Bolokang Moya o Mobotse wa Phuthego

“Anke botho bjo bogolo bja Morena Jesu Kriste bo be le moya wo le o bontšhago.” —BAFIL. 4:23.

RE KA GODIŠA BJANG MOYA O MOBOTSE KA PHUTHEGONG . . .

․․․․․

ge re bokane le bana babo rena?

․․․․․

ka go fišega ga rena bodireding bja tšhemo?

․․․․․

ka go bega dibe tše dikgolo?

1. Phuthego ya Filipi le ya Thiathira di ile tša retwa ka baka la eng?

BAKRISTE ba lekgolong la pele la nywaga ba kua Filipi ba be ba diila. Lega go le bjalo, ba be ba na le seatla se se bulegilego e bile ba be ba bontšha badumedigotee le bona lerato leo le bego le ka ekišwa. (Bafil. 1:3-5, 9; 4:15, 16) Mafelelong a lengwalo la gagwe le le buduletšwego leo le lebišitšwego go bona, moapostola Paulo o be a ka ngwala gore: “Anke botho bjo bogolo bja Morena Jesu Kriste bo be le moya wo le o bontšhago.” (Bafil. 4:23) Ka ge moya o swanago o ile wa bontšhwa ke Bakriste ba Thiathira, Jesu Kriste yo a tagafaditšwego o ile a ba botša gore: “Ke tseba ditiro tša gago, lerato la gago le tumelo le bodiredi le kgotlelelo, le gore ditiro tša gago tša gona bjale ke tše dikgolo go feta tša pele.”—Kut. 2:19.

2. Ke tema efe yeo re e kgathago go dira gore phuthego ya gabo rena e be le moya woo e o bonagatšago?

² Ka mo go swanago, phuthego e nngwe le e nngwe ya Dihlatse tša Jehofa lehono e bonagatša moya o itšego, goba e ba le botumo bjo itšego. Diphuthego tše dingwe di tumile ka go ba le moya o borutho le wa lerato. Tše dingwe di tloga di thopa sefoka tseleng yeo di thekgago modiro wa go bolela ka Mmušo le ka go tšeela godimo bodiredi bja nako e tletšego. Ge e ba rena re le motho ka o tee ka o tee re hlagolela moya o mobotse, gona re tsenya letsogo boteeng bja phuthego e bile re tšwetša pele go gola ga yona ka kakaretšo. (1 Bakor. 1:10) Ka lehlakoreng le lengwe, ge e ba re ka ba le moya o sa lokago, re ka dira gore phuthego e otsele moyeng, e be bololo gomme ra dumelela gore go dirwe bobe ka gare ga yona. (1 Bakor. 5:1; Kut. 3:15, 16) Moya wa phuthego ya geno o bjang? Wena ka noši o ka thuša bjang go godiša moya o mobotse ka phuthegong?

 KGOTHALETŠA GORE GO BE LE MOYA O MOBOTSE

3, 4. Re ka “reta [bjang Jehofa] phuthegong e kgolo”?

³ Mopsalme o opetše ka gore: “[Jehofa] ke tla go reta phuthegong e kgolo; ka go tumiša gare ga mašaba a batho.” (Ps. 35:18) Mopsalme o be a sa tšhabe go tumiša Jehofa ge a be a na le bahlanka ba bangwe ba Modimo. Diboka tša phuthego tša beke le beke, go akaretša le Thuto ya Morokami, di re bulela sebaka se sebotse sa gore re bontšhe moya wa go fišega ge re nea dikarabo gomme re bolelela tumelo ya rena. Yo mongwe le yo mongwe wa rena a ka ipotšiša gore: ‘Na ke diriša ka botlalo tokelo ya gore ke tšee karolo dibokeng? Na ke di lokišetša gabotse gomme ka nea dikarabo tše di holago? Ka ge ke le hlogo ya lapa, na ke thuša bana ba ka go lokišetša dikarabo e sa le pele gomme ka ba ruta gore ba arabe ka mantšu a bona?’

