Ke ka Baka La’ng re Swanetše go Hlahlwa ke Moya wa Modimo?

“O Modimo wa ka. Moya wa gago o lokile; anke o ntlhahle.”—PS. 143:10.

1. Ke eng seo se dirago gore makenete o goge selo seo se dirilwego ka tšhipi?

NA O kile wa bea nalete kgauswi le makenete? Gateetee makenete woo o gogela nalete yeo go wona. Ke ka baka la’ng seo se direga? Ke ka gobane dimakenete di na le matla a sa bonagalego ao a kgonago go goga dilo tše di dirilwego ka tšhipi. Ke kgale batho ba bantši ba diriša makenete go nyaka dilo tšeo di dirilwego ka tšhipi.

2, 3. (a) Ke matla afe a magolo ao Jehofa a a dirišitšego nywageng e mentšintši e fetilego? (b) Ke ka baka la’ng re ka letela gore matla a šomago a Modimo ao a sa bonagalego a re hlahle maphelong a rena lehono?

² Go na le matla a mangwe a sa bonagalego ao a lego bohlokwa kudu tabeng ya go re hlahla. Matla ao ke afe? Ke matla ao go boletšwego ka ona ditemaneng tša mathomo tša Beibele. Ge e bolela ka seo Jehofa a se fihleletšego nywaga e mentšintši e fetilego, Genesi e re: “Mathomong Modimo o hlodile magodimo le lefase.” Ge a be a dira seo, o ile a romela matla a magolo kudu, ka gobane pego ya tlholo e oketša ka gore: “Matla a šomago a Modimo a be a eya pele le morago.” (Gen. 1:1, 2) Ke’ng seo se bego se dira mošomo woo? E be e le moya o mokgethwa—matla a magolo ao a bego a phetha modiro wa tlholo. Re gona lehono ka baka la ge Jehofa a dirišitše moya wo go tšweletša dilo tša gagwe ka moka.—Jobo 33:4; Ps. 104:30.

³ Ka ge re le batho ba phelago, na re ka letela gore matla a šomago a Modimo a tšwele pele a kgoma maphelo a rena? Morwa wa Modimo ka noši o be a tseba gore re swanetše go letela seo, ka gobane Jesu o boditše barutiwa ba gagwe gore: “Moya . . . o tla le hlahla therešong ka moka.” (Joh. 16:13) Re swanetše go kwešiša eng ka moya woo, le gona ke ka baka la’ng re ka nyaka gore o re hlahle?

Seo Moya o Mokgethwa o Lego Sona

4, 5. (a) Batho bao ba dumelago thuto ya Boraro botee ba fošitše ge ba nagana gore moya o mokgethwa ke eng? (b) O be o ka hlalosa bjang seo moya o mokgethwa o lego sona?

⁴ Go ka direga gore ba bangwe ba batho bao o boledišanago le bona bodireding ba na le kwešišo yeo e sego ya Mangwalo ka moya o mokgethwa. Batho bao ba dumelago go thuto ya Boraro botee ba fošitše ka go nagana gore wo ke moya wo o emelago motho yo a lekanago le Modimo Tate. (1 Bakor. 8:6) Eupša go bonolo go bona gore thuto ya Boraro botee e thulana le ya Mangwalo.

⁵ Ka gona, ge e le gabotse moya o mokgethwa ke eng? Lentšu la Segerika la ‘moya,’ ruʹach, leo le fetoletšwego go Genesi 1:2, gantši le fetolelwa e le moya, eupša le ka buša la fetolelwa e le ‘phefo’ goba la fetolelwa ka mantšu a mangwe ao a šupago go matla a sa bonagalego. (Bapiša le Genesi 3:8; 8:1.) Go swana le ge phefo e sa bonagale eupša e na le matla, moya o mokgethwa woo e sego motho ga o bonagale eupša re kgona go bona seo o se tšweletšago. Moya wo ke matla a tšwago go Modimo ao a a dirišago go batho goba go dilo tše itšego gore a phethe morero wa gagwe. Na go thata go dumela gore matla a bjalo a tšwa go Mothopo o mokgethwa, e lego Modimo Ramatlaohle? Le gatee!—Bala Jesaya 40:12, 13.

