“[Dulang] le phakgame le nna.”—MAT. 26:38.

1-3. Baapostola ba ile ba palelwa bjang ke go dula ba phakgame bošegong bja mafelelo bja Jesu mo lefaseng, gona ke’ng seo se bontšhago gore ba ile ba ithuta phošong ya bona?

NAGANA ka seo se ilego sa direga bošegong bja mafelelo bja bophelo bja Jesu bja lefaseng. Jesu o tlile go le lengwe la mafelo ao a bego a a rata, e lego serapa sa Getsemane, ka bohlabela bja Jerusalema. O tlile mo le baapostola ba gagwe ba ba botegago. A gateletšegile kudu monaganong le pelong, Jesu o nyaka go hwetša lefelo la lekatana leo a ka rapelago go lona.—Mat. 26:36; Joh. 18:1, 2.

² Baapostola ba gagwe ba bararo—Petro, Jakobo le Johane—ba sepela le Jesu go tsenelela bogareng bja serapa. O ba botša gore: “Dulang mo gomme le dule le phakgame le nna,” ke moka a ya go rapela. Ge a boa, o hwetša bagwera ba gagwe ba ile ka boroko. A buša a ba lopa a re: “Dulang le phakgame.” Lega go le bjalo, ba robala gape ka makga a mangwe a mabedi! Ka moragonyana bošegong bjona bjoo, baapostola ka moka ba palelwa ke go dula ba phakgame moyeng. Ka baka leo, ba bile ba hlanogela Jesu gomme ba a tšhaba!—Mat. 26:38, 41, 56.

³ Ruri baapostola ba ile ba itshola ka baka la go palelwa ga bona ke go dula ba phakgame. Kapejana banna bao ba ba botegago ba ile ba ithuta phošong ya bona. Puku ya Beibele ya Ditiro e bontšha gore ba ile ba bea mohlala o kgahlišago wa go dula ba phakgame. Mohlala wa bona o swanetše go ba o ile wa tutueletša Bakristegotee le bona go dira se se swanago. Gona bjale go feta le ge e le neng pele, re swanetše go dula re phakgame. (Mat. 24:42) Anke re ahlaahleng dithuto tše tharo tša mabapi le go dula re phakgame tšeo re ka ithutago tšona go tšwa pukung ya Ditiro.

GO PHAFOGELA TLHAHLO YA GORE BA BOLELE KAE

4, 5. Paulo le basepedišani ba gagwe ba ile ba bona tlhahlo ya moya o mokgethwa bjang?

⁴ Sa pele, baapostola ba be ba phafogetše tlhahlo ya gore ba bolele kae. Pegong e nngwe, re ithuta kamoo Jesu a ilego a diriša moya o mokgethwa woo Jehofa a mo neilego  ona go hlahla moapostola Paulo le basepedišani ba gagwe leetong la bona le le sa tlwaelegago. (Dit. 2:33) Anke re sepeleng le bona.—Bala Ditiro 16:6-10.

⁵ Paulo, Silase le Timotheo ba tlogile motseng wa Lisitara ka borwa bja Galatia. Ka morago ga matšatši a itšego ba fihla tseleng e kgolo ya Roma yeo e lebilego ka bodikela bja naga yeo e nago le baagi ba bantši kudu seleteng sa Asia. Ba be ba nyaka go sepela tseleng yeo e le gore ba ka etela metse yeo e bego e na le batho ba dikete bao ba bego ba nyaka go kwa ka Kriste. Eupša go na le selo seo se ilego sa ba thibela go sepela ka tsela yeo. Temana ya 6 e re: “Ba ralala le Firigia le naga ya Galatia gobane ba be ba ileditšwe ke moya o mokgethwa go bolela lentšu seleteng sa Asia.” Ka tsela yeo e sego ya hlaloswa, moya o mokgethwa o ile wa thibela basepedi bao go bolela ditaba tše dibotse profenseng ya Asia. Go molaleng gore Jesu—ka moya wa Modimo—o be a nyaka go hlahla Paulo le basepedišani ba gagwe gore ba sepele ka tsela e fapanego.

