“Ga Bjale ke Golofetše Eupša e Sego go ya go Ile!”

Ka ge go Anega Sara van der Monde

Gantši batho ba mpotša gore: “Sara, o myemyela ka tsela e kgahlišago e le ruri. Ke ka baka la’ng o dula o thabile?” Ke ba botša gore ke na le kholofelo e kgethegilego. E hlalosega gabonolo ka mantšu a: “Ga bjale ke golofetše eupša e sego go ya go ile!”

KE BELEGWE ka 1974 kua Paris, Fora. Go bile le mathata nakong ya ge ke be ke belegwa, gomme ka morago go ile gwa lemogwa gore ke na le kgobalo bjokong. Ke be ke sa kgone go sepediša maoto a ka le matsogo gabotse, gomme polelo ya ka e le thata go e kwešiša. Ke ile ka ba le bolwetši bja go wa e bile ke fetelwa ke malwetši gabonolo.

Ge ke be ke na le nywaga e mebedi, lapa la gešo le ile la hudugela Melbourne, Australia. Nywaga e mebedi ka morago, tate o ile a tlogela nna le mma. Leo e be e le lekga la mathomo le ke le gopolago leo ke ilego ka ikwa ke le kgauswi le Modimo. Mma yo e lego yo mongwe wa Dihlatse tša Jehofa, gantši o be a eya le nna dibokeng tša Bokriste, moo ke ilego ka ithuta gore Modimo o be a nthata le go ntlhokomela. Tsebo yeo, gotee le lerato la mma le kgonthišetšo ya gagwe, di nthušitše go ikwa ke bolokegile go sa šetšwe maemo a rena ao a bego a fetogile.

Le gona mma o ile a nthuta go rapela Jehofa. Ge e le gabotse, ke ile ka hwetša go rapela go le bonolo go feta go bolela. Nakong ya ge ke rapela, ga ke katanele go bitša mantšu, eupša go bjalo ka ge e ka ke a kwa a bopega gabotse monaganong wa ka. Le gona, ka ge polelo ya ka e le thata go e kwešiša, go a homotša go tseba gore Jehofa o kwešiša selo se sengwe le se sengwe, go sa šetšwe gore ke se bolela ka setu monaganong wa ka goba ka go hlaboša ke kgamakgametša.—Ps. 65:2.

Go Lebeletšana le Ditšhitišo

Ge ke be ke na le nywaga e mehlano, lehlakore la ka le be le hwile go fihla bokgoleng bjoo ke bego ke nyaka dilo tša go nthuša go sepela. Ge e le gabotse ke be ke sepela ka go thekesela. Ge ke be ke na le nywaga e 11, ke be ke se sa kgona le go sepela. Ka morago, ke be ke se sa kgona go namela le go fologa malaong ge e se ka thušo ya sedirišwa sa mohlagase sa go nkuka gomme sa nnametša setulo sa digole, seo ke se laolago ka kere.

Ke a dumela gore ka dinako tše dingwe bogole bja ka bo a nnyamiša. Eupša ka morago ga seo, ke gopola moano wa lapa lešo wo o rego: “O se ke wa tshwenyega ka dilo tšeo o ka se kgonego go di dira. Dira tšeo o ka di kgonago.” Se se nthušitše go dira dilo tše bjalo ka go namela pere, go sesa ka sekepe, go sesiša seketswana, go hloma ditente ka morero wa go ithabiša, gaešita le go otlela koloi moo go bego go se na sephethephethe. Ke bontšha bokgoni bja ka go tša bokgabo ka go thala diswantšho, go roka, go loga, go roka ka go kgabiša le go bopa dilo ka letsopa.

Ka baka la go golofala ga ka o šoro, batho ba bangwe ba re ga ke na bokgoni bja go fihlelela phetho ya maleba ya go rapela Modimo. Ge ke be ke na le nywaga e 18, morutiši wa ka o ile a nkgothaletša go tloga gae gore ke tšhabele bodumedi bja  mma bjoo go ya ka yena bo bego bo le kotsi. O ile a ba a ithaopela go nthuša gore ke hwetše madulo. Lega go le bjalo, ke ile ka mmotša gore le ka mohla nka se ke ka tlogela tumelo ya ka e bile ke tla tloga gae ge feela ke be ke itokišeditše go ikemela.

Ke ile ka kolobetšwa gore ke be yo mongwe wa Dihlatse tša Jehofa nakwana ka morago ga tiragalo yeo le morutiši wa ka. Nywaga e mebedi ka morago, ke ile ka inyakela mokutwana. Mo ke a ipshina ka gore ke hwetša thušo yeo ke e nyakago e bile ke ikemetše.

Go Ferewa ke sa Letela

Go theoša le nywaga, ke ile ka lebeletšana le diteko tše dingwe tša tumelo. Letšatši le lengwe ke ile ka tlabega la mafelelo ge morutwanagotee le nna—yoo le yena a golofetšego—a nkgopela gore ke nyalane le yena. Mathomong ke be ke tšeegile maikwelo. Go swana le makgarebe a mantši, ke hlologela go ba le molekane bophelong. Lega go le bjalo, ke ile ka lemoga gore go ba ga rena bao ba golofetšego ga se kgonthišetšo ya gore re tla ba lenyalong leo le thabilego. Go oketša moo, lesogana le le be le sa dumele seo ke bego ke se dumela. Ditumelo tša rena, mediro ya rena le dipakane tša rena di be di tloga di fapane. Ka gona re be re ka phedišana bjang? Le gona ke be ke ikemišeditše go kwa tlhahlo e kwagalago ya Modimo ya go nyalana feela le modumedigotee le nna. (1 Bakor. 7:39) Ka baka leo, ke ile ka botša lesogana leo ka botho gore ke be nka se kgone go amogela kgopelo ya lona.

Le lehono, ke a tseba gore ke dirile kgetho e bohlale. Le gona ga ke na pelaelo monaganong wa ka gore ke tla ba ke thabile lefaseng le lefsa leo Modimo a re holofeditšego lona. (Ps. 145:16; 2 Pet. 3:13) Go sa dutše go le bjalo, ke ikemišeditše go dula ke botegela Jehofa le go kgotsofalela maemo a ka a gona bjale.

Ke hlologetše letšatši leo ke tlago go ba ke kgona go tshela ka lethabo setulong sa ka sa digole gomme ke kitima ka bolokologi. Ke moka ke tla goeletša ka lethabo gore: “Ke be ke golofetše, eupša ga bjale ke phetše gabotse—ka mo go sa felego!”