Go Hlahlwa ke Moya o Mokgethwa Lekgolong la Pele la Nywaga le Lehono
Go Hlahlwa ke Moya o Mokgethwa Lekgolong la Pele la Nywaga le Lehono
“Ditiro tše ka moka di dirwa ke moya o tee.”—1 BAKOR. 12:11.
1. Re tla ahlaahla dintlha dife sehlogong se?
PENTEKOSTE. Ruri lentšu leo le gopotša motho ka ditiragalo tše di kgahlišago! (Dit. 2:1-4) Go tšhollwa ga moya o mokgethwa ka nako yeo ya lekgolong la pele la nywaga go ile gwa tliša phetogo e kgolo ditirišanong tša Modimo le bahlanka ba gagwe. Sehlogong se se fetilego, re ahlaahlile tše dingwe tša ditsela tšeo moya wa Modimo o ilego wa thuša bahlanka ba gagwe ba botegago ba bogologolo gore ba phethagatše dikabelo tše thata le tšeo di bego di nyaka gore ba dire dilo ka šedi. Eupša phapano ke efe magareng ga tsela yeo moya wa Modimo o bego o šoma ka yona dinakong tša pele ga Bokriste le tsela yeo o ilego wa šoma ka yona lekgolong la pele la nywaga? Le gona Bakriste ba holwa bjang ke go šoma ga moya o mokgethwa wa Modimo lehono? Anke re boneng.
“Bona, Nna Lekgoba la Jehofa!”
2. Maria o be a bone bjang go šoma ga moya o mokgethwa?
2 Maria o be a le gona ka phapošing ya ka godimo kua Jerusalema ge moya o mokgethwa o holofeditšwego o be o tšhollelwa barutiwa. (Dit. 1:13, 14) Lega go le bjalo, ka nywaga ya ka godimo ga e masometharo pele ga tiragalo ye, o be a bone matla a moya wa Jehofa ka ditsela tše di makatšago. Jehofa o be a fetišeditše bophelo bja Morwa wa gagwe go tloga legodimong go tla lefaseng, a dira gore Maria a ime gaešita le ge e be e sa le kgarebe. O be a imile “ka moya o mokgethwa.”—Mat. 1:20.
3, 4. Maria o ile a bontšha moya ofe, gomme rena re ka mo ekiša bjang?
3 Ke ka baka la’ng Maria a ile a newa tokelo ye ya moswananoši? Ka morago ga gore morongwa a mo hlalosetše gore thato ya Jehofa e be e le efe ka yena, Maria o ile a re: “Bona, nna lekgoba la Jehofa! A go ntiragalele go ya ka mantšu a gago.” (Luka 1:38) Ka go araba ga gagwe ka tsela yeo, Maria o ile a utolla boemo bja pelo ya gagwe bjoo Modimo a bego a šetše a bo bone. Go arabela ga gagwe ka tsela yeo di sa tloga fase go bontšha gore o be a ikemišeditše go amogela seo thato ya Modimo e bego e se nyaka tabeng yeo. Ga se a ka a tshwenyega ka gore batho ba motse ba tla lebelela bjang mokgwa woo a imilego ka wona goba gore seo se be se ka feleletša ka go kgoma bjang tswalano ya gagwe le monna yo a bego a mmeeleditše. Ka go bolela gore ke yena mohlanka wa maemo a tlasetlase, Maria o bontšhitše gore o be a bota Jehofa ka mo go feletšego gore ke Mong wa gagwe.
4 Na le wena ka dinako tše dingwe o ile wa ikwa o imelwa ke ditlhohlo goba boikarabelo tirelong ya Modimo? Yo mongwe le yo mongwe wa rena o dira gabotse go ipotšiša gore: ‘Na ke bota Jehofa ka mo go feletšego gore o tla dira dilo ka go dumelelana le thato ya gagwe? Na ruri ke tloga ke bontšha moya wa go dira dilo ka go rata?’ Kgodišega gore Modimo o nea moya wa gagwe go bao ba mmotago ka dipelo ka moka e bile ba amogela gore ke mmuši wa legohle.—Dit. 5:32.
