O se ke wa Dumelela Bolwetši bo go Amoga Lethabo

AKANYA o tsoga mesong gomme o duma e ka letšatši le ka sobela le pele ga ge le ka hlaba. O swanelwa ke go lebeletšana le bohloko bja mmele goba bja maikwelo letšatši le lengwe gape. O ka ba wa ikwa go swana le Jobo yo a itšego: “Nka kgetha lehu go e na le ditlaišego tša ka ka moka.” (Jobo 7:15, The New English Bible) Go thwe’ng ge e ba boemo bjoo bo tšwela pele ka nywaga e mentši?

Boemo bjo bjalo bo swana le bja Mefiboshethe, morwa wa Jonathane mogwera wa Kgoši Dafida. Ge Mefiboshethe a be a na le nywaga e mehlano o lle “a wa ke moka a golofala.” (2 Sam. 4:4) Kgatelelo ya gagwe ya maikwelo e swanetše go ba e ile ya oketša bohloko bja bogole bja gagwe ge ka morago a be a latofatšwa ka go eka kgoši gomme a lahlegelwa ke dilo tša gagwe. Lega go le bjalo, o ile a tšwela pele a ipontšha e le mohlala o mobotse wa go lebeletšana le bogole, go thomeletšwa le manyami, gomme a sa dumelele gore dilo tšeo di mo amoge lethabo.—2 Sam. 9:6-10; 16:1-4; 19:24-30.

Mohlala o mongwe ke moapostola Paulo. Nakong e nngwe o ile a ngwala ka “mootlwa nameng” woo a bego a swanetše go o kgotlelela. (2 Bakor. 12:7) Go ka direga gore mootlwa woo a boletšego ka wona e be e le bolwetši bjo bo bego bo mo swere ka nako e telele, goba go ka direga gore e be e le batho bao ba bego ba ganetša go ba ga gagwe moapostola. Go sa šetšwe gore boemo e be e le bofe, bothata bja gagwe bo ile bja tšwela pele gomme o be a swanetše go lebeletšana le bohloko bja mmele goba bja maikwelo bjo bo bego bo bakwa ke bothata bjoo.—2 Bakor. 12:9, 10.

Malwetši a šoro ao a sa alafegego goba kgatelelo ya maikwelo di tlaiša ba bangwe ba bahlanka ba Modimo lehono. Ge Magdalena a be a na le nywaga e 18, go ile gwa hwetšwa gore o na le bolwetši bja systemic lupus erythematosus, e lego bolwetši bjo mašole a mmele a hlaselago ditho tša mmele. O re: “Ke be ke tšhogile kudu. Ge nako e dutše e feta, boemo bja ka bo ile bja mpefala gomme bja gakatšwa ke mathata a go se kgone go šila dijo, dišo tša molomo le mathata a kgokgokgo.” Ka lehlakoreng le lengwe, Izabela, o swanetšwe ke go lebeletšana le maemo a sa bonagalego gabonolo. O hlalosa gore: “Ke bile le kgatelelo ya monagano go tloga bjaneng. Se se feleleditše ka gore ke be le bolwetši bja letšhogo, mathata a mohemo, le go fela ke ehwa bogatšu ka maleng. Ka kakaretšo ke phela ke ikwa ke lapile.”

Go Lemoga Mafokodi a Rena

Bolwetši le bofokodi di ka go nyamiša bophelong. Ge seo se direga, go a thuša go dula fase wa hlahloba maemo a gago ka kelohloko. Go ka fo se be bonolo go amogela mafokodi a gago. Magdalena o re: “Bolwetši bja ka bo tšwela pele bo mpefala. Gantši ke ikwa ke lapile kudu moo ke palelwago ke go tsoga malaong. Bolwetši bja ka  bjo bo fetofetogago go sa letelwa bo dira gore ke thatafalelwe kudu ke go rulaganya dilo e sa le pele. Se se ntšharakanyago le go feta ke gore ga ke sa kgona go dira go gontši tirelong ya Jehofa go etša ge ke be ke dira peleng.”

Zbigniew o hlalosa gore: “Ge nywaga e dutše e feta, rheumatoid arthritis (e lego bolwetši bja marapo) bo mphetša matla, bo senya malokololo a ka ka go latelana. Ka dinako tše dingwe, ge ke rurugile kudu, ke palelwa le ke go dira mediro e bonolonolo. Se se dira gore ke ikwe ke nyamile.”

Nywageng e mmalwa e fetilego, go ile gwa hwetšwa gore Barbara o na le serurugi se se golago bjokong bja gagwe. O re: “Mmele wa ka o ile wa ba le diphetogo tše ke sa di letelago. Ke ikwa ke nolegile moko, ke opša ke hlogo e sa folego e bile ke sa kgone go tsepamiša kgopolo. Ka baka la mafokodi a a mafsa, ke ile ka swanelwa ke go lekodišiša dilo ka moka lefsa.”

