Ba Ile ba Bolela Lentšu la Modimo ka Sebete!

E ba le sebete ge o lebeletšana le kganetšo. Seka se se bontšhwa ke Bakriste ba therešo, go etša ge dikgatišo tše bjalo ka “Go Nea Bohlatse bjo bo Tletšego” ka Mmušo wa Modimo” gotee le Dihlatse tša Jehofa—Bagoeledi ba Mmušo wa Modimo di bontšha. Ka go swana le badumedigotee le rena ba lekgolong la pele la nywaga, re retologela go Jehofa ka thapelo re kgopela moya wa gagwe le thušo ya go bolela lentšu la gagwe ka sebete.—Dit. 4:23-31.

Ngwanabo rena yo mongwe o ngwadile mabapi le modiro wa go bolela ditaba tše dibotse nakong ya ntwa ya pele ya lefase gore: “Bahlanka ba Modimo ba be ba aba ka mafolofolo bolumo ya bošupa ya Studies in the Scriptures, yeo e bego e na le sehlogo seo se rego The Finished Mystery. E ile ya abja ka bontši kudu. Pampišana ya Kingdom News No. 1 e ile ya lokollwa ka 1918. Ke moka gwa latela Kingdom News No. 2, yeo e bego e hlalosa lebaka leo The Finished Mystery e bego e thibelwa ke balaodi. Yona e ile ya latelwa ke Kingdom News No. 3. Dikgatišo tše di ile tša phatlalatšwa ka boati ke sehlopha seo se tloditšwego sa mohlanka yo a botegago. Go be go nyaka tumelo le sebete go phatlalatša pampišana ye ya Kingdom News.”

Lehono, bao e sa tšwago go ba bagoeledi ba Mmušo gantši ba tlwaeletšwa bodiredi, eupša go be go se bjalo peleng. Ge a gopola phihlelo ya gagwe ya pele a le tirelong ya tšhemo ka 1922, ngwanabo rena yo mongwe wa Mopolishi kua United States o ngwadile gore: “Ka ge ke be ke sa tsebe kamoo nka sepedišago dikgatišo ka gona e bile ke bolela Seisemane seo se sa kwagalego, ke ile ka ema ka ntle ga mojako wa ofisi ya ngaka gomme ka kokota. Mooki o ile a bula mojako. Nka se tsoge ke lebetše phihlelo yeo, ka gobane ke be ke thabile e bile ke tšhogile. Ge ke be ke bula mokotla wa ka wa go athwa, dipuku ka moka di ile tša wela maotong a mooki yoo. Ga ke tsebe gore ke ile ka re’ng, eupša ke ile ka mo tlogelela kgatišo. Ge ke tloga moo, ke ile ka kwa ke na le sebete e bile ke šegofaditšwe ke Jehofa. Ke ile ka sepediša dipukwana tše dintši letšatšing leo setarateng seo sa kgwebo.”

Kgaetšedi yo mongwe o boletše gore: “Moo e ka bago ka 1933, bana babo rena ba bantši ba ile ba diriša dikoloi tšeo di bego di na le segodišamodumo go phatlalatša molaetša wa Mmušo.” Lebakeng le lengwe, kgaetšedi yoo gotee le banyalani ba bangwe ba Dihlatse ba be ba dira boboledi dithabeng tša California, U.S.A. O gopola gore: “Ngwanabo rena o ile a iša koloi yeo e nago le segodišamodumo godimo ga thaba, gomme rena ra šala mo tlase toropong yeo. Ge a thoma go bapala molaetša woo o lego segodišamodumong seo, go ile gwa ba bjalo ka ge eka modumo woo o be o etšwa legodimong. Batho ba toropo yeo ba ile ba leka ka makga a mmalwa go hwetša ngwanabo rena, eupša ba ile ba palelwa. Ka morago ga go bapala molaetša woo, re ile ra ya go batho gomme ra ba nea bohlatse. Ke ile ka šoma ka dikoloi tše dingwe tše pedi tša go bapala molaetša ka segodišamodumo gomme therešo ke gore batho ba bantši ba be ba sa nyake go kwa molaetša wa rena. Eupša go be go se na seo ba ka se dirago ka gobane molaetša wo o tšwago dikoloing tšeo o be o fihla magaeng a bona. Ka mehla re bone gore Jehofa o ile a dira gore go dirišwe mokgwa o swanetšego ka nako e  swanetšego. Mokgwa wo o ile wa nyaka gore re be le sebete se segolo, eupša ka mehla o ile wa fihlelela morero wa wona, gomme leina la Jehofa le ile la tagafatšwa.”

