Ekišang Mohlala wa Jesu Tabeng ya go Phakgama
Ekišang Mohlala wa Jesu Tabeng ya go Phakgama
“Dulang le phakgame gomme le rapele.”—MAT. 26:41.
O BE O TLA ARABA BJANG?
․․․․․
Dithapelo tša rena di ka bontšha bjang gore re phakgame?
․․․․․
Re ka bontšha ka ditsela dife gore re phakgame bodireding bja rena?
․․․․․
Ke ka baka la’ng go le bohlokwa gore re dule re phakgame ge re lekwa, gona re ka dira bjang seo?
1, 2. (a) Ke dipotšišo dife tšeo di ka rotogago mabapi le mohlala wa Jesu tabeng ya go phakgama? (b) Na mohlala o phethagetšego wa Jesu o hola batho ba nago le sebe? Bontšha.
MOHLOMONGWE o ka ipotšiša gore: ‘Na go a kgonega gore motho a ekiše mohlala wa Jesu tabeng ya go phakgama? Ge e le gabotse, Jesu yena o be a phethagetše! Go oketša moo, Jesu ka dinako tše dingwe o be a kgona go bona gabotse dilo tšeo di bego di tlo direga nakong e tlago—go akaretša le tšeo di bego di tla direga nywaga e dikete go tloga mehleng ya gagwe! Na go be go tloga go nyakega gore a phakgame?’ (Mat. 24:37-39; Baheb. 4:15) Anke re thomeng ka go hlahloba dipotšišo tšeo e le gore re bone bohlokwa bja go ahlaahla taba ye le kamoo go tlogago go akgofile gore re dire bjalo.
2 Na go a hola gore batho ba nago le sebe ba latele mohlala wa motho yo a phethagetšego? Ee, ka gobane go a kgonega gore motho a ithute go morutiši yo botse le go ekiša mohlala wa gagwe. Ka mohlala, nagana ka motho yo a thomago go ithuta papadi ya go betša mesebe. O thoma a sa kgone go betša mosebe gabotse gore o hlabe mo a go lebantšego, eupša o itlwaetša ka makga a mantši gomme o dula a iteka. E le gore a kaonefatše maitekong a gagwe, o lebelela ka kelohloko seo mohlahli wa gagwe a se dirago, yena yo e lego sekgwari sa go betša mesebe. Morutwana yoo o lebeledišiša kamoo morutiši wa gagwe a emago ka gona, kamoo a emišago matsogo a gagwe ka gona, le kamoo a dirišago menwana ya gagwe ge a nganga bora. Ganyenyane-ganyenyane, morutwana yoo o ithuta gore ke tekanyo e kae ya matla ao a ka a dirišago ge a nganga bora; o lemoga gore go foka ga moya go ka ba le karolo go fihleleleng ga gagwe pakane, gomme o dula a dira boiteko bja go e fihlelela. Ka go latela seo a bonago mohlahli wa gagwe a se dira, o feleletša a kgona go korola mesebe ya gagwe gore e hlabe kgauswi le pakane ya gagwe. Ka mo go swanago, rena re le Bakriste re dula re katanela go kaonefatša maphelo a rena ka go latela ditaelo tša Jesu le ka go ekiša mohlala wa gagwe o phethagetšego.
3. (a) Jesu o bontšhitše bjang gore go be go nyakega gore a be le seka sa go phakgama? (b) Re tla ahlaahla eng sehlogong se?