Petro o Ile a Thušwa ke Moya o Mokgethwa
5. Petro o bone go šoma ga moya o mokgethwa ka ditsela dife pele ga Pentekoste ya 33 C.E.?
5 Ka go swana le Maria, moapostola Petro le yena o ile a bona go šoma ga moya o mokgethwa wa Modimo pele ga Pentekoste ya 33 C.E. Jesu o be a neile yena le baapostola ba bangwe matla a gore ba leleke batemona. (Mar. 3:14-16) Gaešita le ge Mangwalo a sa re botše dintlha tše di oketšegilego, go bonagala Petro a ile a tšwela pele a diriša matla ao. Matla a Modimo a ile a bonagatšwa gape ge Jesu a be a kgopela Petro gore a tle go yena a sepela godimo ga meetse a Lewatle la Galilea, gomme Petro o ile a dira sona seo. (Bala Mateo 14:25-29.) Go molaleng gore Petro o ile a ithekga ka moya o mokgethwa gore o mo thuše go dira mediro e matla. Go se go ye kae moya woo o be o tla šoma go Petro le barutiwa ba bangwe ka ditsela tše difsa.
6. Ka thušo ya moya wa Modimo, ke eng seo Petro a ilego a kgona go se dira nakong ya Pentekoste ya 33 C.E. le ka morago ga yona?
6 Monyanyeng wa Pentekoste ya 33 C.E., Petro le ba bangwe ba ile ba newa ka mohlolo bokgoni bja go bolela maleme a batho bao ba bego ba etetše Jerusalema. Ka morago ga moo, Petro o ile a etelela pele go bolela le lešaba leo le bego le le moo. (Dit. 2:14-36) Ee, monna yo yoo ka dinako tše dingwe a bego a dira dilo ka lepotlapotla goba ka go boifa o ile a ba le sebete sa gore a nee bohlatse go sa šetšwe go tšhošetšwa goba go tlaišwa. (Dit. 4:18-20, 31) O ile a newa tsebo ka gore a e utollelwe ke Modimo. (Dit. 5:8, 9) Le gona o ile a newa matla a go tsoša motho bahung.—Dit. 9:40.
7. Ke dithuto dife tša Jesu tšeo Petro a ilego a thoma go di kwešiša gabotse ka morago ga gore a tlotšwe?
7 Gaešita le pele ga Pentekoste, Petro o ile a kwešiša ditherešo tše dintši tšeo Jesu a bego a di ruta. (Mat. 16:16, 17; Joh. 6:68) Eupša go be go na le dibopego tše dingwe tša dithuto tša Jesu tšeo a ilego a dula a sa di kwešiše pele ga Pentekoste. Ka mohlala, Petro ga se a ka a kwešiša gore Kriste o be a tla tsošwa e le sebopiwa sa moya ka letšatši la boraro goba gore Mmušo o be o tla ba legodimong. (Joh. 20:6-10; Dit. 1:6) Taba ya gore batho e be dibopiwa tša moya le gore ba buše Mmušong wa legodimong e be e sa kwešišege go Petro. E bile feela ka morago ga gore a kolobetšwe ka moya o mokgethwa gomme a newe kholofelo ya go phela legodimong moo a ilego a kwešiša ka botlalo dithuto tša Jesu dintlheng tše.
8. Ke tsebo efe yeo ba tloditšwego gotee le “dinku tše dingwe” ba ka e hwetšago?
8 Dilo tšeo mathomong barutiwa ba Jesu ba bego ba sa di kwešiše di ile tša thoma go kwešišega ka morago ga gore ba tšhollelwe moya o mokgethwa. Ka go budulelwa ke Modimo, bangwadi ba Mangwalo a Bakriste a Segerika ba ngwadile ka dilo tše di kgahlišago tša morero wa Jehofa, ba ngwalela go hola rena. (Baef. 3:8-11, 18) Lehono, bao ba tloditšwego ka moya gotee le ba “dinku tše dingwe” ba fepša moyeng ba le gotee, ba nweletša tšona ditherešo tše ka dipelong tša bona. (Joh. 10:16) Na o tšeela godimo tsebo le kwešišo tšeo di tšwago ka Lentšung la Modimo tšeo moya o mokgethwa o dirago gore o di hwetše?