6, 7. (a) Ke’ng seo se diragaletšego Paulo le basepedišani ba gagwe kgauswi le Bithinia? (b) Barutiwa ba ile ba dira phetho efe, gomme ka mafelelo afe?

⁶ Basepedi bao ba fišegago ba ile ba ya kae? Temana ya 7 e hlalosa gore: “Go feta moo, ge ba fihla tlase Misia ba leka go ya Bithinia, eupša moya wa Jesu wa se ba dumelele.” Ka ge ba be ba thibelwa go dira boboledi kua Asia, Paulo le basepedišani ba gagwe ba ile ba leba leboa, ka maikemišetšo a go dira boboledi metseng ya Bithinia. Lega go le bjalo, ge ba be ba batamela Bithinia, Jesu o ile a ba thibela gape ka moya o mokgethwa. Ka nako yeo, banna ba ba swanetše go ba ba be ba gakanegile. Ba be ba tseba seo ba swanetšego go se bolela le kamoo ba swanetšego go se bolela ka gona, eupša ba be ba sa tsebe gore ke kae mo ba swanetšego go se bolela gona. Re ka bea taba ye ka tsela ye: Ba kokotile mojakong wo o ba išago Asia—eupša ba se bulelwe. Ba kokotile mojakong wo o ba išago Bithinia—le gona moo ba se bulelwe. Na ba ile ba kgaotša go kokota? E sego bagoeledi bao ba mafolofolo!

⁷ Lebakeng le, banna ba ba ile ba dira phetho yeo go ka bonagalago e makatša. Temana ya 8 e hlalosa gore: “Ba feta Misia gomme ba theogela Teroa.” Ka gona basepedi ba ba ile ba leba bodikela gomme ba sepela dikhilomithara tše 563, ba phatša metse ka go latelelana go fihlela ba fihla boemakepeng bja Teroa gomme ba kgona go tsena Matsedonia. Moo, Paulo le basepedišani ba gagwe ba ile ba kokota mojako ka lekga la boraro, eupša lebakeng le mojako woo o ile wa bulega! Temana ya 9 e re botša seo se ilego sa direga ka morago ge e re: “Bošego Paulo a bona pono ye: monna yo mongwe wa Matsedonia o be a eme gomme a mo lopa a re: ‘Tshelela Matsedonia gomme o re thuše.’” Mafelelong, Paulo o be a tseba gore o swanetše go yo dira boboledi kae. Ka ntle le go dikadika, banna bao ba ile ba leba Matsedonia ka sekepe.

8, 9. Re ka ithuta’ng go tšwa pegong ya leeto la Paulo?

⁸ Re ka ithuta’ng pegong ye? Ela hloko gore ke feela ka morago ga ge Paulo a thomile leeto la gagwe la go ya Asia moo moya wa Modimo o ilego wa tsena ditaba gare. Le gona, ke feela ka morago ga ge Paulo a be a le kgauswi le Bithinia moo Jesu a ilego a ba nea ditaelo. La mafelelo, e bile feela ka morago ga ge Paulo a fihlile Teroa moo Jesu a ilego a mo laela gore a ye Matsedonia. Ka ge Jesu e le Hlogo ya phuthego, a ka dirišana le rena ka tsela e swanago lehono. (Bakol. 1:18) Ka mohlala, mohlomongwe o nagana ka go hlankela o le mmulamadibogo goba go hudugela moo go nyakegago bagoeledi ba oketšegilego. Eupša go ka direga gore e be feela ka morago ga gore o gate megato e tiilego ya go fihlelela pakane ya gago moo Jesu, ka moya wa Modimo, a ka go hlahlago. Nagana ka mohlala wo: Mootledi a ka laola koloi ya gagwe gore e ye ka go le letona goba le letshadi ge feela koloi ya gagwe e sepela. Ka mo go swanago, Jesu a ka re hlahla go oketša tirelo ya rena ge feela re sepela—ge re na le maikemišetšo a go fihlelela pakane ya rena.