Batho ba ka moka ke bahlanka ba ineetšego ba Jehofa. Go bona, go dira thato ya gagwe go tla pele. Ba botile Modimo ka dipelo tša bona ka moka gomme ba holwa ke thekgo ya gagwe.—Die. 3:5, 6.

Jehofa o Thuša Bjang?

Re swanetše go phema go nagana gore mahloko ao a re welago ke bohlatse bja gore Modimo o re galefetše. (Dillo 3:33) Nagana ka seo Jobo a ilego a swanelwa ke go lebeletšana le sona go sa šetšwe gore e be e le monna “yo a se nago bosodi le yo a lokilego.” (Jobo 1:8) Modimo ga a leke batho ka dilo tše mpe. (Jak. 1:13) Malwetši ka moka—go akaretša le ao a sa alafegego le a maikwelo—ke bohwa bjo bo nyamišago bjo bo tšwago go batswadi ba rena ba pele, Adama le Efa.—Baroma 5:12.

Lega go le bjalo, Jehofa le Jesu ba ka se tlogele baloki ba hloka thušo. (Ps. 34:15) Kudukudu dinakong tše thata maphelong a rena, ke moo re lemogago gore Modimo ke ‘setšhabelo sa rena le sebo sa rena.’ (Ps. 91:2) Ka gona, ge o lebeletšane le maemo ao a sa rarollegego gabonolo, ke’ng seo se ka go thušago gore o dule o thabile?

Thapelo: Ge o latela mohlala wa bahlanka ba Modimo ba ba botegago ba bogologolo, o ka lahlela maima a gago go Tatago rena wa legodimong ka thapelo. (Ps. 55:22) Ka go dira bjalo, o ka ba le “khutšo ya Modimo yeo e fetago kwešišo  yohle ya batho.” Khutšo yeo ya ka gare ‘e tla diša pelo ya gago le matla a gago a monagano.’ (Bafil. 4:6, 7) Ka go ithekga ka Modimo ka thapelo, Magdalena o kgona go lebeletšana le bolwetši bja gagwe bjo šoro. O re: “Go tšhollela pelo ya ka go Jehofa go a nkimolla e bile go a nthabiša. Ga bjale ke kwešiša gabotse seo se bolelwago ke go ithekga ka Modimo letšatši le letšatši.”—2 Bakor. 1:3, 4.

Jehofa a ka araba dithapelo tša gago ka go go nea matla ka moya wa gagwe o mokgethwa, Lentšu la gagwe le borwarre bja Bokriste. O ka se letele gore Modimo a tloše bolwetši bja gago ka mohlolo. Lega go le bjalo, o ka letela gore a go nee bohlale le matla ao a nyakegago e le gore o lebeletšane le bothata bjo bongwe le bjo bongwe. (Die. 2:7) A ka go matlafatša, a go nea “matla a fetago a tlwaelegilego.”—2 Bakor. 4:7

Lapa: Moya o lerato le wa kwelobohloko woo o fokago ka legaeng o ka go thuša go kgotlelela bolwetši. Lega go le bjalo, dula o gopola gore batho bao o ba ratago le bona ba a tlaišega. Ba ka ikwa ba se na matla go fo swana le ge wena o ikwa bjalo. Go sa dutše go le bjalo, ba tla dula ba go thekga, gaešita le dinakong tša mathata. Go rapela gotee le bona go tla go thuša gore o be le pelo e thabilego.—Die. 14:30.

Barbara o bolela ka morwedi wa gagwe le dikgaetšedi tše dingwe tša bafsa ka phuthegong gore: “Ba a nthekga bodireding. Phišego ya bona e a nkgothatša le go nthabiša.” Zbigniew o tšeela godimo thekgo ya mosadi wa gagwe. O re: “O dira mešomo e mentši ya ka lapeng. O nthuša le go apara e bile gantši o ntshwarela mokotla wa dipuku ge re e ya dibokeng tša Bokriste le ge re eya bodireding.”

Badumedigotee: Ge re le gare ga badumedi gotee le rena, re a kgothatšega le go homotšega. Eupša go thwe’ng ge e ba o sa kgone go ba gona dibokeng ka baka la bolwetši bja gago? Magdalena o re: “Phuthego e ile ya kgonthišetša gore ke holwa ke diboka ka go nkgatišetša lenaneo. Barapedigotee le nna ba fela ba nteletša mogala go bona ge e ba go na le seo ba ka nthušago ka sona. E bile ba nngwalela le mangwalo a kgothatšago. Taba ya gore ba a nkgopola e bile ba na le taba le nna e nthuša go kgotlelela.”

Izabela, yo a nago le kgatelelo ya monagano o anega gore: “Ka gare ga phuthego ke na le ‘botate’ le ‘bomma’ ba bantši bao ba ntheetšago le go  nkwešiša. Phuthego ke lapa la ka—mo ke moo ke hwetšago khutšo le lethabo.”

