Keletšo e Bohlale Tabeng ya go se be Lenyalong le ya go Tsena Lenyalong

“Se ke se bolela . . . gore ke le tutueletše go seo se swanetšego le seo se bolelago go ineela go Morena ka mehla ka ntle le tšhitišo.”—1 BAKOR. 7:35.

1, 2. Ke ka baka la’ng motho a swanetše go nyaka keletšo ya Beibele tabeng ya go se be lenyalong le ya go tsena lenyalong?

KE DILO tše sego kae bophelong tšeo di bakago lethabo, kgakanego goba matshwenyego go swana le go dirišana ga rena le batho ba bong bjo bo fapanego. Bohlokwa bja gore re lebeletšane le maikwelo a bjalo ka katlego bo re dira gore re nyake tlhahlo ya Modimo, eupša go na le mabaka a mangwe a gore re dire bjalo. Mokriste yo a kgotsofaletšego go dula a se lenyalong a ka ba le maikwelo a gore lapa la gabo goba bagwera ba gagwe ba mo phegelela gore a tsene lenyalong. Yo mongwe a ka ba a nyaka go tsena lenyalong eupša a sa hwetše molekane yo a mo swanetšego. Ba bangwe ba nyaka tlhahlo ya kamoo ba ka itokišeletšago boikarabelo bja go ba monna goba mosadi yo a lego lenyalong. Le gona Bakriste bao ba sego lenyalong le bao ba lego lenyalong ba lebeletšana le diteko tša mabapi le boitshwaro bjo bo gobogilego.

² Ka ntle le taba ya gore re nyaka go thaba, ditaba tše di ka kgoma boemo bja rena pele ga Jehofa Modimo. Go kgaolo 7 ya lengwalo la gagwe leo a le ngwaletšego Bakorinthe, Paulo o ile a ba nea tlhahlo ka go se be lenyalong le go tsena lenyalong. Pakane ya gagwe e be e le go kgothaletša babadi ba lengwalo leo gore ba fihlelele “seo se swanetšego le seo se bolelago go ineela go Morena ka mehla ka ntle le tšhitišo.” (1 Bakor. 7:35) Ge o dutše o hlahloba keletšo ya gagwe ditabeng tše tše bohlokwa, leka go lebelela boemo bja gago—go sa šetšwe gore o lenyalong goba go se bjalo—e le tsela ya gore o hlankele Jehofa ka botlalo.

Phetho Yeo e Sego Bonolo

3, 4. (a) Ka dinako tše dingwe mathata a rotošwa bjang ke ge batho ba tshwenyegile kudu ka mogwera wa bona goba wa leloko yo a sa tsenago lenyalong? (b) Keletšo ya Paulo e ka thuša bjang motho gore a be le pono e lekalekanego ka lenyalo?

³ Ka go swana le setšhaba sa Bajuda sa lekgolong la pele la nywaga, ditšo tše dintši lehono di gatelela gore lenyalo ke selo se bohlokwahlokwa. Ge e ba lesogana goba kgarebe e feta nywaga e itšego e sa tsena lenyalong, bagwera le ba leloko bao ba tshwenyegilego ba ka kwa ba gapeletšega go nea lesogana leo goba kgarebe yeo dikeletšo tabeng ye. Ge ba boledišana le bona, ba ka ba ba šišinya gore ba tsoge borokong tabeng ya go nyaka molekane. Ba ka ba ba ba botša gore go na le lesogana le lengwe goba kgarebe tsoko yeo ba e tsebago yeo e ka ba swanelago. Ba ka ba ba diriša mahlajana a go kopantšha batho bao ba babedi ba sego lenyalong. Ka dinako tše dingwe boitshwaro bjoo bo dira gore batho ba feleletše ba lešitšwe dihlong, segwera se senyegile gomme ba bangwe ba kwešitšwe bohloko.

⁴ Le ka mohla Paulo ga se a ka a phegelela ba bangwe gore ba tsene lenyalong goba ba dule ba se lenyalong. (1 Bakor. 7:7) O be a kgotsofaletše go hlankela Jehofa a se na mosadi, eupša o ile a hlompha tshwanelo ya ba bangwe ya gore ba thabele go ba lenyalong. Mokriste yo mongwe le yo mongwe lehono le yena o na le tshwanelo ya go ikgethela ge e ba a nyaka go tsena lenyalong goba go dula a se lenyalong. Ba bangwe ga se ba swanela go ba phegelela gore ba tsene lenyalong goba ba dule ba se lenyalong.