3 Lega go le bjalo, go thwe’ng ka taba ya go phakgama? Na ge e le gabotse go be go nyakega gore Jesu a be le seka se? Therešo ke gore go be go nyakega. Ka mohlala, bošegong bja gagwe bja mafelelo bja bophelo bja gagwe mo lefaseng, Jesu o ile a kgothaletša baapostola ba gagwe ba botegago gore: “Le dule le phakgame le nna.” O okeditše ka gore: “Dulang le phakgame gomme le rapele le sa kgaotše, gore le se tsene molekong.” (Mat. 26:38, 41) Le ge a ile a dula a phakgame dinakong ka moka, Jesu ka mo go kgethegilego o be a nyaka go phakgama diiring tšeo tše bohloko gomme a batamele Tatagwe wa legodimong kgauswi kamoo go bego go kgonega. O be a tseba gore balatedi ba gagwe ba swanetše go phafoga go swana le yena—e sego feela ka nako yeo eupša gaešita le nakong e tlago. Ka gona anke re boneng lebaka leo Jesu a nyakago gore re dule re phakgame. Ka morago ga moo, re tla ahlaahla ditsela tše tharo tšeo re ka ekišago go phakgama ga Jesu maphelong a rena a letšatši le letšatši.
LEBAKA LEO JESU A NYAKAGO GORE RE PHAKGAME
4. Go na le tswalano efe magareng ga seo re sa se tsebego ka bokamoso le go nyakega ga gore re dule re phakgame?
4 Ka boripana, Jesu o nyaka gore re dule re phakgame ka baka la seo re sa se tsebego gotee le seo re se tsebago. Ge Jesu e be e sa le motho mo lefaseng, na o be a tseba dilo ka moka tšeo di bego di tlo direga nakong e tlago? Aowa, ka gobane o ile a amogela ka boikokobetšo gore: “Ge e le mabapi le letšatši leo le iri, ga go na yo a tsebago, gaešita le barongwa ba magodimo le ge e le Morwa ga ba tsebe, eupša ke Tate feela yo a tsebago.” (Mat. 24:36) Ka nako yeo, Jesu, e lego “Morwa,” o be a sa tsebe ka go lebanya nako ya go tla ga bofelo bja lefase le le kgopo. Go thwe’ng ka rena lehono? Na tsebo ya rena ka bokamoso e lekanyeditšwe? Ruri e lekanyeditšwe! Ga re tsebe gore Jehofa o tla romela neng Morwa wa gagwe go tlo fediša tshepedišo ye e kgopo ya dilo. Ge nkabe re tseba, na ruri go be go tla nyakega gore re dule re phakgame? Go etša ge Jesu a hlalositše, bofelo bo tla tla ka tšhoganetšo, go sa letelwa; ka gona re swanetše go dula re phakgame.—Bala Mateo 24:43.
5, 6. (a) Go tseba ga rena bokamoso le merero ya Modimo go kgoma bjang go nyakega ga gore re dule re phakgame? (b) Tsebo yeo re nago le yona ka Sathane e re thuša bjang gore re ikemišetše go dula re phakgame?
5 Ka lehlakoreng le lengwe, Jesu o be a tseba dilo tše dintši tše di kgahlišago ka bokamoso—ditherešo tšeo bontši bja batho bao ba bego ba phela le yena ba bego ba sa di tsebe le ganyenyane. Tsebo ya rena ga e batamele yeo Jesu a bego a na le yona, eupša ka baka la gagwe, re tseba mo gontši ka Mmušo wa Modimo le seo o tlago go se fihlelela kgauswinyane. Ge re dutše re lebelela go re dikologa, e ka ba e le sekolong, mošomong goba tšhemong yeo re dirago bodiredi bja rena go yona, na ga re lemoge gore batho ba bantši ba leswiswing le lesoleso ka ditaba tše tšeo di kgahlišago? Ka gona, le ke lebaka le lengwe gape leo le re bontšhago gore re swanetše go phakgama. Ka go swana le Jesu, re swanetše go dula re phafogile ka mehla, re phakgametše dibaka tša gore re botše ba bangwe seo re se tsebago ka Mmušo wa Modimo. Se sengwe le se sengwe sa dibaka tšeo ke sa bohlokwa, gomme ga re nyake go senya le setee sa tšona. Maphelo a batho a kotsing!—1 Tim. 4:16.