⁴ Mopsalme Dafida o ile a bontšha gore go tia ga dipelo tša rena go tswalana le go opela ga rena. O itše: “Modimo, pelo ya ka e tiile, pelo ya ka e tiile. Ke tla go opelela koša.” (Ps. 57:7) Dikopelo tšeo di dirišwago dibokeng tša Bokriste di re nea sebaka se sebotse sa go ‘opelela Jehofa koša’ ka dipelo tše tiilego. Ge e ba re sa tsebe tše dingwe tša dikopelo tše, go re’ng re sa itlwaetše tšona nakong ya mantšiboa a Borapedi bja Lapa? Eka re ka ikemišetša go ‘opelela Jehofa bophelong bja rena ka moka gomme re mo gobelele ge feela re sa phela.’—Ps. 104:33.

5, 6. Re ka amogela bjang ba bangwe ka magaeng a rena le go abelana le bona dilo tša rena, gomme seo se dira gore phuthego e be bjang?

⁵ Go amogela bana babo rena le dikgaetšedi magaeng a rena ke tsela e nngwe ya go godiša moya wa lerato ka phuthegong. Kgaolong ya gagwe ya mafelelo ya lengwalo leo a le ngwaletšego Baheberu, Paulo o akaretša kgothatšo ye: “Lerato la lena la borwarre a le tšwele pele. Le se ke la lebala go amogela baeng.” (Baheb. 13:1, 2) Go lokišetša dijo bakeng sa balebeledi ba basepedi le basadi ba bona goba go di lokišeletša bahlanka bao ba lego tirelong ya nako e tletšego ka phuthegong ke tsela e botsebotse ya go bontšha go amogela baeng. Nagana le ka bahlologadi, malapa a motswadi o tee goba batho ba bangwe bao ba ka holwago ke go ba le rena dijong goba borapeding bja rena bja lapa.

⁶ Paulo o laetše Timotheo gore a kgothaletše ba bangwe gore “ba dire botse, ba  hume medirong e mebotse, ba be le seatla se se bulegilego, ba ikemišetše go abelana, ka go re’alo ba ipolokele motheo o mobotse wa bokamoso e le lehumo la bona, e le gore ba swarelele ka go tia bophelong bja kgonthe.” (1 Tim. 6:17-19) Paulo o be a kgothaletša gore barapedigotee le yena ba hlagolele moya wa go nea. Gaešita le dinakong tše thata tša maemo a boiphedišo, re ka ba le moya wa go nea. Tsela e botse ya go dira se ke go rwala bao ba nyakago dinamelwa tša go ya bodireding bja tšhemo le go ba iša dibokeng le go ba bušetša gae. Bjale go thwe’ng ka bao ba holwago ke ditokišetšo tše bjalo tše botho? Ba tla ba ba godiša moya o mobotse ka phuthegong ge e ba ba ka leboga ditiro tše bjalo, mohlomongwe ka gore ba neele seo ba ka se kgonago go thuša ditshenyagalelong tše di golelago godimo tša makhura a dinamelwa. Godimo ga moo, na go rulaganya ga rena go fetša nako e oketšegilego le bana babo rena le dikgaetšedi ba moya go ka se dire gore ba ikwe ba nyakega e bile ba ratega? Ge e ba re tlwaela go direla “bao ba tswalanego le rena tumelong” ditiro tše dibotse e bile re ikemišeditše go abelana le bona nako ya rena le dilo tša rena, ga re godiše feela lerato leo re ba ratago ka lona eupša re aga le moya o borutho le o mobotse ka phuthegong.—Bagal. 6:10.

