Bahlanka ba Botegago ba Bogologolo—Ba be ba Hlahlwa ke Moya wa Modimo
Bahlanka ba Botegago ba Bogologolo—Ba be ba Hlahlwa ke Moya wa Modimo
“Mmuši Morena Jehofa o nthomile, e bile o romile le moya wa gagwe.”—JES. 48:16.
1, 2. Go nyakega eng gore re bontšhe tumelo, gomme re tla tutuetšwa ke’ng ka go hlahloba mehlala ya babotegi ba bogologolo?
GAEŠITA le ge e ile ya ba gona go tloga mehleng ya Abele, “tumelo ga se batho bohle bao ba nago le yona.” (2 Bathes. 3:2) Ka gona go tla bjang gore motho a be le seka se, gomme ke eng seo se mo dirago gore a botege? Go fihla bokgoleng bjo itšego, tumelo e latela dilo tšeo di kwelwego Lentšung la Modimo. (Baroma 10:17) Ke seka seo se enywago ke moya o mokgethwa wa Modimo. (Bagal. 5:22, 23) Ka gona, gore re bontšhe tumelo, re nyaka moya o mokgethwa.
2 E tla ba phošo go phetha ka gore banna le basadi ba tumelo ba belegwa ba na le yona, ra phetha ka gore tumelo e itlela feela. Bahlanka bao ba beago mohlala o mobotse bao re balago ka bona ka Beibeleng e be e le batho bao ba nago le “maikwelo a swanago le a rena.” (Jak. 5:17) Go be go na le dilo tšeo di ba belaetšago, ba sa kgodišega ka dilo tše itšego e bile ba na le mafokodi, eupša ba ile “ba dirwa ba matla” ka moya wa Modimo e le gore ba lebeletšane le ditlhohlo. (Baheb. 11:34) Ka go hlahloba kamoo moya wa Jehofa o ilego wa šoma go bona, rena lehono re ka tutueletšega go tšwela pele re sepela tseleng ya tumelo, kudukudu mo nakong ye moo tumelo ya rena e tlogago e hlasetšwe.
Moya wa Modimo o Ile wa Matlafatša Moshe
3-5. (a) Re tseba bjang gore Moshe o ile a dira dilo ka thušo ya moya o mokgethwa? (b) Mohlala wa Moshe o re ruta eng ka taba ya gore Jehofa o nea batho moya wa gagwe?
3 Go batho ka moka bao ba bego ba phela ka 1513 B.C.E., Moshe e be e le “motho yo boletaleta.” (Num. 12:3) Mohlanka yo yo a bego a le boleta o ile a newa boikarabelo bjo bogolo setšhabeng sa Isiraele. Moya wa Modimo o ile wa matlafaletša Moshe gore a porofete, a ahlole, a ngwale, a etelele pele a be a dire le mehlolo. (Bala Jesaya 63:11-14.) Eupša lebakeng le itšego, Moshe o ile a lla ka gore o be a imelwa ke morwalo woo. (Num. 11:14, 15) Ka gona Jehofa o ile a “tšea o mongwe wa moya” wo o bego o le go Moshe gomme a o bea go banna ba bangwe ba 70 gore ba mo thuše go rwala boikarabelo. (Num. 11:16, 17) Le ge morwalo wa Moshe o ile wa bonagala eka o a imela, ge e le gabotse o be a sa o rwala a nnoši—le gona banna bao ba 70 bao ba ilego ba kgethwa gore ba mo thuše ba be ba ka se o rwale ba nnoši.
4 Moshe o be a neilwe moya o mokgethwa woo o bego o lekane modiro wa gagwe. Ka morago ga phetogo ye, Moshe o be a sa dutše a na le moya woo a o nyakago. Moshe o be a se na moya o monyenyane kudu, e bile banna ba bagolo ba 70 ba be ba se na o montši kudu. Jehofa o re nea moya wa gagwe go ya ka dinyakwa tša rena, go ithekgile ka maemo ao re lego go ona. “[Ga a] nee moya ka go lekanyetša” eupša o o nea “ka boati go tšwa go yena.”—Joh. 1:16; 3:34.