Paulo o Ile “a Tlala Moya o Mokgethwa”
9. Paulo o be a kgona go fihlelela eng ka thušo ya moya o mokgethwa?
9 Mo e ka bago ngwaga goba go feta moo ka morago ga Pentekoste ya 33 C.E., go na le motho yo mongwe gape yo a ilego a amogela mpho ya Modimo ya moya o mokgethwa. Motho yoo e be e le Saulo, yoo ka morago a ilego a tsebja e le Paulo. Moya o ile wa šoma go yena ka ditsela tšeo di re holago lehono. Moapostola Paulo o ile a budulelwa go ngwala dipuku tše 14 tša Beibele. Go etša ge go be go le bjalo tabeng ya Petro, moya wa Modimo o ile wa thuša Paulo go kwešiša le go ngwala ka tsela e kwagalago taba ya kholofelo ya go se hwe le go se senyege ga mmele magodimong. Ka go thušwa ke moya o mokgethwa, Paulo o ile a kgona go fodiša malwetši, go leleka batemona gaešita le go tsoša bahu! Lega go le bjalo, matla ao a bego a hwetšwa ka moya o mokgethwa a be a na le morero o mongwe o bohlokwa kudu, morero woo bahlanka ba Modimo ka moka lehono ba o bonago, gaešita le ge e se ka mohlolo.
10. Moya o mokgethwa o ile wa kgoma bjang bokgoni bja Paulo bja go bolela?
10 Paulo, yo a bego a “tletše moya o mokgethwa,” o ile a pepentšha senoge se itšego. Seo se ile sa tloga se kgoma molaodi yo mogolo wa Tsipero yo a bego a theeditše poledišano yeo ka moka! Molaodi yoo o ile a amogela therešo, “ka ge a be a tlabilwe ke thuto ya Jehofa.” (Dit. 13:8-12) Go molaleng gore Paulo o be a tseba gabotse bohlokwa bja moya o mokgethwa wa Modimo ge go tliwa tabeng ya go bolela therešo. (Mat. 10:20) Ka morago o ile a lopa phuthego ya Efeso gore e mo rapelele gore a newe ‘bokgoni bja go bolela.’—Baef. 6:18-20.
11. Paulo o ile a hlahlwa bjang ke moya wa Modimo?
11 Ga se feela gore moya o mokgethwa o ile wa dira gore Paulo a kgone go bolela, eupša ka dinako tše dingwe o ile wa mo thibela go bolela mafelong a itšego. Ge a be a le maetong a gagwe a boromiwa, Paulo o be a hlahlwa ke moya wa Modimo. (Dit. 13:2; bala Ditiro 16:6-10.) Jehofa o sa dutše a hlahla modiro wa boboledi a diriša moya wa gagwe. Ka go swana le Paulo, bahlanka ba Jehofa ka moka ba kwago ba katanela go tsebatša therešo ka sebete le ka phišego. Gaešita le ge tlhahlo ya Modimo e se ka tsela e lego molaleng lehono go swana le mehleng ya Paulo, re ka kgodišega gore Jehofa o diriša moya o mokgethwa go kgonthišetša gore bao ba swanelegago ba kwa therešo.—Joh. 6:44.
“Ditiro tše di Fapafapanego”
12-14. Na moya wa Modimo o šoma go bahlanka ba gagwe ka moka ka tsela e swanago? Hlalosa.
12 Na dipego tša go šegofatša ga Jehofa phuthego ya batlotšwa ya lekgolong la pele la nywaga di kgothatša bahlanka ba Modimo ba ineetšego lehono? Ga go pelaelo gore di a ba kgothatša! Gopola mantšu ao a buduletšwego a Paulo ao a a ngwaletšego phuthego ya Korinthe mabapi le dimpho tša moya tša go dira mehlolo mehleng ya gagwe ge a re: “Bjale go na le dimpho tše di fapafapanego, eupša go na le moya o tee; go na le bodiredi bjo bo fapafapanego, fela go na le Morena o tee; le gona go na le ditiro tše di fapafapanego, fela ke Modimo o tee yo a dirago ditiro tšeo tšohle bathong bohle.” (1 Bakor. 12:4-6, 11) Ee, moya o mokgethwa o ka šoma ka ditsela tše di fapafapanego go bahlanka ba Modimo ba fapafapanego gore go phethagatšwe morero o itšego. Therešo ke gore moya o mokgethwa o ka hwetšwa ke ba “mohlatswana” wa Kriste le ba “dinku tše dingwe” tša gagwe. (Luka 12:32; Joh. 10:16) Lega go le bjalo, ga se ka mehla o šomago ka tsela e swanago go setho se sengwe le se sengwe sa phuthego.