⁹ Lega go le bjalo, go thwe’ng ge e ba maiteko a gago a sa enywe dienywa di sa tloga fase? Na o swanetše go kgaotša, o phethe ka  gore ga o hlahlwe ke moya wa Modimo? Gopola gore Paulo le yena o ile a lebetšana le mapheko. Go sa šetšwe seo, o ile a tšwela pele a tsoma le go kokota go fihlela a hwetša mojako wo o bulegago. Ka mo go swanago, ge e ba o phegelela go tsoma “mojako o mogolo o išago modirong,” le wena o ka putswa.—1 Bakor. 16:9.

LE PHAKGAME GE E LE MABAPI LE DITHAPELO

10. Ke’ng seo se bontšhago gore go phakgama mabapi le thapelo go bohlokwa gore re dule re phafogile?

¹⁰ Bjale, ela hloko thuto ya bobedi mabapi le go phakgama yeo re ka ithutago yona go bana babo rena ba Bakriste ba lekgolong la pele la nywaga: Ba be ba phafogile mabapi le dithapelo. (1 Pet. 4:7) Go phegelela thapelong go bohlokwa e le gore re dule re phakgame. Gopola gore ge Jesu a be a le serapeng sa Getsemane pele ga ge a ka swarwa, o boditše baapostola ba gagwe ba bararo gore: “Dulang le phakgame gomme le rapele le sa kgaotše.”—Mat. 26:41.

11, 12. Ke ka baka la’ng Heroda a ile a hlakiša Bakriste, go akaretša le Petro, gona o ile a dira seo bjang?

¹¹ Petro, yo a bego a le gona ka nako yeo, ka morago o ile a iponela ka noši matla a go phegelela thapelong. (Bala Ditiro 12:1-6.) Ditemaneng tša mathomo tša pego ye, re hwetša gore Heroda o ile a thoma go swara Bakriste gampe e le gore a amogelwe ke Bajuda. Go ka direga gore Heroda o be a tseba gore Jakobo e be e le moapostola yo a bego a na le tswalano ya kgauswi le Jesu. Ka gona, Heroda o ile a bolaya Jakobo “ka tšhoša.” (Temana 2) Ka go re’alo phuthego e ile ya lahlegelwa ke moapostola yo a rategago. A teko e kaakang go bana babo rena!

¹² Ke’ng seo Heroda a ilego a se dira ka morago? Temana ya 3 e hlalosa gore: “Ge a bona gore seo se kgahliša Bajuda, a swara le Petro.” Eupša pejana baapostola ba bangwe ba ile ba lokollwa ka mohlolo kgolegong, gomme Petro e be e le yo mongwe wa bona. (Dit. 5:17-20) Go ka direga gore Heroda o be a tseba seo gabotse. Radipolitiki yoo wa moradia o be a nyaka go kgonthišetša gore Petro ga a phonyokge. O ile a mo tsenya kgolegong a mo gafela go “dihlopha tše nne tša bahlabani ba bane ba bane gore di mo lete ka go šiedišana ka ge a be a ikemišeditše go mo tšweletša bathong ka morago ga paseka.” (Temana 4) Nagana feela! Heroda o ile a bofa Petro ka diketane gare ga bahlapetši ba babedi bao ba šomago le bahlapetši ba bangwe ba lesometshela bao ba šomago ka go šiedišana mosegare le bošego go kgonthišetša gore moapostola yo ga a tšhabe. Maikemišetšo a Heroda e be e le go tšweletša Petro bathong ka morago ga paseka le go mo ahlolela lehu bakeng sa go kgahliša lešaba. Ka tlase ga maemo a bjalo a boifišago, ke’ng seo Bakristegotee le Petro ba bego ba ka se dira?

13, 14. (a) Phuthego e ile ya arabela bjang ge Petro a be a golegwa? (b) Re ka ithuta’ng mohlaleng wa Bakristegotee le Petro tabeng ya thapelo?

