Ke Thabetše go Hlankela Jehofa

Ka ge go anega Fred Rusk

Ke bone therešo ya mantšu a Dafida ao a hwetšwago go Psalme 27:10 a rego: “Le ge tate le mma ba ka ntlogela, Jehofa yena o tla nkamogela.” E re ke hlalose kamoo seo se ntiragaletšego ka gona.

KE GOLETŠE polaseng ya leokodi ya rakgolo wa ka tikologong ya Georgia, U.S.A., nakong ya Tšhaparego e Kgolo nywageng ya bo-1930. Tate, yoo a bego a nyamišitšwe ke lehu la mma le ngwanešo yo a bego a sa tšwa go belegwa, o ile a ntlogela le rakgolo yoo le yena a bego a hlokofaletšwe ke mosadi gomme a ya go šoma toropong ya kgole. Ka morago o ile a leka gore ke tle ke dule le yena, eupša seo ga se sa ka sa kgonagala.

Borakgadi ba ka ba bagolo ba be ba hlokometše lapa leo. Le ge rakgolo e be e se motho wa bodumedi, borakgadi bona e be e le badumedi ba bagolo ba kereke ya Southern Baptist. Ke be ke gapeletšwa ka kgati go ya kerekeng Sontaga se sengwe le se sengwe. Ka gona, go tloga bjaneng ga se ka ka ka tšeela bodumedi godimo. Lega go le bjalo, ke be ke rata sekolo le dipapadi.

Ketelo Yeo e Fetotšego Bophelo bja ka

Thapameng e nngwe ka 1941, ge ke be ke na le nywaga e 15, mokgalabje yo mongwe o ile a tla gagešo le mosadi wa gagwe. Ke ile ka fo tsebišwa gore: “Ke rakgolwago Talmadge Rusk.” Ke be ke se ka ka ka kwa ka ga yena eupša ke ile ka tseba gore yena le mosadi wa gagwe ke Dihlatse tša Jehofa. Seo a se hlalositšego ka morero wa Modimo ka batho gore ba tla phela ka mo go sa felego mo lefaseng se be se fapane kudu le seo ke bego ke se kwele kerekeng. Ba bantši ka lapeng ba ile ba gana—gaešita le go nyatša—seo ba bego ba se bolela. Ga se ba ka ba hlwa ba sa amogelwa gape ka lapeng. Lega go le bjalo, rakgadi wa ka Mary, yo a mphetago ka nywaga e meraro feela, o ile a amogela Beibele gotee le dikgatišo tše dingwe tšeo di bego di thuša go hlalosa Beibele.

Rakgadi Mary o ile a kgodišega ka pela gore o hweditše therešo ya Beibele gomme o ile a kolobetšwa ka 1942 gore e be yo mongwe wa Dihlatse tša Jehofa. O ile a ba a diragalelwa ke seo Jesu a bego a boletše ka sona e sa le pele ge a re: “Manaba a motho e tla ba batho ba lapeng la gabo.” (Mat. 10:34-36) Kganetšo ya ka lapeng e be e le e šoro. Rakgadi wa ka yo mogolo go Mary, yo a bego a na le tšhušumetšo e kgolo seleteng seo, o ile a loga maanomabe gotee le ramotse gomme ba dira gore rakgolo Talmadge a golegwe. O be a latofatšwa ka go rekiša dipuku ntle le tumelelo. O ile a golegwa.

Kuranta ya mo motseng e ile ya bega gore ramotse yoo e bilego e le moahlodi, o boditše bao ba bego ba le kgorong ya motse gore: “Dipuku tše monna yo a di phatlalatšago . . . di kotsi go fo swana le mpholo.” Rakgolo yoo wa ka o ile a fenya molato woo ka go dira boipiletšo, eupša go sa dutše  go le bjalo o be a feditše matšatši a lesome kgolegong.

