Ge mmoledi wa nako e tletšego e lego Charlotte White a fihla Louisville, Kentucky, U.S.A., a goga sutukheise yeo e nago le maotwana, o ile a bitša mahlo a batho.

E BE e le ngwaga wa 1908, gomme Kgaetšedi White o ile a tanya šedi ya batho bao ba dulago ditoropong ka sedirišwa seo ba bego ba thoma go se bona—Sutukheise ya go Sepetša Dipuku. O begile gore: “Batho ba ile ba thoma go bolela ka yona gomme e ile ya mpiletša mahlo a batho.”

Barutwana ba Beibele, go etša ge Dihlatse tša Jehofa di be di bitšwa bjalo ka nako yeo, ba ile ba bona go nyakega gore ba botše ba bangwe ditherešo tša bohlokwa tšeo ba ithutilego tšona go tšwa thutong e tseneletšego ya Mangwalo. Ba bantši ba ile ba hwetša tsebo ya Beibele ka thušo ya lelokelelo la dipuku tšeo di bego di bitšwa Millennial Dawn (ka morago di ile tša bitšwa Studies in the Scriptures). Bakriste bao ba bego ba rata e bile ba ka kgona, ba ile ba sepelela kgole le kgauswi—go phatša ditoropo, metsana gotee le metsemagaeng—ba nea babadi ba bangwe bao ba fagahlelago go hwetša dipuku tšeo ka tlwaelo di bego di bitšwa “Thušo e Tšwago go Barutwana ba Beibele.”

Ka 1908, Kgaetšedi White gotee le bagoeledi ba bangwe bao ba fišegago ba Mmušo ba be ba sepediša sete ya dibolumo tše tshelelago tšeo di tlemilwego ka lešela ka $1.65 (U.S.). Go e na le go sepediša dipuku tšeo tša Millennial Dawn ka yona nako yeo, ba be ba tšea diotara ke moka ba boe ka moragonyana—gantši ka letšatši la mogolo—go tliša diotara le go tšea tšhelete e nyenyane feela ya go lefelela ditshenyagalelo tša kgatišo. Moganetši yo mongwe o ile a belaela kamoo batho ba bego ba ntšha tšhelete e nyenyane ya moneelo ge ba be ba newa dipuku tše!

Malinda Keefer o gopola a tšea diotara tša dipuku tše makgolo a mabedi go ya go a mararo ka beke. Eupša kgahlego e kgolo yeo e bego e eba gona dipukung tše tša Millennial Dawn e ile ya baka bothatanyana. Bolumo ya botshelela e  nnoši, e be e na le matlakala a 740! Makasine wa The Watch Tower o ile wa dumela gore: “Dipuku tše masomehlano di be di imela dikhilograma tše 18,” e lego seo se bego se dira gore go sepetša diotara “go imele kudu,” kudukudu bakeng sa dikgaetšedi.

Go rarolla bothata bjoo bja go sepetša diotara tša dipuku tša Millennial Dawn, Ngwanabo rena James Cole o ile a hlama foreime ya go phuthwa yeo e bego e na le maotwana a mabedi gomme sutukheise e dula godimo ga yona ke moka e kurufelwa. Ka ge go be go se sa nyakega gore go rwalwe sutukheise ya go imela yeo e tletšego dipuku, mohlami ka boyena o boletše gore: “Ka tla ka khutšiša magetla a ka.” O ile a tsebatša sedirišwa se se sefsa kopanong ya Barutwana ba Beibele kua Cincinnati, Ohio ka 1908. Godimo ga dikonotswana tšeo di lego mahlakoreng ka bobedi a tšhipi ya go thekga sutukheise go be go kgwarilwe leina Dawn-Mobile, ka ge mošomo o mogolo wa yona e be e le go rwala dibolumo tša Millennial Dawn. Go be go nyakega tlwaetšo e nyenyane feela ke moka go sepetša sutukheise yeo e tletšego dipuku e be e eba mošomo o bonolo woo o bego o dirwa ka letsogo le tee feela. Bophagamo bja yona bo be bo ka fetofetošwa, gomme maotwana a yona a be a kgona go sepela le tseleng ya lekgwara. Ka morago ga gore motho a fetše letšatši a le bodireding, o be a ka phutha maotwana a yona a raba gomme a a thekge ka sutukheise ke moka a ye gae ka maoto goba ka senamelwa.

Dikgaetšedi tšeo di bego di le tirelong ya nako e tletšego di be di newa Sutukheise ye ntle le tefo. Ge e le gabotse, yona e be e bitša $2.50 (U.S.). Kgaetšedi Keefer, yo a lego mo seswantšhong, o be a na le bokgoni bja go diriša Sutukheise ye gabotse moo e lego gore o be a kgona go sepediša ka letsogo le tee sutukheise yeo e tletšego dipuku gomme a atha mokotla o mongwe o tletšego dipuku ka letsogong le lengwe. Ka ge a be a hwetša batho ba bantši bao ba thabelago toropong e nngwe ya meepo kua Pennsylvania, U.S.A., o be a dira maeto a mararo goba a mane a tshela leporogo gore a iše dipuku ka letšatši la go tliša diotara.

Mafelelong a nywaga ya bo-1980, monna yo mongwe yo a šomago go fofiša difofane o ile a hlama sedirišwa sa go rwala merwalo seo se dirišwago ka bontši maemafofaneng le mafelong ao go nago le leemaema. Eupša nywaga e ka bago e lekgolo e fetilego, ga go pelaelo gore Barutwana ba Beibele ba fišegago ba ile ba thabela go bogelwa ke batho ge ba dutše ba kgorometša Disutukheise tša bona tša go Sepetša Dipuku ba eya godimo le tlase ba phatlalatša dipeu tša therešo ya Beibele.

[Ntlhakgolo go letlakala 32]

Kgaetšedi Keefer o be a dira maeto a mararo goba a mane a tshela leporogo gore a iše dipuku ka letšatši la go tliša diotara

[Ntlhakgolo go letlakala 32]

E ile ya rarolla bothata bja go sepetša puku ya Millennial Dawn