6. Dafida o ile a lopa Jehofa gore a mo direle selo sefe se bohlokwa?

⁶ Na Jehofa a ka tšwela pele a diriša moya wa  gagwe go re hlahla bophelong? O holofeditše mopsalme Dafida gore: “Ke tla dira gore o be le temogo gomme ka go ruta tsela yeo o swanetšego go sepela ka yona.” (Ps. 32:8) Na Dafida o be a nyaka seo? Ee, ka gobane o ile a lopa Jehofa ka gore: “Nthute go dira thato ya gago, gobane o Modimo wa ka. Moya wa gago o lokile; anke o ntlhahle.” (Ps. 143:10) Re swanetše go ba le kganyogo e swanago gotee le maikemišetšo a gore re hlahlwe ke moya wa Modimo. Ke ka baka la’ng go le bjalo? Ela hloko mabaka a mane a latelago.

Ga re Swanelege Gore re Itlhahle

7, 8. (a) Ke ka baka la’ng re sa kgone go itlhahla? (b) Bontšha kamoo e sego gabohlale go leka go phatša tshepedišo ye ya dilo ka borena.

⁷ Sa pele, re swanetše go nyaka go hlahlwa ke moya wa Modimo ka gobane ga re na bokgoni bja go itlhahla. “Go hlahla” go bolela go “lebiša tseleng e itšego goba go bontšha tsela yeo e swanetšego go latelwa.” Lega go le bjalo, Jehofa ga se a re bopa re na le bokgoni bja gore re dire seo ka borena, kudukudu boemong bjo re lego go bjona bja go se phethagale. Moporofeta wa gagwe Jeremia o ngwadile gore: “Hle Morena, ke a lemoga gore tsela ya motho ga e tšwe go yena: motho ga a na matla a go hlahla dikgato tša gagwe.” (Jer. 10:23, The Bible in Basic English) Ke ka baka la’ng a sa kgone? Jeremia o ile a kwa tlhaloso ya Modimo mabapi le lebaka leo re palelwago ke go itlhahla. Ge Jehofa a bolela ka motho yoo re lego yena ka gare, o itše: “Pelo e boradia kudu go feta selo le ge e le sefe e bile ke e kgopo. Ke mang yo a ka e tsebago?”—Jer. 17:9; Mat. 15:19.

⁸ Na e be e ka se be bošilo gore motho yo a se nago phihlelo a tšee leeto a nnoši a lebe lešokeng leo go sa kago gwa fihla motho, a se na mohlahli yo a nago le bokgoni e bile a se na mmapa wa tsela? Ge e ba a sa tsebe kamoo a ka swaraganago le maemo a kotsi a lešokeng e bile a sa tsebe gore o tla fihla bjang mo a yago gona, gona o tla ba a bea bophelo bja gagwe kotsing. Ka gona, motho yo a naganago gore a ka laola tsela ya gagwe lefaseng le le kgopo ka ntle le go dumelela Modimo gore a mmontšhe tsela ya maleba, o bea bophelo bja gagwe kotsing e kgolo. Tsela e nnoši ya gore re phatše ka katlego tshepedišong ye ya dilo ke ka gore re kgopele Jehofa seo Dafida a ilego a se kgopela ge a be a re: “Anke dikgato tša ka di gate mehlaleng ya gago, yeo go yona dinao tša ka di ka se šišinywego.” (Ps. 17:5; 23:3) Go kgonega bjang gore re hwetše tlhahlo e bjalo?