Kamoo Rakgadi Mary a Nthušitšego

Go tlaleletša go seo a bego a mpotša sona ka ditumelo tša gagwe tše difsa, rakgadi Mary o ile a thoma go neela baagišani bohlatse. Ke ile ka ya le yena go monna yo a bego a mo swarela thuto ya Beibele yo a bego a na le puku ya The New World. * Mosadi wa monna yoo o ile a re monna wa gagwe o feditše bošego ka moka a bala puku ye. Le ge ke be ke sa nyake go tsenelela kudu ditabeng tša bodumedi, ke be ke rata seo ke bego ke ithuta sona. Lega go le bjalo, selo se segolo seo se ilego sa nkgodiša gore Dihlatse ke batho ba Modimo ga se dithuto tša Beibele. Ke kgodišitšwe ke tsela yeo di bego di swarwa ka yona.

Ka mohlala, ka letšatši le lengwe ge re be re boa gae re etšwa go lema ditamati, nna le rakgadi Mary re ile ra bona bohlatse Sebešong sa go fiša ditlakala seo se bego se tukela fase gore borakgadi ba bagolo ba be ba fišitše dipuku tša gagwe, go akaretša le keramafomo le direkhoto tša molaetša wa Beibele. Ke be ke galefile kudu eupša yo mongwe wa borakgadi ba ka o ile a sola go galefa ga ka gomme a re: “Seo re se dirilego o tla tla o re leboga ka morago.”

Rakgadi Mary o ile a gapeletšega go tloga gae ka 1943 ka ge a be a ganne go tlogela tumelo ya gagwe e mpsha le go kgaotša go dira boboledi go baagišani. Ka nako yeo, ke be ke thabetše go ithuta e sego feela gore Modimo o na le leina, e lego Jehofa, eupša le gore ke Modimo yo lerato le wa kwelobohloko, e sego yoo a fišago batho mollong wa dihele. Le ge ke be ke sešo ka ya dibokeng, ke ile ka ithuta le gore Jehofa o na le mokgatlo wo o nago le lerato.

Ka moragonyana ge ke be ke sega bjang, koloi e nngwe e ile ya fokotša lebelo gomme yo mongwe wa banna ba babedi bao ba bego ba le ka koloing o ile a mpotšiša ge eba ke le Fred. Ge ke lemoga gore e be e le Dihlatse, ke ile ka re: “E re ke tsene ka gare gomme re yo bolela ka thokwana.” Rakgadi Mary o be a ba romile gore ba tle ba nketele. Yo mongwe wa banna bao e be e le Shield Toutjian, mohlanka wa mosepedi yo a ilego a nkgothatša le go nnea tlhahlo ya moya ka nako e swanetšego. Kganetšo ya lapa e ile ya lebišwa go nna ka ge ke be ke emelela ditumelo tša Dihlatse tša Jehofa.

Rakgadi Mary o ile a nngwalela a le Virginia, moo a bego a hudugetše gona, a re ge e ba ke ikemišeditše go hlankela Jehofa, nka tla ka dula le yena. Ke ile ka phetha ka go tloga gateetee. Bošegong bja Labohlano la October 1943, ke ile ka phuthela tše dingwe tša dilo tše bohlokwa ka lepokising gomme ka le bofelela sehlareng seo se bego se le kgojana le gae. Ka Mokibelo, ke ile ka tšea lepokisi leo, gomme ka tšwa ka sa mafuri ka  feta ntlong ya moagišani ke moka ka namela ka ya toropong. Ke ile ka tšea leeto la go ya motseng wa Roanoke, gomme ka hwetša rakgadi Mary ka lapeng la Edna Fowlkes.

Kgolo ya Moya, Kolobetšo le Bethele

Edna e be e le Hlatse e botho ya motlotšwa—Lidia wa mehleng yeno—yo a bego a hirile lefelo le legolo la bodulo gomme a dula le mogadibo wa gagwe, barwedi ba babedi ba mogadibo yoo wa gagwe gotee le Rakgadi Mary. Banenyana ba—Gladys le Grace Gregory—ka morago ba ile ba ba baromiwa. Gladys, yoo ga bjale a nago le nywaga ya ka godimo ga e 90, o sa dutše a hlankela ka potego lekaleng la Japane.

