“O se ke wa Ithekga ka Tlhaologanyo ya Gago”

“Bota Jehofa ka pelo ya gago ka moka gomme o se ke wa ithekga ka tlhaologanyo ya gago.”—DIE. 3:5.

1, 2. (a) Ke maemo afe ao re ka lebanago le ona? (b) Ke mang yo re swanetšego go ithekga ka yena ge re gateletšegile, ge re swanetše go dira diphetho goba ge re lwantšha teko, gomme ka baka la’ng?

MOTHWADI wa Cynthia * o šetše a tswaletše dikarolo tše dingwe tša khamphani ya gagwe gomme o rodišitše ba bangwe ba bašomi ba gagwe modiro. Cynthia o ipona a latela. O tla dira’ng ge a ka felelwa ke mošomo? O tla lefelela bjang dikoloto tša gagwe? Kgaetšedi wa Mokriste yo a bitšwago Pamela o nyaka go hudugela moo go nyakegago bagoeledi ba Mmušo, eupša o ipotšiša ge e ba a swanetše go ya? Lesogana leo le bitšwago Samuel lona le tshwenyegile ka selo se sengwe. O be a na le mokgwa wa go bogela diswantšho tše di kgothaletšago bootswa ge e be e sa le o monyenyane. Ga bjale Samuel o nywageng ya gagwe ya bo-20, gomme o lekega kudu gore a boele mokgweng woo. A ka lwantšha bjang teko yeo?

² O ithekga ka mang ge o lebeletšane le maemo a gateletšago, ge o dira diphetho tše bohlokwa goba ge o lwantšha diteko? Na o ithekga ka matla a gago feela, goba na o “lahlela maima a gago go Jehofa”? (Ps. 55:22) Beibele e re: “Mahlo a Jehofa a lebeletše baloki, ditsebe tša gagwe di a ba kwa ge ba llela gore a ba thuše.” (Ps. 34:15) Ka gona, ke gabohlokwa gore re bote Jehofa ka dipelo tša rena ka moka gomme re se ithekge ka ditlhaologanyo tša rena!—Die. 3:5.

3. (a) Go bota Jehofa go akaretša’ng? (b) Ke ka baka la’ng ba bangwe ba ka nyaka go ithekga ka tlhaologanyo ya bona?

³ Go bota Jehofa ka dipelo tša rena ka moka go akaretša go dira dilo ka tsela ya gagwe, go ya ka thato ya gagwe. Selo se bohlokwa seo se tlago go re thuša go dira bjalo ke gore re mmatamele ka mehla ka thapelo gomme re mo kgopele ka dipelo tša rena ka moka gore a re hlahle. Lega go le bjalo, batho ba bantši ba hwetša go le boima gore ba ithekge ka Jehofa ka mo go feletšego. Ka mohlala, kgaetšedi yo mongwe wa Mokriste yo a bitšwago Lynn o dumela gore: “Ka mehla ke be ke thatafalelwa ke go ithekga ka Jehofa ka mo go feletšego.” Ka baka la’ng? O re: “Tate ga a na taba le nna, e bile mma ga se a ka a hlokomela dinyakwa tša ka tša maikwelo le tša nama. Ka gona ke ile ka ithuta go itlhokomela ke sa le yo monyenyane.” Tsela yeo Lynn a gotšego ka yona e ile ya mo thatafaletša go bota motho le ge e le ofe ka mo go feletšego. Bokgoni bja motho le katlego ya gagwe le tšona di ka dira gore a ikholofele. Ge e ba mogolo a ithekga ka phihlelo ya gagwe, a ka thoma go phetha boikarabelo bja phuthego ka ntle le gore a thome ka go batamela Modimo ka thapelo.

4. Ke’ng seo se tlago go ahlaahlwa sehlogong se?

⁴ Jehofa o letetše gore re dire boiteko bjo bo feletšego bja go phelela seo re se rapelelago gomme re dire dilo ka go dumelelana le thato ya gagwe. Ka gona, re ka lahlela bjang matshwenyego a rena go yena mola ka lehlakoreng le lengwe re dira boiteko bja go rarolla mathata a boima? Ge go tliwa tabeng ya go dira diphetho, ke’ng seo re swanetšego go se ela hloko? Ke ka baka la’ng thapelo e le bohlokwa ge re leka go ganetša diteko? Re tla ahlaahla dipotšišo tše ka go lebelela mehlala ya ka Mangwalong.