Go Atlega Bophelong bja go se be Lenyalong

5, 6. Ke ka baka la’ng Paulo a ile a kgothaletša batho gore ba dule ba se lenyalong?

⁵ Selo se segolo mantšung a Paulo ao a a boditšego Bakorinthe e bile pono ya gagwe e botse ka go se be lenyalong. (Bala 1 Bakorinthe 7:8.) Le ge Paulo a be a se a nyala, ga se a ka a iphagamišetša bao ba bego ba tsene lenyalong, go etša ge go dira baruti ba Bojakane ba sa tsenego lenyalong. Go e na le moo, moapostola o ile a bolela ka dilo  tšeo di thabelwago ke badiredi ba ditaba tše dibotse ba sego lenyalong. Dilo tšeo ke dife?

⁶ Gantši Mokriste yo a sego lenyalong a ka amogela gabonolo dikabelo tša tirelong ya Jehofa tšeo di ka thatafalelago motho yo a tsenego lenyalong. Paulo o ile a amogela tokelo e kgethegilego ya go ba “moapostola go ditšhaba.” (Baroma 11:13) Bala Ditiro kgaolo 13 go ya go kgaolo 20, gomme o mo šale morago ge yena le baromiwagotee le yena ba dutše ba tsena ditšhemong tše difsa gomme ba thea diphuthego mafelong a fapafapanego. Nakong ya tirelo yeo ya gagwe, Paulo o ile a kgotlelela mathata ao ba bantši ba rena re ka se lebeletšanego le ona lehono. (2 Bakor. 11:23-27, 32, 33) Eupša lethabo leo a bilego le lona ka baka la go thuša batho ba bantši gore e be barutiwa le ile la dira gore mathata ao e se be selo. (1 Bathes. 1:2-7, 9; 2:19) Na o be a ka fihlelela dilo tšeo ka moka tšeo a di fihleletšego ge nkabe a be a le lenyalong goba a na le lapa? Mohlomongwe o be a ka se ke.

7. Nea mohlala wa Dihlatse tšeo di sego lenyalong tšeo di dirišitšego maemo a tšona go tšwetša pele dikgahlego tša Mmušo.

⁷ Bakriste ba bantši bao ba sego lenyalong ba diriša maemo a bona a gona bjale go fihlelela mo gontši modirong wa Mmušo. Sara le Limbania, e lego babulamadibogo ba kua Bolivia, ba ile ba hudugela motseng woo batho ba gona ba bego ba se ba hwetša bohlatse ka nywaga e mentši. Na ba be ba tla tshwenywa ke go hlokega ga mohlagase? Ba begile gore: “Ga go na radio goba thelebišene, ka gona batho ba mo ga ba šitišege go dira selo seo ba se ratago kudu, e lego go bala.” Badudi ba bangwe ba moo ba ile ba bontšha babulamadibogo bao dikgatišo tše dingwe tša Dihlatse tša Jehofa tšeo ba bego ba sa dutše ba di bala eupša e be e le kgale di se sa gatišwa. Ka ge dikgaetšedi tšeo di hweditše batho ba moo ba be ba kgahlega ka bontši, ba be ba thatafalelwa ke go šoma ntlo e nngwe le e nngwe tšhemong yeo. Mokgekolo yo mongwe o ile a ba botša gore: “Bofelo bo swanetše go ba bo le kgauswi ka gobane Dihlatse tša Jehofa di fihlile go rena mafelelong.” Ba bangwe motseng woo ba be ba šetše ba thomile go ba gona dibokeng tša phuthego.

8, 9. (a) Paulo o be a naganne ka eng ge a be a bolelela taba ya go se be lenyalong? (b) Bakriste bao ba sego lenyalong ba thabela dilo dife?

⁸ Go ba gona, ke therešo gore Bakriste ba nyetšego le bona ba a atlega ge ba bolela ditaba tše dibotse mafelong ao a tšweletšago ditlhohlo. Eupša dikabelo tše dingwe tšeo babulamadibogo bao ba sego lenyalong ba lego go tšona di ka thatafalela bao ba tsenego lenyalong goba bao ba nago le bana. Paulo o ile a nagana ka mafelelo a mabotse ao a bego a bona gore a ka ba gona tabeng ya go  tšwetša pele ditaba tše dibotse diphuthegong tša lefelong leo. O be a nyaka gore bohle ba thabe go swana le yena. Ka baka leo, o ile a bolelela taba ya go hlankela ga motho Jehofa a se lenyalong.