Ge ke be ke sa dula ka lapeng la Edna, ke be ke eya dibokeng ka mehla gomme ke hwetša tlhahlo bodireding. Go ithuta Lentšu la Modimo ka bolokologi le go ya dibokeng tša Bokriste go kgotsofaditše kganyogo ya ka ya go gola moyeng. Ke ile ka kolobetšwa ka June 14, 1944. Mary gotee le dikgaetšedi tše pedi tša ga Gregory ba ile ba thoma go bula madibogo gomme ba abelwa go hlankela ka Leboa la Virginia. Ge ba le moo, ba ile ba thuša go hloma phuthego kua Leesburg. Mathomong a 1946, ke ile ka thoma go bula madibogo seleteng seo se bego se se kgole le bona. Selemong seo re ile ra sepela ka moka go ya kopanong ya ditšhabatšhaba yeo e sa lebalegego yeo e bego e swaretšwe Cleveland, Ohio, ka August 4-11.

Kopanong yeo, ngwanabo rena Nathan Knorr, yo a bego a eteletše pele mokgatlong, o ile a hlalosa gore go tlo katološwa Bethele ya Brooklyn. Seo se be se akaretša go aga lefelo le lefsa la bodulo le go katološa meago ya kgatišo. Go be go nyakega bana babo rena ba bantši bao e sa lego ba bafsa. Ke ile ka phetha ka gore moo ke moo ke bego ke nyaka go hlankela Jehofa gona. Ka gona, ke ile ka romela kgopelo ya ka gomme ka morago ga dikgwedi tše sego kae, ka December 1, 1946, ke ile ka ya Bethele.

Mo e ka bago ka morago ga ngwaga, molebeledi wa meago ya kgatišo, e lego Max Larson, o ile a ema tafoleng ya ka Lefapheng la tša Poso. O ile a mpotša gore ke abetšwe go yo hlankela Lefapheng la Tirelo. Kabelong yeo, ke ile ka ithuta go gontši ka go diriša melao ya motheo ya Beibele le ka mediro ya mokgatlo wa Modimo, kudukudu ge ke be ke šoma le T. J. (Bud) Sullivan, e lego molebeledi wa lefapha leo.

Tate o ile a nketela ka makga a mmalwa Bethele. Ka morago o ile a ba motho wa bodumedi. Ketelong ya gagwe ya mafelelo ka 1965, o ile a re: “O ka tla wa nketela eupša nna nka se sa boa go tlo go bona mo gape.” Ke ile ka mo etela ka makga a mmalwa pele a ka hwa. O be a kgodišegile gore o ya legodimong. Ke holofela gore Jehofa a ka se mo lebale, gomme ge e ba go le bjalo, nakong ya tsogo o tla ba mo lefaseng a na le kholofelo ya go phela ka mo go sa felego Paradeiseng yeo e tsošološitšwego,  e sego moo a bego a nagana gore o tla ba gona.

Dikopano tše Dingwe Tšeo di sa Lebalegego le Mediro ya go Aga

Ka mehla dikopano e be e le ditiragalo tše bohlokwa tša go gola ga motho moyeng. Se se bile bjalo kudukudu dikopanong tša ditšhabatšhaba tšeo di ilego tša swarelwa Yankee Stadium kua New York ka bo-1950. Ka 1958, nakong e nngwe ya lenaneo Yankee Stadium le Polo Grounds di be di tletše wa go falala ka batho ba 253 922 go tšwa dinageng tše 123. Go na le selo se sengwe seo nka se tsogego ke se lebetše. Ge ke be ke thuša ofising ya kopano, Ngwanabo rena Knorr o ile a tla go nna ka go akgofa. A re: “Fred, go bonagala ke lebeletše go abela ngwanabo rena go yo boledišana le babulamadibogo ka moka bao ba bokanego holong ya menyanya yeo e hirilwego yeo e lego mo kgauswi. Na o ka kitimela moo gomme wa ba neela polelo ka seo o ka se naganago ge o dutše o e ya go bona?” Ke ile ka rapela gantši pele ke fihla moo, ke feletšwe ke moya.

Ge palo ya diphuthego e dutše e gola kua New York City ka bo-1950 le bo-1960, mafelo ao a bego a hirišwa go ba Diholo tša Mmušo a ile a thoma go hlaela. Ka gona, go tloga ka 1970 go ya go 1990, go ile gwa rekwa meago e meraro kua Manhattan gomme ya lokišwa gore e be mafelo a loketšego go ka swarelwa diboka. Ke be ke le modulasetulo wa dikomiti tše tša meago gomme go na le dilo tše dintši tše di kgahlišago tšeo nka se di lebalego, tša kamoo Jehofa a šegofaditšego diphuthego tšeo di bego di šoma gotee go lefelela le go feleletša meago ye yeo e tšwelago pele e le mafelo a borapedi bja therešo.

