“Badiiledi” Lefaseng le Kgopo
“Badiiledi” Lefaseng le Kgopo
‘Ka tumelo ka moka ba ile ba bolela phatlalatša gore e be e le bašele le badiiledi nageng.’—BAHEB. 11:13.
1. Ke’ng seo Jesu a se boletšego ka boemo bja balatedi ba gagwe ba therešo mabapi le lefase?
JESU o boletše ka barutiwa ba gagwe gore: “Bona ba lefaseng.” Eupša a hlalosa gore: “Bona ga se karolo ya lefase go etša ge nna ke se karolo ya lefase.” (Joh. 17:11, 14) Ka go re’alo, Jesu o bontšhitše gabotse boemo bja balatedi ba gagwe ba therešo mabapi le “lefase le,” leo modimo wa lona e lego Sathane. (2 Bakor. 4:4) Gaešita le ge ba phela lefaseng le le kgopo, e be e ka se be karolo ya lona. Boemo bja bona tshepedišong ye bo swana le bja “badiiledi le . . . badudi ba nakwana.”—1 Pet. 2:11.
Ba Phetše e le “Badiiledi”
2, 3. Ke ka baka la’ng go ka bolelwa gore Henoge, Noa gotee le Aborahama le Sara ba phetše e le “bašele le badiiledi nageng”?
2 Go tloga mehleng ya bogologolo, bahlanka ba botegago ba Jehofa ba ile ba phela ka tsela e fapanego le ya batho ba mehleng ya bona bao ba bego ba sa boife Modimo. Pele ga Meetsefula, Henoge le Noa ba ile ba “sepela le Modimo wa therešo.” (Gen. 5:22-24; 6:9) Bobedi bja bona e be e le baboledi ba nago le sebete ba dikahlolo tša Jehofa tšeo di bego di lebišitšwe lefaseng le kgopo la Sathane. (Bala 2 Petro 2:5; Juda 14, 15.) Ka ge ba be ba sepela le Modimo lefaseng leo le bego le sa mmoife, Henoge “o kgahlišitše Modimo gabotse” gomme Noa “o be a se na bosodi gare ga batho ba mehleng ya gagwe.”—Baheb. 11:5; Gen. 6:9.
3 Ka taelo ya Modimo, Aborahama le Sara ba ile ba tlogela manobonobo a bophelo bja motse wa Uri ya Bakaladea gomme ba amogela tlhohlo ya go phela e le badiiledi nageng e šele. (Gen. 11:27, 28; 12:1) Moapostola Paulo o ngwadile gore: “Ka tumelo Aborahama ge a bitšwa, o ile a kwa ka gore a tloge a ye lefelong leo go lona a bego a tla le newa e le bohwa; o ile a tloga gaešita le ge a be a sa tsebe mo a yago gona. Ka tumelo o ile a dula bjalo ka modiiledi nageng ya kholofetšo go etša ge eka ke nageng e šele, ke moka a dula ditenteng le Isaka le Jakobo, e lego bajabohwagotee le yena ba kholofetšo e swanago.” (Baheb. 11:8, 9) Ge Paulo a bolela ka bahlanka ba bjalo ba botegago ba Jehofa o itše: “Ka moka ba ile ba hwa ba na le tumelo, gaešita le ge dikholofetšo di se tša phethagala mehleng ya bona, eupša ba di bone di le kgole ba di amogela gomme ba bolela phatlalatša gore e be e le bašele le badiiledi nageng.”—Baheb. 11:13.