⁹ Kgaetšedi yo mongwe yo a sego lenyalong yo a tšwago United States o ngwadile gore: “Batho ba bangwe ba dumela gore motho a ka se be le lethabo ge e ba a se lenyalong. Eupša ke bone gore lethabo leo le swarelelago le ithekgile ka tswalano ya motho le Jehofa. Le ge go se be lenyalong e le boikgafo, ke mpho ge e ba o go diriša gabotse.” Ge e le mabapi le go hwetša lethabo, o ngwadile gore: “Go se be lenyalong e ka ba motheo wa gore motho a thabe, e sego lepheko. Ke a tseba gore Jehofa ga a phaele motho ka thoko leratong la gagwe, go sa šetšwe gore ga a lenyalong goba o tsene lenyalong.” Ga bjale kgaetšedi yoo o hlankela ka lethabo nageng yeo go nyakegago ka bontši bagoeledi ba Mmušo. Ge e ba o se lenyalong, na o ka diriša tokologo ya gago go oketša karolo yeo o e kgathago go ruteng ba bangwe therešo? Le wena o ka hwetša gore go se be lenyalong ke mpho e tšwago go Jehofa.

Bao ba Nyakago go Tsena Lenyalong

10, 11. Jehofa o thekga bjang bao ba nyakago go tsena lenyalong eupša ba se ba tšwa ba hwetša molekane wa maleba?

¹⁰ Ka morago ga go fetša nako e teletšana ba se lenyalong, bontši bja bahlanka ba Jehofa ba botegago ba dira phetho ya gore ba nyake molekane wa lenyalo. Ka ge ba lemoga gore ba nyaka tlhahlo, ba kgopela Jehofa gore a ba thuše go hwetša molekane wa maleba.—Bala 1 Bakorinthe 7:36.

¹¹ Ge e ba o nyaka go tsena lenyalong le motho yo a hlankelago Jehofa ka moya wa gagwe ka moka go swana le wena, botša Modimo taba yeo ka thapelo. (Bafil. 4:6, 7) Go sa šetšwe gore go tla nyakega gore o lete ka lebaka le lekaakang, o se ke wa itlhoboga. Holofela gore Modimo wa rena yo lerato e tla ba Mothuši wa gago, gomme o tla go thekga maikwelong ka go dumelelana le dinyakwa tša gago.—Baheb. 13:6.

12. Ke ka baka la’ng Mokriste a swanetše go hlahloba ka kelohloko taba ya go tsena lenyalong?

¹² Mokriste yo a sego lenyalong yo a kganyogago go tsena lenyalong a ka ferewa ke yo a fokolago moyeng goba gaešita le ke motho yo e sego modumedi. Ge e ba seo se go diragalela, gopola gore bohloko bjo bo tlišwago ke go dira kgetho e fošagetšego ya go kgetha molekane wa lenyalo e ka ba bjo bohloko kudu go feta bodutu bjoo motho a bago le bjona ge a dutše a nyaka molekane wa lenyalo. Le gona, motsotsong woo o tsenago lenyalong ka ona, bohlokong le lethabong, o tlamilwe go molekane wa gago go fihlela lehung. (1 Bakor. 7:27) O se ke wa akgofela go dira phetho ya go tsena lenyalong yeo o tlago go itsholela yona ka morago.—Bala 1 Bakorinthe 7:39.

Itokišetše Ditherešo tša Bophelo bja Lenyalo

13-15. Ke dilo dife tšeo di ka bakago tlaišego lenyalong tšeo baratani ba swanetšego go boledišana ka tšona nakong ya lefereyo?

¹³ Le ge Paulo a ile a kgothaletša gore batho ba hlankele Jehofa ba se lenyalong, ga se a ka a nyatša bao ba bego ba dirile phetho ya go tsena lenyalong. Go e na le moo, keletšo ya gagwe e buduletšwego e thuša banyalani gore ba lebeletšane le ditherešo tša bophelo bja lenyalo le go dira gore tlemo ya bona e be ya sa ruri.

¹⁴ Ba bangwe bao ba nyakago go nyalana ba swanetše go lokiša menagano ya bona ka seo ba se letetšego lenyalong. Nakong ya lefereyo, batho ba babedi ba ka bona lerato la bona e le la moswananoši, e le leo le sa tlwaelegago, e le bohlatse bja gore lenyalo la bona le tla tlala lethabo. Ba tsenela lenyalo ba gapilwe ke maikwelo a ditoro le a go dumela gore ga go selo seo le ka mohla se ka senyago lethabo leo ba nago le lona. Go nagana ka tsela yeo go fošagetše. Go bontšhana ga banyalani lerato ke selo se se thabišago, eupša seo ka bosona ga se lokišetše batho ba babedi bao ba nyakago go nyalana tlaišego yeo e welago lenyalo le lengwe le le lengwe.—Bala 1 Bakorinthe 7:28. *