9. Go etša ge seswantšho seo se lego go letlakala 17 se bontšha, moya wa Modimo o ka šoma bjang go re hlahla?

⁹ Ge e ba re ikokobeditše e bile re ikemišeditše go ithekga ka Jehofa, o tla re nea moya wa gagwe o mokgethwa gore o hlahle dikgato tša rena ka mo go feletšego. Matla ao a šomago a tla re thuša bjang? Jesu o hlaloseditše barutiwa ba gagwe gore: “Mothuši, e lego moya o mokgethwa woo Tate a tlago go o roma ka leina la ka, o tla le ruta tšohle le go le gopotša tšohle tšeo ke le boditšego tšona.” (Joh. 14:26) Ge re dutše re ithuta Lentšu la Modimo ka mehla e bile re rapela, re ithuta le mantšu ka moka a Kriste, gona moya o mokgethwa  o tla oketša kwešišo ya rena ka bohlale bjo bo tseneletšego bja Jehofa, e le gore re ka latela thato ya gagwe kgauswi. (1 Bakor. 2:10) Go oketša moo, le ge dilo di ka fetoga ka mokgwa woo re sa o letelago tseleng ya rena ya go ya bophelong, moya woo o tla re bontšha gore re sware mmila ofe. O tla re gopotša melao ya motheo ya Beibele yeo re šetšego re ithutile yona gomme wa re thuša go kwešiša gabotse kamoo e šomago ka gona gore re tsebe mogato wo re ka o gatago go tloga moo.

Jesu o be a Hlahlwa ke Moya wa Modimo

10, 11. Morwa yo a tswetšwego a nnoši wa Modimo o ile a letela eng mabapi le moya o mokgethwa, gomme o ile a lebeletšana le eng?

¹⁰ Lebaka la bobedi leo re swanetšego go nyaka go hlahlwa ke moya o mokgethwa wa Modimo ke ka gobane Modimo a ile a hlahla Morwa wa gagwe ka wona. Pele ga ge Morwa yo a tswetšwego a nnoši wa Modimo a ka tla lefaseng, o be a tseba ka boporofeta bjo bo rego: “Moya wa Jehofa o tla dula go yena, e lego moya wa bohlale le wa kwešišo, moya wa keletšo le wa matla, moya wa tsebo le wa go boifa Jehofa.” (Jes. 11:2) Ruri nagana kamoo Jesu a swanetšego go ba a ile a letela ka phišego go amogela thušo ya moya wa Modimo ge a be a phela maemong ao a ilego a lebeletšana le ona mo lefaseng!

¹¹ Mantšu a Jehofa a ile a phethagala. Pego ya Ebangedi e bolela seo se ilego sa diragala kapejana ka morago ga gore Jesu a kolobetšwe. E re: “Ge Jesu a tletše moya o mokgethwa, a tloga Nokeng ya Jorodane, a išwa ke moya lešokeng.” (Luka 4:1) Gona moo, ge Jesu a be a ikona dijo, a rapela le go naganišiša, go ka direga gore Jehofa o ile a hlahla Morwa wa gagwe le go mo lemoša ka seo se bego se mo letetše kua pele. Matla a šomago a Modimo a be a šoma monaganong wa Jesu le pelong ya gagwe, a hlahla kgopolo ya gagwe le diphetho tša gagwe. Ka gona, Jesu o ile a tseba seo a swanetšego go se dira boemong bjo bongwe le bjo bongwe, gomme o be a dira sona seo Tatagwe a bego a nyaka gore a se dire.

12. Ke ka baka la’ng go le bohlokwa gore re kgopele gore moya wa Modimo o re hlahle?

¹² Ka ge Jesu a be a tseba mehola ya moya wa Modimo bophelong bja gagwe, o ile a thuša barutiwa ba gagwe go lemoga bohlokwa bja gore ba kgopele moya o mokgethwa le gore o ba hlahle. (Bala Luka 11:9-13.) Ke ka baka la’ng seo se le bohlokwa kudu go rena? Ka gobane se ka fetoša tsela yeo re naganago ka yona, sa dira gore e swane le monagano wa Kriste. (Baroma 12:2; 1 Bakor. 2:16) Ka go dumelela moya wa Modimo gore o re hlahle bophelong, re ka nagana ka tsela yeo Kriste a naganago ka yona gomme ra ekiša mohlala wa gagwe.—1 Pet. 2:21.