Temošo go Baisiraele
4. Baisiraele ba ile ba newa temošo efe pele ga ge ba ka dula nageng ya bona?
4 Ditlogolwana tša Aborahama e lego Baisiraele, di ile tša ata gomme mafelelong ya ba setšhaba seo se neilwego molao le naga. (Gen. 48:4; Doit. 6:1) Setšhaba sa Isiraele se be se sa swanela go lebala gore Mong wa naga ya sona e be e le Jehofa. (Lef. 25:23) Se be se swana le bahiri bao ba swanetšego go dira seo Monggae a ba botšago sona. Go feta moo, ba be ba swanetše go gopola gore “motho ga a phele ka senkgwa feela”; ba be ba se ba swanela go dumelela mahumo a ba dira gore ba lebale Jehofa. (Doit. 8:1-3) Pele ga ge Baisiraele ba ka fihla nageng ya bona, ba ile ba newa temošo ye: “E tla re ge Jehofa Modimo wa gago a go goroša nageng yeo a enetšego borakgolokhukhu ba gago e lego Aborahama, Isaka le Jakobo gore o tla go nea yona, e lego metse e megolo le e mebotse yeo o sego wa e aga, le dintlo tšeo di tletšego dilo ka moka tše dibotse tšeo di sa tlatšwago ke wena, didiba tšeo di epilwego eupša di sa epša ke wena, dirapa tša merara le dihlare tša mehlware tšeo o sego wa di bjala, e bile o šetše o jele o khoše, o itlhokomele gore o se ke wa lebala Jehofa.”—Doit. 6:10-12.
5. Ke ka baka la’ng Jehofa a ile a lahla Baisiraele, gomme o ile a thoma go amogela setšhaba sefe se sefsa?
5 Temošo ye e be e le bohlokwa. Mehleng ya Nehemia, sehlopha sa Balefi se ile sa gopola ka manyami seo se ilego sa direga ka morago ga ge Baisiraele ba tsene Nageng ya Kholofetšo. Ka morago ga ge batho ba setšhaba sa Isiraele ba dutše dintlong tša manobonobo gomme ba na le dijo tše dintši le beine, ba ile “ba ja ba kgotsofala, ba nona.” Ba ile ba rabela go Modimo, gaešita le go bolaya baporofeta bao a bego a ba rometše go ba lemoša. Ka gona, Jehofa o ile a ba gafela manabeng a bona. (Bala Nehemia 9:25-27; Hos. 13:6-9) Ka morago go moo, ka tlase ga pušo ya Baroma, Bajuda bao ba se nago tumelo ba ile ba ba ba fihla bokgoleng bja go bolaya Mesia yo a holofeditšwego! Jehofa o ile a ba lahla gomme a thoma go amogela setšhaba se sefsa, Isiraele ya moya.—Mat. 21:43; Dit. 7:51, 52; Bagal. 6:16.
‘Ga le Karolo ya Lefase’
6, 7. (a) O be o ka hlalosa bjang seo Jesu a se boletšego ka boemo bja balatedi ba gagwe mabapi le lefase? (b) Ke ka baka la’ng Bakriste ba therešo ba be ba se ba swanela go ba karolo ya tshepedišo ya Sathane?
6 Go etša ge go bontšhitšwe pejana sehlogong se, Hlogo ya phuthego ya Bokriste, Jesu Kriste, o bontšhitše gabotse gore balatedi ba gagwe e be e ka se be karolo ya lefase, e lego tshepedišo e kgopo ya dilo ya Sathane. Pejana pele ga lehu la gagwe, Jesu o boditše barutiwa ba gagwe gore: “Ge nkabe le be le le karolo ya lefase, lefase le ka be le rata seo e lego sa lona. Ka ge le se karolo ya lefase, eupša ke le kgethile lefaseng, ka baka leo lefase le le hloile.”—Joh. 15:19.
7 Ge Bokriste bo dutše bo ata, na Bakriste ba be ba swanetše go amogela lefase, ba dumelelane le mekgwa ya lona le go ba karolo ya lona? Aowa. Go sa šetšwe gore ba dula kae, ba be ba swanetše go fapana le tshepedišo ya Sathane. Moo e ka bago nywaga e 30 ka morago ga lehu la Kriste, moapostola Petro o ngwaletše Bakriste bao ba bego ba dula dikarolong tše fapafapanego tša mmušo wa Baroma gore: “Baratiwa, ke le kgothatša le le badiiledi le bile le le badudi ba nakwana gore le tšwele pele le ila dikganyogo tša nama, tšeo di lwantšhanago le moya. Dulang le itshwere gabotse gare ga ditšhaba.”—1 Pet. 1:1; 2:11, 12.