7. Go boloka diphiri tša batho ba bangwe go ka thuša bjang go boloka moya o mobotse ka phuthegong?

⁷ Ela hloko dilo tše dingwe gape tšeo di matlafatšago tlemo ya lerato yeo re nago le yona le badumedigotee le rena: segwera le go boloka sephiri. (Bala Diema 18:24.) Bagwera ba kgonthe ba boloka sephiri. Ge bana babo rena ba re ntšhetša sa mafahleng a bona e bile ba kgodišegile gore ditaba tše bjalo di ka se phatlalatšwe ke motho, tlemo ya lerato yeo re šetšego re na le yona le bona e tla gola le go feta. Eka re ka godiša moya wa lerato o swanago le wa bana ba motho ka phuthegong ka gore re be bagwera bao ba kgonago go boloka sephiri.—Die. 20:19.

E BA YO A FIŠEGAGO BODIREDING

8. Balaoditsea ba ile ba newa keletšo efe, gomme ka baka la’ng?

⁸ Ge Jesu a be a bolela le phuthego ya Laoditsea, o itše: “Ke tseba ditiro tša gago gore ga o tonye e bile ga o fiše. Eka o ka be o tonya goba o fiša. Ka gona, ka ge o le bololo o sa fiše e bile o sa tonye, ke tla go tshwa molomong wa ka.” (Kut. 3:15, 16) Balaoditsea ba be ba sa fišegele bodiredi bja Bokriste. Ga go pelaelo gore mokgwa o bjalo o ile wa kgoma le ditswalano tša bona ka noši. Ka gona Jesu ka lerato o ile a ba eletša ka gore: “Ka moka bao ke ba ratago ke a ba kgala le go ba laya. Ka gona [fišegang] gomme [le] itshole.”—Kut. 3:19.

9. Pono ya rena ka bodiredi bja tšhemo e kgoma bjang moya wa phuthego?

⁹ Gore re godiše moya o mobotse ka phuthegong, re swanetše go lebeledišiša phišego yeo re nago le yona tirelong ya tšhemo. Phuthego e rulagantšwe ka morero wa  gore e tsome batho bao ba swanago le dinku tšhemong gomme e ba age moyeng. Ka gona, re swanetše go tšea karolo ka mafolofolo modirong wa go dira barutiwa, go etša ge Jesu a dirile. (Mat. 28:19, 20; Luka 4:43) Ge phišego ya rena bodireding e le godimo, ke gona moo re tlago go ba boteeng re le “bašomigotee le Modimo.” (1 Bakor. 3:9) Ge re dutše re bona ge ba bangwe ba emela tumelo ya bona tirelong ya tšhemo gomme ba bontšha gore ba tšeela godimo dilo tša moya, re tutueletšega go ba rata le go ba hlompha kudu. Le gona, go hlankela “ka botee” bodireding go tšweletša moya wa botee ka phuthegong.—Bala Tsefanya 3:9.

10. Go kaonefatša ga rena tirelo ya rena ya tšhemo go ba le mafelelo afe go moya woo ba bangwe ba o bonagatšago ka phuthegong?

¹⁰ Maiteko a rena a go kaonefatša bodiredi bja rena le ona a kgoma ba bangwe gabotse. Ge re dutše re tshwenyega kutšwanyana ka batho bao re kopanago le bona, le gona ge re dutše re katanela go kaonefatša bokgoni bja rena bja go fihlelela dipelo tša batheetši ba rena, mafolofolo ao re bago le ona ka bodiredi a a oketšega. (Mat. 9:36, 37) Gantši mafolofolo a rena a fetela go bao re fetšago nako le bona. Ge Jesu a be a roma barutiwa ba gagwe go yo dira boboledi, o ba sepedišitše ka babedi ka babedi, e sego e le motho ka o tee ka o tee. (Luka 10:1) Se ga se sa ba thuša feela gore ba kgothatšane ba be ba thušane eupša se ile sa loutša phišego ya bona ka bodiredi. Na ga re thabele go šoma le bagoeledi ba fišegago ba Mmušo? Moya wa bona wa mafolofolo o a re kgothatša le go re matlafaletša go dira modiro wa boboledi.—Baroma 1:12.