¹³ Phuthego e be e tseba gabotse seo e swanetšego go se dira. Temana ya 5 e balega ka gore: “Ka baka leo, Petro o be a hlapeditšwe kgolegong; eupša phuthego e be e mo rapelela ka matla go Modimo.” Ee, dithapelo tša bona legatong la ngwanabo bona yo a ratwago di be di le matla, e le ditopo tše di tšwago pelong. Ka gona lehu la Jakobo ga se la ba dira gore ba felelwe ke kholofelo; goba go dira gore ba lebelele thapelo e se na mohola. Ka mo go fapanego, ba be ba tseba gore dithapelo tša barapedi ba botegago ke tša bohlokwa go Jehofa. Ge e ba dithapelo tša ba bjalo di dumelelana le thato ya gagwe, o a di araba.—Baheb. 13:18, 19; Jak. 5:16.

¹⁴ Re ka ithuta’ng mabapi le tsela yeo Bakristegotee le Petro ba ilego ba arabela ka yona? Go dula re phakgame go akaretša e sego feela go ithapelela rena ka noši eupša le go rapelela bana babo rena le dikgaetšedi. (Baef. 6:18) Na o tseba badumedigotee le wena bao ba lebeletšanego le diteko? Ba bangwe ba ka ba ba kgotleletše ditlaišo, dithibelo tša mmušo goba dikotsi tša tlhago. Ke ka baka la’ng o sa ba akaretše dithapelong tša gago tšeo di tšwago pelong? Mohlomongwe o tseba ba bangwe bao ba lebeletšanego le mathata ao a sa bonagalego. Ba ka ba ba thatafalelwa ke go lebeletšana le mathata  a lapa, go nyama goba go se phele gabotse mmeleng. Go ka ba bjang ge o ka nagana ka batho ba itšego ka go lebanya bao o ka ba bolelago ka maina ge o dutše o bolela le Jehofa, “Mokwi wa thapelo”?—Ps. 65:2.

15, 16. (a) Hlalosa kamoo morongwa wa Jehofa a ilego a lokolla Petro kgolegong. (Bona seswantšho seo se lego ka mo tlase.) (b) Ke ka baka la’ng e le mo go kgothatšago go naganišiša ka tsela yeo Jehofa a ilego a hlakodiša Petro?

¹⁵ Lega go le bjalo, Petro o ile a diragalelwa ke’ng? Bošegong bja gagwe bja mafelelo kgolegong ge a be a ile ka boroko gare ga bahlapetši ba babedi, Petro o ile a diragalelwa ke dilo tše di makatšago ka go latelelana. (Bala Ditiro 12:7-11.) Akanya seo se diregilego: Ka ponyo ya leihlo, seetša se se phadimago se ile sa tlala ka seleng ya gagwe. Morongwa o ile a ema moo, gomme go bonagala bahlapetši ba be ba sa mmone, ke moka kapejana o ile a tsoša Petro. Diketane tšeo a bego a tlemilwe diatla ka tšona di ile tša fo wa! Ke moka morongwa o ile a hlahla Petro go tšwa ka seleng, a feta bahlapetši bao ba bego ba eme ka ntle gomme mafelelong ba feta kgorong e kgolo ya tšhipi, yeo e ilego ya “ipulegela.” Gateetee ge ba be ba le ka ntle ga kgolego, morongwa o ile a nyamela. Petro o be a lokolotšwe!

¹⁶ Na ga se mo go matlafatšago tumelo go naganišiša ka matla a Jehofa a go phološa bahlanka ba gagwe? Ke therešo gore ga se ra lebelela gore Jehofa a re phološe ka mohlolo lehono. Lega go le bjalo, re na le tumelo e tiilego ya gore o diriša matla a gagwe go thuša batho ba gagwe lehono. (2 Dikor. 16:9) A diriša moya wa gagwe o mokgethwa, a ka re nea matla a go lebeletšana le teko le ge e le efe. (2 Bakor. 4:7; 2 Pet. 2:9) Le gona, kgauswinyane Jehofa o tla diriša Morwa wa gagwe go lopolla ba dimilione tše dintši kgolegong ye e sa fokotšegego, e lego lehu. (Joh. 5:28, 29) Go dumela ga rena dikholofetšo tša Jehofa go ka re nea sebete se segolo ge re lebeletšana le diteko lehono.