Bao ba tlaišwago ke diteko tše fapafapanego ba dira gabotse ge ba phema ‘go ipea lekatana.’ Go e na le moo, ba tšeela godimo go bokana gotee le phuthego. (Die. 18:1) Ka gona ba kgothatša ba bangwe kudu. Mohlomongwe mathomong o ka dikadika go botša bana beno le dikgaetšedi ka dilo tšeo o di nyakago. Lega go le bjalo, badumedigotee le wena ba tla leboga go bolela ga gago ka bolokologi. Seo se tla ba nea sebaka sa go bontšha “lerato la borwarre leo le hlokago boikaketši.” (1 Pet. 1:22) Go ka ba bjang ge o ka ba botša gore o nyaka koloi ya go go iša dibokeng, gore o nyaka go šoma le bona bodireding goba gore o nyaka go ba ntšhetša sa mafahleng a gago? Therešo ke gore ga se ra swanela go nyaka dilo ka šiši eupša re swanetše go leboga thušo ya bona.

E ba le pono e nepagetšego: Gantši go matleng a gago go hlagolela go dula o thabile mola o dutše o kgotleletše bolwetši bja gago bjoo bo sa alafegego. Go dula o hlafile le go lahlegelwa ke kholofelo go ka feleletša ka go go dira gore o nagane dilo tše di fošagetšego. Beibele e re: “Moya wa motho o kgona go kgotlelela bolwetši bja gagwe; eupša ke mang yo a ka kgotlelelago moya o nyamilego?”—Die. 18:14.

Magdalena o re: “Ke šoma ka thata e le gore ke pheme go nagana ka mathata a ka. Ke leka go ipshina ka matšatši ao ke ikwago ke le kaone. Ke kgothatšwa ke go bala diphihlelo tša batho bao ba ilego ba dula ba botega go sa šetšwe malwetši a bona ao a sa alafegego.” Izabela o matlafatšwa ke go tseba gore Jehofa o a mo rata e bile o mo tšeela godimo. O re: “Ke ikwa ke nyakwa le gona ke na le motho yo ke mo phelelago. E bile ke lebeletše pele bokamosong bjo bo kgahlišago.”

Zbigniew o re: “Bolwetši bja ka bo nthuta go ikokobetša le go kwa. Bo nthuta go bontšha temogo le kahlolo e botse gaešita le go lebalela go tšwa pelong. Ke ithutile go hlankela Jehofa ka ntle le go ikwela bohloko. Ge e le gabotse, ke tutueletšegile go gola moyeng.”

Dula o gopola gore Jehofa o bona kgotlelelo ya gago. O go kwela bohloko e bile o a go hlokomela. A ka se ‘lebale modiro wa gago le lerato leo o le bontšhitšego leineng la gagwe.’ (Baheb. 6:10) Tšeela godimo kholofetšo yeo a e neago bao ba mmoifago e rego: “Le ka mohla nka se ke ka go tlogela le ge e le go go lahla.”—Baheb. 13:5.

Ge e ba ka dinako tše dingwe o ikwa o nyamile, naganišiša ka kholofelo e kgahlišago ya go phela lefaseng le lefsa. Ruri nako e kgauswi kudu ya gore mahlo a gago a tle a bone ditšhegofatšo tša Mmušo wa Modimo mo lefaseng!

[Box/​Pictures on pages 28, 29]

Ba Tšwela Pele ba Bolela go sa Šetšwe Malwetši a Bona ao a sa Alafegego

“Ga ke sa kgona go itshepelela, ka gona mosadi wa ka goba yo mongwe wa bana babo rena le dikgaetšedi o ya le nna bodireding. Ke swara dithero le mangwalo a Beibele ka hlogo.”—Jerzy, yo e lego sefofu.

“Go tlaleletša go neeng bohlatse ka mogala, ke ngwala mangwalo gomme ka mehla ke boledišana le ba mmalwa bao ba thabelago. Ge ke le sepetlele ke dula ke beile Beibele ya ka le dikgatišo kgauswi le bolao bja ka. Seo se nthušitše go thoma dipoledišano tše dintši tše dibotse ka Beibele.”—Magdalena, yo go hweditšwego gore o na le bolwetši bjoo mašole a mmele a hlaselago ditho tša mmele.

“Ke rata bodiredi bja ntlo le ntlo, eupša ge ke ikwa nka se kgone go ya bodireding bja ntlo le ntlo, ke nea bohlatse ka mogala.”—Izabela, yo a nago le kgatelelo ya monagano.

“Ke thabela go dira maeto a go boela le go thuša ba bangwe go swara dithuto tša Beibele. Ge ke ikwa ke le kaone, ke rata go nea bohlatse ka ntlo le ntlo.”—Barbara, yo a nago le serurugi bjokong.

“Ke rwala mokotla o bohwefo wa dimakasine. Ke hlwa tšhemong ge feela malokololo a ka ao a opago a ntumelela go dira bjalo.”—Zbigniew, yo a swerwego ke bolwetši bja marapo.

[Seswantšho go letlakala 30]

Ba bagolo le ba bafsa e ka ba kgothatšo e kgolo go ba bangwe