8. Radihistori yo mongwe o hlalositše bjang tswalano ya lefase le Bakriste ba mehleng ya pele?
8 Ge a thekga taba ya gore Bakriste ba mehleng ya pele ba be ba itshwere bjalo ka “badiiledi . . . le badudi ba nakwana” mmušong wa Baroma, radihistori Kenneth Scott Latourette o ngwadile gore: “Ke selo se se tsebjago gabotse gore nywagakgolong e meraro ya mathomo ya Bokriste, Bakriste ba be ba tlaišwa ka mehla le gona mabakeng a mantši e le ka tsela e šoro . . . Ba be ba latofatšwa ka dilo tše dintši. Ka baka la ge ba be ba gana go tšea karolo menyanyeng ya boheitene, Bakriste ba be ba lebelelwa e le bailaModimo. Ka baka la go se tšee karolo ga bona medirong e mentši ya setšhaba e bjalo ka menyanya ya boheitene, meletlo ya setšhaba yeo Bakriste ba bego ba e lebelela e tletše ditumelo, mekgwa le boitshwaro bjo bo gobogilego bja boheitene—ba be ba kwerwa ka go botšwa gore ba hloile batho.”
Go se Diriše Lefase ka Botlalo
9. Ka ge re le Bakriste ba therešo, re nea bjang bohlatse bja gore ga se ra ‘hloya batho’ ba bangwe?
9 Boemo ke bofe lehono? Ge e le mabapi le “[tshepedišo] ya gona bjale e kgopo ya dilo,” re dula re na le boemo bja kgopolo bjo bo swanago le bjoo Bakriste ba mehleng ya pele ba bego ba na le bjona. (Bagal. 1:4) Ka baka la se, batho ba bantši ga ba re kwešiše e bile ba bangwe ba bona ba re hloile. Lega go le bjalo, ruri ga se ra ‘hloya batho’ le gatee. Ka baka la ge re rata batho ba bangwe, re tsena ka ntlo le ntlo re dira maiteko a go boledišana le motho yo mongwe le yo mongwe ka “ditaba tše . . . dibotse tša Mmušo” wa Modimo. (Mat. 22:39; 24:14) Re dira se ka baka la ge re kgodišegile gore Mmušo wa Jehofa ka tlase ga pušo ya Kriste kgauswinyane o tla fediša pušo ya batho ba sa phethagalago gomme ya tšeelwa legato ke tshepedišo e mpsha ya dilo.—Dan. 2:44; 2 Pet. 3:13.
10, 11. (a) Re diriša bjang lefase ka mo go lekanego? (b) Ke ka ditsela dife tše dingwe Bakriste bao ba lego šedi ba phemago go diriša lefase ka botlalo?
10 Ka baka la go akgofa ga phedišo ye e tlelago tshepedišo ye ya dilo, ka ge re le bahlanka ba Jehofa re lemoga gore ye ga se nako ya go iketla lefaseng le le le hwago. Re ela hloko mantšu a moapostola Paulo a rego: “Bana bešo, ke re nako e šetšego ke e nyenyane. Go tloga bjale go ya pele anke . . . bao ba rekago ba etše bao ba se nago selo, bao ba dirišago lefase ba etše bao ba sa le dirišego ka mo go tletšego; gobane boemo bja lefase le bo a fetoga.” (1 Bakor. 7:29-31) Eupša Bakriste ba mehleng yeno ba diriša lefase bjang? Ba dira se ka go diriša thekinolotši ya lehono e le mokgwa wa poledišano wa go phatlalatša tsebo ya Beibele lefaseng ka bophara ka maleme a makgolokgolo. Ba diriša lefase ka mo go lekanego e le gore ba kgone go iphediša. Ba reka dithoto tše di nyakegago le go lefelela ditirelo tše bohlokwa tšeo di hwetšwago lefaseng. Lega go le bjalo, ba phema go diriša lefase ka botlalo ka gore ba be le dithoto tše di lekanego le go dira gore mešomo ya bona ya boiphedišo e se ba laole.—Bala 1 Timotheo 6:9, 10.