ITIIŠE MALEBANA LE GO NGONGOREGA LE GO DIRWA GA BOBE

11. Baisiraele ba bangwe ba mehleng ya Moshe ba ile ba ba le moya ofe, gomme seo se ile sa ba kgoma bjang?

¹¹ Dibeke tše sego kae ka morago ga gore Isiraele e be setšhaba se sefsa, Baisiraele ba ile ba ba le moya wa go se kgotsofale le go ngongorega. Se se ile sa ba dira gore ba rabele go Jehofa le go baemedi ba gagwe. (Ek. 16:1, 2) Ke Baisiraele ba sego kae feela bao ba tšwilego Egipita bao ba ilego ba tsena Nageng ya Kholofetšo. Gaešita le Moshe ga se a dumelelwa go tsena nageng yeo ka baka la tsela yeo a ilego a arabela ka yona go moya o mobe wa phuthego ya Isiraele! (Doit. 32:48-52) Ke eng seo re ka se dirago lehono go phema gore re wele molabeng wa go ba le moya o mobe?

12. Re ka phema bjang go hlagolela moya wa go swayaswaya diphošo?

¹² Re swanetše go phema go ba le moya wa go ngongorega. Gaešita le ge re ka holwa ke go hlagolela boikokobetšo le go hlompha bolaodi, re swanetše go šetša mohuta wa batho bao re gweranago le bona. Go kotsi go kgetha boithabišo bjo bobe goba go fetša nako e ntši kudu le bašomigotee le rena goba bao re tsenago le bona sekolo bao ba sa rego selo ka melao ya motheo ya go loka. Ke gabohlale go lekanyetša nako yeo re e fetšago le batho bao ba swayaswayago diphošo goba bao ba godišago moya wa boitaolo.—Die. 13:20.

13. Tutuetšo e senyago ya go ngongorega e ka lebiša mekgweng efe e gobatšago ka phuthegong?

¹³ Tutuetšo e senyago ya go ngongorega e ka lebiša mekgweng e mengwe e gobatšago moyeng. Ka mohlala, go ngongorega go ka šitiša khutšo le botee tša phuthego. Go oketša moo, go ngongorega ka badumedigotee le rena go ka feleletša e sego feela ka go ba kweša bohloko eupša gape le ka gore seo e be go thomeletša le go roga motho yo mongwe, e lego dibe tše dikgolo. (Lef. 19:16; 1 Bakor. 5:11) Bangongoregi ba bangwe ba lekgolong la pele la nywaga ba be ba “nyatša bolaodi gomme ba bolela gampe ka bao ba nago le letago.” (Juda 8, 16) Ga go pelaelo gore tsela e bjalo ya go ngongorega ka  bao ba nago le boikarabelo ka phuthegong ga se ya ka ya thabiša Modimo.

14, 15. (a) Go dumelela ga rena bobe go ka kgoma bjang phuthego ka moka? (b) Re swanetše go dira eng ge e ba re lemoga gore motho yo mongwe o dira sebe ka sephiring?

¹⁴ Go thwe’ng ge e ba re tseba gore motho yo a itšego o dira sebe ka sephiring, mohlomongwe o diriša dinotagi gampe, o bogela diswantšho tše di kgothaletšago bootswa goba o phela bophelo bjo bo gobogilego? (Baef. 5:11, 12) Go iphoufaletša ga rena bobe bjo bogolo go ka šitiša moya wa Jehofa o mokgethwa go elela ka bolokologi gomme gwa bea khutšo ya phuthego ka moka kotsing. (Bagal. 5:19-23) Go swana le ge Bakriste ba mehleng ya pele ba Korinthe ba ile ba swanelwa ke go tloša bobe, le lehono tutuetšo le ge e le efe e senyago e swanetše go ntšhetšwa ka ntle ga phuthego e le gore phuthego e ka dula e phetše gabotse moyeng. O ka dira eng go tlaleletša tabeng ya gore phuthego e be le khutšo?