6 Jesu o be a tseba selo se sengwe gape seo se ilego sa mo dira gore a dule a phakgame. O be a tseba gore Sathane o be a ikemišeditše go mo leka, go mo tlaiša le go mo dira gore a se botege. Lenaba leo le sehlogo le be le dula le nyaka “nako e nngwe e loketšego” gore le leke Jesu. (Luka 4:13) Jesu ga se a ka a kgaotša go dula a phakgame. O be a nyaka go dula a itokišeditše teko le ge e le efe, e ka ba e le kganetšo goba tlaišo. Na go ka bolelwa se se swanago ka rena? Re a tseba gore Sathane o sa dutše a “swana le tau e rorago, a nyaka yo a kago go mo metša.” Ke ka baka leo Lentšu la Modimo le kgothaletšago Bakriste ka moka gore: “Dulang le hlaphogetšwe, le phakgame.” (1 Pet. 5:8) Eupša re ka dira seo bjang?
KAMOO RE KA PHAKGAMELAGO THAPELO
7, 8. Jesu o neile keletšo efe mabapi le thapelo, gomme o re beetše mohlala ofe?
7 Beibele e bontšha gabotse tswalano yeo e lego gona magareng ga go phafoga moyeng, goba go phakgama, gotee le thapelo. (Bakol. 4:2; 1 Pet. 4:7) Nakwana ka morago ga gore a kgopele balatedi ba gagwe gore ba dule ba phakgame le yena, Jesu o itše: “Dulang le phakgame gomme le rapele le sa kgaotše, gore le se tsene molekong.” (Mat. 26:41) Na ge a be a ba botša keletšo yeo o be a e ra gore ba e latele ka yona nako yeo feela yeo ba bego ba lebeletšane le boemo bjo šoro? Aowa, keletšo ya gagwe ke molao wa motheo woo re swanetšego go phela ka wona letšatši le letšatši.
8 Jesu o beile mohlala o mobotse kudu tabeng ya go rapela. Mohlomongwe o a gopola gore o ile a fetša bošego ka moka a rapela Tatagwe. Anke re leke go bona boemo bjoo ka leihlo la kgopolo. (Bala Luka 6:12, 13.) Ke sehla sa seruthwane, mohlomongwe kgauswi le motse wa go reela dihlapi wa Kaperenaume, e lego motse woo Jesu a bego a dula go wona tikologong yeo. Ge bošego bo batamela, Jesu o ya go e nngwe ya dithaba tšeo di okametšego Lewatle la Galilea. Ge a dutše a lebeletše naga nakong ya ge leswiswi le swara, mohlomongwe o bona ge mabone a makhura a dutše a tuka motseng wa Kaperenaume le metsaneng e mengwe ya kgauswi. Lega go le bjalo, ge Jesu a bolela le Jehofa, o naganišiša feela ka seo a rapelago ka sona. Go feta metsotso—ke moka go feta le diiri. Ga a hlokomele ge mabone kua tlasenyana a dutše a tima ka go latelana goba ge ngwedi o feta sebakabakeng goba ge diphoofolo tša bošego di tsoma moo sethokgwaneng. Go molaleng gore thapelo ya gagwe e mabapi le phetho e kgolo yeo a bego a swanetše go e dira—phetho ya go kgetha baapostola ba gagwe ba 12. Re ka kgona go nagana Jesu a tšhollela Tatagwe pelo ya gagwe a mmotša tšohle tšeo a di naganago le tšeo di mo tshwenyago ka morutiwa yo mongwe le yo mongwe ge a dutše a mo kgopela tlhahlo le bohlale.