11 Bakriste bao ba lego šedi ba phema go diriša lefase ka botlalo tabeng ya thuto e phagamego. Batho ba bantši lefaseng le ba lebelela thuto e phagamego e le mathomomayo a botumo le bophelo bja manobonobo. Eupša rena Bakriste re phela bjalo ka badiiledi e bile re phegelela dipakane tše di fapanego. Re phema go “hlagolela dilo tše phagamego.” (Baroma 12:16; Jer. 45:5) Ka ge re le balatedi ba Jesu, re ela hloko temošo ya gagwe e rego: “Dulang le butše mahlo le itišitše mohuteng o mongwe le o mongwe wa megabaru, gobane gaešita le ge motho a atetšwe ke dilo, fela bophelo bja gagwe ga bo tlišwe ke dilo tše a nago le tšona.” (Luka 12:15) Ka baka leo, bafsa ba Bakriste ba kgothaletšwa go phegelela dipakane tša moya, le go hwetša feela thuto e lekanego yeo e ka ba thušago gore ba hwetše dinyakwa tša bohlokwa ge ba dutše ba tsepamišeditše dikgopolo tša bona go itokišeletšeng go hlankela Jehofa ‘ka dipelo tša bona ka moka, moya wa bona ka moka, matla a bona ka moka le ka menagano ya bona ka moka.’ (Luka 10:27) Ka go dira bjalo, ba ka “huma go Modimo.”—Luka 12:21; bala Mateo 6:19-21.
Phema go Imelwa ke Dipelaelo tša Bophelo
12, 13. Go theetša ga rena mantšu a Jesu ao a begilwego go Mateo 6:31-33 go tla re hlaola bjang go batho ba lefase?
12 Bahlanka ba Jehofa ba fapana le batho ba lefase ka tsela yeo ba lebelelago dilo tše di bonagalago. Tabeng ye, Jesu o boditše balatedi ba gagwe gore: “Le ka mohla le se ke la belaela la re: ‘Re tla ja’ng, ra nwa’ng goba ra apara’ng?’ Gobane tše ka moka ke dilo tše ditšhaba di di phegelelago ka phišego. Tatago lena wa legodimong o a tseba gore dilo tše ka moka le a di nyaka. Ka gona, tšwelang pele le tsoma Mmušo pele le toko ya gagwe gomme dilo tše tše dingwe ka moka le tla di okeletšwa.” (Mat. 6:31-33) Ba bantši ba badumedigotee le rena ba bone go tšwa phihlelong gore Tatago rena wa legodimong o ba nea dilo tšeo ba di nyakago.
13 “Boineelo go Modimo bo tliša leruo le legolo ge e ba re kgotsofaletše seo re nago le sona.” (1 Tim. 6:6) Seo se tloga se fapane kudu le pono yeo batho ba nago le yona lefaseng lehono. Ka mohlala, ge bafsa ba tsena lenyalong, bontši bja bona bo letetše go hwetša dilo ka moka di sa tloga fase—ntlo goba folete yeo e feletšego ka dithoto tše dibotse tšeo di bitšago, koloi e botse, gotee le didirišwa tša moragorago tša elektroniki. Lega go le bjalo, Bakriste bao ba phelago e le badiiledi ga ba nyake go kganyoga dilo tšeo di lego ka godimo ga matla a bona goba tšeo ba ka se di fihlelelego. Ruri re reta ba bantši bao ba tlogetšego manobonobo a dilo tše di bonagalago e le gore ba ka gafa nako le matla a oketšegilego tirelong ya Jehofa e le bagoeledi ba Mmušo ba fišegago. Ba bangwe ba hlankela e le babulamadibogo, magaeng a Bethele, modirong wa bosepedi goba e le baromiwa. Ruri ka moka ga rena re tloga re leboga tirelo ya pelo ka moka yeo e dirwago ke barapedigotee le rena ba Jehofa!
14. Re ithuta’ng seswantšhong sa Jesu sa mobjadi?
14 Seswantšhong sa gagwe sa mobjadi, Jesu o boletše gore “dipelaelo tša lefase le gotee le matla a forago a mahumo” di ka bipa lentšu la Modimo ka dipelong tša rena gomme tša dira gore re se enywe. (Mat. 13:22) Go phela re kgotsofaletše go ba badiiledi tshepedišong ye ya dilo go re thuša go phema go wela molabeng wo. Go oketša moo, go re thuša go boloka leihlo la rena “le lokile,” goba “le tsepeletše” pele, le lebeletše Mmušong wa Modimo “le sa šitišege” gomme le dula le etišitše dikgahlego tša wona pele maphelong a rena.—Mat. 6:22, mongwalo wa ka tlase.