¹⁵ Go etša ge go boletšwe peleng, ke gabohlokwa go boloka diphiri ditabeng tše itšego, kudukudu ge batho ba re ntšhetša sa mafahleng a bona. Ruri ke phošo e bile go kweša bohloko go gaša diphiri tša motho yo mongwe! Lega go le bjalo, ge e ba motho a dirile sebe se segolo, bao ba tlangwago ke Mangwalo go swaragana le taba yeo—bagolo ba phuthego—ba swanetše go tsebišwa. (Bala Lefitiko 5:1.) Ka gona ge e ba re tseba gore ngwanabo rena goba kgaetšedi o wetše bobeng bjo bjalo, re swanetše go mo kgothaletša gore a ye go bagolo gomme a kgopele thušo. (Jak. 5:13-15) Eupša ge e ba a ka se dire seo ka morago ga nako e lekanego, gona re swanetše go botša bagolo sebe seo.

16. Go bega ga rena dibe tše dikgolo go thuša bjang go šireletša moya wa phuthego?

¹⁶ Phuthego ya Bokriste ke botšhabelo bja moya, gomme re swanetše go e šireletša ka gore re bege dibe tše dikgolo. Ge e ba bagolo ba thuša modiri wa bobe go bona phošo ya gagwe gomme a itshola ke moka a amogela kgalemelo le phošollo, gona ga a sa beile moya wa phuthego kotsing. Eupša go thwe’ng ge e ba motho yo a dirilego sebe se segolo a sa nyake go itshola gomme a sa amogele keletšo e lerato ya bagolo? Go rakwa ga gagwe ka phuthego go feleletša ka gore go ‘fedišwe,’ goba go tlošwe selo seo se senyago gare ga rena, gomme moya wa phuthego o a šireletšwa. (Bala 1 Bakorinthe 5:5.) Ee, go šireletša moya wa phuthego go nyaka gore yo mongwe le yo mongwe wa rena a gate mogato wa maleba, a dirišane le sehlopha sa bagolo, gomme a šireletše bophelo bjo bobotse bja badumedigotee le yena.

KGOTHALETŠA GORE GO BE LE “BOTEE BJA MOYA”

17, 18. Re tla thušwa ke eng gore re “boloke botee bja moya”?

¹⁷ Ka go “tšwela pele ba ikgafela thutong ya baapostola,” balatedi ba Jesu ba mehleng ya pele ba ile ba thuša gore go be le moya wa botee ka phuthegong. (Dit. 2:42) Ba ile ba tšeela godimo keletšo ya Mangwalo le tlhahlo yeo ba bego ba e hwetša go banna ba bagolo. Ka ge bagolo ba mehleng yeno ba dirišana le sehlopha sa mohlanka yo a botegago le wa temogo, bohle ka phuthegong ba a kgothatšwa le go thušwa gore ba dule e le batee. (1 Bakor. 1:10) Ge e ba re amogela tayo e theilwego Beibeleng go tšwa mokgatlong wa Jehofa gomme re latela tlhahlo ya bagolo, re hlatsela gore re “leka ka matla go boloka botee bja moya setlemong se se tlemaganyago sa khutšo.”—Baef. 4:3.

¹⁸ Ka gona, a re direng sohle seo re ka se kgonago go šireletša moya o mobotse ka phuthegong. Ge e ba re dira bjalo, re kgonthišetšwa gore ‘botho bjo bogolo bja Morena Jesu Kriste bo tla ba le moya wo re o bontšhago.’—Bafil. 4:23.

[Dipotšišo tša Thuto]

[Seswantšho go letlakala 19]

Na o tsenya letsogo gore go be le moya o mobotse ka gore o lokišetše dikarabo tše di agago?

[Seswantšho go letlakala 20]

Tsenya letsogo gore go be le moya o mobotse ka gore o tlwaelane le dikopelo tša rena