Moya wa Lefase o tla re Aroša

13. Moya wa lefase ke eng, gomme o tšweletša eng?

¹³ Lebaka la boraro la gore re nyake gore moya wa Modimo o re hlahle ke gore ka ntle le wona re ka arošwa ke moya woo e sego o mokgethwa woo o šomago go batho ba bantši lehono. Lefase le na le moya wa lona o matla le o tutuetšago tsela yeo e fapanego ka mo go feletšego le seo moya o mokgethwa o ka se tšweletšago ka go rena. Go e na le gore o tutuetše batho gore ba be le monagano wa Kriste, moya wa lefase o dira  gore tsela yeo ba naganago ka yona le yeo ba dirago dilo ka yona e swane le ya mmuši wa lefase, e lego Sathane. (Bala Baefeso 2:1-3; Tito 3:3.) Ge motho a ineela tutuetšong ya moya wa lefase gomme a thoma go dira mediro ya nama, seo se feleletša ka ditlamorago tše mpe, gomme se mo palediša go ja bohwa bja Mmušo wa Modimo.—Bagal. 5:19-21.

14, 15. Re ka atlega bjang go ganetša moya wa lefase?

¹⁴ Jehofa o re neile ditlhamo tša gore re kgone go ganetša moya wa lefase. Moapostola Paulo o itše: “Tšwelang pele le hwetša matla Moreneng le bonatleng bja matla a gagwe . . . gore le kgone go ikemela letšatšing le lebe.” (Baef. 6:10, 13) Jehofa ka moya wa gagwe o re matlafaletša go lebeletšana le maiteko a Sathane a go re timetša. (Kut. 12:9) Moya wa lefase o na le matla, gomme re ka se kgone go o phema ka mo go feletšego. Lega go le bjalo, ga se ra swanela go dumelela gore o re senye. Moya o mokgethwa ke o matla le go feta, gomme o tla re thuša!

¹⁵ Moapostola Petro o boletše ka bao ba ilego ba hlanogela Bokriste lekgolong la pele la nywaga gore: “Ba arošitšwe ke go tlogela tsela e lokilego.” (2 Pet. 2:15) Ruri re swanetše go tloga re thabela gore ga se ra amogela “moya wa lefase, eupša re amogetše moya o tšwago go Modimo”! (1 Bakor. 2:12) Ka go thušwa ke tutuetšo yeo o nago le yona go rena le ka go diriša ka botlalo ditokišetšo ka moka tša Jehofa tša go re thuša go dula tseleng ya maleba ya moya, re ka atlega go ganetša moya wa lefase le le kgopo wo o tutuetšwago ke Sathane.—Bagal. 5:16.

Moya o Mokgethwa o Tšweletša Dika tše Dibotse

16. Moya o mokgethwa o ka tšweletša dika dife ka go rena?

¹⁶ Lebaka la bone la gore re nyake gore moya wa Modimo o šome ka go rena ke gore o tšweletša dika tše dibotse maphelong a bao o ba hlahlago. (Bala Bagalatia 5:22, 23.) Ke mang gare ga rena yo a ka se ratego go ba yo a bonagatšago lerato, lethabo le khutšo kutšwanyana? Ke mang gare ga rena yo a ka se ratego go ba yo a sa felego pelo, yo botho le yo a nago le toko ka boati? Ke mang gare ga rena yo a ka se holwego ke go ba le tumelo, boleta le boitshwaro ka tekanyo e kgolwanyana? Moya wa Modimo o tšweletša ka go rena dika tše dibotse tšeo di re holago gotee le go hola bao re phelago le bona e bile re ba hlankela. Go hlagolela dika tše ke mošomo woo o sa kgaotšego, ka gobane dika tšeo moya o di tšweletšago ka go rena ga di na magomo.