5 Na go na le diteko tšeo o di kgotleletšego? Na boikarabelo bja gago bjo bo oketšegago bo go tšeela nako e ntši? Na o katanela go hlokomela dinyakwa tša moya le tša nama tša lapa la gago mola o dutše o lebeletšane le go hlatloga ga ditshenyagalelo goba mathata a tša maphelo? Na o rwele boikarabelo bjo bogolo ka phuthegong? Kgodišega gore ka thušo ya moya wa gagwe, Modimo o ka go nea matla ao o a hlokago gore o lebeletšane le boemo le ge e le bofe.—Baroma 15:13.
Moya o Mokgethwa o Ile wa Dira Gore Betsalele a Swanelege
6-8. (a) Ke eng seo moya wa Modimo o ilego wa dira gore Betsalele le Oholiaba ba kgone go se dira? (b) Ke eng seo se bontšhago gore Betsalele le Oholiaba ba be ba hlahlwa ke moya wa Modimo? (c) Ke ka baka la’ng phihlelo ya Betsalele e kgothatša ka mo go kgethegilego?
6 Phihlelo ya Betsalele yo a phetšego ka nako e tee le Moshe e utolla mo gontši ka tsela yeo moya wa Modimo o šomago ka yona. (Bala Ekisodo 35:30-35.) Betsalele o ile a kgethwa gore a etelele pele modiro wa go dira dithoto tšeo di bego di nyakega ka taberenakeleng. Na o be a na le tsebo modirong wa bokgabo pele ga ge a ka thoma kabelo ye e kgolo? Mohlomongwe o be a na le yona, eupša go ka direga gore modiro wa gagwe wo a bego a tlwaetše go o dira e be e le wa go direla Baegipita ditena. (Ek. 1:13, 14) Ka gona Betsalele o be a ka phethagatša bjang modiro wo wa gagwe o mogolo? Jehofa “o mo tladitše ka moya wa Modimo gore a be le bohlale, kwešišo, tsebo le bokgoni bja mošomo o mongwe le o mongwe wa diatla, gore a hlame dilo . . . [le go dira] dilo tša mehutahuta.” Bokgoni le ge e le bofe bjoo Betsalele a bego a na le bjona bo ile bja kaonefatšwa ke moya o mokgethwa. Go bile ka tsela e swanago le ka Oholiaba. Betsalele le Oholiaba ba swanetše go ba ba ile ba ithuta gabotse, ka gobane ga se ba fo phetha mošomo wa bona feela eupša ba ile ba ruta le ba bangwe seo ba swanetšego go se dira. Ee, Modimo o ile a dira gore ba be le bokgoni bja go ruta ba bangwe.
7 Bohlatse bjo bongwe bja gore Betsalele le Oholiaba ba be ba hlahlwa ke moya wa Modimo ke gore modiro wa bona o ile wa swarelela lebaka le letelele. Dilo tšeo ba bego ba di dirile di be di sa dutše di dirišwa nywaga e ka bago e 500 ka morago. (2 Dikor. 1:2-6) Go fapana le batšweletši ba dilo ba mehleng yeno, Betsalele le Oholiaba ga se ba nyaka gore dilo tšeo ba di tšweleditšego di be le maina a bona. Tumišo ka moka e ile ya lebišwa go Jehofa ka baka la tšeo ba di fihleletšego.—Ek. 36:1, 2.
8 Lehono, re ka ba re lebeletšane le mediro e megolo yeo e nyakago bokgoni bjo bo kgethegilego, e bjalo ka go aga, go gatiša, go rulaganya dikopano, go rulaganya modiro wa tlhakodišo gotee le go boledišana le dingaka le bašomi ba dipetlele ka boemo bja rena tabeng ya go dirišwa ga madi. Ka dinako tše dingwe, mediro ye e dirwa ke bašomi bao ba nago le bokgoni, eupša gantši e phethwa ke baithaopi bao ba se nago phihlelo medirong yeo. Moya wa Modimo o atlegiša maiteko a bona. Na o kile wa gana go amogela kabelo e itšego tirelong ya Jehofa, o nagana gore ba bangwe ba be ba swanelega kudu go go feta? Gopola gore moya wa Jehofa o ka kaonafatša tsebo ya gago le bokgoni bja gago gomme o go thuše go phethagatša kabelo le ge e le efe yeo a go neago yona.
