dingwe tša go Homotša ba Bangwe

15, 16. Ke dilo dife tšeo re ka di dirago go thuša Bakristegotee le rena le go ba homotša?

¹⁵ Re ka hola Bakristegotee le rena ra ba ra ba homotša ka ditsela tše di fapafapanego. Ka mohlala, re ka yela batšofadi goba badumedigotee le rena bao ba babjago mabenkeleng. Re ka thuša ba bangwe ka mediro ya ka gae, ka go re’alo re bontšha gore re a ba kgahlegela. (Bafil. 2:4) Mohlomongwe re ka reta barapedigotee le rena ka baka la dika tša bona tše dibotse, tše bjalo ka lerato, bokgoni bjo ba nago le bjona, sebete le tumelo.

¹⁶ Ge re dutše re katanela go homotša batšofadi, re ka ba etela gomme ra ba theetša ka kelohloko ge ba re botša diphihlelo tša bona tša nakong e fetilego gotee le ditšhegofatšo tšeo re di bonago tirelong ya bona go Jehofa. Ruri seo se ka re kgothatša le go re homotša! Re ka balela bao re ba etelago Beibele goba dikgatišo tša rena tšeo di theilwego Beibeleng. Mohlomongwe re ka hlahloba Thuto ya Morokami ya beke yeo goba ra bolela le bona ka Thuto ya Beibele ya Phuthego yeo e tlago go akaretšwa bekeng yeo. Re ka bogela le bona DVD yeo e theilwego Mangwalong. Go oketša moo, re ka ba balela goba ra ba laodišetša diphihlelo tše di kgothatšago tšeo di hwetšwago ka dikgatišong tša rena.

17, 18. Ka ge re le bahlanka ba Jehofa ba botegago, ke ka baka la’ng re ka kgodišega gore o tla re thekga le go re homotša?

¹⁷ Ge e ba re lemoga gore morapedigotee le rena wa Jehofa o nyaka go homotšwa, re ka mo akaretša dithapelong tša rena. (Baroma 15:30; Bakol. 4:12) Ge re dutše re lebeletšana le mathata a rena a bophelo e bile re katanela go homotša ba bangwe, re ka ba le tumelo le kgodišego e swanago le ya mopsalme yo a opetšego ka gore: “Lahlela maima a gago go Jehofa, gomme yena o tla go thekga. Le ka mohla a ka se dumelele gore moloki a šišinyege.” (Ps. 55:22) Ga go pelaelo gore Jehofa ka mehla o tla dula a homotša le go thekga bahlanka ba gagwe ba botegago.

¹⁸ Modimo o boditše barapedi ba gagwe ba bogologolo gore: “Ge e le nna ke Nna ke le homotšago.” (Jes. 51:12) Jehofa o tla re direla se se swanago gomme o tla šegofatša ditiro tša rena tše dibotse le mantšu a rena a mabotse ge re dutše re homotša bao ba llago. Go sa šetšwe gore kholofelo ya rena ke ya go phela legodimong goba lefaseng, yo mongwe le yo mongwe wa rena a ka homotšwa ke mantšu a Paulo ao a bego a lebišitšwe go Bakristegotee le yena bao ba tloditšwego ka moya, a rego: “Eka Morena wa rena Jesu Kriste le Modimo Tatago rena, bao ba re ratilego gomme ba re nea khomotšo e sa felego le kholofelo e botse ka botho bjo bogolo bja Modimo, ba ka homotša dipelo tša lena gomme ba le matlafatša tirong e nngwe le e nngwe e botse le lentšung le lengwe le le lengwe le lebotse.”—2 Bathes. 2:16, 17.

Na o a Gopola?

• Modiro wa rena wa go homotša bao ba llago o phatlaletše gakaaka’ng?

• Ke dilo dife tšeo re ka di dirago go homotša ba bangwe?

• Ke bohlatse bofe bja Mangwalo bjo bo bontšhago gore Jehofa o homotša batho ba gagwe?

[Dipotšišo tša Thuto]

[Seswantšho go letlakala 28]

Na o tšea karolo go homotšeng bao ba llago?

[Seswantšho go letlakala 30]

Ba bagolo le ba banyenyane ba ka kgothatša ba bangwe