 Ge re Gateletšegile

5, 6. Hesekia o ile a arabela bjang ge a be a tšhošetšwa ke kgoši ya Asiria?

⁵ Beibele e bolela ka Kgoši Hesekia wa Juda gore: “O ile a kgomarela Jehofa. Ga se a ka a tlogela go mo latela, eupša o ile a lota ditaelo tša Jehofa tšeo a bego a di laetše Moshe.” Ee, “o be a bota Jehofa Modimo wa Isiraele.” (2 Dikg. 18:5, 6) Hesekia o ile a arabela bjang ge Kgoši Sanheribe wa Asiria a romela batseta ba gagwe Jerusalema—go akaretša le Rabashake—ba na le madira a matla? Madira ao a matla a Asiria a be a šetše a thopile metse e mmalwa e šireleditšwego ya Juda, gomme Sanheribe bjale o be a lebile Jerusalema. Hesekia o ile a ya ntlong ya Jehofa gomme a rapela a re: “Wena Jehofa Modimo wa rena, hle re phološe seatleng sa gagwe, e le gore mebušo ka moka ya lefase e tsebe gore wena Jehofa o Modimo o nnoši.”—2 Dikg. 19:14-19.

⁶ Hesekia o ile a dira dilo ka go dumelelana le thapelo ya gagwe. Gaešita le pele ga ge a ka ya tempeleng go yo rapela, o ile a laela batho gore ba se arabe ge Rabashake a ba kwera. Le gona Hesekia o ile a romela ba bangwe ba bona go moporofeta Jesaya, a kgopela gore a mo eletše. (2 Dikg. 18:36; 19:1, 2) Hesekia o ile a gata megato yeo a bego a swanetše go e gata. Mo lebakeng le, ga se a ka a leka go nyaka tharollo yeo e bego e sa dumelelane le thato ya Jehofa ka gore a kgopele thušo go Egipita goba go ditšhaba tša baagišani. Go e na le gore Hesekia a ithekge ka tlhaologanyo ya gagwe, o ile a bota Jehofa. Ka morago ga gore morongwa wa Jehofa a bolaye banna ba Sanheribe ba 185 000, Sanheribe o ile “a tloga” gomme a gomela Ninife.—2 Dikg. 19:35, 36.

7. Ke’ ng seo re ithutago sona seo se ka re kgothatšago ka thapelo ya Hanna le ya Jona?

⁷ Hanna mosadi wa Elikana wa Molefi, le yena o ile a ithekga ka Jehofa ge a be a gateletšegile ka ge e be e le moopa. (1 Sam. 1:9-11, 18) Moporofeta Jona o ile a phološwa ka mpeng ya hlapi e kgolo ka morago ga ge a rapetše gore: “Ke goeleditše Jehofa ke le tlalelong gomme a nkaraba. Ka llela thušo ke le ka mpeng ya Bodulabahu. Wena wa kwa lentšu la ka.” (Jona 2:1, 2, 10) Go tloga go kgothatša go tseba gore go sa šetšwe gore boemo bjo re lego go bjona ke bjo bobe gakaakang, re ka bitša Jehofa gomme ra ‘kgopela gore a re gaugele’!—Bala Psalme 55:1, 16.

8, 9. Ke dilo dife tšeo di boletšwego thapelong ya Hesekia, ya Hanna le ya Jona, gomme re ithuta’ng go seo?

⁸ Mehlala ya Hesekia, Hanna le Jona e re ruta le thuto e bohlokwa ka seo re sa swanelago go se lebala ge re rapela nakong ya ge re gateletšegile. Ka boraro bja bona ba be ba ikwa ba gateletšegile maikwelong. Eupša dithapelo tša bona di bontšha gore ba be ba sa tshwenyega feela ka bona le gore ba imollwe mathateng a bona. Dilo tše bohlokwahlokwa go bona e be e le leina la Modimo, borapedi bja gagwe le go dira ga bona thato ya gagwe. Hesekia o be a kwešitšwe bohloko ke gore leina la Jehofa le be le gobošwa. Hanna o ile a holofetša gore o tla tšea morwa yoo wa gagwe yo a bego a mo rata gomme a mo gafa tirelong ya taberenakele kua Shilo. Jona yena o itše: “Seo ke se ennego ke tla se phetha.”—Jona 2:9.