13 Ka mohlala, bagolo ba kgethwa ke moya o mokgethwa. (Dit. 20:28) Eupša ga se batlotšwa ka moka bao ba hlankelago e le balebeledi ka phuthegong. Re ka fihlelela phetho efe motheong wa se? Re ka phetha ka gore moya wa Modimo o šoma ka ditsela tše di fapafapanego go ditho tša phuthego.
14 Moya woo o dirago gore batlotšwa ba ikwe ba na le “moya wa go amogelwa,” goba maikwelo a gore ke barwa ba Modimo, ke wona moya woo Jehofa a ilego a tsoša Morwa wa gagwe yo a tswetšwego a nnoši ka wona bahung gore a be le bophelo bja go se hwe legodimong. (Bala Baroma 8:11, 15.) Ke wona moya woo Jehofa a bopilego legohle ka moka ka wona. (Gen. 1:1-3) Ka wona moya woo o mokgethwa, Jehofa o ile a dira gore Betsalele a swanelegele go dira modiro o kgethegilego taberenakeleng, a matlafaletša Simisone go dira mediro yeo e bego e nyaka matla a sa tlwaelegago, gomme a thuša Petro gore a kgone go sepela godimo ga meetse. Ka gona, anke re se ke ra gakantšha taba ya go ba le moya wa Modimo le taba ya go tlotšwa ka moya wa Modimo, gobane taba ya go tlotšwa ka moya wa Modimo ke e nngwe ya ditsela tše di kgethegilego tša go šoma ga moya woo. Modimo ke yena a kgethago gore o tlotša mang ka moya woo.
15. Na go kolobetša ka moya go tla tšwela pele ka mo go sa felego? Hlalosa.
15 Matla a Modimo a šomago a be a dutše a šoma ka ditsela tše di fapafapanego go bahlanka ba gagwe ba botegago ka nywaga e mentši ga e sa le go tloga mola a bago le bahlanka ba botegago, ee, ka nywaga e dikete pele ga ge batho ba ka tlotšwa ka moya. Ka Pentekoste ya 33 C.E., tsela yeo e mpsha ya go dirišwa ga moya e ile ya thoma go ba gona, eupša e ka se tšwele pele ka mo go sa felego. Go kolobetšwa ka moya go tla kgaotšwa, eupša moya o mokgethwa o tla tšwela pele o šoma bathong ba Modimo e le gore ba dire thato ya gagwe ka mo go sa felego.
16. Ke’ng seo bahlanka ba Modimo ba se dirago gona bjale ka thušo ya moya wa gagwe?
16 Ke’ng seo ka mo go kgethegilego se diregago mo lefaseng gona bjale ka thušo ya moya o mokgethwa wa Jehofa? Kutollo 22:17 e araba ka gore: “Moya le monyadiwa ba re: “Tlaa!” Mang le mang yo a kwago a a re: “Tlaa!” Mang le mang yo a nyorilwego a a tle; mang le mang yo a ratago a tle a tšee meetse a bophelo ka ntle le tefo.” Ka go tutuetšwa ke moya wa Modimo, Bakriste lehono ba fetišetša taletšo ya Jehofa go “mang le mang yo a ratago” gore a tle a amogele meetse a bophelo. Bakriste ba tloditšwego ba etelela pele go direng se. Lega go le bjalo, ba dinku tše dingwe le bona ba a ba thuša go fetišetšeng taletšo ye. Dihlopha tše ka bobedi di dirišana le moya woo o mokgethwa go phethagatšeng modiro wo. Bao ba lego dihlopheng tšeo ka bobedi ba bontšhitše boineelo bja bona go Jehofa ka gore ba kolobetšwe “leineng la Tate le la Morwa le la moya o mokgethwa.” (Mat. 28:19) Le gona ka moka ga bona ba dumelela gore moya wa Modimo o šome maphelong a bona, ba o dumelela gore o ba thuše go tšweletša dika tša wona ka go bona. (Bagal. 5:22, 23) Ka go swana le batlotšwa, dinku tše dingwe di dumelela moya wa Modimo gore o di thuše. Ka baka la go thušwa ke moya wo, ba dira sohle seo ba ka se kgonago gore ba fihlelele dinyakwa tša Jehofa tša bokgethwa.—2 Bakor. 7:1; Kut. 7:9, 14.