9. Re ithuta’ng mohlaleng wa Jesu wa go rapela ga gagwe bošego ka moka?
9 Re ka ithuta’ng mohlaleng wa Jesu? Na re ithuta gore re swanetše go fetša diiri re rapela? Aowa, ka gobane ka botho o ile a lemoga se se latelago ka balatedi ba gagwe: “Go ba gona, moya o mafolofolo eupša nama e a fokola.” (Mat. 26:41) Eupša re ka ekiša Jesu. Ka mohlala, na re bolela le Tatago rena wa legodimong pele ga ge re ka dira phetho le ge e le efe yeo e re kgomago, e kgomago malapa a rena goba badumedigotee le rena moyeng? Na dithapelo tša rena di akaretša dilo tšeo re tshwenyegilego ka tšona ka bana babo rena le dikgaetšedi tumelong? Na re rapela go tšwa pelong go ena le go boaboetša dipolelwana tše di tlwaelegilego? Le gona, lemoga gore Jesu o be a tšeela godimo taba ya go boledišana le Tatagwe a le noši. Lefaseng la lehono la leemaema le la semphete-ke-go-fete, go bonolo kudu gore re swarege kudu ka dilo tše dingwe tša bophelo gomme re lebale dilo tše bohlokwa kudu. Ge e ba re ipha nako e lekanego ya go rapela thapelo e tseneletšego re le noši, re tla dula re phafogile moyeng ka mehla. (Mat. 6:6, 7) Re tla batamela kgauswi kudu le Jehofa, ra ikemišetša go matlafatša tswalano ya rena le yena gomme ra phema go dira selo le ge e le sefe seo se ka e fokodišago.—Ps. 25:14.
KAMOO RE KA PHAKGAMAGO MODIRONG WA BOBOLEDI
10. Ke mohlala ofe woo o re bontšhago kamoo Jesu a bego a phakgametše dibaka tša go nea bohlatse?
10 Jesu o be a phakgametše modiro woo Jehofa a bego a mo abetše wona. Mohlomongwe go ka ba go na le mešomo e mengwe yeo e fago motho sebaka sa gore monagano wa gagwe o lelere gomme go se be le ditlamorago tše kotsi. Lega go le bjalo, mešomo e mentši e nyaka gore motho a tsepamiše kgopolo e bile a phafoge, gomme ke kamoo bodiredi bja Bokriste bo lego ka gona. Jesu o be a dula a phafogile modirong wa gagwe, a phakgametše dibaka tša gore a botše batho ba bangwe ditaba tše dibotse. Ka mohlala, nakong ya ge yena le barutiwa ba gagwe ba fihla motseng wa Sikara ka morago ga go sepela lebaka le letelele ka maoto mesong, barutiwa ba gagwe ba ile ba ya go reka dijo. Jesu o ile a dula kgauswi le sediba sa motse woo gore a khutše, eupša o ile a dula a phafogile, gomme o ile a bona sebaka sa gore a nee bohlatse. Mosadi yo mongwe wa Mosamaria o ile a batamela gore a ge meetse. Jesu nkabe a ile a kgetha go robala go se nene. Nkabe a ile a nagana ka mabaka a gore a pheme go boledišana le motho le ge e le ofe. Lega go le bjalo, o ile a thoma go bolela, a boledišana le mosadi yoo, gomme a nea bohlatse bjo matla bjo bo ilego bja kgoma maphelo a ba bantši motseng woo. (Joh. 4:4-26, 39-42) Na re ka latela kgauswi kudu mohlala wa Jesu wa go phakgama, mohlomongwe ka go katanela go dula re phafogetše dibaka tša go bolela ditaba tše dibotse le batho bao re kopanago le bona medirong ya rena ya letšatši le letšatši?
11, 12. (a) Jesu o ile a arabela bjang go bao ba bego ba nyaka go mo šitiša modirong wa gagwe? (b) Jesu o ile a bontšha tekatekano efe modirong wa gagwe?
11 Ka dinako tše dingwe, batho bao ba bego ba se na maikemišetšo a mabe ba ile ba nyaka go šitiša Jesu modirong wa gagwe. Kua Kaperenaume, mašaba a ile a kgongwa kudu ke mehlolo ya Jesu ya go fodiša batho moo a ilego a nyaka gore Jesu a dule le ona. Seo se be se kwešišega. Lega go le bjalo, morero wa Jesu e be e le go bolela le “dinku tše di timetšego tša ntlo ya Isiraele,” e sego feela tšeo di bego di le motseng o tee. (Mat. 15:24) Ka gona o ile botša batho bao gore: “Le metseng e mengwe ke swanetše go bolela ditaba tše dibotse tša Mmušo wa Modimo, gobane ke sona se ke se rometšwego.” (Luka 4:40-44) Go molaleng gore bophelo bja Jesu bo be bo tsepamišeditšwe bodireding. Ga se a dumelela gore go be le seo se mo šitišago.