Joshua o Ile a Atlega ka go Thušwa ke Moya wa Modimo
9. Baisiraele ba ile ba ikhwetša ba le boemong bofe ka morago ga go huduga Egipita, gomme go ile gwa rotoga potšišo efe?
9 Moya wa Modimo o ile wa thuša le motho yo mongwe gape yo a phetšego ka nako e tee le Moshe le Betsalele. Nakwana ka morago ga go huduga ga Baisiraele Egipita, Baamaleke ba ile ba hlasela batho ba Modimo ba se ba ba dira selo. Yeo e ile ya ba nako ya gore Baisiraele ba itwele. Gaešita le ge ba be ba se ba tlwaelana le dintwa, Baisiraele ba ile ba swanelwa ke go lwa ntwa ya bona ya pele e le setšhaba seo se bego se lokolotšwe. (Ek. 13:17; 17:8) Go be go nyakega motho yo a bego a ka etelela madira pele. E be e tla ba mang?
10. Ke ka baka la’ng Baisiraele bao ba bego ba eteletšwe pele ke Joshua ba ile ba fenya ntwa?
10 Go ile gwa kgethwa Joshua. Eupša ge e ba a be a ka kgopelwa gore a bolele gore modiro wo a bego a na le phihlelo go ona e be e le ofe, o be a ka re’ng? Na o be a ka re ke wa go ba lekgoba? Modubi wa leraga? Motopi wa manna? Therešo ke gore rakgolo wa Joshua e lego Elishama e be e le kgošana ya moloko wa Efuraime gomme go bonagala a be a eteletše pele banna ba 108 100 go dikgao tša meloko e meraro ya Isiraele. (Num. 2:18, 24; 1 Dikor. 7:26, 27) Eupša Jehofa o ile a ntšha taelo a diriša Moshe gore go se kgethwe Elishama goba morwa wa gagwe Nuni, eupša go kgethwe Joshua gore a etelele madira pele gore a fediše lenaba. Ntwa yeo e ile ya fetša mo e ka bago letšatši ka moka. Ka baka la go kwa ga Joshua ka pelo ka moka gotee le go tšeela ga gagwe godimo tlhahlo ya moya wa Modimo, Isiraele e ile ya fenya.—Ek. 17:9-13.
11. Re ka atlega bjang tirelong e kgethwa go etša ge Joshua a dirile?
11 Ka moragonyana, Joshua o ile a hlatlama Moshe “a tletše moya wa bohlale.” (Doit. 34:9) Moya o mokgethwa ga se wa nea Joshua bokgoni bja gore a porofete goba a dire mehlolo go swana le Moshe, eupša o ile wa mo thuša go etelela Isiraele pele dintweng tšeo di dirilego gore a thope Kanana. Lehono, re ka nagana gore ga re na phihlelo goba ga re swanelegele go phetha dibopego tše itšego tša tirelo ya rena e kgethwa. Lega go le bjalo, ka go swana le Joshua, re kgonthišetšwa gore re tla atlega ge e ba re ka kgomarela ka botlalo tlhahlo ya Modimo.—Josh. 1:7-9.
“Moya wa Jehofa wa Aparela Gideone”
12-14. (a) Taba ya gore banna ba 300 ba be ba ka fenya madira a matla a Bamidiane e utolla’ng? (b) Jehofa o ile a kgonthišetša Gideone bjang? (c) Ke kgonthišetšo efe e tšwago go Modimo yeo re e hwetšago lehono?
12 Ka morago ga lehu la Joshua, Jehofa o ile a tšwela pele a bontšha gore matla a gagwe a ka matlafatša bao ba mmotegelago. Puku ya Baahlodi e tletše ka dipego tša batho bao ba ilego “ba dirwa ba matla go tloga boemong bja go fokola.” (Baheb. 11:34) Modimo ka go diriša moya wa gagwe o mokgethwa, o ile a tutuetša Gideone gore a lwele batho ba Gagwe. (Baa. 6:34) Lega go le bjalo, madira ao Gideone a bego a a kgobokeditše a be a fetwa ke manaba a Bamidiane, yo tee wa bona a lebanwe ke manaba a mane. Mahlong a Jehofa, gaešita le palo yeo ya madira a Baisiraele e be e le e ntši kudu. O ile a laela Gideone ka makga a mabedi gore a fokotše palo ya madira ao go ba go fihlela ge yo tee wa madira a Isiraele a be a lebanwe ke manaba a 450. (Baa. 7:2-8; 8:10) Yeo ke palo yeo Jehofa a bego a e nyaka. Ge e ba go be go tla ba le phenyo e makatšago, ke mang yo a bego a ka ikgantšha ka gore e tlišitšwe ke maiteko a motho goba bohlale bja gagwe?