⁹ Ge re rapelela go hlakodišwa boemong bjo itšego bjo boima, ke gabohlale gore re hlahlobe maikemišetšo a rena. Na re tshwenyegile kudu ka gore re imollwe bothateng bjoo bja rena, goba na re dula re gopola ka Jehofa le morero wa gagwe? Tlaišego ya rena e ka dira gore re nagane ka rena feela moo e lego gore ga re sa bona bohlokwa bja ditaba tša moya. Ge re rapela Modimo gore a re thuše, anke menagano ya rena e dule e nagana ka Jehofa, go kgethagatšwa ga leina la gagwe le go godišwa ga bogoši bja gagwe. Go dira bjalo go tla re thuša go ba le boemo bjo bo nepagetšego bja kgopolo gaešita le ge tharollo yeo re bego re e holofetše e sa tšwelele. Ka dinako tše dingwe Modimo o araba dithapelo tša rena ka go re nea matla a go kgotlelela teko.—Bala Jesaya 40:29; Bafilipi 4:13.

 Ge re Dira Diphetho

10, 11. Jehoshafate o ile a dira’ng ge a be a lebeletšane le boemo bjoo a bego a sa tsebe gore a swaragane bjang le bjona?

¹⁰ O dira bjang diphetho tše dikgolo bophelong? Na mohlomongwe o thoma ka go dira phetho ke moka e be gona o rapelago Jehofa gore a šegofatše phetho yeo o šetšego o e dirile? Ela hloko seo Jehoshafate kgoši ya Juda a se dirilego ge madira a kopanego a Bamoaba le Baamoni a etla go lwa le yena. Juda e be e ka se kgone go lwa le bona gomme ya fenya. Jehoshafate o ile a gata mogato ofe?

¹¹ Beibele e re: “Jehoshafate a boifa gomme a ikemišetša go tsoma Jehofa.” O ile a laela gore Juda ka moka e ikone dijo gomme a kgoboketša batho gore “ba botšiše Jehofa.” Ke moka o ile a ema pele ga setšhaba sa Juda le sa Jerusalema gomme a rapela. Ka boripana, o itše: “Hle Modimo wa rena, na o ka se ba ahlole? Ka gobane rena ga re na matla pele ga lešaba le le legolo leo le tlago go lwa le rena; e bile rena ga re tsebe gore re dire eng, eupša mahlo a rena a lebeletše wena.” Modimo wa therešo o ile a kwa thapelo ya Jehoshafate gomme a ba phološa ka mohlolo. (2 Dikor. 20:3-12, 17) Ge re dira diphetho, kudukudu tšeo di ka kgomago bomoya bja rena, na ga se ra swanela go ithekga ka Jehofa go ena le go ithekga ka ditlhaologanyo tša rena?

12, 13. Kgoši Dafida o re beetše mohlala ofe tabeng ya go dira diphetho?

¹² Re swanetše go dira’ng ge re lebeletšane le maemo ao go ka bonagalago go le bonolo go a rarolla—mohlomongwe e le ka baka la gore phihlelo yeo re nago le yona e dira gore re nagane tharollo ya kapejana? Pego ya mabapi le Kgoši Dafida e re thuša go ba le temogo tabeng ye. Ge Baamaleke ba be ba hlasela motse wa Tsikilaga, ba ile ba thopa basadi ba Dafida le bana ba gagwe gotee le ba banna ba gagwe. Dafida o ile a botšiša Jehofa gore: “Na nka rakediša bahlasedi ba?” Jehofa o ile araba ka gore: “Ba rakediše, ka gobane o tla ba swara gomme wa thopolla tšeo di thopilwego.” Dafida o ile a latela seo, gomme “a tšea dilo ka moka tšeo Baamaleke ba bego ba di tšere.”—1 Sam. 30:7-9, 18-20.