12 Na Jesu o be a šeditše modiro wa gagwe kudu moo a ilego a ba mofišegelathoko goba moitlami? Na o be a nweletše kudu bodireding bja gagwe moo a bilego a be a sa tshwenyege ka dinyakwa tša malapa? Aowa, Jesu o beile mohlala o mobotse tabeng ya go bontšha tekatekano. O be a thabela bophelo, a thabela go kopana le bagwera ba gagwe. O be a tšeela godimo malapa, a tshwenyegile kudu ka dinyakwa tša ona le mathata a ona, gomme o ile a bontšha ka bolokologi gore o rata bana.—Bala Mareka 10:13-16.
13. Re ka ekiša bjang mohlala wa Jesu wa go phakgama le wa go ba le tekatekano ge go tliwa tabeng ya modiro wa go bolela ka Mmušo?
13 Ge re dutše re ekiša mohlala wa Jesu wa go phakgama, re ka katanela bjang go ba le tekatekano e swanago? Ga re dumelele lefase le le re aroša go direng modiro wa rena. Gaešita le bagwera le ba leloko bao ba se nago maikemišetšo a mabe ba ka re kgothaletša go dira dilo ka go nanya bodireding bja rena goba ba re kgothaletša go phegelela seo ba se bonago e le bophelo bjo bo tlwaelegilego. Lega go le bjalo, ge e ba re ekiša Jesu, re lebelela bodiredi bja rena bo le bjalo ka ge eka ke dijo. (Joh. 4:34) Modiro wa rena o re aga moyeng e bile o a re thabiša. Lega go le bjalo, ga re nyake go dira dilo ka tsela e feteletšego, re bonagatša moya wa go itira baloki goba wa boitlami. Ka go swana le Jesu, re nyaka go ba bahlanka ba thabilego le bao ba nago le tekatekano ba “Modimo yo a thabilego.”—1 Tim. 1:11.
KAMOO RE KA PHAKGAMAGO DINAKONG TŠA DITEKO
14. Re swanetše go phema mokgwa ofe nakong ya ge re lekwa, gona ka baka la’ng?
14 Go etša ge re šetše re bone, tše dingwe tša dikgothatšo tše di akgofilego tša Jesu tša gore batho ba dule ba phakgame o di boletše nakong ya ge a be a lekwa o šoro. (Bala Mareka 14:37.) Ge re lebeletšana le mathata, go tloga go nyakega gore re latele mohlala wa gagwe go feta le ge e le neng pele. Ba bantši ge ba lekwa, gantši ba lebala therešo e bohlokwa kudu, yeo e lego bohlokwa moo puku ya Diema e e bolelago gabedi gore: “Go na le tsela yeo motho a e bonago e lokile, eupša e feleletša ka ditsela tša lehu.” (Die. 14:12; 16:25) Ge e ba re ithekga ka dikgopolo tša rena, kudukudu ge re swaragane le mathata a magolo, go na le kgonagalo e kgolo ya gore re ikgobatše re be re gobatše le bao re ba ratago.
15. Ke teko efe yeo hlogo ya lapa e ka lebeletšanago le yona nakong e thata ya maemo a boiphedišo?
15 Ka mohlala, hlogo ya lapa e ka ba ka tlase ga kgateletšo e kgolo ya gore e fepe ‘bao e lego ba gabo yona’ ka dilo tša nama. (1 Tim. 5:8) E ka lekega go amogela mošomo woo o dirago gore e dule e foša diboka tša Bokriste, go etelela pele borapeding bja lapa goba go tšea karolo bodireding. Ge e ba e ithekga feela ka kgopolo ya motho, go ka bonagala tsela yeo e ka lokafatšwa, gaešita le go ba e lokilego. Lega go le bjalo, seo se ka feleletša ka gore motho a babje moyeng goba a hwe moyeng. Ruri go kaone gore motho a latele keletšo ya Diema 3:5, 6! Solomone o itše: “Bota Jehofa ka pelo ya gago ka moka gomme o se ke wa ithekga ka tlhaologanyo ya gago. Mo ele hloko ditseleng tša gago ka moka gomme yena o tla letliša ditsela tša gago.”