Tšwelang Pele le Kgopela Moya o Mokgethwa
17. Re ka hlatsela bjang gore re na le moya wa Modimo?
17 Ka gona go sa šetšwe gore kholofelo yeo Modimo a go neilego yona ke ya go phela ka mo go sa felego legodimong goba mo lefaseng, Jehofa a ka go nea “matla a fetago a tlwaelegilego” e le gore o kgone go dula o botega gomme o amogele moputso wa gago. (2 Bakor. 4:7) Go tšwela pele ga gago o bolela ditaba tše dibotse tša Mmušo go ka dira gore o kwerwe. Eupša gopola gore “ge e ba [o] gobošwa ka baka la leina la Kriste, [o] a thaba, gobane moya wa letago, wona moya wa Modimo, o godimo ga [gago].”—1 Pet. 4:14.
18, 19. Jehofa o tla go thuša bjang a diriša moya o mokgethwa, gomme wena o ikemišeditše eng tabeng ye?
18 Moya o mokgethwa ke mpho e sa lefelelwego ya Modimo yeo a e neago bao ba mo nyakago ka potego. E ka se kaonefatše feela bokgoni bja gago, eupša e tla kaonefatša le kganyogo ya gago ya go dira sohle seo o ka se kgonago tirelong ya gagwe. “Modimo ke yena yo a [go] fago mafolofolo, a [go] neago kganyogo le matla a gore [o] dire dilo tšohle tšeo a di ratago.” Mpho e bohlokwa ya moya o mokgethwa, go akaretša le maiteko a rena a go dula re ‘swareletše ka go tia lentšung la bophelo,’ e tla re thuša gore re ‘dule re šomela phološo ya rena ka go boifa le go thothomela.’—Bafil. 2:12, 13, 16.
19 Ka gona, ka go bota ga gago moya wa Modimo, phetha kabelo ya gago ka pelo ka moka, dira ka bokgwari seo o abelwago gore o se dire gomme o kgopele Jehofa gore a go thuše. (Jak. 1:5) O tla go nea seo o se nyakago gore o kwešiše Lentšu la gagwe, o lebeletšane le mathata a bophelo le go bolela ditaba tše dibotse. ‘Tšwela pele o kgopela gomme o tla newa; tšwela pele o tsoma gomme o tla hwetša; tšwela pele o kokota gomme o tla bulelwa,’ gomme seo se akaretša le go hwetša moya o mokgethwa. (Luka 11:9, 13) Ee, tšwela pele o lopa Jehofa gore o swane le bao ba bego ba mmotegela mehleng ya bogologolo le bao ba mmotegelago lehono, e lego bao ba bego ba hlahlwa ke moya o mokgethwa wa Modimo.
Na o ka Hlalosa?
• Ka go swana le Maria, ke boemo bofe bja kgopolo bjoo bo tla re tlišetšago ditšhegofatšo bjo re swanetšego go bo bonagatša?
• Paulo o ile a hlahlwa ke moya wa Modimo ka kgopolo efe?
• Bahlanka ba Modimo ba hlahlwa bjang ke moya wa Modimo lehono?
[Dipotšišo tša Thuto]
[Seswantšho go letlakala 24]
Moya wa Modimo o ile wa thuša Paulo go fenya tutuetšo ya meoya e kgopo
[Seswantšho go letlakala 26]
Lehono, moya o mokgethwa o gona go thuša Bakriste, go sa šetšwe gore kholofelo ya bona ke efe