¹⁵ Bontši bja bao ba sa tšwago go nyalana ba a makala, gaešita le go nyama, ge balekane ba bona ba sa dumelelane le bona ditabeng tše bohlokwa. Ba ka ikhwetša ba sa dumelelane kamoo ba swanetšego go diriša tšhelete ya bona ka gona le kamoo ba tlago go ikhutša ka gona, lefelo leo ba tlago go dula go lona, le gore ba tla etela ba meloko ya bona gakae. Le gona yo mongwe le yo  mongwe o na le go dira dilo tšeo di ka tenago yo mongwe. Nakong ya lefereyo, go bonolo gore motho a tšee dilo tše bjalo ganyenyane, eupša ka morago di ka tla tša baka mathata a magolo lenyalong. Ke gabotse ge baratani ba ka lokiša dilo tšeo di ba tshwenyago pele ga ge ba nyalana.

16. Ke ka baka la’ng banyalani ba swanetše go dumelelana kamoo ba tlago go lebeletšana le ditlhohlo tša bophelo bja lenyalo?

¹⁶ Gore banyalani ba tle ba atlege e bile ba thabe, ba swanetše go lebeletšana le ditlhohlo tša bona e le ngatana e tee. Ba swanetše go dumelelana kamoo ba tlago go laya bana ba bona le kamoo ba tlago go hlokomela batswadi ba bona bao ba tšofalago. Kgateletšo yeo e bakwago ke mathata a lapa ga se ya swanela go katologanya banyalani bao. Ka go diriša keletšo ya Beibele, ba ka rarolla mathata a mantši, ba kgotlelela ao go sego bonolo go a rarolla gomme ba dula ba thabile.—1 Bakor. 7:10, 11.

17. Ke ‘dilo dife tša lefase’ tšeo banyalani ba ka letelago go tshwenyega ka tšona?

¹⁷ Paulo o bolela ka therešo e nngwe ya bophelo bja lenyalo go 1 Bakorinthe 7:32-34. (Bala.) Ka tlwaelo banyalani ba “tshwenyega ka dilo tša lefase,” tše bjalo ka dijo, diaparo, madulo le dilo tše dingwe tšeo e sego tša moya. Ke ka baka la’ng go le bjalo? Nakong ya ge ngwanabo rena e be e sa le lesogana, a ka ba a ile a diriša nako e ntši bodireding. Eupša ka ge ga bjale a nyetše, o hwetša gore o swanetše go diriša e nngwe ya nako yeo le a mangwe a matla ao gore a hlokomele mosadi wa gagwe e le gore a mo amogele. Mosadi le yena o dira se se swanago go monna wa gagwe. Jehofa le yena o lemoga seo ka baka la bohlale bja gagwe. O a tseba gore gantši lenyalo leo le atlegilego le nyaka nako le matla ao monna le mosadi ba bego ba a diriša tirelong ya Gagwe pele ga ge ba nyalana.

18. Ke diphetogo dife tša mabapi le go thabela segwera le ba bangwe tšeo ba bangwe ba ka swanelwago ke go di dira ka morago ga lenyalo?

¹⁸ Eupša thuto ye ga e felele mo. Ge e ba banyalani ba swanetše go diriša e nngwe ya nako ya bona le a mangwe a matla a bona gore ba hlokomelane go e na le go dira tirelo ya Modimo, na ga  se ba swanela go dira se se swanago ka dilo tšeo peleng ba bego ba di diriša go thabela segwera le ba bangwe pele ga ge ba nyalana? Mosadi o tla ikwa bjang ge monna wa gagwe a tšwela pele a phelela dipapadi le bagwera ba gagwe? Goba monna o tla ikwa bjang ge mosadi wa gagwe a fetša nako e ntši a dira dilo tša go itloša bodutu le bagwera ba gagwe? Go se go ye kae molekane yoo a hlokomologilwego a ka ikwa a lewa ke bodutu, a se a thaba e bile a sa ratwe. Seo se ka phengwa ge e ba bao ba nyalanago ba dira sohle seo ba ka se kgonago go matlafatša tlemo ya bona ya go ba monna le mosadi.—Baef. 5:31.

Jehofa o Nyaka Gore re Hlweke Boitshwarong

19, 20. (a) Ke ka baka la’ng banyalani ba ka wela tekong ya go itshwara ka tsela e gobogilego? (b) Ke kotsi efe yeo banyalani ba ka welago go yona ge e ba ba dumelela gore ba arogane ka nako e telele?

