Go Dira Gore Nako ya go Ithuta e be e Thabišago le e Holago

Re ka oketša bjang lethabo la rena la go ithuta Beibele? Re ka dira bjang gore dinako tša rena tša go ithuta e be tše holago kudu? Anke re ahlaahleng ka boripana megato e meraro e bohlokwa yeo e tla re thušago gore re holege ka botlalo nakong ya ge re ithuta Beibele re le noši.

1 RAPELA: Mogato wa pele woo re swanetšego go o tšea ke wa gore re rapele. (Ps. 42:8) Ka baka la’ng? Re swanetše go lebelela go ithuta Lentšu la Modimo e le karolo ya borapedi bja rena. Ka gona, re swanetše go kgopela Jehofa gore a re thuše go ba le boemo bjo bo nepagetšego bja kgopolo gomme a re nee moya wa gagwe o mokgethwa. (Luka 11:13) Barbara yo e lego kgale e le moromiwa o re: “Ka mehla ke a rapela pele ga ge ke bala goba ke ithuta Beibele. Ka morago ga moo, ke ikwa e ka Jehofa o na le nna le gore o amogela seo ke se dirago.” Go rapela pele ga ge re ithuta go bula menagano ya rena le dipelo tša rena gore di amogele ka botlalo dijo tše dintši tša moya tšeo di lego pele ga rena.

2 NAGANIŠIŠA: Ka baka la go hloka nako, ba bantši ba feleletša ba bala Lentšu la Modimo ka lebelo. Lega go le bjalo, ba lahlegelwa ke mehola yeo ba ka e hwetšago ka go ithuta Beibele. Carlos yo a hlanketšego Jehofa ka nywaga ya ka godimo ga e 50, o ile a lemoga bohlokwa bja go beela ka thoko nako ya go naganišiša gore thuto ya gagwe e be le mohola. O re: “Ga bjale ke bala matlakala a sego kae a Beibele—mo e ka bago a mabedi ka letšatši. Ke moka ke kgona go fetša nako e oketšegilego ke naganišiša ka seo ke se balago e le gore ke ithute dithuto tše bohlokwa.” (Ps. 77:12) Ge e ba re fetša nako re naganišiša, gona re oketša tsebo ya rena le kwešišo ya rena ka thato ya Modimo.—Bakol. 1:9-11.

3 DIRIŠA SEO O SE BALAGO: Ge e ba re bona gore selo se itšego se na le mohola, ke gona moo se ka re holago. Ruri seo ke sa therešo tabeng ya go ithuta Beibele. Gabriel, e lego ngwanabo rena yo mofsa yo a nago le lenaneo le tsepamego la go ithuta Beibele, o re: “Go ithuta go nthuša gore ke fenye mathata a bophelo bja letšatši le letšatši, gomme go ntlhamela gore ke thuše ba bangwe.” O oketša ka gore: “Bophelong bja ka ke leka go diriša dilo ka moka tšeo ke ithutago tšona.” (Doit. 11:18; Josh. 1:8) Ee, go na le dilo tše dintši tša tsebo ya Modimo tšeo re ka di nweletšago ka go rena gomme ra di diriša.—Die. 2:1-5.

BOELETŠA: Re tloga re na le tokelo e kgolo ya gore re tsenelele ka gare ga tsebo yeo Jehofa a re neago yona, yena Mothopo wa bohlale ka moka! (Baroma 11:33) Ka gona, nakong e tlago ge o ithuta, kgonthišetša gore o thoma ka go rapela Jehofa gomme o mo kgopele gore a go thuše go ba le boemo bjo bo nepagetšego bja kgopolo le moya wa gagwe o mokgethwa. Ke moka iphe nako ya go naganišiša ka seo o se balago. Le gona, kgonthišetša gore bophelong bja gago bja letšatši le letšatši o diriša seo o ithutago sona. Ge e ba o latela megato ye e meraro e bohlokwa, o tla hwetša gore go ithuta ga gago Beibele e ba selo se se thabišago le seo se nago le mohola.