Diphetogo Bophelong

Letšatši le lengwe ka 1957, ge ke be ke eya mošomong ka tsela e fetago phakeng ya magareng ga Meago ya Bodulo ya Bethele le meago ya kgatišo, pula e ile ya thoma go na. Ke ile ka bona kgarebjana e botsana ya moriri wa mmala wa gauta yeo e bego e sa tšwa go fihla Bethele. E be e se na samporela, ka gona ke ile ka sepela le yona re diriša samporela sa ka. Ke kamoo ke ilego ka kopana le Marjorie, gomme go tloga ka letšatši la lenyalo la rena ka 1960, re ile ra tšwela pele re sepela mmogo ka lethabo tirelong ya Jehofa bohlokong le lethabong. Re ketekile ngwaga wa rena wa lenyalo wa bo-50 ka September 2010.

Re be re se ra tšwa re fetša go pakolla merwalo ya rena ge re tšo boa maikhutšong a ka morago ga letšatši la lenyalo, ge Ngwanabo rena Knorr a mpotša gore ke abetšwe go ba mohlahli sekolong sa Gilead. Ruri yeo e be e le tokelo e kgolo! Go tloga ka 1961 go ya go 1965, diklase tše hlano tšeo di bego di tšea nako e telele e be e le tša bašomi ba makaleng bao ba bego ba newa tlhahlo e kgethegilego ya go hlokomela makala. Mafelelong a ngwaga wa 1965, diklase di ile tša boela go ba tšeo di tšeago lebaka la dikgwedi tše hlano, gomme  bjalo ka mehleng, morero wa tšona e ile ya ba go hlahla baromiwa.

Ka 1972, ke ile ka se sa hlwa ke hlankela Sekolong sa Gilead gomme ka išwa Lefapheng la go Araba Dipotšišo, moo ke ilego ka hlankela ke le molebeledi. Go dira nyakišišo ka dipotšišo tše dintši le mathata go nthušitše go kwešiša gakaone dithuto tša Lentšu la Modimo le go diriša melao e phagamego ya motheo ya Modimo wa rena ge ke thuša ba bangwe.

Ke moka ka 1987, ke ile ka abelwa go šoma lefapheng le lefsa leo le bitšwago Lefapha la Ditirelo tša Tsebišo ya Sepetlele. Go ile gwa rulaganywa diseminari tša go ruta kamoo bagolo bao ba lego Dikomiting tša go Hloma Kwano le Dipetlele ba ka boledišanago le dingaka, baahlodi le badirelaleago go hlalosa boemo bja rena bja Mangwalo ge go tliwa tabeng ya madi. Bothata bjo bogolo e be e le gore dingaka di be di tšhela bana ba rena madi ka ntle le tumelelo ya batswadi, gomme gantši di be di kgopela tumelelo kgorong ya tsheko.

Ge mehuta e mengwe ya go alafa ntle le go tšhela madi e be e šišinywa go dingaka, karabo ya tšona ya ka mehla e be e le gore mohuta woo ga o gona goba gore o bitša kudu. Gantši ke be ke araba dingaka tšeo ka gore: “E re ke bone seatla sa gago.” Ge e fetša go mpontšha sona, ke be ke re: “Le wena o a tseba gore seatla seo se gare ga didirišwa tše kaonekaone tše o ka di dirišago go alafa motho ka ntle le go mo tšhela madi.” Go mo reta ka tsela yeo go be go mo gopotša seo a bego a se tseba gabotse—gore go diriša gabotse thipa ya go bua go fokotša tahlegelo ya madi.

Nywagasomeng e mebedi e fetilego, Jehofa o šegofaditše kudu maiteko a a go ruta dingaka le baahlodi. Boemo bja bona bja kgopolo bo ile bja fetoga kudu ge ba be ba thoma go kwešiša pono ya rena gabotse. Ba ile ba ithuta gore dinyakišišo tša kalafo di bontšha gore mehuta e mengwe ya go alafa ntle le go tšhela madi e a kgonega le gore go na le dingaka tše dintši tšeo di dirišanago le rena gotee le dipetlele tšeo molwetši a ka romelwago go tšona.