¹⁹ Bahlanka ba Jehofa ba ikemišeditše go dula ba hlwekile boitshwarong. Ba bangwe ba kgetha go tsena lenyalong e le gore ba pheme go ba le mathata tabeng ye. Lega go le bjalo, lenyalo ga le šireletše motho le semeetseng gore a se hlweke ditabeng tša botona le botshadi. Mehleng ya Beibele, motse o ageleditšwego o be o šireletša batho ge feela ba be ba dula ka gare ga wona. Ge motho a be a ka tšwela ka ntle ga motse ge sehlopha sa bahlakodi le sa mahodu se be se sepelasepela moo, o be a ka hulwa goba a bolawa. Ka mo go swanago, batho bao ba lego lenyalong ba šireletšwa boitshwarong bjo bo gobogilego ge feela ba dula ka gare ga mellwane ya boitshwaro bja tša botona le botshadi yeo Mothomi wa lenyalo a ba beetšego yona.

²⁰ Paulo o boletše ka mellwane yeo go 1 Bakorinthe 7:2-5. Mosadi o na le tokelo ya go ba le dikopano tša botona le botshadi le monna wa gagwe a nnoši; monna le yena o na le tokelo yeo go mosadi wa gagwe feela. Go letetšwe gore yo mongwe le yo mongwe a nee yo mongwe “tshwanelo” ya lenyalo, goba dikopano tša botona le botshadi tšeo batho bao ba nyalanego ba nago le tshwanelo ya go ba le tšona. Lega go le bjalo, banna ba bangwe le basadi ba bangwe ba fetša nako e telele ba arogane—ba tšea maeto a boikhutšo a sa swanego goba ba aroganywa ke mošomo wa boiphedišo, ka go re’alo ba timana “tshwanelo” ye. Nagana mathata a magolo ao a ka bago gona ka baka la “go se kgone go itshwara,” gomme motho a ineela kgateletšegong ya Sathane ke moka a wela bohlotlolong. Jehofa o šegofatša dihlogo tša malapa tšeo di fepago malapa a tšona ntle le go bea manyalo a tšona kotsing.—Ps. 37:25.

Mehola ya go kwa Keletšo ya Beibele

21. (a) Ke ka baka la’ng phetho ya go ba ga motho lenyalong le ya go se tsene go lona e le boima ka tsela ye? (b) Ke ka baka la’ng keletšo yeo e lego go 1 Bakorinthe kgaolo 7 e na le mohola?

²¹ Phetho ya go dula ga motho a se lenyalong le ya go tsena go lona e gare ga tše dingwe tša diphetho tše boima kudu tšeo motho a tlago go di dira. Batho ka moka ga se ba phethagala, e lego seo se bakago mathata a mantši ditswalanong tša bona. Ka gona gaešita le bao Jehofa a ba ratago le go ba šegofatša ba ka se tšhabele ka mo go feletšego manyami, go sa šetšwe gore ga ba lenyalong goba ba tsene go lona. Ge e ba o diriša keletšo e bohlale yeo e hwetšwago go 1 Bakorinthe kgaolo 7, o ka dira gore mathata a bjalo e be a sego kae feela. “O tla dira gabotse” mahlong a Jehofa, go sa šetšwe gore ga o lenyalong goba o tsene go lona. (Bala 1 Bakorinthe 7:37, 38.) Go amogelwa ke Modimo ke pakane e kgolo kudu yeo o ka e fihlelelago. Ge a go amogetše, o tla tšwela pele o lebile bophelong lefaseng la gagwe le lefsa. Gona moo, tswalano ya monna le mosadi e tla ba e se na dikgateletšo tšeo di tlwaelegilego lehono.

[Mongwalo wa tlase]

Na o ka Araba?

• Ke ka baka la’ng go sa swanela go ba le motho yo a phegelelago motho yo mongwe gore a tsene lenyalong?

• O ka diriša bjang nako ya gago gabotse ge o le mohlanka wa Jehofa yo a sego lenyalong?

• Batho bao ba lego lefereyong ba ka itokišetša bjang ditlhohlo tša lenyalo?

• Ke ka baka la’ng lenyalo le sa šireletše motho le semeetseng boitshwarong bjo bo gobogilego bja tša botona le botshadi?

[Dipotšišo tša Thuto]

[Diswantšho go letlakala 14]

Bakriste ba sego lenyalong bao ba dirišago nako ya bona go katološa bodiredi bja bona ba a thaba

[Seswantšho go letlakala 16]

Ke diphetogo dife tšeo ba bangwe ba ka swanelwago ke go di dira ka morago ga lenyalo?