16. (a) Jesu o beile mohlala ofe tabeng ya go bota Jehofa go ena le go bota bohlale bja gagwe? (b) Dihlogo tše dintši tša malapa di ekiša bjang mohlala wa Jesu wa go bota Jehofa dinakong tša mathata?
16 Ge Jesu a be a lekwa, o ile a gana a tiišitše gore a se ithekge ka tlhaologanyo ya gagwe. Anke o nagane ka seo! Motho yo bohlalehlale yo a kilego a phela mo lefaseng o ile a kgetha go se ithekge ka bohlale bja gagwe ge a nyaka ditharollo mathateng a gagwe. Ka mohlala, ge Sathane a be a mo leka, Jesu o ile a araba leboelela ka go bolela mantšu a rego: “Go ngwadilwe gwa thwe.” (Mat. 4:4, 7, 10) O ile a ithekga ka bohlale bja Tatagwe gore a fenye diteko, a bontšha gore o na le boikokobetšo bjoo Sathane a bo nyatšago e bile bo mo hlaelelago o šoro. Na re dira se se swanago? Hlogo ya lapa yeo e ekišago tsela ya Jesu ya go phakgama e dumelela Lentšu la Modimo le e hlahla, kudukudu dinakong tša mathata. Go dikologa lefase, dihlogo tše dintši tša malapa di dira sona seo. Di phegelela ka matla go etiša Mmušo wa Modimo le borapedi bjo bo sekilego pele maphelong a tšona, go akaretša le nakong ya ge go na le mathata a ditšhelete. Ka go re’alo, di kgona go hlokomela malapa a tšona gabotse kudu. Jehofa o arabela ka go šegofatša maiteko a tšona a go hlokomela malapa a tšona ka dilo tša nama, go etša feela ka ge Lentšu la gagwe le holofetša.—Mat. 6:33.
17. Ke’ng seo se go šušumeletšago gore o ekiše mohlala wa Jesu wa go phakgama?
17 Ga go pelaelo gore Jesu o beile mohlala o mokaonekaone tabeng ya go phakgama. Mohlala wa gagwe o a šoma, o a hola e bile o phološa maphelo. Gopola gore Sathane o ikemišeditše go go dira gore o otsele moyeng, e lego boemo bja go fokola tumelong, bja go ba yo a itholago kgwara borapeding le bja go se botege. (1 Bathes. 5:6) O se mo dumelele gore a atlege! Dula o phakgame go etša ge Jesu a dirile—phakgama dithapelong tša gago, bodireding bja gago le ge o lebeletšana le diteko. Ka go latela tsela yeo, o tla thabela bophelo bjo bo humilego, bja lethabo le bjo bo kgotsofatšago gaešita le mo nakong ye ya mafelelo ya tshepedišo ye e felelago ya dilo. Go phela bophelo bja go ba yo a phakgamego go tla go thuša le gore o kgonthišege gore ge Mong wa gago a etla go tlo fediša tshepedišo ye ya dilo, a go hwetše o phafogile e bile o le mafolofolo, o dira thato ya Tatagwe. Ruri Jehofa o tla thabela go go putsa ka baka la ge o ile wa phela ka potego!—Kut. 16:15.
[Dipotšišo tša Thuto]
[Seswantšho go letlakala 6]
Jesu o ile a boledišana le mosadi ka ditaba tše dibotse sedibeng. Wena o bula dibaka dife gore o boledišane le ba bangwe ka ditaba tše dibotse letšatši le letšatši?
[Seswantšho go letlakala 7]
Go hlokomela ga gago bomoya bja lapa la gago go bontšha gore o phakgame