Ga e sa le go tloga ka 1996, nna le Marjorie re hlanketše Lefelong la tša Thuto la Watchtower kua Patterson, New York, leo le lego bokgole bja dikhilomithara tše 110 ka leboa la Brooklyn. Mo ke ile ka šoma ka nakwana Lefapheng la Tirelo gomme ka nako e nngwe ke ruta bašomi ba lekaleng le balebeledi ba basepedi. Nywageng e 12 e fetilego, ke ile ka hlankela gape ke le molebeledi Lefapheng la go Araba Dipotšišo, leo le bego le tlošitšwe Brooklyn gomme le išitšwe Patterson.

Ditlhohlo tša Botšofadi

Go phetha dikabelo tša ka tša tirelo ya Bethele go ile gwa thoma go nthatafalela ka ge ke na le nywaga ya ka godimo ga ye 80. Ke na le nywaga e fetago e lesome ke na le kankere. Ke ikwa go swana le Hesekia, yoo Jehofa a mo okeleditšego matšatši a bophelo. (Jes. 38:5) Mosadi wa ka le yena ga a phela gabotse gomme re swarišane gore a lebeletšane le bolwetši bja gagwe bja Alzheimer. Marjorie e bile mohlanka yo a swanelegago wa Jehofa, mohlala go bafsa, mothuši yo a botegago le mogwera wa ka wa go wa le go tsoga. Ka mehla e be e le morutwana yo mobotse wa Beibele e bile a na le bokgoni bja go ruta ka yona, gomme bana ba rena ba bantši ba moya ba sa dutše ba ikgokaganya le rena.

Rakgadiaka Mary o hwile ka March 2010 a na le nywaga e 87. E be e le morutiši yo a atlegago wa Lentšu la Modimo gomme o thušitše batho ba bangwe go emela borapedi bja therešo. O feditše nywaga e mentši a le tirelong ya nako e tletšego. Ke tloga ke thabela karolo yeo a e tšerego go nthuša go ithuta therešo ya Lentšu la Modimo gore ke swane le yena, ke be mohlanka wa Modimo wa rena yo lerato, Jehofa. Rakgadi Mary o bolokilwe kgauswi le monna wa gagwe, yoo pejana a ilego a hlankela e le moromiwa kua Isiraele. Ke kgodišegile gore Jehofa a ka se ba lebale le gore ba letetše tsogo.

Ge ke lebelela morago nywageng e 67 e fetilego ya go hlankela Jehofa, ke leboga kudu ditšhegofatšo tšeo ke ilego ka di hwetša. Ruri ke thabetše go dira thato ya Jehofa! Ke botile botho bja gagwe bjo bogolo e bile ke na le kholofelo e feletšego ya go bona go phethega ga kholofetšo ya Morwa wa gagwe ya gore: “Yo mongwe le yo mongwe yo a tlogetšego dintlo goba bana babo goba dikgaetšedi goba tate goba mma goba bana goba mašemo ka baka la leina la ka, o tla okeletšwa kudu e bile o tla ja bohwa bja bophelo bjo bo sa felego.”—Mat. 19:29.

[Mongwalo wa tlase]

[Seswantšho go letlakala 19]

Ke le polaseng ya rakgolo ya leokodi kua Georgia, U.S.A., ka 1928

[Seswantšho go letlakala 19]

Rakgadi Mary le rakgolo Talmadge

[Seswantšho go letlakala 20]

Rakgadi Mary, Gladys le Grace

[Seswantšho go letlakala 20]

Ge ke be ke kolobetšwa ka June 14, 1944

[Seswantšho go letlakala 20]

Lefapheng la Tirelo Bethele

[Seswantšho go letlakala 21]

Ke na le rakgadi Mary kopanong ya ditšhabatšhaba ya 1958 kua Yankee Stadium

[Seswantšho go letlakala 21]

Ke na le Marjorie letšatšing la rena la lenyalo

[Seswantšho go letlakala 21]

Re le mmogo ka 2008