GO NEA BOHLATSE BJO BO TLETŠEGO GO SA ŠETŠWE MAPHEKO

17. Paulo o re beetše mohlala ofe o mobotse wa go bolela ka phišego le go ba le maikwelo a go akgofa?

¹⁷ Thuto ya boraro yeo re ka ithutago yona go baapostola mabapi le go dula re phakgame ke ye: Ba ile ba tšwela pele ba nea bohlatse bjo bo tletšego go sa šetšwe mapheko. Go dira boboledi ka phišego le ka go akgofa go bohlokwa bakeng sa gore re dule re phakgame. Moapostola Paulo e be e le mohlala o mobotse tabeng ye. O ile a ikgafa ka phišego, a tšea maeto a go ya kgole le go hloma diphuthego tše dintši. O ile a kgotlelela mathata a mantši, lega go le bjalo ga se a ka a lahlegelwa ke phišego ya gagwe goba maikwelo a go akgofa ga nako.—2 Bakor. 11:23-29.

18. Paulo o ile a tšwela pele bjang a nea bohlatse ge a be a golegilwe kua Roma?

¹⁸ Ela hloko pego ya mafelelo ka Paulo pukung ya Ditiro, bjalo ka ge e begilwe go Ditiro kgaolo 28. Paulo o fihlile Roma, moo a bego a swanetše go tla go ema pele ga Mmušiši Nero. O be a golegilwe, mohlomongwe a bofeletšwe go yo mongwe wa bahlapetši. Lega go le bjalo, ga go ketane yeo e bego e ka thibela moapostola yo yo a fišegago go dira  boboledi! Paulo o ile a tšwela pele a hwetša ditsela tša go nea bohlatse. (Bala Ditiro 28:17, 23, 24.) Ka morago ga matšatši a mararo, Paulo o ile a bitša banna ba bagolo ba Bajuda gore a ba nee bohlatse. Ke moka, ka letšatši le le kgethilwego, Paulo o ile a nea bohlatse bjo bo tletšego le go feta. Temana 23 e re: “Bjale [Bajuda ba lefelong leo] ba rulaganyetša go hlwa letšatši le yena, ba tla go yena ka bontši lefelong la gagwe la bodulo. Ke moka a ba hlalosetša taba ye ka go nea bohlatse bjo bo tletšego mabapi le mmušo wa Modimo e le gore a ba kgodiše mabapi le Jesu go tšwa molaong wa Moshe gotee le go Baporofeta, a dira se go tloga mesong go fihla mantšiboa.”

19, 20. (a) Ke ka baka la’ng Paulo a be a atlega go neeng bohlatse? (b) Paulo o ile a ikwa bjang ge batho ba bangwe ba be ba sa amogele ditaba tše dibotse?

¹⁹ Ke ka baka la’ng Paulo a be a atlega kudu go neeng bohlatse? Ela hloko gore temana 23 e re fa mabaka a mmalwa. (1) O ile a bolela kudu ka Mmušo wa Modimo le ka Jesu Kriste. (2) O ile a leka go ipiletša go batheetši ba gagwe e le gore “a ba kgodiše.” (3) O ile a fa mabaka go tšwa Mangwalong. (4) O bontšhitše moya wa boikgafo, a nea bohlatse “go tloga mesong go fihla mantšiboa.” Paulo o neile bohlatse bjo matla, eupša ga se bohle bao ba ilego ba bo amogela. Temana 24 e re: “Ba bangwe ba dumela dilo tše di boletšwego; ba bangwe ba se dumele.” Go ile gwa tsoga dikgakgano gomme batho ba tloga.