“Lefase le a Feta”
15. Ke mantšu afe a moapostola Johane ao a tutuetšago pono le boitshwaro bja Bakriste ba therešo mabapi le lefase la gona bjale?
15 Lebaka le legolo leo rena Bakriste ba therešo re itebelelago re le ‘badiiledi e bile re le badudi ba nakwana’ lefaseng le ke kgodišego ya rena ya gore matšatši a lona a badilwe. (1 Pet. 2:11; 2 Pet. 3:7) Pono ye ke yona e tutuetšago dikgetho tša rena bophelong, dikganyogo le dipakane tša rena. Moapostola Johane o lemošitše badumedigotee le yena gore ba se rate lefase goba dilo tše di lego lefaseng gobane “lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.”—1 Joh. 2:15-17.
16. Re ka bontšha bjang gore re hlaotšwe lefaseng gore re be batho ba fapanego?
16 Baisiraele ba be ba boditšwe gore ge e ba ba theetša Jehofa, e be e tla ba “thoto ya [gagwe] e kgethegilego gare ga merafo e mengwe ka moka.” (Ek. 19:5) Ge Baisiraele ba botega, ba be ba fapana le ditšhaba tše dingwe ka moka ka tsela yeo ba rapelago ka yona le tsela ya bona ya bophelo. Ka mo go swanago le lehono, Jehofa o ikgethetše batho bao go lego molaleng gore ba fapana le lefase la Sathane. Re botšwa gore: “Re se ke ra gana go boifa Modimo, re gane dikganyogo tša lefase, re phele ka monagano o hlaphogetšwego le toko le boineelo go Modimo gare ga tshepedišo ye ya dilo ya gona bjale, ge re letile kholofelo e thabišago le ponagalo ya letago ya Modimo Ramatlaohle le ya Mophološi wa rena, Kriste Jesu, yo a ikgafetšego rena gore a re hlakodiše mohuteng o mongwe le o mongwe wa go hloka molao gomme a itlhwekišetša batho bao e lego ba gagwe ka mo go kgethegilego, bao ba fišegelago mediro e mebotse.” (Tito 2:11-14) Batho ba ba bopša ke Bakriste ba tloditšwego le “dinku tše dingwe” tša Jesu tše dimilione tšeo di ba thušago le go ba thekga.—Joh. 10:16.
17. Ke ka baka la’ng batlotšwa le bagwera ba bona ba ka se tsoge ba itsholetše gore ba ile ba phela e le badiiledi lefaseng le le kgopo?
17 “Kholofelo e thabišago” ya batlotšwa ke ya go buša le Kriste legodimong. (Kut. 5:10) Ge kholofelo ya bophelo bjo bo sa felego lefaseng e phethagatšwa bakeng sa dinku tše dingwe, e ka se sa ba badiiledi lefaseng le kgopo. Ba tla ba le dintlo tše dibotse, dijo tše dintši le dino. (Ps. 37:10, 11; Jes. 25:6; 65:21, 22) Ka go se swane le Baisiraele, ba ka se tsoge ba lebetše gore dilo tšeo ka moka di tšwa go Jehofa, “Modimo wa lefase ka moka.” (Jes. 54:5) Batlotšwa le dinku tše dingwe ba ka se itsholele gore ba ile ba phela e le badiiledi lefaseng le le kgopo.
O be o tla Araba Bjang?
• Batho ba mehleng ya bogologolo ba ile ba phela bjang e le badiiledi?
• Bakriste ba mehleng ya pele ba ile ba itshwara bjang mabapi le lefase?
• Bakriste ba therešo ba diriša lefase bjang ka tsela e lekanego?
• Ke ka baka la’ng re ka se tsoge re itsholetše gore re ile ra phela re le badiiledi lefaseng le le kgopo?
[Dipotšišo tša Thuto]
[Seswantšho go letlakala 18]
Bakriste ba mehleng ya pele ga se ba tšea karolo boithabišong bjo bošoro le bjo bo gobogilego