13 Gideone le madira a gagwe ba be ba le kgauswi le go tsena ntweng. Ge nkabe o be o le karolo ya madira ao a manyenyane, na nkabe o ile wa ikwa o šireletšegile ka ge o tseba gore madira ao o bego o na le ona a be a se na bao ba boifago le bao ba sego šedi? Goba na nkabe o ile wa welwa ke letšhogonyana ge o nagana kamoo ditaba di bego di tla feleletša ka gona? Ga go hlokagale gore re phopholetše kamoo Gideone a ilego a ikwa ka gona. O ile a dira seo a bego a se laetšwe! (Bala Baahlodi 7:9-14.) Jehofa ga se a ka a kgalema Gideone ka ge a mo kgopetše seka seo se hlatselago gore Modimo o be a tla ba le yena. (Baa. 6:36-40) Go e na le moo, o ile a matlafatša tumelo ya Gideone.
14 Matla a Jehofa a go phološa ga a fele. A ka phološa batho ba gagwe bothateng le ge e le bofe, gaešita le go dira seo a diriša batho bao ba bonagalago ba fokola goba ba se na mohola. Ka dinako tše dingwe re ka ikwa eka re fetwa ke manaba a rena ka palo goba re tlalelong. Ga se ra letela gore re newe kgonthišetšo ka mohlolo go swana le kamoo Gideone a ilego a kgonthišetšwa ka gona, eupša re ka hwetša tlhahlo le kgonthišetšo e ntši go tšwa Lentšung la Modimo le ka phuthego ya gagwe yeo e hlahlwago ke moya. (Baroma 8:31, 32) Dikholofetšo tša Jehofa tše lerato di matlafatša tumelo ya rena e bile di re kgonthišetša gore ruri e tloga e le Mothuši wa rena!
“Moya wa Jehofa wa Tlela Jefeta”
15, 16. Ke ka baka la’ng morwedi wa Jefeta a be a na le boemo bjo bobotse bja kgopolo, gomme se se kgothatša batswadi ba bjang?
15 Ela hloko mohlala o mongwe gape. Ge Baisiraele ba be ba swanelwa ke go lwa le Baamoni, moya wa Jehofa o ile “wa tlela Jefeta.” Ka ge Jefeta a be a fagahletše phenyo yeo e bego e tla tumiša Jehofa, o ile a dira keno yeo e ilego ya mo kweša bohloko. O ile a ikana ka gore ge e ba Modimo a be a ka gafela Baamoni seatleng sa gagwe, gona motho wa pele yoo a bego a tla tšwa mojakong wa gagwe ge a boa gae e be e tla ba wa Jehofa. Ge Jefeta a boa ntweng ka morago ga go fenya Baamoni, morwedi ba gagwe o ile a tla go mo gahlanetša. (Baa. 11:29-31, 34) Na seo se ile sa makatša Jefeta? Ga go bonagale bjalo, ka gobane o be a na le ngwana o tee feela. O ile a phethagatša keno ya gagwe ka gore a gafe morwedi wa gagwe tirelong e kgethegilego tempeleng ya Jehofa kua Shilo. Ka ge morwedi wa Jefeta e be e le morapedi yo a botegago wa Jehofa, o be a kgodišegile gore keno ya tatagwe e be e swanetše go hlompšha. (Bala Baahlodi 11:36.) Moya wa Jehofa o ile wa nea Jefeta le morwedi wa gagwe matla ao ba bego ba a nyaka.
16 Morwedi wa Jefeta o ile a hlagolela bjang moya woo wa boikgafo? Ga go pelaelo gore tumelo ya gagwe e ile ya gola ge a dutše a lebeletše phišego ya tatagwe le boineelo bja gagwe go Modimo. Lena batswadi, ga se gore bana ba lena ga ba bone mohlala wa lena. Diphetho tša lena di ba botša gore le dumela seo le se bolelago. Bana ba lena ba theetša dithapelo tša lena tša go tšwa pelong, ba ela hloko mokgwa wa lena wa go ruta gomme ba bona maiteko a lena ka moka ao le a dirago ge le hlankela Jehofa ka pelo e feletšego. Ge bana ba lena ba dutše ba dira seo, ga go pelaelo gore ba tla ba le kganyogo e kgolo ya gore ba ithaopele tirelo ya Jehofa. Seo se a thabiša.