17. Re ka hlagolela bjang seka seo se tšweletšwago ke moya ka tekanyo e kgolo ka mo re ka kgonago ka gona?

¹⁷ Ke gabohlokwa go itlhahloba e le gore re kgonthišetše gore mantšu a rena le ditiro tša rena di hlatsela gore re laolwa ke moya o mokgethwa e bile re tšweletša dika tša wona. (2 Bakor. 13:5a; Bagal. 5:25) Ge e ba re bona gore go nyakega gore re hlagolele dika tše itšego tša moya, re ka dirišana le moya o mokgethwa ka tekanyo e kgolo e le gore re tšweletše dika tše bjalo. Re dira seo ka gore re ithute seka se sengwe le se sengwe go etša ge se tšwelela ka Beibeleng gomme se ahlaahlwa ka dikgatišong tša rena tša Bokriste. Ka gona re ka lemoga kamoo seka seo se se tšweletšwago ke moya se swanetšego go bonagatšwa ka gona bophelong bja rena bja letšatši le letšatši gomme re šomela go se bonagatša ka tekanyo e kgolo ka mo re ka kgonago ka gona. * Ge re bona mafelelo a bago gona ka baka la go šoma ga moya wa Modimo maphelong a rena gotee le maphelong a Bakristegotee le rena, re kgona go bona gabotse lebaka leo re swanetšego go hlahlwa ke moya woo.

Na o Dumelela Gore Moya wa Modimo o go Hlahle?

18. Jesu ke mohlala wa rena ka tsela efe tabeng ya go gata mogato ka go dumelelana le moya wa Modimo?

¹⁸ Ka ge Jesu e be e le “mošomi yo a nago le bokgoni” wa Modimo nakong ya ge go bopša legohle ka moka, o be a tseba gabotse tsela yeo makenete o bego o šoma ka yona, e lego sona selo seo batho ba se dirišago go phatša lefase. (Die. 8:30; Joh. 1:3) Lega go le bjalo, ka Beibeleng ga go na bohlatse bjo bo bontšhago gore Jesu o kile a diriša  matla a makenete gore a mo hlahle ge a be a sa le mo lefaseng. Beibele e re botša gore ge Jesu a be a sa le mo lefaseng, o ile a bona kamoo moya o mokgethwa wa Modimo o bego o na le matla ka gona bophelong bja gagwe. O ile a amogela tutuetšo ya wona, gomme ge o be o mo šušumetša, o ile a dumelelana le wona gomme a gata mogato. (Mar. 1:12, 13; Luka 4:14) Na le wena o ka tsela yeo?

19. Re swanetše go dira’ng gore moya o mokgethwa o re hlahle ka botlalo maphelong a rena?

¹⁹ Matla a šomago a Modimo a sa dutše a šoma menaganong le dipelong tša batho bao ba nyakago gore o ba tutuetše le go ba hlahla. O ka o dumelela bjang gore o šome go wena gomme o go lebiše tseleng e nepagetšego? Rapela Jehofa ka mehla gore a go romele moya wa gagwe gomme a go thuše go latela tutuetšo ya wona. (Bala Baefeso 3:14-16.) Dira dilo ka go dumelelana le dithapelo tša gago ka gore o nyakišiše keletšo yeo e hwetšwago ka Lentšung la Modimo le le ngwadilwego, e lego Beibele—sona selo seo se tšweleditšwego ke moya o mokgethwa. (2 Tim. 3:16, 17) Theetša ditaelo tše bohlale tšeo le di neago gomme o arabele ka phišego tlhahlong ya moya o mokgethwa. Dira dilo o na le tumelo ya gore Jehofa o tla go hlahla gabotse bophelong mo lefaseng le le kgopo.

[Mongwalo wa tlase]

Na o Kwešišitše Dintlhakgolo?

• Moya o mokgethwa o ka kgoma bjang maphelo a rena?

• Ke mabaka afe a mane ao a swanetšego go re dira gore re nyake go hlahlwa ke moya wa Modimo?

• Ke’ng seo re ka se dirago gore re holwe ka botlalo ke go hlahlwa ke moya o mokgethwa?

[Dipotšišo tša Thuto]

[Seswantšho go letlakala 15]

Moya wa Modimo e be e le matla ao a bego a hlahla Jesu bophelong bja gagwe

[Seswantšho go letlakala 17]

Moya wa Modimo o šoma go hlahla menagano le dipelo tša batho