¹³ Nakwana ka morago ga tlhaselo ya Baamaleke, Bafilisita ba ile ba tla go hlasela Isiraele. Le gona moo Dafida o ile a botšiša Jehofa gomme a mo nea karabo e kwagalago. Modimo o ile a re: “Rotoga, gomme nna ke tla ba gafela seatleng sa gago.” (2 Sam. 5:18, 19) Go se go ye kae ka morago ga mo, Bafilisita ba ile ba boa gape go tlo lwa le Dafida. O be a tla dira’ng lebakeng le? O be a ka re: ‘Nkile ka lebeletšana le boemo bjo bo swanago le bjo ka makga a mabedi. E re ke lwe le manaba a a Modimo, go swana le ge ke ile ka dira peleng.’ Goba na Dafida o be a ka nyaka tlhahlo go Jehofa? Dafida ga se a ka a ithekga ka phihlelo yeo a bego a na le yona. O ile a rapela Jehofa ka lekga le lengwe gape. Ruri o swanetše go ba a ile a thabišwa ke gore o ile a dira seo! Ditaelo tšeo a ilego a di hwetša lebakeng le di be di fapane le tša peleng. (2 Sam. 5:22, 23) Ge re lebeletšane le boemo goba bothata bjo re bo tlwaetšego, re swanetše go ba šedi gore re se ithekge feela ka phihlelo ya rena.—Bala Jeremia 10:23.

14. Re ka ithuta thuto efe tseleng yeo Joshua le banna ba bagolo ba Isiraele ba ilego ba dirišana le Bagibeoni?

¹⁴ Ka moka ga rena ka ge re sa phethagala—go akaretša le bagolo bao ba nago le phihlelo—re swanetše go ba šedi gore re se ikhwetše re sa nyake tlhahlo ya Jehofa ge re dira diphetho. Ela hloko kamoo mohlatlami wa Moshe e lego Joshua, gotee le banna ba bagolo ba Isiraele ba ilego ba arabela ka gona ge Bagibeoni ba bohlale ba be ba etla go bona ba ikgakantše e bile ba itira eka ba tšwa nageng ya kgole. Ka ntle le gore ba botšiše Jehofa, Joshua le banna bao ba ile ba dira khutšo le Bagibeoni, go akaretša le go dira kgwerano le bona. Gaešita le ge Jehofa a ile a feleletša a thekgile kwano yeo, o ile a kgonthišetša gore phošo ye ya go se kgopele tlhahlo go yena e ngwalwe ka Mangwalong e le gore e hole rena.—Josh. 9:3-6, 14, 15.

 Ge re Thatafalelwa ke go Ganetša Diteko

15. Hlalosa lebaka leo thapelo e lego bohlokwa bakeng sa go ganetša teko.

¹⁵ Ka ge re na le “molao wa sebe” gare ga ditho tša mebele ya rena, re swanetše go lwantšha ka thata dikganyogo tša sebe. (Baroma 7:21-25) Ye ke ntwa yeo re ka e fenyago. Bjang? Jesu o boditše balatedi ba gagwe gore thapelo ke e bohlokwa bakeng sa go ganetša teko. (Bala Luka 22:40.) Gaešita le ge dikganyogo goba dikgopolo tše di fošagetšego di sa kgaotše ka morago ga ge re rapetše Modimo, re swanetše go ‘tšwela pele re kgopela Modimo’ gore a re nee bohlale bja go lebeletšana le teko yeo. Re kgonthišeditšwe gore “o fa bohle kudu ka ntle le go goboša.” (Jak. 1:5) Jakobo gape o ngwala gore: “Na go na le motho yo a babjago [moyeng] gare ga lena? A a bitše bagolo ba phuthego ba mo rapelele, ba mo tlotše ka makhura leineng la Jehofa. Thapelo ya tumelo e tla fodiša yo a babjago.”—Jak. 5:14, 15.

16, 17. Nako e kaone ya go rapela ke efe ge re nyaka thušo ya gore re ganetše teko?