“Moya wa Jehofa wa Theogela go” Simisone
17. Simisone o ile a dira’ng ka thušo ya moya wa Modimo?
17 Ela hloko mohlala o mongwe gape. Ge Baisiraele ba be ba thopša ke Bafilisita, “moya wa Jehofa wa thoma go . . . tutuetša” Simisone gore a lopolle Baisiraele. (Baa. 13:24, 25) Simisone o ile a newa matla a gore a dire mediro e matla yeo e sa bapišwego le selo. Ge Bafilisita ba be ba rakediša Baisiraele ba setšhaba sa boSimisone gore ba mo sware, “moya wa Jehofa wa theogela go yena, gomme dithapo tšeo ba bego ba mo tlemile diatla ka tšona tša ba bjalo ka ditlhale tša lešela la linene tšeo di fišitšwego ke mollo, moo ditlemo tšeo di ilego tša bofologa diatleng tša gagwe.” (Baa. 15:14) Gaešita le nakong ya ge a be a se na matla mmeleng ka baka la ge a se a dira phetho e bohlale, Simisone o ile a newa matla “ka tumelo.” (Baheb. 11:32-34; Baa. 16:18-21, 28-30) Moya wa Jehofa o ile wa šoma go Simisone ka tsela ya moswananoši ka baka la maemo a sa tlwaelegago ao a bego a le go ona. Dipego tše tša bogologolo di re kgothatša e le ruri. Ka tsela efe?
18, 19. (a) Phihlelo ya Simisone e re kgonthišetša’ng? (b) O hotšwe bjang ke go hlahloba mehlala ya babotegi bao go boletšwego ka bona sehlogong se?
18 Le rena re ithekga ka wona moya woo o mokgethwa woo Simisone a bego a ithekgile ka wona. Re dira seo ge re dutše re phetha modiro woo Jesu a o neilego balatedi ba gagwe, e lego wa gore “re bolele bathong le go nea bohlatse bjo bo feletšego.” (Dit. 10:42) Kabelo ye e nyaka bokgoni bjoo bo ka se no itlelago ka tlhago. Re tloga re leboga gore Jehofa o diriša moya wa gagwe go re thuša go dira mediro e fapafapanego yeo re e neilwego! Ka baka leo, ge re dutše re phetha modiro wa rena, re ka bolela go swana le moporofeta Jesaya gore: “Mmuši Morena Jehofa o nthomile, e bile o romile le moya wa gagwe.” (Jes. 48:16) Ee, re romilwe ke moya wa Modimo! Re phetha modiro wa rena ka pelo ka moka re kgodišegile gore Jehofa o tla kaonefatša bokgoni bja rena go etša ge a dirile ka tsela e swanago ka Moshe, Betsalele le Joshua. Re tšea “tšhoša ya moya, ke gore, lentšu la Modimo,” re kgodišegile gore o tla re matlafatša go etša ge a ile a matlafatša Gideone, Jefeta le Simisone. (Baef. 6:17, 18) Ka go ithekga ka Jehofa gore a re thuše go fenya mapheko, re ka ba ba matla moyeng go etša ge Simisone a be a le matla mmeleng.
19 Go molaleng gore Jehofa o šegofatša bao ba emelago borapedi bja therešo ka sebete. Ge re dutše re arabela gabotse tseleng yeo moya wa Modimo o šomago ka yona, tumelo ya rena e tla gola. Ka gona, e tla ba mo go thabišago go ahlaahla tše dingwe tša ditiragalo tše di kgahlišago tšeo di begilwego ka Mangwalong a Bakriste a Segerika. Seo se tla utolla kamoo moya wa Jehofa o bego o šoma ka gona go bahlanka ba botegago ba lekgolong la pele la nywaga, pele le ka morago ga Pentekoste ya 33 C.E. Dipego tšeo di tla ahlaahlwa sehlogong se se latelago.
Ke ka baka la’ng o kgothaditšwe ke go tseba kamoo moya wa Modimo o ilego wa šoma go . . .
• Moshe?
• Betsalele?
• Joshua?
• Gideone?
• Jefeta?
• Simisone?
[Dipotšišo tša Thuto]
[Ntlhakgolo go letlakala 22]
Moya wa Modimo o ka re dira gore re be ba matla moyeng go etša ge Simisone a be a le matla mmeleng
[Seswantšho go letlakala 21]
Lena batswadi, mohlala wa lena wa phišego o fetela baneng ba lena