Ka bo-1930 le mathomong a bo-1940, dikeramafomo le dipolelo tše di gatišitšwego tša Beibele di ile tša dirišwa bodireding bja rena. Mosadi yo mongwe wa Mokriste o gopola gore: “Kgaetšedi yo mongwe yo mofsa o be a dira modiro wa ntlo le ntlo a swere keramafomo. Ka morago ga gore a thome go e bapala legaeng le lengwe, mong wa lapa leo o ile a galefa kudu moo a ilego a raga keramafomo ya wela kgole le mathudi. Ga go na le rekhoto e tee yeo e ilego ya robega. Banna ba bararo bao ba bego ba eja dijo tša matena ba le ka loring yeo e bego e eme ba ile ba bona seo se diragetšego, gomme ba ile ba kgopela kgaetšedi yoo gore a ba bapalele molaetša, ke moka ba ile ba amogela dikgatišo tšeo a ilego a ba nea tšona. Seo se ile sa fodiša ntho yeo.” Go be go nyakega sebete gore motho a kgotlelele diteko tše bjalo.

Kgaetšedi yoo o oketša ka gore: “Ke gopola ge go be go thongwa modiro wa go sepediša dimakasine setarateng ka 1940. Pele ga moo, go be go eba le megwanto ya go phatlalatša tsebišo. Bana babo rena le dikgaetšedi ba be ba theoga ba le ka thoko ga tsela ba šalane morago ba swere dipolakate tšeo di ngwadilego gore ‘Bodumedi ke Moreo le Kgwebo ya Bofora’ le tša gore ‘Hlankela Modimo le Kriste Kgoši.’ Ka yona nako yeo, batho ba be ba newa dipampišana ka ntle le tefo. Go be go nyakega sebete gore motho a tšee karolo dibopegong tše tša modiro wa rena, eupša di ile tša phetha morero wa gore leina la Jehofa le batho ba gagwe le dule le tsebja ke batho ka kakaretšo.”

Kgaetšedi yo mongwe o re: “Go sepediša dimakasine ditarateng tša ditoropong tše dinyenyane go be go le boima kudu. Ka nako yeo Dihlatse di be di ganetšwa o šoro. . . . Go be go tloga go nyakega sebete gore o eme khutlong ya setarata o swere dimakasine gomme o goeletše mantšu ao go bego go šišintšwe gore re a bolele. Lega go le bjalo, go be go se na Mokibelo woo o re fetago. Ka dinako tše dingwe batho ba be ba le botho. Ka dinako tše dingwe go be go tšwelela dihlopha tša batho bao ba befetšwego, gomme mabakeng a mangwe re be re swanelwa ke go ngwega e le gore re pheme dihlopha tše bjalo.”

Go sa šetšwe tlaišo yeo e bilego gona Ntweng ya II ya Lefase, Dihlatse tša Jehofa di ile tša phetha bodiredi bja tšona ka sebete. Nakong ya lesolo la matšatši a 43 la go tloga ka December 1, 1940 go ya go January 12, 1941, bagoeledi ba ka bago 50 000 kua United States ba ile ba aba dipukwana tše ka bago tše dimilione tše seswai lebakeng leo le bego le bitšwa Nako ya go Nea Bohlatse ka “Sebete.”

Batšofadi ba bantši ka mokgatlong wa Modimo ba gopola gabotse ditlhohlo tša nakong e fetilego tšeo di ilego tša nyaka gore ba be le sebete. Ba bangwe ba gopola gore go theoša le nywaga, sebete sa bona se be se bonagatšwa ke mantšu ao ba bego ba rata go a bolela a gore: Thibela manaba kgorong! Taba ya gore molaetša woo re o filwego ke Modimo o tla tšea sebopego sefe pele ga bofelo bja tshepedišo ya gona bjale e kgopo, e tla ya le matšatši. Lega go le bjalo, ka thušo ya Modimo, re tla tšwela pele re tsebatša lentšu la Jehofa ka tumelo le ka sebete.

[Ntlhakgolo go letlakala 9]

Ka mehla modiro wa go bolela ka Mmušo o be o nyaka gore motho a be le sebete