¹⁶ Thapelo ke e bohlokwa e le gore re ganetše teko, eupša re swanetše go lemoga nako ya maleba ya go rapela. Ela hloko mohlala wa lesogana le lengwe leo go bolelwago ka lona go Diema 7:6-23. Nakong ya ge šwahlane e tšeatšea, le sepela mokgotheng woo go tsebjago gore go dula mosadi yo a gobogilego. Ka go gogwa ke dikgoketšo tša mosadi yoo ge a le phegelela ka dipolelo tše dintši le ka melomo ya gagwe e boreledi, lesogana leo le mo šala morago, go etša poo yeo e yago tlhabong. Ke ka baka la’ng lesogana leo le ile moo? Ka ge le be le na le “pelo ya bošilo,” ke gore, le be le se na temogo, go bonagala le be le thatafalelwa ke go laola dikganyogo tše di fošagetšego. (Die. 7:7) Ke neng moo thapelo e ka bego e hotše lesogana leo kudu? Go ba gona, go rapelela ga lona matla a go lwantšha teko ka nako le ge e le efe nkabe go le thušitše. Eupša nako e kaone kudu yeo nkabego le rapetše ka yona e be e le nakong ya ge le thoma go tlelwa ke kgopolo ya gore le sepele ka mokgotha woo.

¹⁷ Lehono, monna a ka ba a leka ka matla go se bogele diswantšho tše di kgothaletšago bootswa. Lega go le bjalo, a re re o be a tsena mekerong ya Inthanete yeo a tsebago gabotse gore e na le diswantšho goba dibidio tšeo di tsošago kganyogo ya tša botona le botshadi. Na boemo bja gagwe bo be bo ka se swane le bja lesogana leo go boletšwego ka lona go Diema kgaolo 7? Yeo ke tsela e kotsi kudu yeo motho a ka thomago go sepela ka yona! E le gore motho a ganetše teko ya go bogela diswantšho tše di kgothaletšago bootswa, o swanetše go kgopela thušo ya Jehofa ka thapelo pele ga ge a ka thoma go tsena diswantšhong tše bjalo go Inthanete.

18, 19. (a) Ke ka baka la’ng go ganetša teko e ka ba tlhohlo, eupša o ka kgona bjang go lebeletšana le tlhohlo yeo ka katlego? (b) O ikemišeditše go dira’ng?

¹⁸ Ga go bonolo go ganetša teko goba go fenya mekgwa e mebe. Moapostola Paulo o  ngwadile gore: “Nama e ganetšana le moya kganyogong ya yona gomme moya o ganetšana le nama.” Ka gona, ‘ga re dire tšona dilo tše re nyakago go di dira.’ (Bagal. 5:17) E le gore re fenye tlhohlo ye, re swanetše go rapela ka matla ge dikgopolo tše di fošagetšego goba diteko di thoma go rotoga ka menaganong ya rena, ke moka re gate megato ka go dumelelana le dithapelo tša rena. “Ga go moleko wo o [re] wetšego ge e se woo o tlwaelegilego bathong,” le gona ka thušo ya Jehofa, re ka dula re mmotegela.—1 Bakor. 10:13.

¹⁹ Go sa šetšwe gore re lebeletšane le boemo bjo boima, goba gore re swanelwa ke go dira phetho e boima goba re leka go ganetša teko, Jehofa o re neile mpho e botse kudu—tokišetšo e kgahlišago ya thapelo. Re bontšha gore re ithekgile ka yena ge e ba re mo rapela. Le gona re swanetše go dula re kgopela Modimo moya wa gagwe o mokgethwa, e lego woo o re hlahlago le go re matlafatša. (Luka 11:9-13) Anke re direng sohle seo re ka se kgonago gore re bote Jehofa gomme re se ithekge ka ditlhaologanyo tša rena.

[Mongwalo wa tlase]

Na o a Gopola?

• O ithutile eng go Hesekia, Hanna le Jona mabapi le go bota Jehofa?

• Mehlala ya Dafida le Joshua e gatelela bjang bohlokwa bja go ba šedi ge re dira diphetho?

• Ke neng ka mo go kgethegilego moo re swanetšego go rapela ge re lekwa?

[Dipotšišo tša Thuto]

[Seswantšho go letlakala 9]

Ke neng moo thapelo e ka re holago kudu ge re ganetša teko?