²⁰ Na Paulo o ile nyema moko ka baka la ge e se bohle ba ilego ba amogela ditaba tše dibotse? Le gatee! Ditiro 28:30, 31 e re botša gore: “O ile a dula moo nywaga e mebedi ka moka ka ntlong ya gagwe e hirilwego, gomme o be a amogela ka botho bohle bao ba bego ba tsena ka moo a bego a le ka gona, a ba botša ka mmušo wa Modimo le go ruta dilo tše di lego mabapi le Morena Jesu Kriste ka tokologo e kgolo kudu ya polelo, a se na tšhitišo.” Puku e buduletšwego ya Ditiro e phetha ka mantšu ao a a homotšago.

21. Re ka ithuta’ng go tšwa mohlaleng wa Paulo ge a be a golegilwe ka ngwakong?

²¹ Re ka ithuta’ng mohlaleng wa Paulo? Ge a be a golegilwe ka ngwakong, Paulo o be a sa kgone go nea bohlatse ka ntlo le ntlo. Lega go le bjalo, o ile a dula a na le boemo bjo bo nepagetšego bja kgopolo, a nea bohlatse go bohle bao ba bego ba etla go yena. Ka mo go swanago, bontši bja batho ba Modimo lehono ba dula ba thabile gomme ba tšwela pele ba dira boboledi go sa šetšwe go golegwa ka go hloka toka ka baka la tumelo ya bona. Ba bangwe ba bana babo rena le dikgaetšedi ba ba rategago ga ba kgone go tšwa ka nywakong, mohlomongwe ba bile ba dula mafelong a go hlokomela balwetši ka baka la botšofadi goba bolwetši. Ge ba kgona, ba dira boboledi go dingaka le bašomi ba moo gotee le baeng. Kganyogo ya bona e tšwago pelong ke go nea bohlatse bjo bo tletšego ka Mmušo wa Modimo. Ruri re leboga mohlala wo ba o beago!

22. (a) Ke tokišetšo efe yeo e re thušago go holwa ke puku ya Beibele ya Ditiro? (Bona lepokisi leo le lego ka mo godimo.) (b) O ikemišeditše go dira’ng ge o dutše o letetše bofelo bja tshepedišo ye ya kgale ya dilo?

²² Go molaleng gore go na le mo gontši moo o ka ithutago gona ka go dula o phakgame go tšwa go baapostola le Bakriste ba bangwe ba lekgolong la pele la nywaga bao go boletšwego ka bona ka pukung ya Beibele ya Ditiro. Ge re dutše re letetše bofelo bja tshepedišo ye ya kgale ya dilo, anke re ikemišetšeng go ekiša Bakriste bao ba lekgolong la pele la nywaga go neeng bohlatse ka sebete le ka phišego. Ga bjale ga go na tokelo e fetago ya gore re tšee karolo “go [neeng] bohlatse bjo bo tletšego” ka Mmušo wa Modimo!—Dit. 28:23.

[Dipotšišo tša Thuto]

Morongwa o ile a hlahla Petro go tšwa ka kgoro e kgolo ya tšhipi

[Lepokisi go letlakala 13]

“NKA SE SA LEBELELA PUKU YA DITIRO GO SWANA LE PELENG”

Ka morago ga go bala puku ya “Go Nea Bohlatse bjo bo Tletšego” ka Mmušo wa Modimo, molebeledi yo mongwe wa mosepedi o ile a ntšha maikwelo a gagwe ka tsela ye: “Nka se sa lebelela puku ya Ditiro go swana le peleng. Ke badile pego ya Ditiro ka makga a mantši eupša go be go le bjalo ka ge eka ke swere kerese e bile ke apere digalase tša ditšhila. Ga bjale ke ikwa eka ke šegofaditšwe go bona letago la yona ke le seetšeng sa letšatši.”

[Seswantšho go letlakala 12]

Morongwa o ile a hlahla Petro go tšwa ka kgoro e kgolo ya tšhipi