Ee, go Bjalo, ye ke Kgatišo e Ithutwago!

Re beakantše lefsa sebopego sa kgatišo e ithutwago gore e ipiletše kutšwanyana gomme e go thuše ge o ithuta Lentšu la Modimo le le kgahlišago la therešo.—Ps. 1:2; 119:97.

Go fetile nywaga e mene ga e sa le re thoma go gatiša dikgatišo tše pedi tša Morokami, e nngwe bakeng sa batho bohle gomme e nngwe bakeng sa rena ka moka—rena Dihlatse tša Jehofa gotee le diithuti tša rena tša Beibele tšeo di dirago tšwelopele.

Mohlanka yo mongwe wa Jehofa wa nako e telele o ngwadile mabapi le kgatišo e ithutwago gore: “Ge ke be ke thoma go bona kgatišo ya pele e ithutwago ya Morokami, ke ile ka lemoga gore e a kgahliša e bile e a sedimoša. Polelo e tseneletšego ka dilo tša moya gotee le dipolelwana tša wona tšeo di dirišitšwego di be di tloga di nkgoma pelo. Ruri ke tloga ke leboga kudu tokišetšo ye e mpsha e kgahlišago.” Ngwanabo rena yo mongwe o ngwadile gore: “Ke fagahlela go fetša diiri tše ditelele ke ithuta kgatišo e ithutwago gomme ke swere Beibele ya ka.” Re holofela gore le wena o ikwa ka tsela e swanago.

Ka ge le tseba, Morokami o gatišitšwe go tloga ka 1879, e lego selo seo se fihleletšwego feela ka moya wa Jehofa le tšhegofatšo ya gagwe. (Sak. 4:6) Nywageng ye e 133, go bile le diphetogo tše mmalwa letlakaleng la ka ntle la makasine wo. Bakeng sa 2012, kgatišo e nngwe le e nngwe e ithutwago e tla ba le seswantšho se se thadilwego sa mebalabala letlakaleng la ka ntle seo se bontšhago batho ba ba neago bohlatse, se re gopotša ka kabelo yeo re e neilwego ke Modimo ya go nea bohlatse bjo bo tletšego mabapi le mmušo wa Modimo. (Dit. 28:23) Go letlakala la bobedi, le tla hwetša seswantšho seo se swanago le seo se thadilwego letlakaleng la ka ntle gomme se na le tlhaloso e kopana ya seo se diregago le gore se diragala kae. Ge ngwaga o dutše o eya, diswantšho tšeo di tla gopotša yo mongwe le yo mongwe wa rena gore batho ba Jehofa ba bolela ditaba tše dibotse “lefaseng ka moka.”—Mat. 24:14.

Ke diphetogo dife tše dingwe tšeo di dirilwego makasineng wo? Lepokisi la go boeletša dintlhakgolo le beilwe mathomong a sehlogo se sengwe le se sengwe se ithutwago. Le tla gatelela dintlha tše bohlokwa tšeo o swanetšego go di ela hloko ge o dutše o bala le go ithuta sehlogo seo. Ee, baswari ba thuto ya Morokami ba tla tšwela pele ba diriša dipotšišo tše mafelelong a thuto go boeletša taba yeo e bego e ahlaahlwa. O tla lemoga gore dikgoba tšeo di lego ka mathoko di okeditšwe ganyenyane le gore dinomoro tša dirapa di bonagala kutšwanyana.

Go etša ge go hlalositšwe kgatišong ya kgwedi ye, go tla ba le sebopego se sefsa seo se rego: “Go tšwa Bobolokelong bja Rena,” seo se bontšhago tšwelopele ya bohlokwa kudu historing ya Dihlatse tša Jehofa tša mehleng yeno. Le gona, go tla fela go e ba le diphihlelo tšeo di tšwelelago ka tlase ga sehlogo se se rego: “Ba Ile ba Ikgafa go tšwa Pelong.” Diphihlelo tše di tla hlalosa gabotse boipshino, kgotsofalo le lethabo leo bana babo rena le dikgaetšedi ba bilego le lona ka go hlankela moo go tlogago go nyakega bagoeledi ba oketšegilego ba Mmušo.

Eka o ka thabela ka botlalo nako yeo o e fetšago o ithuta Lentšu la Modimo ka thušo ya makasine wo.

Bagatiši

[Seswantšho go letlakala 3]

1879

[Seswantšho go letlakala 3]

1895

[Seswantšho go letlakala 3]

1931

[Seswantšho go letlakala 3]

1950

[Seswantšho go letlakala 3]

1974

[Seswantšho go letlakala 3]

2008